Պատերազմ Ուկրաինայում (լայվ բլոգ, թարմացվող)

Ռուսաստանի պաշտպանության նախարարությունն այսօր առաջարկել է հանձնվել Սևերոդոնեցկի «Ազոտ» քիմիական գործարանի տարածքում ամրացած ուկրաինական ուժերին և խոստացել, որ խաղաղ բնակիչների համար մարդասիրական միջանցք կբացվի դեպի ռուսների վերահսկողության տակ գտնվող Սվատովո քաղաք։

Տեղական ուկրաինական իշխանությունների պնդմամբ` գործարանի տարածքում մինչև 560 խաղաղ բնակիչներ կան, այդ թվում` երեխաներ։

Ուկրաինական կողմը պնդում է նրանց տարհանել իրենց վերահսկողության տակ գտնվող հարևան Լիսիչանսկ։ Բայց Ռուսաստանի պաշտպանության նախարարությունը գտնում է, որ այդ առաջարկը շրջափակման մեջ ընկած ուկրաինական ստորաբաժանումները փրկելու փորձ է։

Ռուսական կողմը հայտարարել է, որ Լիսիչանսկի ուղղությամբ տարհանումը հնարավոր չէ, քանի որ ուկրաինացիները պայթեցրել են երկու քաղաքները կապող բոլոր երեք կամուրջները։

Ուկրաինական կողմը կամուրջները պայթեցնելու մեջ մեղադրում է ռուսական կողմին։ Միաժամանակ տեղական իշխանությունները հայտնում են, որ Սևերոդոնեցկը ամբողջովին կտրված չէ։ Քաղաքապետ Ալեքսանդր Ստրյուկն այսօր ասել է, որ «բավականին բարդ, բայց ուղիներ կան»։

Հայաստանի վարչապետ Նիկոլ Փաշինյանը Քաթար կատարած այցի ընթացքում «Ալ Ջազիրային» տված հարցազրույցում անհանգստություն է հայտնել Ուկրաինայի իրավիճակի կապակցությամբ, հանդես է եկել երկխոսության և բոլոր խնդիրները խաղաղ եղանակով լուծելու օգտին։

«Իհարկե, մենք շատ անհանգստացած ենք Ուկրաինայի շուրջ ստեղծված իրավիճակով, բայց կարծում եմ` աշխարհի բոլոր երկրներն են անհանգստացած, որովհետև տեսնում ենք աշխարհակարգի փլուզում, և ոչ մեկը չգիտի` ինչպիսին կլինի հաջորդ աշխարհակարգը։ Իհարկե, մենք աջակցում ենք բոլոր խնդիրների՝ երկխոսության և խաղաղ ճանապարհով լուծմանը»,- ասել է Փաշինյանը։

Այսօր Բրյուսելում հանդիպում կանցկացնի Ուկրաինայի հարցով կոնտակտային խումբը, որին կմասնակցեն մոտ հինգ տասնյակ երկրների ներկայացուցիչներ։ Նիստը վարելու է ԱՄՆ պաշտպանության նախարար Լլոյդ Օսթինը։

«Դոնբասում դաժան հրետանային մարտեր են: Ուկրաինացի պաշտոնյաները հայտարարել են, որ իրենք օրական 150-ից 200 զինվոր են կորցնում մարտերում», - հաղորդում է ԱՄՆ պաշտպանության նախարարությունը:

Օսթինը համակարգում է գործողությունները կոնտակտային խմբի հետ անհրաժեշտ սպառազինություն և տեխնիկա Ուկրաինա հասցնելու համար:

Ուկրաինայի նախագահ Վլադիմիր Զելենսկին նախօրեին հայտարարել էր, որ երկիրը չունի բավարար ժամանակակից հակահրթիռային պաշտպանության համակարգեր, և դրանց մատակարարումների հետաձգումը թանկ կարժենա Ուկրաինային։

Ուկրաինայի արևելքում ռուսական բանակի առաջխաղացումը դանդաղեցնելու համար արևմտյան երկրները պետք է որքան հնարավոր է շուտ ավելացնեն ծանր սպառազինության մատակարարումը Կիևին։ Նման հայտարարություն է արել ՆԱՏՕ-ի գլխավոր քարտուղար Յենս Ստոլտենբերգը ասուլիսի ժամանակ Հաագայում, որտեղ հանդիպել է Հյուսիսատլանտյան դաշինքի անդամ 7 երկրների ղեկավարների հետ։

«Այո, Ուկրաինային ավելի շատ ծանր սպառազինություն է պետք», - հաստատել է Ստոլտենբերգը՝ հավելելով, որ ուկրաինական զորքերը լիովին կախված են այդ մատակարարումներից։

Եվրամիությունն ուղիներ է փնտրում ռուսական էներգիայից իր կախվածությունը նվազեցնելու համար և ընդլայնում է համագործակցությունը Իսրայելի հետ, գրում է Financial Times-ը։

Եվրահանձնաժողովի նախագահ Ուրսուլա ֆոն դեր Լայենը նախօրեին ասել է, որ Եվրամիությունը շարունակում է նախապատրաստվել երկու խոշոր ենթակառուցվածքային նախագծերի իրականացմանը, որոնք ուղղված են Իսրայելի հետ էներգետիկ կապերի ամրապնդմանը՝ խողովակաշար Միջերկրական ծովի արևելքում և ստորջրյա էլեկտրահաղորդման մալուխ, որը կապում է Իսրայելը Կիպրոսին և Հունաստանին:

Ռուսաստանի նավթային եկամուտներն ըստ երևույթին աճել են՝ չնայած չվերամշակված նավթի արտահանման նվազմանը, և ԱՄՆ-ն ու դաշնակիցները պետք է դրանք նվազեցնելու ուղիներ գտնեն, հնարավոր է՝ գների սահմանափակումով, երեքշաբթի օրը հայտարարել է Միացյալ Նահանգների ֆինանսների փոխնախարար Ուոլի Ադեյեմոն:

Ելույթ ունենալով Սենատի հատկացումների ենթահանձնաժողովի առջև՝ Ադեյեմոն ասել է, որ նավթի բարձր գները կոմպենսացնում են արդյունահանման և արտահանման անկումը:

Ըստ փոխնախարարի՝ ԱՄՆ-ը եվրոպական և ասիական դաշնակիցների հետ քննարկում է ռուսական նավթի համար վճարվող գինը սահմանափակելու ուղիները, որպեսզի նվազեցնի Մոսկվայի շահույթը համաշխարհային շուկաներում էներգակիրների բարձր գներից:

Ուկրաինան ծանր կորուստներ է կրում Սևերոդոնեցկում և Խարկովի շրջանում: Այդ մասին անցած գիշեր իր տեսաուղերձում հայտնել է նախագահ Վլադիմիր Զելենսկին:

Նա վերստին ընդգծել է, որ Ուկրաինային անհրաժեշտ են հակահրթիռային արդիական համակարգեր, և «աններելի» է անվանել սատարող պետությունների կողմից դրանց մատակարարման ձգձգումը:

«Ուկրաինացինե՛ր, մեր բոլոր պաշտպաննե՛ր, այսօր մեր հակաօդային պաշտպանությունը կարողացել է կտրել ռուսական հրթիռների թևերը, մենք ոչնչացրել ենք մեր ավանների վրա արձակված բավական թվով հրթիռներ: Դա նշանակում է, որ կյանքեր ենք փրկել, բայց, ավաղ, մենք ոչնչացրել ենք միայն դրանց մի մասը և ունենք կորուստներ: Այսօր հարվածների են ենթարկվել Լվովի և Տերնոպոլի շրջանները: Մենք նորից դիմում ենք մեր գործընկերներին՝ մեզ հակահրթիռային պաշտպանության համակարգեր տվե՛ք»,- ասել է Զելենսկին:

Նրա խոսքով, ռուսների ճգրտիտ հրթիռների քանակը սպառվում է, բայց նրանք դեռ ունեն հին խորհրդային արտադրության հրթիռների հսկայական պաշար, և դրանք էլ մեծ վտանգ են Ուկրաինայի համար:

Կիևը հայտնել է, որ փորձում է տարհանել խաղաղ բնակիչներին Սևերդոնեցկից: Կռիվն այդ քաղաքի համար այսօր դարձել է առանցքայինն ամբողջ ռազմաճակատում:

Երկու կողմերն էլ կորուստներ են կրում: Մոսկվան ռուսական կորուստների մասին տեղեկություններ չի հայտնում:

ՆԱՏՕ-ի գլխավոր քարտուղար Յենս Ստոլտենբերգն ասել է, որ դաշինքը պետք է հզորացնի արևելան թևի ռազմական կարողությունները թե՛ մարտական պատրաստության և թե՛ նոր տեխնիկայի ու հանդերձանքի առումով:

Այդ մասին գլխավոր քարտուղարն ասել է Հաագայում, որտեղ Մադրիդում ամսվա վերջին կայանալիք ՆԱՏՕ-ի գագաթնաժողովին ընդառաջ ոչ պաշտոնական հավաքում հանդիպել են Նիդեռլանդների, Դանիայի, Լեհաստանի, Լատվիայի, Ռումինիայի, Պորտուգալիայի և Բելգիայի ղեկավարները:

«Մենք շարունակելու ենք Ուկրաինային սատարել ինչպես կարճաժամկետ, այնպես էլ երկարաժամկետ հեռանկարում: Ակնկալում ենք նախագահ Վլադիմիր Զելենսկու ուղերձը Մադրիդում մեր գագաթնաժողովին: Ի պատասխան Ուկրաինայի դեմ Ռուսաստանի ագրեսիայի, մենք հզորացրել ենք մեր դիրքերը և պատրաստ ենք պաշտպանել ՆԱՏՕ-ի տարածքի ամեն մի թիզը»,- ասել է Ստոլտենբերգը:

Գլխավոր քարտուղարը հավաքում խոսել է նաև դաշինքին միանալու Շվեդիայի և Ֆինլանդիայի դիմումների մասին, ասելով, որ այդ երկու երկրների անդամակցումը ՆԱՏՕ-ն ավելի հզոր կդարձնի:

Ստոլտենբերգը նաև գովեստով է խոսել այդ հարցում Թուրքիայի ներկայացրած առարկությունները և մտահոգությունները հաշվի առնելու Հելսինկիի և Ստոկհոլմի պատրաստակամության մասին:

Ֆրանսիայի նախագահ Էմանյուել Մակրոնը Ռումինիայում ասել է, թե ամեն ինչ կանի Ուկրաինայի պատերազմը դադարեցնելու համար:

Մակրոնը եռօրյա այցով է մեկնել Ռումինիա: Սև ծովի ափին Կոնստանցայի մոտակայքում գտնվող ՆԱՏՕ-ի Կոգալնիչեաու ռազմակայանում Մակրոնը Ռումինիայի նախագահ Կլաուս Յոհաննեսի ընկերակցությամբ հանդիպել է Ֆրանսիայից, ԱՄՆ-ից, Բրիտանիայից և Հյուսիսատլանտյան դաշինքի այլ երկրներից գործուղված զինծառայողների հետ:

Այսօր ավելի ուշ Մակրոնը պետք է մեկնի Մոլդովայի մայրաքաղաք Քիշնև, որտեղ կհանդիպի արևմտամետ նախագահ Մայա Սանդուի հետ:

Պաշտոնապես դեռևս չհաստատված որոշ տեղեկությունների համաձայն, Մակրոնը կարող է Քիշնևից մեկնել նաև Կիև, ընդ որում այդ այցին կարող են միանալ Ռումինիայի նախագահ Կլաուս Յոհաննեսը, Իտալիայի վարչապետ Մարիո Դրագին և Գերմանիայի կանցլեր Օլաֆ Շոլցը:

«Մենք պարտավոր ենք սատարել Ուկրաինային, սակայն պետք է մշտապես գիտակցենք, որ մենք և Ռուսաստանը պատերազմի մեջ չենք»,- Ռումինիայում ասել է Էմանյուել Մակրոնը:

Կրեմլը համոզված է, որ չնայած ներկայիս ծանր ճգնաժամին՝ Միացյալ Նահանգների հետ հաղորդակցության խողովակները պետք է պահպանել, քանի որ դրանք կենսական նշանակություն ունեն: Այդ մասին ասել է նախագահ Վլադիմիր Պուտինի խոսնակ Դմիտրի Պեսկովը:

«Կարող են ապագայում լինել ԱՄՆ-ի հետ հարաբերությունների բարելավման հույսեր, բայց դա կլինի միանգամայն նոր հաղորդակցություն: Հաղորդակցությունն անչափ կարևոր է, Միացյալ Նահանգները ոչ մի տեղ չի անհետանա, Եվրոպան չի անհետանա, ուստի, մենք պարտադրված ենք ինչ-որ եղանակով հաղորդակցություն պահպանել», - ասել է Կրեմլի խոսնակը:

Պեսկովի համոզմամբ՝ ապագայում հարաբերությունները և հաղորդակցությունը պետք է հիմնվեն բացառապես փոխադարձ հարգանքի, անվտանգության անբաժանելիության, փոխադարձ մտահոգությունների ըմբռնման և փոխադարձ շահի վրա: