Պատերազմ Ուկրաինայում (լայվ բլոգ, թարմացվող)

Ֆինլանդիայի նախագահ Սաուլի Նիինիստյոն և վարչապետ Սաննա Մարինը համատեղ հայտարարություն են արել Հյուսիսատլանտյան դաշինքին միանալու մասին։ «Ֆինլանդիան պետք է անհապաղ դիմի ՆԱՏՕ-ին անդամակցելու համար», - ասվում է հայտարարության մեջ:

Ավելի վաղ ՆԱՏՕ-ն խոստացել էր Ֆինլանդիայի դիմումը դիտարկել արագացված ռեժիմով։ Սկզբում երկիրը ստանում է թեկնածուի կարգավիճակ, իսկ հետո ՆԱՏՕ-ի անդամ բոլոր 30 երկրների խորհրդարանները պետք է հաստատեն նոր անդամի ընդունումը։

Եվրամիությունը և Ճապոնիան կշարունակեն Ռուսաստանի նկատմամբ սանկցիաները:

Տոկիոյում տեղի են ունեցել Եվրոպական հանձնաժողովի նախագահ Ուրսուլա ֆոն դեր Լայենի, Եվրոպական խորհրդի նախագահ Շառլ Միշելի և Ճապոնիայի վարչապետ Ֆումիո Կիշիդայի բանակցությունները: Երեք լիդերները քննարկել են նաև Ուկրաինայի թեման:

«Ռուսաստանի ներխուժումն Ուկրաինա ցնցել է միջազգային իրավակարգի հիմքերը ոչ միայն Եվրոպայում, այլև Ասիայում, և դա բացարձակ անընդունելի է: Համագործակցելով Մեծ յոթնյակի շրջանակներում՝ Ճապոնիան խստագույն պատժամիջոցներ է սահմանելու Ռուսաստանի նկատմամբ», - ասել է Կիշիդան:

«Մեր հանդիպումը տեղի է ունենում մի ժամանակաշրջանում, երբ Ռուսաստանը շարունակում է դաժան հարձակումն Ուկրաինայի ժողովրդի վրա: Մենք միասնական պատասխան ենք տվել, դատապարտել ենք հարձակումը և պատժամիջոցներ ենք սահմանել: Ուզում եմ շնորհակալություն հայտնել Ճապոնիայի մեծարգո վարչապետին այս հարցում դրսևորած համերաշխության համար: Մենք միասին կարևոր մարդասիրական, ֆինանսական և ռազմական օգնություն ենք տրամադրում Ուկրաինային և նրա ժողովրդին», - ասել է Միշելը:

Մեծ Բրիտանիայի վարչապետ Բորիս Ջոնսոնը հայտարարել է, թե հարկ է կանգնեցնել Վլադիմիր Պուտինին: Միաժամանակ նա չի ցանկացել Պուտինին համեմատել Հիտլերի հետ: Այդ թեման արծարծվել է LBC ռադիոկայանի թղթակցի հետ զրույցում:

«Ես մի կողմ կդնեմ պատմական քննարկումներն ու զուգահեռները: Ընդամենը տեսեք, թե ինչ է նա անում Ուկրաինայում: Սա բացարձակ բարբարոսական ագրեսիա է մի երկրի դեմ, որը տառացիորեն ոչ մի կերպ նրան չի սպառնացել, ոչ մի վատ բան չի արել, երկիր, որի ժողովուրդն ընդամենը ցանկացել է իր համար խաղաղ ապրել: Եվ նա շարունակում է ռմբահարել, հրետակոծել անմեղ մարդկանց: Նրան անհրաժեշտ է կանգնեցնել»,- ասել է Ջոնսոնը` պատասխանելով այն հարցին, թե ո՞վ է ավելի բացասական կերպար՝ Պուտի՞նը, Ստալի՞նը, թե՞ Հիտլերը:

Ջոնսոնն ասել է, որ Բրիտանիան ամեն կերպ սատարում է Ուկրաինային և կշարունակի դա անել:

ՄԱԿ-ի Մարդու իրավունքների գերագույն հանձնակատար Միշել Բաչելետն ասել է, թե Ուկրաինայի մայրաքաղաք Կիևի շրջանում անցած մի քանի շաբաթների ընթացքում հազարավոր դիակների հայտնաբերումը վկայում է ռուսական ուժերի կողմից պատերազմական հանցագործություններ կատարելու հավանականության մասին:

«Ապօրինի սպանությունների քանակը, Կիևից հյուսիս գտնվող շրջանում արտադատարանական մահապատիժների մասին վկայող փաստերը ցնցող են»,- ասել է գերագույն հանձնակատարը տեսաուղերձում, որով դիմել է Ժնևում գտնվող ՄԱԿ-ի Մարդու իրավունքների խորհրդին:

ՄԱԿ-ի Մարդու իրավունքների խորհուրդը պետք է որոշում կայացնի Կիևի շրջանում այս տարվա փետրվարին և մարտին կատարված հանցագործությունների խնդրով պաշտոնական հետաքննություն սկսելու վերաբերյալ:

Ռուսաստանի նախագահ Վլադիմիր Պուտինն այսօր Մոսկվայում տնտեսական հարցերով խորհրդակցության ընթացքում ասել է, թե երկիրը հաջողությամբ հաղթահարում է պատժամիջոցները:

Նրա խոսքով, «Արևմուտքի սանկցիոն մոլուցքը Եվրամիության բնակիչների համար կստեղծի ծանրագույն հետևանքներ և սով կառաջացնի աշխարհի առավել աղքատ երկրներում»:

«Շատ առումներով հենց այդ պատժամիջոցներն են համաշխարհային ճգնաժամ հարուցում: Դրանց կարճատես հեղինակները՝ ղեկավարվելով քաղաքական հավակնություններով և ռուսատյացությամբ, իրենց իսկ ազգային շահերին, սեփական տնտեսություններին և իրենց բնակիչների բարեկեցությանն են հարվածում»,- հայտարարել է Պուտինը:

Նա ասել է, թե մի շարք երկրներում արդեն կա սովի սպառնալիք, և դրա համար մեղավոր է «բացառապես Արևմուտքի վերնախավը»:

Ռուսաստանի ղեկավարը պնդել է նաև, որ ազգային տարադրամը՝ ռուբլին, աշխարհի բոլոր արժույթների շարքում «ունի առավել կայուն դինամիկան»:

Ռուսաստանի նախագահ Վլադիմիր Պուտինի խոսնակ Դմիտրի Պեսկովն այսօր ասել է, թե ՆԱՏՕ-ի հետագա ընդարձակումը չի նպաստի Եվրասիայի անվտանգության ամրապնդմանը, իսկ Ֆինլանդիայի միացումը կդիտվի Ռուսաստանի համար սպառնալիք:

Նա նշել է, որ Մոսկվան անպայման կարձագանքի Ֆինլանդիայի հնարավոր անդամակցությանը Հյուսիսատլանտյան դաշինքին և համապատասխան քայլերով կամրապնդի սեփական անվտանգությունը:

Պեսկովի խոսքով՝ Ռուսաստանի գործողությունները կախված կլինեն այն հանգամանքից, թե որքանով է ՆԱՏՕ-ի ռազմական ենթակառուցվածքը մոտենալու երկրի սահմաններին:

Ուկրաինայի արտաքին գործերի նախարար Դմիտրո Կուլեբան այսօր Բեռլինում ասել է, թե Եվրամիության անդամության հարցում Կիևի համար ընդունելի է միայն լիիրավ անդամի կարգավիճակը:

Իր այդ մեկնաբանությամբ Կուլեբան արձագանքել է Ֆրանսիայի նախագահ Էմանյուել Մակրոնի շաբաթասկզբին հնչեցրած առաջարկությանը, որի համաձայն, «նպատակահարմար կլինի Եվրոպայում ստեղծել մի նոր քաղաքական կառույց, որն ուրախ կլինի իր անդամների թվում նաև Ուկրաինան տեսնել»:

«Ես լսել եմ Մակրոնի առաջարկի մասին, ես բառացիորեն շատ քիչ տեղեկություն ունեմ և չեմ կարող որևէ եզրակացություն անել, սակայն կարող եմ վստահ ասել, որ Ուկրաինայի համար եվրոպական ինտեգրմանը որևէ այլընտրանք ընդունելի չի լինի»,- ասել է Կուլեբան գերմանացի օրենսդիրների հետ զրույցում:

Նրա փոխանցմամբ, Կիևում վստահ են, որ Ուկրաինային Եվրամիության անդամի թեկնածուի կարգավիճակի շնորհումը բխում է նաև Եվրամիության շահերից: Հարցը պետք է քննարկվի հունիսին կայանալիք Եվրոպական հանձնաժողովի նիստում:

Ռուսաստանի դաշնության էկոնոմիկայի նախարար Մաքսիմ Ռեշետնիկովն այսօր մասնակցել է տնտեսական հարցերին նվիրված հեռավար համաժողովին, որը վարել է նախագահ Վլադիմիր Պուտինը և խոսել է արևմտյան պատժամիջոցների ազդեցության մասին:

«Հիմնական մարտահրավերներն են մատակարարումների ցանցի խափանումը և ներկրման շեշտակի անկումը: Ընկերություններն ունեն աշխատանքային կապիտալի կարիք, ինչպես միշտ, հրատապ են զբաղվածության և քաղաքացիների եկամուտների հարցերը»,- ասել է նախարարը:

Միաժամանակ նա նշել է, որ տնտեսության պահպանմանն ու պաշտպանությանն ուղղված նախագահ Վլադիմիր Պուտինի կարգադրությունները դրական ազդեցություն են գործել:

Նախարարի խոսքով, հաջողվել է կանխել խուճապային միտումները և հաղթահարել որոշ ապրանքատեսակների դեֆիցիտը, սղաճի տեմպը նվազել և հասել է 6.4 տոկոսի, ազգային արժույթն էլ կայունացել է:

Ռուսաստանի տնտեսության ոլորտում բարդություններ են առաջացել փետրվարի 24-ին Ուկրաինայի վրա հարձակման կապակցությամբ արևմտյան երկրների սահմանած խիստ պատժամիջոցների հետևանքով:

Ուկրաինայի արտաքին գործերի նախարար Դմիտրո Կուլեբան այսօր Բեռլինում ասել է, թե իր երկիրը պատրաստ է բանակցել Ռուսաստանի հետ, սակայն ռուսների կողմից վերջնագրեր չի ընդունի:

Այդ մասին Ուկրաինայի արտաքին գերատեսչության ղեկավարն ասել է Die Welt համագերմանական օրաթերթին տված հարցազրույցում:Նրա խոսքով, եթե Ռուսաստանը սրի իրավիճակը՝ Կիևը պատասխան հարված կհասցնի:

«Ամենալուրջ խնդիրն այն է, որ Ռուսաստանը չի ցանկանում իրական և բովանդակալից բանակցություններ վարել»,- ասել է Կուլեբան:

Նախարարը խոսել է ռուս-ուկրաինական պատերազմում հաղթելու համար անհրաժեշտ գործոնների մասին:

«Կիևին հաղթանակի համար երեք բան է պետք՝ ուկրաինական տոկունությունը, բնավորությունը և մարտունակությունը, անհրաժեշտ զենքի մատակարարումներ և Ռուսաստանի նկատմամբ պատժամիջոցներ: Եթե այդ երեք գործոններն իրար միանան, ապա մենք կհաղթենք այս պատերազմում»,- ասել է Կուլեբան:

Նրա խոսքով, պատժամիջոցները շատ կարևոր են և արդյունավետ, բայց չեն կարող կանգնեցնել ռուսական ռազմամեքենան, «քանի դեռ Եվրոպան շարունակում է գազ գնել Ռուսաստանից»:

Մեծ Բրիտանիայի պաշտպանության նախարար Բեն Ուոլեսը The Washington Post ամերիկյան պարբերականին տված հարցազրույցում ասել է, որ Լոնդոնը Կիևին կփոխանցի կարճ հեռահարության հակաօդային պաշտպանության համակարգեր:

Նախարարի խոսքով, դա կարվի Ուկրաինայում հնարավոր էսլակացիայի դեպքում ռուսների գործողությունները սահմանափակելու համար:

«Դրանք հեռահար ՀՕՊ համակարգեր չեն, բայց վստահ կբարդացնեն ռուսական ավիացիայի թռիչքները քաղաքների շրջանում»,- ասել է Ուոլեսը: