Պատերազմ Ուկրաինայում (լայվ բլոգ, թարմացվող)

Մարտական գործողությունների 106-րդ օրը Կրեմլի խոսնակը հայտարարել է, թե Ուկրաինայում պատերազմը կավարտվի այն ժամանակ, երբ ռուսական կողմը հասնի Պուտինի նախանշած բոլոր նպատակներին։

«Նախագահ Պուտինը նշել է այս հատուկ ռազմական գործողության առաջադրանքները, և այդ խնդիրների կատարումը կնշանակի հատուկ ռազմական գործողության ավարտ», - ասել է Դմիտրի Պեսկովը։

Ավելի վաղ Պետդումայի պատգամավոր Ադամ Դելիմխանովը հայտարարել էր, որ Ուկրաինայում Ռուսաստանի «հատուկ ռազմական գործողությունը» կարող է ավարտվել մինչև այս տարվա վերջ։ Ինքը՝ Դմիտրի Պեսկովն էլ օրերս ասել էր, թե Ուկրաինայում ռուսական «հատուկ ռազմական գործողության» հիմնական միջանկյալ արդյունքներից մեկը բազմաթիվ բնակավայրերի ազատագրումն է «ազգայնական տարրերից»։

Ուկրաինայի նախագահ Վլադիմիր Զելենսկին ասել է, թե Սևերոդոնեցկի մարտերով որոշվում է Դոնբասի ճակատագիրը. «Սա շատ դաժան ճակատամարտ է, շատ դժվար: Թերևս ամենադժվարներից մեկն այս պատերազմի ընթացքում: Ես երախտապարտ եմ յուրաքանչյուրին: Շատ առումներով մեր Դոնբասի ճակատագիրը այժմ որոշվում է այնտեղ»։

Independent-ը, հղում անելով բրիտանական հետախուզությանը, գրում է. «Դոնբասում ռուսական զորքերը տասնյակ անգամ գերազանցում են ուկրաինացիներին հրետանու և զինամթերքի քանակով, ինչը ճնշող ազդեցություն է թողնում ուկրաինացի զինվորների բարոյահոգեբանական վիճակի վրա»։

Սակայն չնայած բոլոր այս դժվարություններին, սպառազինության պակասին ու ռուսական ուժերի առաջխաղացմանը, Զելենսկին վերստին հայտարարել է, որ Կիևի նպատակն է դուրս հանել ռուսական զորքերը երկրի ամբողջ տարածքից։

Ուկրաինայի նախագահ Վլադիմիր Զելենսկին անժամկետ պատժամիջոցներ է սահմանել Ռուսաստանի նախագահ Վլադիմիր Պուտինի, վարչապետ Միխայիլ Միշուստինի, կառավարության գրեթե բոլոր մնացած անդամների, ՌԴ Անվտանգության խորհրդի քարտուղար Նիկոլայ Պատրուշևի և Կրեմլի խոսնակ Դմիտրի Պեսկովի նկատմամբ:

Ընդհանուր հաշվով ցանկում 35 քաղաքական գործիչ է: Պատժամիջոցները ենթադրում են ակտիվների արգելափակում, առևտրային գործառնությունների սահմանափակում և Ուկրաինա մուտք գործելու արգելք:

Սանկցիաներ են սահմանվել նաև ռուսական 236 բուհերի և դրանց 261 ղեկավարների նկատմամբ: Այդ ցուցակում են Մոսկվայի Միխայիլ Լոմոնոսովի անվան Պետական համալսարանը և դրա ռեկտոր՝ Ուկրաինայում ծնված Վիկտոր Սադովնիչին:

Զելենսկու հրամանագրով դադարեցվել է երկու երկրների համագործակցությունը մշակույթի, գիտության, կրթության և սպորտի բնագավառներում:

EFE իսպանական միջազգային լրատվական գործակալությունը հայտնել է, որ Ուկրաինայի նախագահ Վլադիմիր Զելենսկուն կհրավիրեն Իսպանիայի մայրաքաղաք Մադրիդում հունիսի 28-30-ը կայանալիք ՆԱՏՕ-ի գագաթնաժողովին:

Իսպանիայի կառավարությունը ՆԱՏՕ-ի և այլ հաստատությունների հետ ավարտում է գագաթնաժողովի նախապատրաստման աշխատանքը:

Դաշինքը դեռ պետք է հավանություն տա որոշմանը: Ենթադրվում է, որ առաջիկայում Հյուսիսատլանտյան դաշինքը պաշտոնապես կհրապարակի Ուկրաինայի ղեկավարին հրավիրելու որոշումը:

Bloomberg ամերիկյան լրատվական գործակալության փոխանցմամբ՝ Եվրոպական հանձնաժողովը հունիսի 17-ին կառաջարկի Ուկրաինային շնորհել Եվրամիության անդամի թեկնածուի կարգավիճակ:

Առաջարկի տեքստում տեղ կգտնեն Ուկրաինայում օրենքի գերակայություն ապահովելու և կոռուպցիայի դեմ պայքարը խստացնելու պահանջներ:

Եվրոպական հանձնաժողովն այդ առաջարկը Եվրամիության գագաթնաժողովի քննարկմանը կներկայացնի հունիսի 23-24-ը Բրյուսելում կայանալիք գագաթնաժողովին:

Վերլուծաբանների համոզմամբ, անդամի կարգավիճակ ստանալու դեպքում Եվրամիությանն Ուկրաինայի անդամակցության գործընթացը կարող է մոտ մեկ տասնամյակ տևել:

Ճապոնիան, որպես պատժամիջոցների նոր փաթեթի մաս, հունիսի 17-ից կարգելի բեռնատարների, ինքնաթափ մեքենաների և բուլդոզերների արտահանումը Ռուսաստան։

Երկրի էկոնոմիկայի նախարարության կայքում հրապարակված փաստաթղթի համաձայն՝ Ռուսաստան արտահանման համար արգելված ապրանքների ցանկը ներառում է նաև փայտանյութի որոշ տեսակներ, հաստոցների պահեստամասեր և մի շարք այլ ապրանքներ:

ԱՄՆ ֆինանսների նախարար Ջանեթ Յելենն ասել է, որ «երկրների մեծ խմբի» կողմից Ռուսաստանի դեմ պատժամիջոցների սահմանումը «կբարձրացներ դրանց արդյունավետությունը»:

«Իմ կարծիքով՝ մեզ անհրաժեշտ է երկրների բավականին մեծ խումբ, որը կհամաձայնի պատժամիջոցներ կիրառել Ռուսաստանի դեմ», - հայտարարել է Յելենը։

Ռուսաստանը Ճապոնիային կզրկի Կուրիլյան կղզիների շրջանում ձկնորսության իրավունքից, քանի որ ճապոնական կողմը չի վճարել համապատասխան քվոտայի համար։ Այս մասին ուրբաթ օրը լրագրողներին հայտնել է փոխվարչապետ, Հեռավոր Արևելքի դաշնային օկրուգում Ռուսաստանի նախագահի լիազոր ներկայացուցիչ Յուրի Տրուտնևը։

«Մենք, փաստորեն, արդեն սահմանափակել ենք [ձկան արտահանումը], և մենք դա սահմանափակել ենք հենց իրենց ջանքերով՝ իրենք հրաժարվեցին վճարել Կուրիլյան կղզիների շուրջ ձկնորսության քվոտաների համար։ Համապատասխանաբար՝ այդ իրավունքը կվերցվի նրանցից։ Հետևաբար, իրենք իրենց լավ պատժում են՝ նրանց նույնիսկ օգնելու կարիք չկա», - ասել է Տրուտնևը։

Ճապոնիայի և Ռուսաստանի միջև 1998 թվականին ստորագրված համաձայնագիրը թույլ էր տալիս ճապոնացի ձկնորսներին ռուսական կողմի հատկացրած քվոտայի շրջանակում ձկնորսություն իրականացնել Կուրիլյան կղզիների հարավային մասում:

Ռուս-ուկրաինական պատերազմում Ռուսաստանի զինված ուժերը կորցրել է մոտ 20 հազար զինծառայող: Այդ մասին հաղորդում է The Guardian բրիտանական օրաթերթը՝ վկայակոչելով մի անանուն բարձրաստիճան պաշտոնյայի:

Բրիտանական պարբերականը գրում է, թե մարդուժի և տեխնիկայի առավել ծանր կորուստներ ռուսները կրում են Լուգանսկի շրջանի արևմտյան հատվածում՝ Սևերոդոնեցկի և Լիսիչանսկի համար մարտերում, որտեղ նրանք որոշակի նվաճումներ են ապահովել և կարողացել են առաջ շարժվել:

Վերջին անգամ Ռուսաստանի պաշտպանության նախարարությունը մարտի 25-ին հայտնել է, որ Ուկրաինայում սպանվել է 1351 ռուսաստանցի զինծառայող:

Ուկրաինական կողմն իր կորուստների մասին չի հաղորդում: Ռուսները պնդում են, որ Ուկրաինայի կորուստներն անգամներով են գերազանցում Ռուսաստանինը:

Ուկրաինայի պաշտպանության նախարար Օլեքսի Ռեզնիկովի փոխանցմամբ՝ «ամեն օր զոհվում է մոտ 100 և վնասվածք է ստանում մոտ 500 ուկրաինացի զինծառայող»:

Ուկրաինայի նախագահ Վլադիմիր Զելենսկին ասել է, թե «դրական լուրեր» ունի Զապորոժիեի շրջանից: Նրա փոխանցմամբ՝ ուկրաինական բանակը կարողացել է ետ մղել ռուսների գրոհները:

Իր ավանդական կեսգիշերային տեսաուղերձում Զելենսկին ասել է, որ ուկրաինական ուժերն աստիճանաբար առաջ են շարժվում Խարկովի շրջանի ուղղությամբ և ազատագրում են տարածքները:

Ռուսաստանը փորձում է ամրապնդվել Խերսոնի և Զապորոժիեի շրջաններում, որտեղ նրանց ենթարկվող տեղական լիդերները ծրագրում են «հանրաքվեներ» անցկացնել Ռուսաստանին միանալու համար: