Պատերազմ Ուկրաինայում (լայվ բլոգ, թարմացվող)

Բրյուսելում այսօր մեկնարկում է Եվրամիության անդամ պետությունների արտգործնախարարների հերթական հավաքը, որի ընթացքում կողմերը կրկին կփորձեն համաձայնեցնել Ռուսաստանի դեմ պատժամիջոցների վեցերորդ փաթեթը:

Reuters գործակալությունը արտգործնախարարների հավաքը պատժամիջոցները համաձայնեցնելու «հուսահատ փորձ» է անվանում՝ նշելով, որ ԵՄ ղեկավարությանը չի հաջողվել հաղթահարել դաշինքի ներսում առկա բոլոր տարաձայնությունները։

Reuters-ի աղբյուրները փոխանցել են, որ կիրակի օրը կայացած նիստի ընթացքում ԵՄ ներկայացուցիչներն ընդհանուր հայտարարի չեն եկել այն փոխզիջումային առաջարկի շուրջ, որի համաձայն պատժամիջոցները սահմանվում են բացառապես ծովային ճանապարհով մատակարվող ռուսական նավթի վրա, իսկ «Դրուժբա» խողովակաշարով Հունգարիա, Չեխիա և Սլովակիա առաքվող վառելիքը առժամանակ դուրս է բերվում սանկցիոն փաթեթից։

«Ռուսաստանի՝ Ուկրաինա ներխուժումից հետո մենք տեսանք թե ինչ կարող է լինել, եթե Եվրոպան միասնական հանդես գա։ Այդ միասնությունը, սակայն, սկսվում է խարխլվել», - նախօրեին հայտարարել է Գերմանիայի էկոնոմիկայի նախարար Ռոբերտ Հաբեկը։

Եվրատեսիլում հաղթանակ տարած ուկրաինական Kalush Orchestra խումբը 900 հազար դոլարով վաճառել է իր մրցանակը՝ բյուրեղապակե միկրոֆոնը, որպեսզի անօդաչու թռչող սարքեր գնի ուկրաինական բանակի համար։

Մրցանակը աճուրդի էր հանվել Ֆեյսբուքում։ Վաճառքը համընկավ Բեռլինում՝ Բրադենբուրգյան դարպասների մոտ խմբի բարեգործական համերգի հետ, որից ստացված միջոցները պետք է ուղղվեն ուկրաինական պատերազմի հետևանքով տուժածներին բժշկական օգնություն ցուցաբերելուն։

ՄԱԿ-ի տվյալների համաձայն, փետրվարի 24-ից՝ Ուկրաինա ռուսական ներխուժումից ի վեր զոհվել են 4 հազար 31 քաղաքացիական անձինք, զոհված զինվորականների թիվը չի նշվում, մոտ 14 միլիոն մարդ թողել է իր տունը։

Բելգրադն ու Մոսկվան գազի մատակարարման եռամյա պայմանագիր կկնքեն։ Այս մասին հայտարարել է Սերբիայի նախագահ Ալեքսանդր Վուչիչը՝ նշելով, որ այդ համաձայնությունը ձեռք է բերվել Ռուսաստանի նախագահի հետ բանակցությունների արդյունքում։

Սերբիայի նախագահը, սակայն, չի հստակեցրել, թե ինչ գնով է «Գազպրոմ» ընկերությունը պատրաստվում ռուսական գազը վաճառել Սերբիային։

«Կարող եմ միայն ասել, որ [գազի մատակարարման] հիմնական դետալների շուրջ ձեռք բերված պայմանավորվածությունները շատ շահավետ են Սերբիայի համար։ Գոնե այս պահին դա Եվրոպայում առկա լավագույնն գինն է։ Մենք պայմանագիրը ստորագրելու ենք երեք տարով, այլ ոչ թե մեկ ամսով, ինչպես ոմանք ակնկալում էին», - հայտարարում էր Վուչիչը։

Ուկրաինայի իշխանությունները թույլ են տվել երկրի հինգերորդ նախագահ Պյոտր Պորոշենկոյին հատել Լեհաստանի հետ սահմանը՝ Նիդերլանդներ ուղևորվելու նպատակով։ Այս մասին հաղորդում է Reuters գործակալությունը՝ նշելով, որ Պորոշենկոն երկիրը կարողացել է լքել երրորդ փորձից։

Նախկին նախագահն ուղևորվում է Ռոտերդամ՝ Եվրոպայի Ժողովրդական կուսակցության (EPP) հավաքին մասնակցելու համար։

Հանգստյան օրերին ուկրաինացի սահմանապահները նախկին նախագահին երկու անգամ չէին թույլատրել լքել երկրի տարածքը՝ անտեսելով անգամ Գերագույն ռադայի խոսնակի պաշտոնական թույլտվությունը։

Ուկրաինայի իշխանությունները թույլ են տվել երկրի հինգերորդ նախագահ Պյոտր Պորոշենկոյին հատել Լեհաստանի հետ սահմանը՝ Նիդերլանդներ ուղևորվելու նպատակով։ Այս մասին հաղորդում է Reuters գործակալությունը՝ նշելով, որ Պորոշենկոն երկիրը կարողացել է լքել երրորդ փորձից։

Նախկին նախագահն ուղևորվում է Ռոտերդամ՝ Եվրոպայի Ժողովրդական կուսակցության (EPP) հավաքին մասնակցելու համար։

Հանգստյան օրերին ուկրաինացի սահմանապահները նախկին նախագահին երկու անգամ չէին թույլատրել լքել երկրի տարածքը՝ անտեսելով անգամ Գերագույն ռադայի խոսնակի պաշտոնական թույլտվությունը։

Ռուսաստանի ՊՆ պնդում է, որ այսօր իրականացված հրետանային հարվածների հետևանքով Ուկրաինային փոխանցված արևմտյան սպառազինության ևս մեկ խմբաքանակ է ոչնչացվել։

«Խոսքը Իտալիայի կողմից Ուկրաինա առաքված 155 միլիմետր տրամաչափի հաուբիցների մասին է», - հայտնել է Ռուսաստանի ռազմական գերատեսչությունը՝ նշելով, որ հրանոթները հնարվոր է եղել հայտնաբերել հետախուզական անօդաչու թռչող սարքերի միջոցով։

Անկախ աղբյուրները Մոսկվայի տրամադրած այս տեղեկատվությունը դեռ չեն հաստատում։

Ֆրանսիայի նորանշանակ արտգործնախարարի խոսքով՝ Փարիզը կանի ամեն ինչ Ուկրաինայում խաղաղության վերահաստատման համար։ Ֆրանսիական դիվանագիտության ղեկավար Քրիստին Կոլոնան այս մասին հայտարարել է Կիևի մերձակա Բուչա քաղաք կատարած այցի շրջանակներում։

Կոլոնան ֆրանսիացի ամենաբարձրաստիճան պաշտոնյան է, որ այցելում է Կիևի փետրվարի 24-ից՝ ռուս-ուկրաինական պատերազմի մեկնարկից ի վեր։

Լուգանսկի վարչակազմի ղեկավար Սերգեյ Գայդայի պնդմամբ՝ այսօր ռուսական հրետանու հարվածի հետևանքով մարզի տարածքում ֆրանսիացի լրագրող է զոհվել։ Գայդայի խոսքով՝ հրետակոծության հետևանքով վնասվել է զրահապատ այն մեքենան, որով տեղաշարժվում էր ֆրանսիացի լրագրողը։

Մարզային վարչակազմի ղեկավարը չի բացահայտել զոհվածի ինքնությունը, սակայն ուկրաինական մի շարք աղբյուրներ հաղորդում են, որ դա ֆրանսիական առաջատար լրատվական հեռուստաալիքներից մեկի՝ BFM TV-ի թղթակից Ֆեդերիկ Լեկլեր Իմհոֆն է։

Միջադեպից հետո մարզային իշխանությունները հայտարարել են Սևերոդոնեցկում և Լիսիչանսկում մնացող խաղաղ բնակիչների տարհանման դադարեցման մասին։

Միացյալ Նահանգներն Ուկրաինային այնպիսի հրթիռային համակարգեր չի մատակարարի, որոնց միջոցով հնարավոր կլինի խոցել Ռուսաստանի տարածքում գտնվող թիրախները։ Այսօր Վաշինգտոնում լրագրողների հետ զրույցում նման հայտարարությամբ է հանդես եկել Միացյալ Նահանգների նախագահ Ջոզեֆ Բայդենը։

Ավելի վաղ ամերիկյան մի շարք լրատվամիջոցներ, մասնավորաբար CNN հեռուստաընկերությունն ու The Washington Post օրաթերթը, հաղորդել էին, որ ամերիկյան վարչակազմը հակված է նման զինատեսակներ տրամադրել ուկրաինական բանակին։ Խոսքը մասնավորաբար HIMARS տեսակի հրթիռային համակարգերի մասին է, որոնց գործողության շառավիղը կարող է հասնել 300 կիլոմետրի։

Ռուսաստանի և Թուրքիայի նախագահները այսօր կայացած հեռախոսազրույցի ընթացքում քննարկել են Ուկրաինայում ստեղծված կացությունը։

«Հեռախոսազրույցի ընթացքում Ռեջեպ Թայիփ Էրդողանը ընդգծել է Ուկրաինայում խաղաղության շուտափույթ հաստատման անհրաժեշտությունը», - հաղորդում է Թուրքիայի նախագահի մամուլի ծառայությունը` հավելելով, որ Էրդողանն իր ռուսաստանցի պաշտոնակցին նաև տեղեկացրել է, որ Անկարան «համապատասխան պայմանավորվածության ձեռքբերման դեպքում պատրաստ է դերակատարություն ստանձնել այն դիտորդական մեխանիզմում, որ կարող է ստեղծվել Կիևի, Մոսկվայի և ՄԱԿ-ի միջև»։

Կրեմլի տարածած հաղորդագրության համաձայն` Ռուսաստանի նախագահը Էրդողանին տեղեկացրել է, որ Մոսկվան պատրաստ է նպաստել բեռների անխափան ծովային փոխադրումների կազմակերպմանը, այդ թվում` ուկրաինական նավահանգիստներից ցորենի արտահանմանը։