Պատերազմ Ուկրաինայում (լայվ բլոգ, թարմացվող)

Պրահայի քաղաքային խորհուրդն ընդունել է խորհրդային մարշալ Իվան Կոնևի պատվավոր քաղաքացիությունը չեղարկելու որոշում:

Այն ուժի մեջ կմտնի Պրահայի քաղաքային խորհրդարանի հավանությանն արժանանալուց հետո: Ենթադրվում է, որ մայրաքաղաքի օրենսդիր մարմինն առաջիկայում կվավերացնի որոշումը:

Մարշալ Իվան Կոնևը Պրահայի պատվավոր քաղաքացի է հռչակվել 1945 թվականի հունիսին: Նրա հրամանատարությամբ 1945 թվականի մայիսի 9-ին Կարմիր բանակի ստորաբաժանումները մտել են Պրահա:

Կոնևին այդ կարգավիճակից զրկելու նախաձեռնությամբ հանդես է եկել Պրահայի քաղաքապետ Զդենեկ Հրժիբը: Չեխիայի քաղաքական գործիչների գերիշխող մեծամասնությունը խստորեն դատապարտում է Ռուսաստանի հարձակումն Ուկրաինայի վրա:

Գերմանիայի կանցլեր Օլաֆ Շոլցը հայտարարել է, թե ներկայիս իրավիճակում իր երկիրը պետք է ռազմական օգնություն տրամադրի Ուկրաինային: Այդ մասին կանցլերն ասել է Գերմանիայի արհեստակցական միությունների համաժողովում:

«[Նախագահ Վլադիմիր] Պուտինը մեզ այլ ելք չի թողնում, քան զենք տալ Ուկրաինային», - ասել է կանցլերը և հավաստիացրել, որ Գերմանիան կշարունակի աջակցել Ռուսաստանի հարձակման ենթարկված Ուկրաինային:

Գերմանիայի կառավարության ղեկավարը բազմիցս նշել է, որ ՆԱՏՕ-ն որևէ պարագայում չպետք է ուղիղ եղանակով ներքաշվի այս պատերազմի մեջ և ամեն բան կանի այդ վտանգը կանխելու համար:

Եվրոպական միության հանձնակատար Իլվա Յոհանսոնը և միության այլ պաշտոնյաներ մայիսի 9-ին Ուկրաինայի հետ համերաշխություն են հայտնել՝ Բելգիայում Եվրամիության կենտրոնակայանի մոտ երկինք բաց թողնելով սպիտակ աղավնիներ: Արարողությանը մասնակցել են նաև մի խումբ ուկրաինացի դիվանագետներ:

Այսօր Եվրոպայի օրվա առթիվ հրապարակած ուղերձում Ուկրաինայի հարցին է անդրադարձել նաև Եվրոպական հանձնաժողովի նախագահ Ուրսուլա ֆոն դեր Լայենը:

Ելույթ ունենալով Ստրասբուրգում տեղակայված Եվրախորհրդարանում, նա ասել է, թե խաղաղության և համերաշխության տեսարանը «շատ ավելի հզոր է, քան ինչ-որ զինվորական զորահանդես, որը հիմա տեղի է ունենում Մոսկվայի փողոցներում»:

Ուրսուլա ֆոն դեր Լայենի ուղերձը համընկել է այդ պահին Ռուսաստանում Հաղթանակի օրվա կապակցությամբ անցկացվող զորահանդեսի հետ:

Մեծ Բրիտանիայի վարչապետ Բորիս Ջոնսոնն ասել է, թե կարևոր է հարգել նացիստական Գերմանիայի դեմ պատերազմում զոհված խորհրդային մարդկանց հիշատակը:

«Ռուսները ճիշտ են անում, որ հպարտանում են նացիզմին պարտության ենթարկելու գործում իրենց հերոսական դերով», - նշել է Ջոնսոնը Evening Standard օրաթերթին տված հարցազրույցում:

Խոսելով Ուկրաինայի պատերազմի մասին, Ջոնսոնն ասել է, թե Ռուսաստանը հայտնվել է մի այնպիսի իրավիճակում, որից հնարավոր չէ հաղթող դուրս գալ:

«Պուտինը սոսկ հանուն սնափառության է ներքաշվել այս անիմաստ պատերազմի մեջ, որում անհնարին է հաղթել, և նվաստացումից խուսափելու համար մահվան է դատապարտում երիտասարդ ռուսներին և ուկրաինացիներին», - հայտարարլ է Բրիտանիայի վարչապետը:

Ֆրանսիայի նախագահ Էմանյուել Մակրոնը հայտարարել է, որ Ուկրաինայի անդամակցումը Եվրամիությանը կարող է երկար տևել:

«Մենք բոլորս շատ լավ գիտակցում ենք, որ անդամակցության գործընթացը կարող է տևել տարիներ և նույնիսկ տասնամյակներ: Դա է իրականությունը, եթե, իհարկե, մենք չմեղմենք թեկնածուների նկատմամբ պահանջները կամ չվերանայենք մեր մոտեցումը Եվրոպայի միասնության հանդեպ», - ասել է Մակրոնը:

«Բայց նույնիսկ առանց Եվրամիության անդամ ի պաշտոնե համարվելու հանգամանքի Ուկրաինան եվրոպական ընտանիքի անդամ է, որովհետև այսօր խիզախորեն պայքարում է Եվրոպայի համար», - շեշտել է Ֆրանսիայի նախագահը:

Եվրոպական խորհրդի նախագահ Շառլ Միշելը երեկ Օդեսայում հրթիռակոծության կապակցությամբ ստիպված ընդհատել է հանդիպումներն ու տեղափոխվել է ռմբապաստարան:

Միշելն Ուկրաինայում վարչապետ Դենիս Շմիգալի հետ քննարկել է Կիևին տնտեսական, մարդասիրական և ռազմական օգնություն տրամադրելու հարցերը: Քննարկմանը Կիևից տեսակապով մասնակցել է նաև նախագահ Վլադիմիր Զելենսկին:

«Ուկրաինայի վարչապետի հետ բանակցությունների ընթացքում զրուցակիցները ստիպված ընդհատել են քննարկումը և իջել են ռմբապաստարան, քանի որ ռուսական ուժերը սկսել են հրթիռակոծել Օդեսան», - ասել է Միշելին ուղեկցող մի պաշտոնյա:

Եվրոպայի խորհրդի նախագահը նախապես չհայտարարված այց է կատարել Ուկրաինա:

Ամերիկայի Միացյալ Նահանգների նախագահ Ջո Բայդենը ստորագրել է «լենդ-լիզի» մասին օրենքը, որը դյուրացնելու է զենք, զինամթերք, տեխնիկա և ռազմական նշանակության այլ օգնություն Ուկրաինային տրամադրելու գործընթացը: Այդ մասին Twitter-ում հայտնել է Սպիտակ տան մամլո քարտուղարի օգնական Էնջելա Պերեսը:

Այդ նախաձեռնության մասին դեռ պատերազմից առաջ խոսել են մի խումբ հանրապետական սենատորներ: Նրանք առաջարկել են նախագահին շնորհել առավել ընդարձակ լիազորություններ Ուկրաինայի կառավարությանը վարձակալության տարբերակով ամերիկյան զենք և տեխնիկա ժամանակավոր տրամադրելու համար:

Մայիսի 9-ին Հաղթանակի օրվան նվիրված հանրային միջոցառումների, երթերի և զորահանդեսների ընթացքում Ռուսաստանում ձերբակալվել է առնվազն 125 մարդ:

Իրավապահներն այդ քաղաքացիներն ձերբակալել են հակապատերազմական ակցիաների, կարգախոսներ վանկարկելու, պաստառներ կամ խորհրդանշաններ կրելու համար:

Ռուսական ռեզերվները, արժութային պահուստներից սառեցված ակտիվները պետք է բռնագրավվեն և օգտագործվեն Ուկրաինան վերականգնելու համար։ Սա Եվրամիության արտաքին քաղաքականության պատասխանատու Ժոզեպ Բորելի կարծիքն է, որ նա հայտնել է հեղինակավոր Financial Times-ին։

Բորելն ասել է, որ սա նման մի բան կլինի, ինչ Վաշինգտոնն արեց Աֆղանստանի կենտրոնական բանկի ակտիվների հետ, երբ թալիբները վերադարձան իշխանության։

Մարտին Ռուսաստանը հայտարարել էր, որ պատերազմի պատճառով սառեցվել են մոտ 300 միլիարդ դոլարի իր ակտիվները՝ արտասահմանում երկրի ոսկու և արժույթի պահուստների մոտ կեսը։

Ըստ Եվրահանձնաժողովի գնահատականների՝ Ուկրաինայի վերակառուցման գինը կարող է հասնել հարյուր միլիարդավոր եվրոների։