Պատերազմ Ուկրաինայում (լայվ բլոգ, թարմացվող)

ԱՄՆ սենատորները, ովքեր հանդիպել են Միացյալ Նահանգներում Ուկրաինայի դեսպանի հետ, ասել են, որ նա երախտագիտություն է հայտնել և հասկացրել, որ իր երկիրը ապագայում ավելի շատ օգնության կարիք կունենա:

Երկու կուսակցությունների սենատորները հանդիպել են Օքսանա Մարկարովայի հետ՝ քննարկելու Ուկրաինայի պատերազմը։

Դեմոկրատ-սենատոր Ռոբերտ Մենենդեսը, ով Սենատի արտաքին հարաբերությունների հանձնաժողովի նախագահն է, ասել է. - «Դա երախտագիտության ուղերձ էր, կոչ՝ աջակցելու [Ուկրաինային] մինչև վերջ»:

Երեկ երեկոյան և անցած գիշեր Ռուսաստանի Զինված ուժերը շարունակել են ավիացիոն և հրթիռային հարվածներ հասցնել Ուկրիանայի տարածքին։ Ռուսաստանի պաշտպանության նախարարության խոսնակ, գեներալ-մայոր Իգոր Կոնաշենկովի խոսքով՝ գիշերային հարվածների ընդհանուր թիվը հասել է 500-ի։

«Հարվածների հետևանքով ոչնչացվել է ուկրաինական բանակի 15 հրամանատարական կետ,17 զինապահեստ ինչպես նաև 280 ուկրաինացի զինվորական», - հայտարարել է Կոնաշենկովը։

ԱՄՆ նախագահ Ջո Բայդենը Սպիտակ տանը հանդիպել է Իտալիայի վարչապետ Մարիո Դրագիի հետ։

Երկու երկրների ղեկավարները քննարկել են Ուկրաինային տրամադրվող օգնությունը, ներառյալ՝ ռազմական։ Դրագին կոչ է արել խաղաղ բանակցություններ սկսել․ - «Մենք պետք է օգտագործենք բոլոր ուղիները՝ խաղաղության հասնելու, զինադադարի և լուրջ բանակցությունների համար»։

Պաշտոնական Բուդապեշտը կրկին հայտարարում է, որ Ռուսաստանում արդյունահանված նավթի ներկրումների լիակատար արգելքի սահմանումը «Հունգարիայի տնտեսության համար ատոմային ռումբի էֆեկտ կունենա»։ Այս մասին Հունգարիայի ԱԳ նախարար Պետեր Սիյարտոն հայտարարել է «Ֆեյսբուքի» իր էջում հրապարակված տեսաուղերձում՝ նշելով, որ երկրի ղեկավարությունը Բրյուսելից հստակ զիջումներ է ակնկալում։

«Ազովստալ» գործարանում մնացող ուկրաինացի զինվորականները ծանր կորուստներ են կրում», - բրիտանական Sky News հեռուստաալիքին տված հարցազրույցում հայտարարել է Ուկրաինայի Ազգային գվարդիայի կազմում գործող «Ազով» գնդի սպա Իլյա Սամոյլենկոն։

«Մենք ծանր կորուստներ ունենք և ամեն օրը մեզ համար կարող է վերջինը դառնալ։ Մեր պաշարները խիստ սահմանափակ են և սպառվելու եզրին են։ Այս պահին մեզ համար ելքը կարող է լինել կամ անխուսափելի մահը, կամ էլ գերեվարումը, ինչը ևս հավասարազոր է մահվան», - հայտարարում էր «Ազով» գնդի զինծառայողը։

«Ռուսաստանը երախտապարտ է Թուրքիային՝ ուկրաինական ճգնաժամի ընթացքում գործադրած միջնորդական ջանքերի համար», - այսօր լրագրողների հետ զրույցում նշել է Կրեմլի պաշտոնական ներկայացուցիչ Դմիտրի Պեսկովը։

«Կասկած չկա, որ մենք շատ բարձր ենք գնահատում այն ջանքերը, որ գործադրում էին մեր թուրք գործընկերները, որպեսզի Ստամբուլում կայացած հանդիպման համար անհրաժեշտ պայմաններ ստեղծվեն», - նշել է Պեսկովը։

Ռուսաստանը հավատարիմ է գազի մատակարարումների իր ստանձնած պարտավորություններին, հայտարարել է Կրեմլի խոսնակ Դմիտրի Պեսկովը՝ մեկնաբանելով դեպի Եվրոպա ռուսական գազի տարանցումը սահմանափակելու Կիևի որոշումը։

«Ռուսաստանը իր պայմանագրային պարտավորությունները միշտ էլ պատասխանատու կերպով է կատարել և հետագայում ևս պատրաստվում է նույնն անել։ Ուկրաինական կողմը հայտնել է ինչ-ինչ ֆորսմաժորային պայմանների մասին։ Մենք, սակայն, լսել ենք նաև «Գազպրոմի» բացատրությունները, որոնց համաձայն [Ուկրաինայի կողմից] ֆորսմաժորի վերաբերյալ որևէ ծանուցում կամ բացատրություն չի հնչել», - նշել է Պեսկովը։

«Մոտ ժամանակում Ուկրաինայում խաղաղ համաձայնագրի կնքման հնարավորություն չկա», - երեկ հայտարարել է ՄԱԿ-ի գլխավոր քարտուղարը:

Միաժամանակ, Անտոնիու Գուտերեշը խոստացել է, որ համաշխարհային կազմակերպությունը «երբեք չի հանձնվի» և «միշտ պետք է պատրաստ լինի անել հնարավոր ամեն բան՝ վերջ տալու համար այս անիմաստ պատերազմին»։

Գուտերեշը լրագրողներին ասել է, որ ՄԱԿ-ն անում է ամեն ինչ՝ փրկելու կյանքեր և դյուրացնելու տարհանումն ու մարդասիրական օգնության տրամադրումը:

«Այս պատերազմը հավերժ չի տևի: Կգա խաղաղ բանակցությունների ժամանակը: Կգա պահը, երբ, հուսով եմ, հնարավոր կլինի ՄԱԿ-ի կանոնադրությանը և միջազգային իրավունքին համապատասխան գտնել խնդրի լուծումը», - նշել է ՄԱԿ-ի գլխավոր քարտուղարը:

Գերմանական և համաշխարհային արդյունաբերության հսկա Siemens կոնցեռնը հայտարարել է Ռուսաստանից ամբողջովին դուրս գալու մասին։ Այսօր կոնցեռնը հայտարարություն է ուղարկել ռուսական մամուլին՝ տեղեկացնելով «բոլոր արդյունաբերական գործարքների դադարեցման մեկնարկի մասին»։

«Մենք կմիանանք միջազգային հանրությանը՝ դատապարտելու պատերազմը Ուկրաինայում: [...] Siemens-ը դուրս է գալիս ռուսական շուկայից ուկրաինական պատերազմի պատճառով», - ասվում է հայտարարությունում։

Ռուսաստանում Siemens-ը ներկայացված է երկու ընկերություններով՝ Siemens և Siemens Energy:

Գերմանիայի կանցլերը կարծիք է հայտնել, որ Ուկրաինան կարող է հարյուր տարի զգալ Ռուսաստանի հետ պատերազմի հետևանքները, քանի որ շատ քաղաքներ լցված են չպայթած ռումբերով։

«Հետևաբար, մենք ստիպված կլինենք միասին աշխատել վերակառուցման վրա», - ասել է Օլաֆ Շոլցը երեկ Բեռլինում ասուլիսի ժամանակ։

Կանցլերը հիշեցրել է, որ Գերմանիայում դեռ հաճախ են գտնում Երկրորդ համաշխարհային պատերազմից մնացած ռումբեր։