Պատերազմ Ուկրաինայում (լայվ բլոգ, թարմացվող)

Bloomberg-ի փոխանցմամբ՝ Մեծ յոթնյակի հռչակագրի նախագծում ասվում է․ աշխարհի ամենազարգացած երկրները Ուկրաինային ռազմական, հումանիտար, դիվանագիտական աջակցություն կտրամադրեն այնքան, որքան անհրաժեշտ է։

Ինդոնեզիայի նախագահ Ջոկո Վիդոդոն մտադիր է այցելել Ռուսաստան և Ուկրաինա։ Reuters-ի փոխանցմամբ՝ Վիդոդոն իր այցն անվանում է «խաղաղապահ առաքելություն» և մտադիր է կոչ անել երկու երկրների նախագահներին հնարավորություն ստեղծել երկխոսության համար։ Ինդոնեզիայի նախագահն ասիական առաջին ղեկավարն է, ով այցելելու է Ռուսաստան և Ուկրաինա ռազմական գործողությունների սկսվելուց հետո:

Միացյալ Նահանգները ծրագրում է այս շաբաթ հայտարարել Ուկրաինայի համար միջին և մեծ հեռահարության հակահրթիռային պաշտպանության արդիական համակարգեր գնելու մասին, հաղորդում է CNN-ը՝ վկայակոչելով իր աղբյուրները։

ԱՄՆ նախագահ Ջո Բայդենը, ով Գերմանիայում մասնակցում է Մեծ յոթնյակի գագաթնաժողովին, վերջերս հաստատել է, որ Վաշինգտոնը Կիևին կտրամադրի ավելի առաջադեմ հրթիռային համակարգեր և զինամթերք:

Ուկրաինայի նախագահն Արևմուտքին կոչ է արել հակաօդային պաշտպանության համակարգեր մատակարարել Ուկրաինային:

«Մեզ անհրաժեշտ է հզոր հակաօդային պաշտպանություն՝ ժամանակակից, լիովին արդյունավետ, որը կարող է ապահովել ամբողջական պաշտպանություն այդ հրթիռներից: Մենք այդ մասին ամեն օր խոսում ենք գործընկերների հետ», - երեկ երեկոյան իր հեռուստաուղերձում ասել է Վլադիմիր Զելենսկին:

Ակնկալվում է, որ այսօր կայանալիք G7-ի գագաթնաժողովում Մեծ Բրիտանիայի վարչապետ Բորիս Ջոնսոնը համաշխարհային առաջնորդներին կոչ կանի՝ հրատապ միջոցներ ձեռնարկել՝ ապահովելու Ուկրաինայից հիմնական սննդամթերքի արտահանումը, ասվում է Մեծ Բրիտանիայի կառավարության կայքում:

Ռուսաստանի կողմից ուկրաինական խոշոր նավահանգիստների շրջափակումը և այլ լուրջ կառուցվածքային խնդիրներ, որոնք առաջացել են ռուսական ներխուժման հետևանքով, այս տարի հանել են ուկրաինական արտադրանքը համաշխարհային շուկայից:

Պարենի և գյուղատնտեսության կազմակերպության տվյալներով՝ Ուկրաինան մատակարարում է համաշխարհային ցորենի 10 տոկոսը, եգիպտացորենի 12-17 տոկոսը, արևածաղկի ձեթի կեսը։ 25 միլիոն տոննա եգիպտացորեն և ցորեն չի կարող արտահանվել և ներկայումս ուկրաինական պահեստներում փտելու վտանգի տակ է: Այս խնդիրը հուլիսյան բերքահավաքի հետ կապված կտրուկ կսրվի։

Ռուսաստանի գործողությունների հետևանքով բարձրացրել են գները մի շարք երկրներում, նաև Մեծ Բրիտանիայում, թեև Մեծ Բրիտանիան ուղղակիորեն կախված չէ ուկրաինական հացահատիկի արտահանումից:

Թուրքիայի կողմից Ռուսաստանի դեմ պատժամիջոցների կիրառումն ավելի շատ վնաս կհասցնի թուրքական տնտեսությանը, քան՝ ռուսականին։ Այս մասին հայտարարել է Թուրքիայի նախագահի խոսնակ Իբրահիմ Քալընը։

Փաստորեն, Անկարան, պաշտպանելով իր շահերը, չմիացավ այն սահմանափակումներին, որոնք շատ երկրներ սահմանեցին Ռուսաստանի դեմ Ուկրաինայի վրա հարձակումից հետո։ Ըստ Քալընի՝ Արևմուտքը հասկացել է այս դիրքորոշումը։

Բարձրաստիճան պաշտոնյան ընդգծել է, որ Թուրքիան կախված է էներգակիրների արտասահմանյան աղբյուրներից, ուստի «Ռուսաստանի հետ նույնպես զարգացնում է հարաբերությունները, ինչպես Իրանի հետ»։

Հազարավոր ցուցարարներ երեկ դուրս էին եկել Մադրիդի փողոցներ՝ բողոքելով այս շաբաթ Իսպանիայի մայրաքաղաքում կայանալիք ՆԱՏՕ-ի գագաթնաժողովի դեմ։

ՆԱՏՕ-ի առաջնորդները հունիսի 29-30-ը կհանդիպեն Մադրիդում՝ Ուկրաինա ռուսական ներխուժման աննախադեպ մարտահրավերի ֆոնին, որին բախվում է դաշինքը:

Ցուցարարները պնդում էին, որ Եվրոպայում ՆԱՏՕ-ի պաշտպանական ծախսերի ավելացումը սպառնալիք է խաղաղության համար:

Ըստ կազմակերպիչների՝ երթին մասնակցել է 5 հազար մարդ, սակայն Մադրիդի իշխանությունները մասնակիցների թիվը գնահատել են 2,2 հազար։