Պատերազմ Ուկրաինայում (լայվ բլոգ, թարմացվող)

Կիևը պնդում է, որ ուկրաինական զորքերը Խարկովի հատվածում դուրս են եկել Ռուսաստանի հետ սահման։

Կիրակի երեկոյան Ուկրաինայի պաշտպանության նախարարությունը մի տեսանյութ է տարածել, որում պատկերված են ուկրաինացի զինվորականներ՝ կապույտ և դեղին գույներով ներկված սահմանային սյան մոտ խմբված։ Զինվորականները պնդում են, որ ներկայացնում են Ուկրաինայի տարածքային պաշտպանության ուժերի 127-րդ բրիգադը։

Ուկրաինայի զինված ուժերի գլխավոր շտաբն այսօր առավոտյան տարածած հաղորդագրության մեջ, սակայն, նշել է միայն, որ ռուսական ուժերը փորձում են թույլ չտալ ուկրաինական ուժերի առաջխաղացումը դեպի պետական սահման։

Արևմտյան լրատվամիջոցները ևս առայժմ ի վիճակի չեն անկախ աղբյուրներից հաստատել ուկրաինական զորքերի՝ սահմանին մոտենալու մասին տեղեկությունները։

«Որևէ երաշխիք չկա, որ Եվրամիությունն այսօր կկարողանա համաձայնեցնել Ռուսաստանի դեմ պատժամիջոցների վեցերորդ փաթեթը», - այսօր Բրյուսելում ԵՄ արտգործնախարարների հերթական հավաքից առաջ հայտարարել է դաշինքի արտաքին հարաբերությունների և անվտանգության հարցերով գլխավոր պատասխանատու Ժոզեպ Բորելը: Նրա խոսքով՝ դիվանագիտական փակուղու պատճառը «ԵՄ անդամ որոշ պետությունների կոշտ դիրքորոշումն է»։

Մոսկվայի դեմ սահմանվող պատժամիջոցների նոր փաթեթի առանցքային դրույթը, ըստ դրա հեղինակների, պետք է լինի Ռուսաստանում արդյունահանված նավթի ԵՄ ներկրման ամբողջական արգելքը։ Պաշտոնական Բուդապեշտը, սակայն, պնդում է, որ նման քայլը ծանր հարված կհասցնի Հունգարիայի տնտեսությանը։

Իսպանական El Pais թերթին տված հարցազրույցում Հունգարիայի ԱԳ նախարար Պետեր Սիյարտոն շաբաթ օրը հայտարարել է, որ իր երկրին ռուսական նավթից հրաժարման հետևանքները չեզոքացնելու համար 750 միլիոն եվրո է պահանջվելու։

Ռուսական կողմը պնդում է, որ Մարիուպոլի «Ազովստալ» գործարանի տարածքում պաշարված ուկրաինացի զինվորականների հետ բանակցություններ են ընթանում։ Ռուսաստանի Պետական հեռուստատեսության եթերում այս մասին հայտարարել է Դոնեցկի ինքնահռչակ հանրապետության ամենաազդեցիկ դաշտային հրամանատարներից մեկը՝ Ալեքսանդր Խոդակովսկին։

Նրա խոսքով` այսօր առավոտյան «Ազովստալի» տարածքից ինը ուկրաինացի զինվորականներ են դուրս եկել՝ պնդելով, որ ներկայացնում են զինծառայողների ավելի մեծ խմբի շահերը։

«Մարիուպոլի «Ազովստալ» գործարանի տարածքում գտնվող վիրավոր ուկրաինացի զինվորականները կտարհանվեն», - հաղորդել է Ռուսաստանի ՊՆ՝ տեղեկացնելով, որ նման պայմանավորվածությունը ձեռք է բերվել այսօր ուկրաինական պաշարված կայազորի հրամանատարության հետ բանակցությունների ընթացքում։

«Այս պահին գործարանի տարածքում լռության ռեժիմ է հաստատվել, բացվել է մարդասիրական միջանցք, որով վիրավոր ուկրաինացի զինծառայողները տեղափոխվում են Դոնեցկի հանրապետության Նովոազովսկ քաղաքի հիվանդանոց՝ անհրաժեշտ օգնություն ցուցաբերելու նպատակով», - նշված է Ռուսաստանի ռազմական գերատեսչության տարածած հայտարարության մեջ։

«ԵՄ-ից ևս մի քանի օր կպահանջվի Ռուսաստանի դեմ պատժամիջոցները համաձայնեցնելու համար», - երեկ Բրյուսելում հայտարարել է Գերմանիայի արտգործնախարար Աննալենա Բերբոկը։

Նրա խոսքով՝ Ռուսաստանում արդյունահանված նավթի ներկրման ամբողջական արգելք սահմանելու շուրջ տարաձայնությունները դաշինքի ներսում պահպանվում են։

«Ես վստահ եմ, որ մենք պայմանավորվածությունների կկարողանանք հանգել արդեն առաջիկա մի քանի օրերին», - նշում էր գերմանական դիվանագիտության ղեկավարը։

Գերմանիայի կանցլեր Օլաֆ Շոլցը հայտարարել է, որ Ուկրաինայում պատերազմի մոտալուտ ավարտի նշաններ չի տեսնում, և մտահոգություն է հայտնել հակամարտության հնարավոր սրման վերաբերյալ։

Գերմանիան կշարունակի զենք տրամադրել Ուկրաինային, խոստացել է Շոլցը։

Միևնույն ժամանակ, նա վստահեցրել է, որ թույլ չի տա որոշումներ, որոնք կարող են հանգեցնել ՆԱՏՕ-ի և Ռուսաստանի միջև ուղիղ հակամարտության: «Մենք պետք է նաև մշտապես զգույշ լինենք, որպեսզի չընդունենք որոշումներ, որոնք մեզ կդարձնեն հակամարտության կողմ», - ընդգծել է Շոլցը։

Միացյալ Նահանգների Սենատն ընթացակարգային քվեարկություն է անցկացրել Ուկրաինային մոտ 40 միլիարդ դոլարի լրացուցիչ օգնություն տրամադրելու օրինագծի վերաբերյալ։ Օրինագծի վերաքննարկմանը կողմ է քվեարկել 81, դեմ՝ 11 սենատոր։

Սա նշանակում է, որ Կենտուկիի սենատոր Ռենդ Փոլի կողմից մայիսի 13-ին արգելափակված օգնության օրինագիծը կրկին կքննարկվի Սենատում:

Եվրամիությունը և ԱՄՆ-ը պայմանավորվել են հետագայում համակարգել իրենց գործողությունները՝ «մեղմացնելու Ուկրաինայում Ռուսաստանի պատերազմի բացասական հետևանքները համաշխարհային տնտեսության համար»:

ԵՄ-ԱՄՆ Առևտրի և տեխնոլոգիաների հարցերով խորհրդի նիստից հետո հրապարակված համատեղ հայտարարությունում ասվում է, որ նրանք հավատարիմ են՝ «աշխատելու Ուկրաինայի հետ՝ վերականգնելու նրա տնտեսությունը և խթանելու առևտուրն ու ներդրումները»:

Երկուստեք բարձր է գնահատվել «արտահանման վերահսկողության ոլորտում աննախադեպ համագործակցությունը», որը, մասնավորապես, ուղղված է Մոսկվայի արդյունաբերական ու ռազմական ներուժի զարգացումը խոչընդոտելուն։