Պատերազմ Ուկրաինայում (լայվ բլոգ, թարմացվող)

CNBC հեռուստաընկերության փոխանցմամբ, Նյու Յորքի դաշնային դատավորը վավերացրել է ռուսաստանցի մեծահարուստ Ռոման Աբրամովիչին պատկանող երկու մասնավոր օդանավերի վրա կալանք սահմանելու ԱՄՆ-ի արդարադատության նախարարության հրամանագիրը:

CNBC-ի փոխանցմամբ, խոսքը Boeing 787-8 Dreamliner և Gulfstream G650ER օդանավերի մասին է: Համաձայն դատարանի տվյալների, Boeing-ը գտնվում է Դուբայում, իսկ Gulfstream-ը՝ Ռուսաստանում:

Աբրամովիչը ներառված չէ Ռուսաստանի նկատմամբ Միացյալ Նահանգների սահմանած պատժամիջոցների ցանկերում, բայց ֆինանսների նախարար Ջանեթ Ելենը չի բացառել դրա հնարավորությունը:

Ճապոնիան ընդլայնել է պատժամիջոցների ցանկը՝ դրանում ներառելով երկու խոշոր ռուսական և մեկ բելառուսական բանկ:

Պատժամիջոցներ են սահմանվել Մոսկովյան վարկային բանկի, «Ռոսսելխոզբանկ»-ի և «Բելինվեստբանկ»-ի նկատմամբ։

Մոսկովյան վարկային բանկը և «Ռոսսելխոզբանկ»-ը՝ Ռուսաստանի, «Բելինվեստբանկ»-ը՝ Բելառուսի խոշորագույն բանկերի տասնյակում են։

Վլադիմիր Զելենսկու խոսքով՝ չնայած այն հանգամանքին, որ Սևերոդոնեցկում անհավասար մարտեր են ընթանում, ուկրաինական զորքերն այդտեղ հաջողության հասնելու իրական շանսեր ունեն։ Այս մասին Ուկրաինայի նախագահը հայտարարել է երկուշաբթի ուշ երեկոյան Կիևում կայացած մամուլի ասուլիսի ժամանակ։

«Իրադրությունն արևելքում, մասնավորաբար՝ Սևերոդոնեցկում, բարդ է։ Մենք, սակայն, դիմանում ենք։ Ռուսական ուժերն ավելի ուժեղ են, քանակական առումով ևս նրանք մեզ գերազանցում են։ Չնայած այդ ամենին՝ ես կարծում եմ, որ մենք այդ ուղղությամբ [հաջողությամբ] պայքարելու բոլոր շանսերն ունենք», - հայտարարում էր Ուկրաինայի նախագահը։

Փետրվարի 24-ից՝ Ռուսաստանի և Ուկրաինայի միջև ռազմական գործողությունների սկզբից ի վեր գերեվարված ուկրաինացի զինվորականների թիվը գերազանցում է 6 հազարը։ Այսօր Մոսկվայում այդ մասին հայտարարել է Ռուսաստանի պաշտպանության նախարար Սերգեյ Շոյգուն։

«Գերեվարված ուկրաինացի զինծառայողների ընդհանուր թիվը հասել է 6 հազար 489-ի։ Վերջին հինգ օրերին գերի է հանձնվել Ուկրաինայի զինված ուժերի 126 զինծառայող», - ասել է Շոյգուն։

Ռազմական գործողությունների ընթացքում ռուսական ուժերի վերահսկողության տակ անցած տարածքներում կենսական ենթակառույցների աշխատանքը խափանված չէ, վստահեցրել է Սերգեյ Շոյգուն:

«Մարիուպոլի և Բերդյանսկի նավահանգիստները պատրաստ են սկսել հացահատիկի առաքումները։ Բնականոն կերպով է աշխատում նաև Եվրոպայի խոշորագույն՝ Զապորոժիեի ատոմակայանը», - նշել է Ռուսաստանի պաշտպանության նախարարը։

«Մոսկվան մտադիր չէ հրաժարվել Խերսոնի և Զապորոժիեի մարզերի կարգավիճակի շուրջ Ուկրաինայի հետ քննարկումներից», - այսօր հայտարարել է Կրեմլի պաշտոնական ներկայացուցիչ Դմիտրի Պեսկովը՝ մեկնաբանելով մամուլում հայտնված այն տեղեկությունները, որոնց համաձայն Ռուսաստանի իշխանությունները Կիևի հետ խաղաղ համաձայնագրի կնքման դեպքում այս երկու մարզերի պատկանելության հարցին չեն անդրադառնալու։

«Դա այդպես չէ, դա սխալ տեղեկատվություն է», - լրագրողների հետ զրույցում այսօր նշել է Պեսկովը։

Գերմանիայի դաշնային կանցլեր Օլաֆ Շոլցի խոսքով՝ Կիևին զենքի մատակարարումների առումով Գերմանիան աշխարհի առաջատարներից մեկն է։ «Քչերն են Ուկրաինային այնքան սպառազինություն տրամադրել, որքան Գերմանիան», - հայտարարել է դաշնային կառավարության ղեկավարը Լիտվա կատարած այցի ընթացքում։

«Գերմանիան Ուկրաինայի գլխավոր աջակիցներից մեկն է։ Որևէ մեկը մեր չափ զենք ուկրաինացիներին չի տրամադրել։ Կան, իհարկե, որոշ երկրներ, որոնք ավելին են անում, առաջին հերթին՝ Միացյալ Նահանգները, սակայն Գերմանիան ևս մեծածավալ ներդրում ունի այս գործում։ Մենք Ուկրաինային հակատանկային սպառազինություն, հակաօդային պաշտպանության համակարգեր, մեծ ծավալի զինամթերք ենք տրամադրել», - հայտարարում էր Օլաֆ Շոլցը։

Ռուսաստանի արտգործնախարար Սերգեյ Լավրովն այսօր այցելում է Թուրքիա։

Ռուսաստանի դիվանագիտական գերատեսչության հաղորդագրության համաձայն` Անկարայում Լավրովը բանակցություններ կանցկացնի իր թուրք պաշտոնակից Մևլյութ Չավուշօղլուի հետ։

«Նախարարները տեսակետներ կփոխանակեն ուկրաինական ճգնաժամի, ներկա վիճակի, ինչպես նաև ռուս-ուկրաինական խաղաղ բանակցությունների վերսկսման հեռանկարների շուրջ», - նշված է հաղորդագրությունում։

Նույն աղբյուրի փոխանցմամբ՝ Լավրովն ու Չավուշօղլուն այլ թեմաների շարքում անդրադառնալու են նաև Անդրկովկասում ստեղծված կացությանը։