Պատերազմ Ուկրաինայում (լայվ բլոգ, թարմացվող)

Ուկրաինայի նախագահ Վլադիմիր Զելենսկին նախօրեին հատուկ ուղերձով դիմել է Դանիայի ժողովրդին: Նա ասել է, որ Դանիան 77 տարի առաջ կարողացել է վտարել նացիստներին:

Նրա խոսքով՝ ամեն տարի եվրոպացիները մայիսյան այս օրերին տոնում են հրեշավոր չարիքի՝ նացիզմի դեմ հաղթանակը:

«Բայց միայն հիշել բավական չէ, անհրաժեշտ է կանխել այն, ինչ նացիստները ժամանակին արել են Եվրոպայում: Հիմա ուկրաինացի կանայք և տղամարդիկ՝ մեր բարեկամ և գործընկեր երկրների աջակցությամբ, ինչպես հակահիտլերյան կոալիցիայի օրերին, պայքարում են չար ուժերի դեմ և ետ են պահում նրանց, ովքեր մոռացել են, թե ինչն է մարդկանց ուրախություն բերել 1945 թվականին: Եթե Ռուսաստանում բոլորը դա հիշեին, այս պատերազմը պարզապես չէր սկսվի», - հայտարարել է Զելենսկին:

Ռուսաստանի Դաշնության պաշտպանության նախարարության խոսնակ, գեներալ-մայոր Իգոր Կոնաշենկովը հայտնել է հրետանու հարվածներով ուկրաինացի ավելի քան 600 զինծառայողների ոչնչացնելու մասին:

«Հրետանու միավորները հարվածներ են հասցրել 32 թիրախներին, 5 պահեստներին, մարդուժի և տեխնիկայի կուտակման վայրերին, 403 հենակետերին և ուկրաինական հրետանու 51 դիրքերին, ոչնչացվել է ավելի քան 600 «նացիոնալիստ», 61 միավոր զենք և տեխնիկա»,- ասել է գեներալ-մայոր Կոնաշենկովը:

Նրա փոխանցմամբ, ռուսական ուժերը հրթիռակոծել են Կիրովոգրադի շրջանում Կանատովո օդակայանը և Նիկոլաևում վառելիքի խոշոր պահեստ: Ուկրաինայի բանակը շարունակում է դիմադրել:

Բելառուսի նախագահ Ալեքսանդր Լուկաշենկոյի փոխանցմամբ, Ուկրաինան հետաքրքրված չէ Ռուսաստանի հետ բանակցություններով: Այդ մասին Լուկաշենկոն ասել է Associated Press ամերիկյան լրատվական գործակալությանը տված հարցազրույցում:

«Ես գիտեմ Ռուսաստանի դիրքորոշումը, գիտեմ, թե ինչ է առաջարկում Ռուսաստանը: Բայց ինչու Ուկրաինան, որի տարածքում փաստացի պատերազմ է ընթանում, ռազմական գործողություններ են, մարդիկ են զոհվում, հետաքրքրված չէ այդ բանակցություններով, դա էլ հարց է, և այդ հարցի պատասխանը կարելի է գտնել Վաշինգտոնում», - ասել է Լուկաշենկոն:

Նա ենթադրում է, որ Ուկրաինայի ղեկավարությունը ցանկանում է հարցը լուծել դիվանագիտական եղանակով, սակայն չի կարող դա անել, քանի որ նախագահ Վլադիմիր Զելենսկին գործնականում այսօր չի կառավարում երկիրը:

«Դուք եք {Արևումտքը} այնտեղ իշխում: Հերիք է Ջո Բայդենն ասի՝ «բա՛վ է, տղերք, կռվեցիք, իրար մռութ ջարդեցիք, հիմա ավարտե՛ք, այս պատերազմը ոչ մեկին պետք չէ, ոչ մեկին ձեռնտու չէ», և մեկ շաբաթում պատերազմը կավարտվի», - ասել է Բելառուսի նախագահը:

Ուկրաինայի նախագահ Վլադիմիր Զելենսկին նախաձեռնում է համաշխարհային դրամահավաք: Նվիրատվությունները կուղղվեն Ռուսաստանի ագրեսիան դիմագրավելու և երկիրը պատերազմից հետո վերակառուցելու խնդիրներին:

Դրամահավաքի մասին Զելենսկին հայտնել է Twitter-ում այսօր տեղադրած անգլերեն տեսաուղերձով:

Վլադիմիր Զելենսկու փոխանցմամբ, այս նախաձեռնությունն ամբողջ աշխարհի շարքային մարդկանց թույլ կտա միանալ Ռուսաստանի բանակի հարձակման դեմ Ուկրաինան պաշտպանելու առաքելությանը:

Դրամահավաքի կայքում նշվում է, որ նվիրատվությունները կուղղվեն երեք հիմնական նպատակների՝ պաշտպանությանը և ականազերծմանը, առողջապահությանը և երկրի վերակառուցմանը:

Ֆրանսիայում կալանք է դրվել ռուս օլիգարխ, «Ալֆա-Բանկի» հիմնադիր Միխայիլ Ֆրիդմանին պատկանող շքեղ առանձնատան վրա:

Copab անվամբ վիլլան գտնվում է Սեն-Տրոպեում և ունի 580 քառակուսի մետր տարածք: Ըստ կադաստրի փաստաթղթերի, առանձնատունը պատկանում է SNC COPAB ֆրանսիական մասնավոր ընկերությանը, որի շահառուներն են ռուս օլիգարխի դուստրեր Լարիսա և Եկատերինա Ֆրիդմանը: Գույքի ևս 1 տոկոսն էլ պատկանում է Ֆրիդմանի նախկին կնոջը՝ Օլգա Այզիմանին:

Copab վիլլայում կա 10 ննջասենյակ, տարածքում կա լողավազան, շոգեբաղնիք և առանձին հարթակ ուղղաթիռի համար:

Այս վիլլան համացանցում ունի իր կայքը և վարձով է տրվում ամսական 180-ից 440 հազար եվրո գումարով:

Միխայիլ Ֆրիդմանը դարձել է Ուկրաինայի դեմ Ռուսաստանի նախաձեռնած պատերազմի կապակցությամբ Եվրոպական միության պատժամիջոցների ցուցակում ընդգրկված ռուսաստանցի առաջին օլիգարխներից մեկը: Նրան պատժամիջոցի ենթարկելու հիմնավորման փաստաթղթում ասվում է, որ նա սերտ կապեր ունի նախագահի աշխատակազմի հետ և նպաստել է 2014 թվականին Ղրիմի բռնազավթմանը:

Ֆրիդմանը Bloomberg գործակալությանը տված հարցազրույցում «անարդար» է անվանել սանկցիայի որոշումը:

Ֆրանսիայի նախագահ Էմանյուել Մակրոնը երեկ տեսակապով մասնակցել է Վարշավայում անցկացվող Ուկրաինայի դոնոր երկրների համաժողովին:

Մակրոնն ասել է, որ Ֆրանսիան Ուկրաինային տրամադրվող օգնությունը 2022 թվականին 1 միլիարդ 700 միլիոն եվրոյից կհասցնի 2 միլիարդ եվրոյի:

Ֆրանսիայի նախագահի փոխանցմամբ, գումարն ավելացվում է, քանի որ մեծացել են թե՛ բնակչությանը տրվող մարդասիրական օգնության և թե՛ ավերված ենթակառուցվածքների վերականգնման ծավալները:

Ուկրաինայի դոնոր երկրների համաժողովը հովանավորում են Լեհաստանը և Շվեդիան: Համաժողովի ընթացքում արդեն հավաքվել է 6,5 միլիարդ դոլար:

Եվրոպական հանձնաժողովը 200 միլիոն եվրո է տրամադրել: Միլիոնավոր եվրոներ են խոստացել Չեխիան, Ֆինլանդիան և մի շարք այլ երկրներ:

Կրեմլը հայտարարել է, թե տեղյակ է, որ արևմտյան երկրները հետախուզական տվյալներ են տրամադրում Ուկրաինային:

«Մեր զինվորականները տեղյակ են, որ Միացյալ Նահանգները, Մեծ Բրիտանիան և ընդհանրապես ամբողջ ՆԱՏՕ-ն հետախուզական և կարևոր այլ տեղեկատվություն են փոխանցում Ուկրաինային», - ասել է Պեսկովը:

Նա նշել է, թե չնայած այդ տեղեկատվական և նյութական օգնությանը, Ռուսաստանի բանակը միևնույն է կլուծի հանձնարարված խնդիրները:

«Զենքը, որը ՆԱՏՕ-ն փոխանցում է Ուկրաինային, այդ բոլոր գործողությունները, այսպես ասենք՝ թույլ չեն տալիս արագ ավարտել օպերացիան, բայց միևնույն ժամանակ դրանք չեն խարխլել նպատակներին հասնելու կարողությունը», - ասել է Պեսկովը:

Reuters լրատվական գործակալությունը լայնածավալ հետազոտություն է անցկացրել և հայտարարել է, որ Կիևի շրջանում գտնվող Բուչա ավանում մարդկանց սպանդի հետ առնչություն ունեն գրավման պահին այնտեղ գտնվող ռուսական ուժերը:

Ըստ հետազոտության, Կիևի շրջանի այդ հատվածում տեղակայված են եղել «Ռոսգվարդիա» կառույցի «Վիտյազ» ստորաբաժանումը, Պսկովից ժամանած 76-րդ դեսանտային դիվիզիան և չեչենական զորամիավորումները:

Գերմանիայի կանցլեր Օլաֆ Շոլցը և Միացյալ Նահանգների նախագահ Ջո Բայդենը հեռախոսով քննարկել են Ուկրաինայի խնդիրը: Այդ մասին հայտնել է Գերմանիայի կառավարության խոսնակ Շտեֆեն Հեբեշրայտը:

«Կանցլերը և նախագահն ընդգծել են, որ չեն ճանաչի որևէ քայլ, որը կհակասի Ուկրաինայի տարածքային ամբողջականությանը և ինքնիշխանությանը: Նմանօրինակ քայլերն իրավակարգ չեն համարվի», - ասել է Հեբեշրայտը:

Նրա փոխանցմամբ՝ Շոլցը և Բայդենը միակարծիք են, որ հարկ է շարունակել Ուկրաինայի պաշտպանությանն ուղղված էական և մշտական օգնության տրամադրումը:

«Երկու լիդերները համոզված են, որ Ռուսաստանը պարտավոր է դադարեցնել պատերազմը, դուրս հանել զորքն Ուկրաինայից և այդպես ապահովել այդ երկրի տարածքային ամբողջականությունն ու ինքնիշխանությունը», - նշել է խոսնակը:

Ֆինլանդիան պատրաստ է Ռուսաստանի կողմից բնական գազի մատակարարման հնարավոր դադարեցմանը։ Այս մասին Reuters լրատվական գործակալությանն ասել է Ֆինլանդիայի նախարարների կաբինետի անդամներից մեկը։