Պատերազմ Ուկրաինայում (լայվ բլոգ, թարմացվող)

Դանիան հայտարարել է, որ Մոսկվայում իր դեսպանատունն այլևս չի ընդունի դիմումներ վիզաների և բնակության թույլտվության համար։

Դիվանագիտական առաքելությունը որպես պատճառ նշել է անձնակազմի պակասը՝ մայիսին պաշտոնական Մոսկվայի կողմից դեսպանատան չորս դիվանագետի և երեք այլ աշխատակցի արտաքսելուց հետո:

Ըստ հաղորդագրության՝ որոշումը ժամանակավոր է, թեև չի նշվում, թե որքան ժամանակ է այն ուժի մեջ մնալու:

Գերմանիան Ուկրաինային հակաօդային պաշտպանության համակարգեր կտրամադրի։ Այսօր Գերմանիայի խորհրդարանի ստորին պալատում՝ Բունդեսթագում հնչեցրած ելույթում այդ մասին հայտարարել է դաշնային կանցլեր Օլաֆ Շոլցը։

«Մենք Ուկրաինային կտրամադրենք նաև հատուկ ռադարներ, որոնց միջոցով հնարավոր կլինի տեղորոշել հակառակորդի հրանոթներն ու հրթիռային համակարգերը։ Սա Ուկրաինայի անվտանգության ապահովմանն ուղղված ևս մեկ որոշում է։ Մենք ճշտությամբ անուն ենք այն ամենն, ինչ հնարավոր է։ Այնպես որ ընդդիմության՝ մեր հասցեին հնչեցվող մեղադրանքները իրականությանը չեն համապատասխանում», - նշում էր Շոլցը։

«Թուրքիան օգնություն կտրամադրի ուկրաինական նավահանգիստների ականազերծման հարցում», - այսօր Սաուդյան Արաբիայի մայրաքաղաք Էր-Ռիյադում կայացած մամուլի ասուլիսի ժամանակ հայտարարել է Ռուսաստանի ԱԳ նախարար Սերգեյ Լավրովը։ Նման պայմանավորվածություն են ձեռք բերել Ռուսաստանի և Թուրքիայի նախագահները։

«Նախագահների զրույցի արդյունքում պայմանավորվածություն է ձեռք բերվել, որի համաձայն թուրք գործընկերները կփորձեն օգնել ուկրաինական նավահանգիստների ականազերծումը կազմակերպելու հարցում։ Դա թույլ կտա ազատագրել այնտեղ, ընտ էության, պատանդառված նավերը՝ զարգացող պետությունների համար անհրաժեշտ բեռներով հանդերձ», - հայտարարել է ռուսական դիվանագիտության ղեկավարը։

2021 թվականի Նոբելյան Խաղաղության մրցանակի դափնեկիր, ռուսաստանցի լրագրող Դմիտրի Մուրատովը մրցանակը ներկայացրել է աճուրդի, որը կիրականացնի Heritage Auctions տունը:

Մուրատովը վաճառքից ակնկալվող ամբողջ գումարը փոխանցելու է ՄԱԿ-ի Մանկական հիմնադրամին՝ ՅՈՒՆԻՍԵՖ-ին, որն իր խողովակներով օգնություն կտրամադրի ուկրաինացի փախստական-երեխաներին և նրանց ընտանիքներին:

Աճուրդը մեկնարկել է Երեխաների պաշտպանության միջազգային օրը՝ հունիսի 1-ին, և կավարտվի հունիսի 20-ին՝ Փախստականների միջազգային օրը:

«Փողը կտրամադրվի փախստական երեխաներին՝ Եվրոպայում, Ուկրաինայում կամ Ռուսաստանում, աշխարհում այլևս չկան օտար փախստականներ», - ասել է Նոբելյան Խաղաղության մրցանակի դափնեկիրը:

Անցյալ տարվա դեկտեմբերին Մուրատովն իր մրցանակը՝ մոտ 40 միլիոն ռուբլու չափով, փոխանցել է ռուսական բարեգործական հիմնադրամներին:

Միացյալ Նահանգները քննարկում է Ուկրաինային մեծ մարտական անօդաչու թռչող սարքերի վաճառքի հարցը: Այդ չորս անօդաչուները ԱՄՆ-ը լայնորեն կիրառել է Աֆղանստանում, հաղորդում է Reuters-ը՝ վկայակոչելով իրավիճակին ծանոթ երեք աղբյուրների։

Grey Eagle անօդաչուները, ըստ փորձագետների, մոտ երեք անգամ հզոր են թուրքական Bayraktar-ներից, որոնք ակտիվորեն օգտագործվում են այսօր: Gray Eagle-ը կարող է համալրվել ավելի հզոր զենքերով, մասնավորապես՝ Hellfire հրթիռներով: Բացի այդ, Gray Eagle-ը կարողանում է շատ ավելի երկար մնալ օդում և ավելի շատ հետախուզական տվյալներ հավաքել թռիչքի ժամանակ:

Ուկրաինային այս անօդաչուները վաճառելու որոշումը դեռ կարող է արգելափակվել Կոնգրեսի կողմից, նաև կարող է լինել «քաղաքականության փոփոխություն» Բայդենի վարչակազմում, ասել են Reuters-ի աղբյուրները։

Այս գիշեր Լվովի մարզը հրթիռակոծվել է Սև ծովից: Մարզի ղեկավար Մաքսիմ Կոզիցկու վկայությամբ՝ հարված է հասցվել երկաթուղային ենթակառուցվածքին։ Վիրավորվել է հինգ մարդ։

Խարկովի մարզի ղեկավար Օլեգ Սինեգուբովը հայտնել է, որ գիշերը ռուս զինվորականները հրետակոծել են Խարկովի Կիևի և Սլոբոդսկոյ շրջանները։ Նրա խոսքով՝ արկերից մեկն ընկել է դպրոցի վրա: Հրետակոծության հետևանքով մի կին է մահացել։

Սումիի մարզային վարչակազմի ղեկավարի վկայությամբ՝ գիշերը Ռուսաստանը երեք հրթիռային հարված է հասցրել Կրասնոպոլսկի համայնքի տարածքին։ Ավերվել է մեկ տուն, ևս մի քանիսը վնասվել են։ Նախնական տվյալներով՝ տուժել է առնվազն երեք մարդ։