Պատերազմ Ուկրաինայում (լայվ բլոգ, թարմացվող)

Միացյալ Նահանգներում Ռուսաստանի դեսպանատունը երեկ հաղորդագրություն է տարածել, որում պնդում է, թե Վաշինգտոնն անպատասխանատու մոտեցում է ցուցաբերում՝ Կիևին տրամադրելով հեռահար հրետանային համակարգեր՝ չնայած էսկալացիայի վտանգին։

«Հիմնական ռիսկը հակամարտության սրումն է, եթե Ուկրաինայի զինված ուժերն օգտագործեն այդ համակարգերը Ռուսաստանի Դաշնության տարածքին հարվածելու համար: Սա հղի է անկանխատեսելի հետևանքներով», - մասնավորապես ասված է հաղորդագրությունում։

Փետրվարի 24-ից՝ Ռուսաստանի զինված ուժերի ներխուժումից ի վեր Ուկրաինայում առնվազն 4 հազար 253 խաղաղ բնակիչ է զոհվել, այդ թվում 272-ը՝ երեխա։ Այս մասին հաղորդում է ՄԱԿ-ի Մարդու իրավունքների գերագույն հանձնակատարի գրասենյակը նոր զեկույցում:

Զեկույցի համաձայն՝ ևս 5 հազար 141 քաղաքացիական անձ վիրավորվել է։

Ռուսաստանի Պետդուման երրորդ ընթերցմամբ ընդունել է Մարդու իրավունքների եվրոպական դատարանի (ՄԻԵԴ)` 2022 թվականի մարտի 15-ից հետո կայացրած որոշումները չկատարելու մասին օրենքների փաթեթը։ Այդ մասին հայտնում է Դումայի կայքը։

Ինչպես օրեր առաջ հայտարարել էր Պետդումայի խոսնակ Վյաչեսլավ Վոլոդինը, մինչև մարտի 15-ը ուժի մեջ մտած վճիռներով սահմանված փոխհատուցումները կվճարվեն միայն ռուբլով, փոխանցումները պետք է իրականացվեն միայն ռուսաստանյան բանկային հաշիվներին:

Մարտի 15-ին Ռուսաստանը դուրս է եկել Եվրախորհրդից:

Ըստ ռուսական լրատվամիջոցների՝ ընդունված օրենսդրությամբ սահմանվել է, որ ՄԻԵԴ որոշումներն այլևս հիմք չեն համարվի ռուսական դատարանների որոշումների վերանայման համար, և ռուսական դատարանների որոշումները կգերակայեն ՄԻԵԴ վճիռների նկատմամբ:

Համաշխարհային բանկը (ՀԲ) կանխատեսում է 2022 թվականին Ուկրաինայի համախառն ներքին արդյունքի (ՀՆԱ) 45 տոկոս անկում։ Ռուսաստանում տնտեսական անկումը կկազմի 8,9 տոկոս, ըստ ՀԲ-ի:

Ռուսաստանի ներխուժումն Ուկրաինա խաթարել է ուկրաինական արդյունաբերական հատվածը, հանգեցրել ենթակառուցվածքների ոչնչացմանը, բնակչության կտրուկ նվազմանը, ասվում է համաշխարհային տնտեսության հեռանկարների վերաբերյալ Համաշխարհային բանկի զեկույցում:

Իր հերթին, Ուկրաինա ներխուժումը, արտասահմանյան ընկերությունների հեռանալը, պատժամիջոցները ծանր հարված են հասցրել Ռուսաստանի տնտեսությանը, սակայն էներգակիրների արտահանման եկամուտները կառավարությանը թույլ են տալիս ֆինանսավորել բյուջեի ծախսերը, ընդգծում է ՀԲ-ը:

Ուկրաինայի դեմ Ռուսաստանի պատերազմը բացասաբար է անդրադառնում նաև համաշխարհային տնտեսության վրա։ Համաշխարհային բանկը կրճատել է գլոբալ տնտեսական աճի իր կանխատեսումը ավելի քան կիսով չափ՝ մինչև 1,2 տոկոս։

Լուգանսկի նահանգապետ Սերգեյ Գայդայը, այսօր մեկնաբանելով Սևերոդոնեցկում ծավալված ռազմական գործողությունների ընթացքը, չի բացառել, որ այստեղ մարտնչող ուկրաինական ստորաբաժանումները կարող են նահանջել։

«Մարտերը շարունակվում են, սակայն որևէ մեկը քաղաքը թողնել չի պատրաստվում, անգամ եթե մեր զինվորականները ստիպված լինեն նահանջել՝ ավելի շահեկան դիրքեր զբաղեցնելու նպատակով։ Դա չի նշանակում, որ քաղաքը թողնելու ենք, պարզապես չի բացառվում, որ մեր ստորաբաժանումները ստիպված լինեն հետ քաշվել», - հայտարարել է Գայդայը։

Եթե Ուկրաինան համաձայնի ականազերծել իր վերահսկողության տակ գտնվող նավահանգիստները, Ռուսաստանը պատրաստ է երաշխիքներ մշակել առ այն, որ Կիևի այդ քայլը Մոսկվայի կողմից չի օգտագործվի «հատուկ գործողության» ընթացքում: Այսօր Անկարայում Թուրքիայի ԱԳ նախարար Մևլյութ Չավուշօղլուի հետ բանակցությունների ընթացքում նման հայտարարությամբ է հանդես եկել Ռուսաստանի դիվանագիտական գերատեսչության ղեկավար Սերգեյ Լավրովը։

Դրա հետ մեկտեղ, ռուսական դիվանագիտության ղեկավարը պնդել է, որ ուկրաինական հացահատիկի՝ նավահանգիստներում արգելափակված լինելու փաստը համաշխարհային պարենային անվտանգության վրա որևէ կերպ չի ազդում։ «Ուկրաինայում աճեցված հացահատիկի մասնաբաժինը չի գերազանցում համաշխարհային արտադրության 1 տոկոսը», - հայտարարել է Լավրովը։

Խոսելով Ուկրաինայի և Ռուսաստանի նախագահների հնարավոր բանակցությունների մասին՝ Լավրովը նշել է, որ նման հանդիպմանը պետք է նախորդեն երկու երկրների պատվիրակությունների բանակցությունները։ «Գնդակը Ուկրաինայի դաշտում է», - հավելել է ՌԴ ԱԳ նախարարը։

«Ուկրաինական ճգնաժամը պետք է հանգուցալուծվի Կիևի համար ընդունելի պայմաններով», - այսօր Եվրախորհրդարանում ունեցած ելույթում հայտարարել է Եվրամիության արտաքին հարաբերությունների գծով բարձր ներկայացուցիչ Ժոզեպ Բորելը:

Եվրոպական դիվանագիտության ղեկավարի խոսքով՝ «պատերազմը պետք է ավարտվի Ուկրաինայի ինքնիշխանության և միջազգայնորեն ճանաչված սահմաններում տարածքային ամբողջականության սկզբունքները հարգելով»։

«Եվրամիությունը վճռականորեն պաշտպանելու է Ուկրաինային, իսկ դաշինքի պաշտպանական փաստաթղթերում հստակորեն խոսվելու է նաև Վրաստանին, Մոլդովային և Հարավային Կովկասի պետություններին օգնություն տրամադրելու մասին», - Ժոզեպ Բորելի խոսքերն է փոխանցում «Ինտերֆաքս» գործակալությունը։

Ուկրաինայի պաշտպանության նախարար Ալեքսեյ Ռեզնիկովն ասել է, որ ռազմաճակատում իրավիճակը ծանր է։ «Յուրաքանչուր օր մենք մինչև 100 զինվոր ենք կորցնում, շուրջ 500-ը վիրավորվում են։ Կրեմլը շարունակում է ճնշել զանգվածով, տեղապտույտ են տալիս, հզոր դիմադրության հանդիպում, մեծ կորուստներ կրում, բաց դեռ ուժեր ունեն ռազմաճակատի առանձին հատվածներում առաջ շարժվելու համար», - Ֆեյսբուքի իր էջում գրել է Ռեզինկովը։

Պատերազմի 104-րդ օրը Ուկրաինայի Զինված ուժերի գլխավոր շտաբը հայտնում է, որ ռուսական ուժերը գրոհում են Բոգորոդիչնևոյի շրջանում, որն ընկած է Դոնեցկի մարզի Սլավյանսկ և Կրամատորսկ քաղաքների ճանապարհին։

Խարկովի քաղաքային իշխանությունները այսօր հայտնում են, որ չորեքշաբթի ուշ երեկոյան ռուսական ուժերի հրետակոծման հետևանքով առնվազն 3 մարդ է զոհվել, ևս հինգը վիրավորվել են։

Արտակարգ իրավիճակների տեղական ծառայությունը հաղորդում է, որ հավանաբար հրթիռ է հարվածել հարևանությամբ սուպերմարկետին, սրճարանին ու դպրոցական գրադարանին։ Հրթիռակոծված տեղանքը այսօր մաքրվում էր փլատակներից ու բեկորներից։