Պատերազմ Ուկրաինայում (լայվ բլոգ, թարմացվող)

Ռուսաստանի հյուսիսում Նալչիկի կայազորային զինվորական դատարանը իրավաչափ համարեց Ռոսգվարդիայի 115 անդամների պաշտոնանկությունը, որոնք հրաժարվել էին պատերազմել Ուկրաինայի դեմ։ Սահմանից նրանք վերադարձել էին իրենց մշտական ծառայության վայրը, ինչի համար պաշտոնանկ էին արվել։

Իրենց ազատելու հրամանը նրանք վիճարկել են դատարանում, սակայն դատարանը նրանց գործողությունները մեկնաբանեց «ծառայողական խնդիրները կատարելու ինքնակամ մերժում` դրանով իսկ թույլ տալով կարգապահական կոպիտ խախտում»։

Ռուսաստանի նախագահ Վլադիմիր Պուտինը խոսել է Ռուսաստանին բարձր տեխնոլոգիաներից մեկուսացնելու Արևմուտքի փորձերի մասին` հայտարարելով, թե դա անհնարին է։

«Ժամանակակից աշխարհում դա ուղղակի անիրատեսական է, անհնարին է։ Եթե մենք ինքներս մեզ չառանձնացնենք ինչ-որ պատով, ապա ոչ մեկն ի վիճակի չէ մեկուսացնել այնպիսի երկիր, ինչպիսին Ռուսաստանն է։ Նրանք, ովքեր փորձում են պատժամիջոցներվ վնաս հասցնել Ռուսաստանին, վնասում են իրենց», - ասել է Պուտինը և նույնիսկ դրական համարել Ռուսաստանից արտասահմանյան ընկերությունների հեռանալը. նրա խոսքով` հայրենական բիզնեսը կզբաղեցնի ազատված տեղերը։

Ուկրաինայի արևելքում իրավիճակն ավելի վատ է, քան բոլորը կարծում են, զգուշացրել է երկրի արտգործնախարար Դմիտրի Կուլեբան։

Թվիթերում պատասխանելով իր հետևորդների հարցերին՝ Կուլեբան ասել է, որ Ուկրաինային ավելի շատ զենք է անհրաժեշտ:

«Զենք, զենք և կրկին զենք», - կրկնել է Ուկրաինան միջազգային հանրությանը ուղղված իր կոչում:

«Առանց հրետանու, առանց համազարկային կրակի ռեկտիվ համակարգերի մենք չենք կարողանա հետ մղել ռուսական զորքերը: Եթե դուք իսկապես մտածում եք Ուկրաինայի մասին, եթե ցանկանում եք, որ Ուկրաինան դեօկուպացնի իր տարածքները, հնարավորինս շուտ ուղարկեք մեզ համազարկային կրակի ռեկտիվ համակարգեր», - ասել է Կուլեբան՝ հավելելով, թե որոշ ժամանակ առաջ Միացյալ Նահանգների խոստացած այդ տեսակի զենքը դեռ տեղ չի հասել։

Մինչ Միացյալ Նահանգները և դաշնակիցները Ուկրաինային ավելի ու ավելի ժամանակակից սպառազինություն են մատակարարում, Վաշինգտոնը բանակցություններ է վարում Կիևի հետ իրավիճակի սրման վտանգի շուրջ, եթե ուկրաինական ռազմական հարվածները հասնեն Ռուսաստանի խորքեր: Երեկ այս մասին հաղորդել է Reuters լրատվական գործակալությունը՝ վկայակոչելով ԱՄՆ վարչակազմի պաշտոնյաներին և դիվանագիտական աղբյուրները:

Անդրկուլիսային քննարկումները, որոնք խիստ զգայուն են, և նախկինում դրանց մասին չի հաղորդվել, հստակ աշխարհագրական սահմանափակումներ չեն դնում ուկրաինական ուժերին մատակարարվող զենքի օգտագործման համար։

«Մենք անհանգստացած ենք էսկալացիայով, բայց, այնուամենայնիվ, չենք ցանկանում աշխարհագրական սահմանափակումներ դնել կամ նրանց ձեռքերը շատ կապել», - ասել է ամերիկյան վարչակազմի պաշտոնյան՝ անանուն մնալու պայմանով:

Վերջին մեկ օրվա ընթացքում Ուկրաինայի արևելքում գտնվող Սևերոդոնեցկում հրետակոծությունից չորս մարդ է մահացել, շրջանում մոտ 50 տուն է վնասվել, հայտնել է Լուգանսկի շրջանի ղեկավար Սերգեյ Գայդայը։

Նրա խոսքով՝ Սևերոդոնեցկի բնակիչներն արդեն մոռացել են, թե երբ է քաղաքում լռություն տիրել:

«Ռուսներն անընդհատ կրակում են բնակելի թաղամասերի վրա», - ասել է Գայդայը։

Ավելի վաղ Սևերոդոնեցկի քաղաքապետը հայտնել էր, որ քաղաքը գրեթե միշտ հրետակոծության տակ է, բնակելի ֆոնդի 60 տոկոսն ամբողջությամբ ավերված է, շենքերի մինչև 90 տոկոսը վնասված են և կապիտալ վերականգնման կարիք կունենան։

Գերմանիայի կանցլեր Օլաֆ Շոլցը կրկին վստահություն է հայտնել, որ Ռուսաստանի նախագահ Վլադիմիր Պուտինը չի հաղթի Ուկրաինայի պատերազմում։ «Նա արդեն չի կարողացել հասնել իր բոլոր ռազմավարական նպատակներին», - հայտարարել է Շոլցը՝ ելույթ ունենալով Դավոսի Համաշխարհային տնտեսական համաժողովում:

Կանցլերն ասել է, որ «Ռուսաստանի կողմից ողջ Ուկրաինայի գրավումն այսօր ավելի հեռու է թվում, քան պատերազմի սկզբում»։

Մեծ Բրիտանիայի վարչապետ Բորիս Ջոնսոնն այսօր ասել է, թե Ռուսաստանի նախագահ Վլադիմիր Պուտինի բանակն Ուկրաինայի արևելյան շրջանում առաջխաղացում է արձանագրում:

«Կարծես թե, Պուտինն իր և ռուսական զորքի համար ծանր գնով, այնուամենայնիվ շարունակում է նորանոր տարածքներ յուրացնել Դոնբասում: Նա շարունակում է թեպետ դանդաղ, բայց շոշափելի նվաճումներ գրանցել, ուստի, ծայրաստիճան անհրաժեշտ է, որ մենք շարունակենք աջակցել Ուկրաինայի բանակին»,- ասել է Ջոնսոնը:

Մեծ Բրիտանիայի վարչապետի համոզմամբ, Ուկրաինայի բանակին անհրաժեշտ են նոր զինատեսակներ, այդ թվում՝ համազարկային կրակի նոր ռեակտիվ հրթիռային համակարգեր:

«Պատերազմն ավարտելու մեկ այլ տարբերակն այն է, որ Պուտինն ընդունի, թե Ուկրաինայի դենացիֆիկացումն ավարտվել է և այդպես կարողանա արժանապատվորեն դուրս գալ Ուկրաինայից»,- ասել է Ջոնսոնը և անմիջապես ընդգծել, թե բնավ չի կիսում ռուսական կողմի ենթադրությունն այն մասին, որ Ուկրաինայում կան նացիստներ:

Բորիս Ջոնսոնի համոզմամբ, բոլոր դեպքերում Պուտինն ունի «քաղաքական առումով մանևրելու և պատերազմին վերջ տալու հնարավորություններ»:

Կրեմլի խոսնակ Դմիտրի Պեսկովն Ուկրաինային է մեղադրել խաղաղության բանակցությունների փակուղային վիճակի համար, ասելով, որ հայտնի չէ, թե ինչ է Կիևն ուզում:

«Նախ բանակցությունները սառեցված են, և դա ուկրաինական կողմի ընտրությունն է: Երկրորդ, ընդհանուր առմամբ Ուկրաինայի ղեկավարները մշտապես հանդես են գալիս իրարամերժ հայտարարություններով: Դա թույլ չի տալիս հասկանալ, թե ի վերջո ինչ են ուզում Կիևում, արդյո՞ք այնտեղ ըմբռնում են ներկայիս կացությունը և պատրաստ են իրատեսական մոտեցման»,- ասել է Պեսկովը:

Ուկրաինայի նախագահ Վլադիմիր Զելենսկին ավելի վաղ ասել է, թե բազմիցս փորձել է կազմակերպել հանդիպում ռուսաստանցի պաշտոնակից Վլադիմիր Պուտինի հետ, սակայն ռուսական կողմը պատրաստ չի եղել լրջորեն բանակցել խաղաղություն հաստատելու շուրջ:

Եվրոպական միության երկրները քննարկում են ռուսական նավթի ներկրումն արգելելու հնարավորությունը, պայմանով, որ բացառություն արվի այդ հարցում առարկություններ ներկայացրած Հունգարիայի համար:

Համաձայնության պարագայում Եվրամիությունը կկարողանա ուժի մեջ մտցնել Ռուսաստանի նկատմամբ պատժամիջոցների վեցերորդ փաթեթը:

Ենթադրվում է, որ համաձայնությունը կարող է ձեռք բերվել Բրյուսելում կիրակի օրը Եվրամիության դեսպանների հանդիպման ընթացքում, ինչից հետո այն հաստատման կներկայացվի մայիսի 30-31-ը կայանալիք ԵՄ գագաթնաժողովին: