Պատերազմ Ուկրաինայում (լայվ բլոգ, թարմացվող)

Եվրամիության առաջնորդները երկուշաբթի ուշ երեկոյան համաձայնեցրել են Ռուսաստանի դեմ պատժամիջոցների վեցերորդ փաթեթը, որը նախատեսում է մասնակի էմբարգո ռուսական նավթի ներկրման վրա և «Սբերբանկ»-ի անջատում SWIFT համակարգից։

Եվրամիության պետությունների և կառավարությունների ղեկավարները համաձայնության են եկել ռուսական նավթի երկու երրորդի ներմուծման էմբարգոյի շուրջ, հայտարարել է Եվրոպական խորհրդի ղեկավար Շառլ Միշելը Բրյուսելում, որտեղ անցկացվում է Ուկրաինայի հարցով ԵՄ արտակարգ գագաթնաժողովը։

Միշելի փոխանցմամբ՝ ևս երեք ռուսական պետական լրատվամիջոցների համար ԵՄ-ում հեռարձակման արգելք է սահմանվել։

ԵՄ առաջնորդները նաև պայմանավորվել են Ուկրաինային ուղարկել 9 միլիարդ եվրո օգնություն՝ պատերազմի պայմաններում տնտեսությանն աջակցելու համար։

Ուկրաինայի և Ռուսաստանի միջև բանակցությունները շարունակվում են, բայց միայն հումանիտար հարցերի շուրջ, երկուշաբթի օրը հայտարարել է Ուկրաինայի նախագահի գրասենյակի ղեկավարի խորհրդական Միխայիլ Պոդոլյակը։

Նրա խոսքով՝ դադարեցվել են ոչ միայն պաշտոնական բանակցությունները, այլև ոչ պաշտոնական խորհրդակցությունները։

Ռուսական «Գազպրոմ» կորպորացիան հայտարարել է հոլանդական GasTerra թրեյդերին գազի մատակարարումների ամբողջական դադարեցման մասին, երբ այն հրաժարվել է ռուբլով վճարել։

«Ապրիլի 1-ից մատակարարվող գազի դիմաց վճարումները պետք է կատարվեն ռուբլով՝ օգտագործելով նոր ռեկվիզիտներ, որոնց մասին ժամանակին տեղեկացվել են գործընկերները», - ասվում է «Գազպրոմ»-ի հաղորդագրությունում:

Մատակարարումների դադարեցումը նշանակում է, որ մինչև պայմանագրի ժամկետի ավարտը՝ հոկտեմբերի 1-ը, Նիդերլանդները մոտավորապես 2 միլիարդ խորանարդ մետր գազ չի ստանա։

Լուգանսկի շրջանի Սևերոդոնեցկը, որը վերջին օրերին դարձել է ռուսական հարձակման գլխավոր թիրախը, մասամբ անցել է ռուսական զորքերի վերահսկողության տակ։ Քաղաքում փողոցային մարտերը շարունակվում են, երեքշաբթի առավոտյան հայտնել է Լուգանսկի շրջանային վարչակազմի ղեկավար Սերհի Գայդայը։

Ավելի վաղ Պատերազմի ուսումնասիրման ամերիկյան ինստիտուտը ենթադրել էր, թե Սևերոդոնեցկի հնարավոր գրավմամբ ռուսական հարձակումը Դոնբասում կարող է կանգ առնել։ Ուկրաինական զորքերը կարող են ամրապնդվել Լիսիչանսկում՝ Սևերսկի Դոնեց գետի արևմտյան, բարձր ափին: Ռուսական զորքերին առայժմ չի հաջողվել շրջափակել Լիսիչանսկում գտնվող ուկրաինական ուժերին։

Երկրորդ կարևոր ուղղությունը, որով շարունակվում են Ռուսաստանի հարձակման փորձերը, Դոնեցկի մարզի հյուսիսում գտնվող Սլովյանսկ (Սլավյանսկ) քաղաքն է։

Մինչ այդ, անցած օրերին գրավված Լիման քաղաքով ռուսական զորքերը հասել են Սևերսկի Դոնեց։ Գետի վրայով անցնող կամուրջը քանդվել է։

Մի խումբ ռուսաստանցի օլիգարխներ Եվրամիության դատարանում վիճարկում են եվրոպական դաշինքի կողմից իրենց դեմ սահմանված պատժամիջոցները։ Հայցեր են ներկայացրել Ռոման Աբրամովիչը, Պյոտր Ավենը, Միխայիլ Ֆրիդմանը, ավելի վաղ բողոքներ են ներկայացրել նաև Ալեքսեյ Մորդաշովը և Ալիշեր Ուսմանովը։

Եվրամիության անդամ բազմաթիվ երկրների իշխանություններ, Միացյալ Նահանգների Կոնգրեսի անդամներ առաջարկում են առգրավել ռուսաստանցի միլիարդատերերի ակտիվները և դրանք փոխանցել Ուկրաինային։ Օրենքով նման առաջարկն իրագործել հնարավոր չէ, Եվրամիության պաշտոնյաները հայտարարել են, որ մտադիր են իրավական այլ ուղիներ փնտրել:

Լյուքսեմբուրգի դատարան դիմած ռուսաստանցի մեծահարուստները կտրականապես հերքում են իրենց մտերմությունը Կրեմլի հետ և պնդում, որ Վլադիմիր Պուտինի որոշումների վրա ազդելու որևէ լծակ չունեն։

Բաքու է ժամանել ԱՄՆ պետքարտուղարի էներգետիկ դիվանագիտության հարցերով խորհրդականի տեղակալ Լորա Լոքմանը, նրան այսօր ընդունել է Ադրբեջանի նախագահ Իլհամ Ալիևը։

Ադրբեջանական կողմի պաշտոնական հաղորդագրության համաձայն՝ հանդիպմանը քննարկվել է «Հարավային գազային միջանցքի» գործունեությունը, «ընդգծվել է Ադրբեջանի դերը Եվրոպայի էներգետիկ անվտանգության և գազամատակարարման դիվերսիֆիկացման գործում»։ «Տեղի է ունեցել մտքերի փոխանակում մեր երկրից Եվրոպա գազի արտահանման ծավալների ավելացման շուրջ», - հայտնում է Ադրբեջանի նախագահի մամլո ծառայությունը:

«Հարավային գազային միջանցքը» կառուցվել է Եվրամիության գազամատակարարումը դիվերսիֆիկացնելու և մատակարարման մեկ աղբյուր ունեցող եվրոպական երկրների թիվը նվազագույնի հասցնելու նպատակով: Մասնագետների գնահատմամբ՝ թեև ադրբեջանական գազը կարող է օգնել Եվրամիության երկրներին հրաժարվել ռուսական գազից, ծավալները, սակայն, բավարար չեն այն ամբողջությամբ փոխարինելու համար:

Մոսկվան շտապել է արձագանքել Սպիտակ տան ղեկավարի հայտարարությանը, թե Միացյալ Նահանգները Ուկրաինային չի տրամադրի հրթիռային համակարգեր, որոնք կարող են խոցել Ռուսաստանի տարածքում գտնվող թիրախները:

Ռուսաստանի Անվտանգության խորհրդի փոխնախագահ Դմիտրի Մեդվեդևը Ջո Բայդենի որոշումը գնահատել է «ողջամիտ»: «Հակառակ դեպքում, եթե հարձակում լիներ մեր քաղաքների վրա, Ռուսաստանի զինված ուժերը կիրականացնեին իրենց սպառնալիքը և կհարվածեին այդ հանցավոր որոշումների կենտրոններին», - Telegram-ում գրել է Մեդվեդևը։

Ուկրաինային նման հրթիռային համակարգեր չտրամադրելու որոշման մասին Բայդենը հայտարարել է նախօրեին: Թե ինչ զինատեսակների մասին է խոսքը, ԱՄՆ նախագահը չի հստակեցրել։

Ուկրաինայի խորհրդարանը պաշտոնանկ է արել մարդու իրավունքների պաշտպան Լյուդմիլա Դենիսովային։ Որոշմանը կողմ է քվեարկել 234, դեմ՝ 9 պատգամավոր։

Դենիսովան պաշտոնավարում է 2018 թվականի մարտից, նրա պաշտոնանկության գործընթացը նախաձեռնել են իշխող «Ժողովրդի ծառա» կուսակցության խմբակցության պատգամավորները։

Խորհրդարանական մեծամասնության ներկայացուցիչ Պավել Ֆրոլովը, Ֆեյսբուքում անդրադառնալով օմբուդսմենին հեռացնելու նախաձեռնությանը, նշել է, որ Դենիսովան ռուս զինվորականների կողմից ուկրաինացի երեխաների բռնաբարման դեպքերի մասին խոսել է «այլասերված ձևով», և որ նրա պնդումները հետագայում այդպես էլ չեն հաստատվել:

Բացի այդ, իշխող ուժի պատգամավորի խոսքով, մարդու իրավունքների պաշտպանը չի մասնակցել պատերազմի գոտում հումանիտար միջանցքների կազմակերպման գործընթացներին և պատերազմի ընթացքում նախընտրել է մնալ Արևմտյան Եվրոպայում։

Դենիսովան նախօրեին ապօրինի է գնահատել իրեն պաշտոնանկ անելու նախաձեռնությունը:

Միացյալ Նահանգների նախագահ Ջո Բայդենը երեկ հայտարարել է, որ Վաշինգտոնը Կիևին կտրամադրի ավելի կատարելագործված հրթիռային համակարգեր և զինամթերք, որպեսզի ուկրաինական զորքերն «առավել ճշգրիտ խոցեն մարտադաշտի հիմնական թիրախները»:

Երեքշաբթի օրը The New York Times-ի կայքում հրապարակված հոդվածում Բայդենը նշել է. - «Մենք արագ անցանք Ուկրաինային զգալի քանակությամբ զենք և զինամթերք ուղարկելուն, որպեսզի կարողանան կռվել մարտի դաշտում և հնարավորինս ամուր դիրք գրավեն բանակցությունների սեղանի շուրջ»:

Բայդենի վարչակազմը երեքշաբթի օրը հայտարարեց, որ Ուկրաինա կուղարկի փոքր թվով բարձրտեխնոլոգիական միջին հեռահարության հրթիռային համակարգեր՝ կարևորագույն զենք, որն Ուկրաինայի ղեկավարներն ավելի վաղ խնդրել էին Արևմուտքից:

Ուկրաինայի նախագահ Վլադիմիր Զելենսկին վստահեցրել է, որ ուկրաինական բանակն ամերիկյան հրթիռները չի օգտագործի ռուսաստանյան տարածքներ խոցելու համար:

Newsmax-ին տված հարցազրույցում Զելենսկին ասել է, որ Ուկրաինան հետաքրքրված չէ ռուսական տարածքներով, միևնույն ժամանակ ընդգծել, որ Ռուսաստանի նախագահ Վլադիմիր Պուտինը չի կարող հաղթել, և «աշխարհը պետք է դադարի պաշտպանել նրան՝ հատկապես Ուկրաինայում ռազմական հանցագործությունների ֆոնին»։

Զելենսկու խոսքով՝ Ուկրաինան օրական կորցնում է 60-100 զինծառայող, ևս մոտ 500-ը վիրավորվում են։

Ուկրաինան երկրի նախագահն անվանել է «պաշտպանական բնագիծ» և «ֆիզիկական արգելք» ռուսական ագրեսիայի համար։