Պատերազմ Ուկրաինայում (լայվ բլոգ, թարմացվող)

Ուկրաինայի նախագահ Վլադիմիր Զելենսկին դիմել է Արևմուտքին երկրին ավելի շատ ծանր սպառազինություն՝ համազարկային հրթիռային համակարգեր, տանկեր, հականավային հրթիռներ և այլ տեսակի զենքեր մատակարարելու համար։

«Իրավիճակը Դոնբասում չափազանց բարդ է: Փաստորեն, բոլոր ուժերը, որոնք դեռևս ուներ ռուսական բանակը, ուղարկվել են այնտեղ հարձակման», - հայտարարել է Զելենսկին հերթական գիշերային ելույթում։

Ուկրաինային ծանր սպառազինության մատակարարումը, ըստ Զելենսկու, «լավագույն ներդրումն է աշխարհում կայունության պահպանման և այն ծանր ճգնաժամերից շատերը կանխելու համար, որոնք Ռուսաստանը դեռ պլանավորում է կամ արդեն հրահրել է»։

Լրատվամիջոցները հայտնում են, որ վաղ առավոտյան Զապորոժիե քաղաքում մի քանի պայթյուն է լսվել։ Օդային ռմբակոծության ազդանշանները հնչել են գիշերը 3:20-ի սահմաններում, պայթյուններ են լսվել առավոտյան ժամը 5-ից հետո:

Ինչպես հայտնել է Զապորոժիեի մարզի ղեկավարությունը իր տելեգրամյան ալիքում, ռուսական զորքերը 4 թևավոր հրթիռ են արձակել քաղաքի ուղղությամբ, դրանցից մեկը խոցվել է Ուկրաինայի հակաօդային պաշտպանության կողմից։

«Ներկայումս տուժած տարածքը հետազոտվում է, և դեպքի վայրում աշխատում են համապատասխան ծառայությունները»,- ասվում է հաղորդագրությունում։

Հունգարիայի վարչապետ Վիկտոր Օրբանը երեկ հայտարարել է, որ նոր արտակարգ դրություն է մտցնում երկրում՝ որպես պատճառ նշելով հարևան Ուկրաինայում շարունակվող պատերազմի հետ կապված մարտահրավերները։

Միևնույն ժամանակ, ինչպես հաղորդում է France-Presse լրատվական գործակալությունը, միայն հաջորդ երեքշաբթի է Հունգարիայում լրանում հերթական արտակարգ դրության ժամկետը, որը հայտարարվել էր կորոնավիրուսային համավարակի պատճառով։

«Աշխարհը տնտեսական ճգնաժամի շեմին է: Հունգարիան պետք է պաշտպանի իրեն պատերազմից և պաշտպանի իր քաղաքացիների ֆինանսական անվտանգությունը»,- գրել է Օրբանը Facebook-ում՝ մատնանշելով «մանևրելու և անհապաղ գործողությունների համար տարածքի» անհրաժեշտությունը։

Մոսկվայի և Կիևի միջև գերիների փոխանակման հարցի քննարկումը հնարավոր կլինի միայն հանձնված ուկրաինացի զինվորների դատավարությունից հետո, հայտարարել է Ռուսաստանի փոխարտգործնախարար Անդրեյ Ռուդենկոն։

«Մենք ամեն ինչ կքննարկենք այն բանից հետո, երբ գերի հանձնվածները պատշաճ կերպով կդատապարտվեն, դատավճիռ կկայացվի, հետո կարող են ինչ-որ այլ քայլեր լինել: Մինչ այդ փոխանակման մասին բոլոր խոսակցությունները վաղաժամ են», - ասել է Ռուդենկոն:

Ռուսաստանի և Ուկրաինայի միջև գերիների փոխանակման հարցն օրակարգում հայտնվեց, երբ Մարիուպոլի «Ազովստալ» գործարանի տարածքում պատսպարված հարյուրավոր ուկրաինացի զինվորականներ անցած շաբաթ հանձնվեցին ռուսական կողմին։

Ռուսաստանի նախագահ Վլադիմիր Պուտինը հրամանագիր է ստորագրել, որը Ուկրաինայի Խերսոնի և Զապորոժիեի մարզերի բնակիչներին իրավունք է տալիս պարզեցված կարգով ՌԴ քաղաքացիություն ստանալ։ Նրանք կկարողանան ռուսական անձնագիր ձեռք բերել նույն ընթացակարգով, ինչ Դոնբասի բնակիչները։

Փետրվարի 24-ին Ուկրաինա Ռուսաստանի ներխուժումից հետո Խերսոնի և Զապորոժիեի մարզերը մասամբ անցել են ռուսական զորքերի վերահսկողության տակ։ Խոսքը վերաբերում է Խերսոն մարզկենտրոնին և մարզի տարածքի մեծ մասին ու Զապորոժիեի մարզի մոտ կեսին: Զապորոժիե քաղաքը գտնվում է Ուկրաինայի վերահսկողության տակ։

Ուկրաինայի պատերազմում գրեթե 4 հազար խաղաղ բնակիչ է զոհվել, որից 259-ը երեխաներ են։

Ավելի քան 2 հազարը զոհվել են Դոնեցկի և Լուգանսկի մարզերում։ Վիրավորվել է ավելի քան 4 հազար 500 խաղաղ բնակիչ։ Այս մասին հայտնում է ՄԱԿ-ի Մարդու իրավունքների գրասենյակը։

Եվրամիությունը, Միացյալ Նահանգներն ու Մեծ Բրիտանիան միջազգային խումբ են ստեղծել՝ Ուկրաինայում ռազմական հանցագործությունները հետաքննելու համար:

Խորհրդատվական խմբի քրեական փորձագետների մեծ մասը գտնվելու է Լեհաստանում՝ անվտանգության նկատառումներով։ «Ռազմական հանցագործությունները չեն կարող անպատիժ մնալ»,- ասել է ԵՄ դիվանագիտության ղեկավար Ժոզեպ Բորելը

Երեկ առավոտյան Զապորոժիեի հրետակոծության հետևանքով կինոթատրոն, սրճարան, տասնյակ առանձնատներ, փոքր ու միջին ձեռնարկությունների տարածքներ են ավերվել, զոհվել է մեկ խաղաղ բնակիչ։ Այս մասին հայտարարել է Զապորոժիեի քաղաքային խորհրդի քարտուղար Անատոլի Կուրտևը։

ԱՄՆ դատապարտել է Զապորոժիեի և Խերսոնի բնակիչներին պարզեցված ընթացակարգով ՌԴ քաղաքացիություն տրամադրելու Պուտինի որոշումը։

Ռուսաստանի նախագահը մայիսի 25-ին հրամանագիր է ստորագրել Ուկրաինայի Զապորոժիեի և Խերսոնի շրջանների բնակիչներին Ռուսաստանի քաղաքացիություն տրամադրելու պարզեցված ընթացակարգի մասին։ ԱՄՆ պետքարտուղարության խոսնակ Նեդ Փրայսը հայտարարել է, որ ԱՄՆ-ը «խստորեն դատապարտում է Ռուսաստանի այս թեթև քողարկված քայլը, որը հանդիսանում է Ուկրաինայի ժողովրդին հնազանդեցնելու, իր կամքը ուժով պարտադրելու փորձերի մի մասը»։

Ռուսաստանի սևծովյան նավատորմը շարունակում է շրջափակված պահել ուկրաինական նավահանգիստները` խաթարելով առաջին անհրաժեշտության ապրանքների, այդ թվում` հացահատիկի և ձեթի արտահանումը։

Սև և Ազովի ծովերի նավահանգիստներում առնվազն 70 նավ մնացել է արգելափակված, որոնց 95 տոկոսը արտասահմանյան նավեր են։

Ստեղված իրավիճակի պատճառով Ուկրաինան միլիոնավոր դոլարների վնասներ է կրում։

«Եթե նախկինում մենք մոտավորապես 6 միլիոն տոննայի շրջանառություն ունեինք՝ օգտագործելով նավահանգիստներն ու այլ տրանսպորտային հանգույցներ, ապա հիմա ամիսը 600 հազարից 700 հազար տոննա՝ ցամաքային ճանապարհների ու Դանուբի միջոցով»,- «Ասոշիեյթեդ Փրեսին» ասել է ցորենի առևտրով զբաղվող գործարար Վիտալի Լավրովը։

Ղրիմի, Ազովի ափերին արված նկարահանումները վկայում են, որ նավագնացությունը գրեթե կանգ է առել։ 1-ին կարգի կապիտան, պահեստային Սերգեյ Գորբոչովը դիսփլեյի վրա ցույց է տվել, որ ծովի արևմտյան մասում ընդամենը մի քանի նավ կա։

«Ակնհայտ է, որ այնտեղ մարտական ակտիվության շրջան է, ականների ու օդային հարվածների իրական վտանգ կա», -ասել է նա։