Պատերազմ Ուկրաինայում (լայվ բլոգ, թարմացվող)

Երեկ ամերիկացի սենատորները կողմ են քվեարկել Ուկրաինային 40 միլիարդ դոլար լրացուցիչ օգնություն հատկացնելու օրինագծին։ Նախագահ Ջոզեֆ Բայդենը շեշտել է. Կոնգրեսը, հավանություն տալով նման օգնությանը, «աշխարհին հստակ ազդանշան է ուղարկել»՝ ԱՄՆ-ն Ուկրաինայի հետ միասին «պաշտպանում է ժողովրդավարությունն ու ազատությունը»։

Բայդենի գրավոր հայտարարությունում նշված է նաև, որ ԱՄՆ-ն արդեն պատմական օգնություն է ցուցաբերել Ուկրաինային անվտանգության ոլորտում և մտադիր է արագացնել լրացուցիչ զենքի և սարքավորումների մատակարարումը: Միացյալ Նահանգների նախագահի խոսքով՝ օգնությունը կներառի մարտի դաշտում արդեն արդյունավետ օգտագործվող հրետանի և այլ սարքավորումներ:

Միացյալ Նահանգները լիովին աջակցում է Շվեդիայի և Ֆինլանդիայի՝ ՆԱՏՕ-ին միանալու պատմական որոշմանը, հայտարարել է ԱՄՆ նախագահ Ջո Բայդենը։

Երեկ Բայդենն ասել է, որ Շվեդիայի և Ֆինլանդիայի հայտերը շրջադարձային են եվրոպական անվտանգության մեջ, և մայրցամաքի հյուսիսում գտնվող երկրների միացումը կամրապնդի ամբողջ դաշինքի դիրքերը։

«Ես ուղիղ կասեմ՝ ՆԱՏՕ նոր անդամների մուտքը վտանգ չի ներկայացնում ոչ մի երկրի համար: ՆԱՏՕ-ի նպատակը ագրեսիայից պաշտպանվելն է», - ընդգծել է ԱՄՆ նախագահը:

Եվրամիությունն ուսումնասիրում է ռուս օլիգարխներին պատկանող և պատժամիջոցների արդյունքում սառեցված ակտիվների՝ Ուկրաինայի հետպատերազմյան վերականգնման համար օգտագործման հնարավորությունը։ Այս մասին գերմանական ZDF հեռուստաալիքի եթերում հայտարարել է Եվրահանձնաժողովի նախագահ Ուրսուլա ֆոն դեր Լայենը։

Նրա խոսքով՝ այժմ այս հարցով զբաղվում են փաստաբանները։ «Իմ կարծիքով՝ Ռուսաստանը պետք է իր ներդրումը կատարի [Ուկրաինայի վերականգնման գործում]», - Reuters լրատվական գործակալության փոխանցմամբ՝ ասել է ֆոն դեր Լայենը:

Ապրիլի սկզբին Եվրամիությունը հայտնել էր, որ պատերազմի սկսվելուց հետո եվրոպական երկրները սառեցրել են ռուսական ակտիվները՝ 29,5 մլրդ եվրոյի չափով։ Կրեմլը դա անվանել էր «օրինական ձեռնարկատերերի կողոպուտ»։

Միացյալ Նահանգները հայտարարել է Ուկրաինային 100 միլիոն դոլար արժողությամբ ռազմական տեխնիկա տրամադրելու մասին՝ ի հավելումն հինգշաբթի օրը Կոնգրեսի կողմից հաստատված 40 միլիարդ դոլարի օգնության:

Նոր փաթեթը ներառում է 18 հաուբից և հակահրետանային ռադիոտեղորոշիչ համակարգեր։

Պենտագոնի խոսնակ Ջոն Քիրբին ասել է, որ զինտեխնիկան հասանելի կլինի ուկրաինական զորքերին «շատ, շատ շուտով»:

Բրիտանիան Ուկրաինային կտրամադրի հեռահար հրետանի, անօդաչու թռչող սարքեր և հականավային հրթիռներ։

Ուկրաինայի նախագահ Վլադիմիր Զելենսկու հետ հեռախոսազրույցից հետո Միացյալ Թագավորության վարչապետ Բորիս Ջոնսոնը Թվիթերում գրել է. - «Ես նախագահին տեղեկացրեցի Ուկրաինայի պաշտպանությանը տրամադրվող աջակցության մասին՝ ներառյալ հեռահար հրետանի, «ափ-նավ» հրթիռներ և անօդաչու սարքեր: Սա մեր լրացուցիչ ռազմական օգնության փաթեթի մի մասն է՝ 1,3 մլրդ ֆունտ ստերլինգի չափով»:

Գերմանիայի նախկին կանցլեր Գերհարդ Շրյոդերը, որին քննադատում են Ռուսաստանի հետ սերտ կապերի համար, պետք է հրաժարվի Բունդեսթագի իր գրասենյակից։ Գերմանական աղբյուրների համաձայն՝ նման որոշում է ընդունել օրենսդիր մարմնի աշխատակազմը։

Գերմանական լրատվամիջոցները նշում են, որ, այդուհանդերձ, 78-ամյա նախկին կանցլերը կշարունակի թոշակ ստանալ, օգտվել թիկնապահների ծառայությունից, ինչը նախատեսված է կառավարության նախկին ղեկավարների համար։

Ռուսական «Ռոսնեֆտ»-ն էլ հաղորդում է, որ Շրյոդերը լքում է ընկերության տնօրենների խորհուրդը:

Գերմանիայի սոցիալ-դեմոկրատական կուսակցության անդամ Շրյոդերը, ով կանցլերի պաշտոնում աշխատել է 1998-ից մինչև 2005 թվականները, հայտնի է Ռուսաստանի նախագահ Վլադիմիր Պուտինի հետ ընկերական կապերով:

Ռուս - ուկրաինական պատերազմի մեկնարկից ի վեր առաջին անգամ հեռախոսազրույց են ունեցել Միացյալ Նահանգների և Ռուսաստանի զինված ուժերի գլխավոր շտաբների ղեկավարները։

Վալերի Գերասիմովը և Մարկ Միլին հեռախոսազրույցի ընթացքում «քննարկել են երկկողմ հետաքրքրություն ներկայացնող հարցերը՝ այդ թվում իրավիճակը Ուկրաինայում», - ասվում է Ռուսաստանի պաշտպանության նախարարության հաղորդագրությունում։ Այլ մանրամասներ չեն հրապարակվում։

Անցած շաբաթավերջին էլ հեռախոսազրույց էր կայացել Ռուսաստանի և Միացյալ Նահանգների պաշտպանության նախարարների միջև՝ նույնպես առաջին անգամ Ուկրաինայում պատերազմի ընթացքում:

Ռուսաստանի հարևան Ֆինլանդիան դադարեցնում է ռուսական գազի ներկրումը։

«Վաղվանից ամառային ամիսներին Gasum-ը իր բաժանորդներին բնական գազ կմատակարարի այլ աղբյուրներից՝ Balticconnector խողովակաշարի միջոցով», - հայտարարել է ֆիննական ընկերությունը, որը հրաժարվում է ռուսական գազի դիմաց վճարել ռուբլով։

Ֆինլանդիան գազի ներքին պահանջարկի մեծ մասը ապահովում է Ռուսաստանից մատակարարվող գազով, սակայն գազն ապահովում է երկրում տարեկան սպառվող էներգիայի մոտ 5 տոկոսը:

Ռուսաստանի պաշտպանության նախարար Սերգեյ Շոյգուն հայտարարել է, որ ի պատասխան Շվեդիայի և Ֆինլանդիայի՝ ՆԱՏՕ-ի ռազմական դաշինքին միանալու քայլին, Մոսկվան մինչև տարեվերջ 12 նոր զորամաս և ստորաբաժանումներ կստեղծի Արևմտյան ռազմական օկրուգում։

«Լարվածությունը շարունակում է աճել Արևմտյան ռազմական օկրուգի պատասխանատվության գոտում: Մենք համարժեք հակաքայլեր ենք ձեռնարկում», - ասել է Շոյգուն։

Ուկրաինայում պատերազմի մեկնարկից ի վեր սպանվել է 11 վրացի կամավորական։

Անցած օրերին ուկրաինական Իզյում քաղաքի մարտերի ժամանակ սպանված վրացին 38-ամյա Ռատի Շուրգայան է: Վրացական լրատվամիջոցների փոխանցմամբ` նրա մարմինը տեղափոխվել է Վրաստան, հուղարկավորությունը տեղի կունենա երեքշաբթի օրը։

Վրաստանի իշխանությունները փետրվարի 24-ից ի վեր փորձում են կանխել վրաց կամավորականների խմբերի Ուկրաինա մեկնումը։ Ի պատասխան՝ նախագահ Վլադիմիր Զելենսկին պատերազմի մեկնարկից մի քանի օր անց հետ կանչեց Թբիլիսիում Ուկրաինայի դեսպանին՝ վրացական իշխանություններին քննադատելով Կիևին բավարար աջակցություն չցուցաբերելու համար։