Պատերազմ Ուկրաինայում (լայվ բլոգ, թարմացվող)

«ՆԱՏՕ-ի արագ արձագանքման ուժերում ընդգրկված զինվորականների թիվը հասցվելու է 300 հազարի», - այսօր Բրյուսելում կայացած մամուլի ասուլիսի ժամանակ հայտարարել է դաշինքի գլխավոր քարտուղար Յենս Ստոլտենբերգը։

«Մենք ուժեղացնելու ենք մեր առաջապահ պաշտպանությունը։ Դաշինքի արևելյան թևում տեղակայված մեր մարտական խմբերը կհասցվեն բրիգադի մակարդակի։ Մենք նաև վերափոխելու ենք դաշինքի արագ արձագանքման ուժերը՝ դրանցում ներգրավված զինվորականների թիվը հասցնելով 300 հազարի», - հայտարարում է Ստոլտենբերգը։

Խոսելով վաղը Մադրիդում մեկնարկող ՆԱՏՕ-ի գագաթաժողովի մասին` Ստոլտենբերգը նշել է, որ դրա ընթացքում դաշինքի անդամները կհամաձայնեցնեն Ուկրաինային հավելյալ օգնության տրամադրման հարցը։

«Խոսքը Ուկրաինային տրամադրվող օգնության համապարփակ փաթեթի մասին է», - հայտարարում էր Ստոլտենբերգը։

Ուկրաինայի խորհրդարանի իշխող «Ժողովրդի ծառա» խմբակցության ղեկավար Դավիթ Արախամիան խոստանում է հստակ ապացույցներ ներկայացնել առ այն, որ Վրաստանի իշխանություններն օգնում են Մոսկվային շրջանցել արևմտյան պատժամիջոցները։ Այս մասին Արախամիան գրել է այսօր իր Տելեգրամ ալիքում։

«Վրաստանի կառավարության անդամների և իշխանամետ պատգամավորների կողմից արտերկրում իրականացված փոխանցումների, նրանց բանկային հաշիվների մասին տեղեկությունները շուտով հասանելի կդառնան հանրությանը», - գրել է Արախամիան՝ պնդելով, որ արևմտյան պատժամիջոցները շրջանցելու գործում ներգրավված է նաև «Վրացական երազանք» կուսակցության հիմնադիր, միլիարդատեր Բիձինա Իվանիշվիլին։

Լիտվան ենթարկվել է հուժկու հաքերային հարձակման։ Այս մասին տեղեկացրել է երկրի պաշտպանության նախարարությունը՝ վկայակոչելով Կիբերանվտանգության ազգային ծառայության տրամադրած տվյալները։

Նույն աղբյուրի փոխանցմամբ՝ հաքերային հարձակման թիրախ են դարձել նաև պետական կառույցների կողմից կիրառվող և մինչ օրս անվտանգ համարվող ներքին ցանցերը։

Հաքերային հարձակումը տեղի է ունեցել Կալինինգրադի մարզի հետ հաղորդակցության սահմանափակումների պատճառով Վիլնյուսի և Մոսկվայի միջև ծագած դիվանագիտական ճգնաժամի ֆոնին։

Առնվազն 13 մարդ է զոհվել, ևս 50-ը՝ վիրավորվել երեկ կեսօրին Ուկրաինայի Պոլտավայի մարզի Կրեմենչուգ քաղաքի հրթիռակոծության հետևանքով, հայտնել է տեղի շրջանային ռազմական վարչակազմի ղեկավար Դմիտրի Լունինը։ Հարձակումը, ըստ ուկրաինական իշխանությունների, իրականացվել է ռուս զինվորականների կողմից։ Հրթիռն ընկել է Amstor առևտրի կենտրոնի վրա, որը հրդեհի հետևանքով ամբողջությամբ այրվել է։

Կրեմենչուգի քաղաքապետ Վիտալի Մալեցկին գրել է, որ հարվածը հասցվել է «շատ մարդաշատ վայրի, որը 100 տոկոսով կապ չունի ռազմական գործողությունների հետ»։

Ուկրաինայի ռազմաօդային ուժերի հրամանատարությունը պնդում է, որ հրթիռներն օդ են բարձրացել Կալուգայի շրջանի Շայկովկա օդանավակայանից։

Մեծ Բրիտանիայի վարչապետ Բորիս Ջոնսոնը հայտարարել է, որ Ռուսաստանի հրթիռային հարձակումը Կրեմենչուգի մարդաշատ առևտրի կենտրոնի վրա ցույց է տալիս Ռուսաստանի առաջնորդ Վլադիմիր Պուտինի դաժանության և բարբարոսության խորությունը:

«Պուտինը պետք է հասկանա, որ իր վարքագիծը կամրապնդի Մեծ Բրիտանիայի և Մեծ յոթնյակի ցանկացած այլ երկրի վճռականությունը՝ աջակցելու Ուկրաինային այնքան ժամանակ, որքան կպահանջվի», - ասել է Ջոնսոնը:

ՄԱԿ-ում Ռուսաստանի մշտական ներկայացուցչի առաջին տեղակալ Դմիտրի Պոլյանսկին Կրեմենչուգում տեղի ունեցածը որակել է որպես ուկրաինական կողմի «հերթական սադրանք»:

«Այնպիսի տպավորություն է, թե գործ ունենք Բուչայի ոճով ուկրաինական նոր սադրանքի հետ: Պետք է սպասել մեր Պաշտպանության նախարարության հայտարարությանը, բայց արդեն չափազանց շատ ակնհայտ անհամապատասխանություններ կան», - Twitter-ում գրել է դիվանագետը, հավելելով՝ Կիևի ռեժիմը նման ձևով ուզում է Արևմուտքի ուշադրությունը սևեռել Ուկրաինայի վրա մինչև ՆԱՏՕ-ի գագաթնաժողովը:

Ուկրաինայի անդամակցությունը ՆԱՏՕ-ին կարող է հանգեցնել երրորդ համաշխարհային պատերազմի, եթե Կիևը հետագայում փորձի ոտնձգություն կատարել Ղրիմի դեմ,հայտարարել է Ռուսաստանի Անվտանգության խորհրդի փոխնախագահ Դմիտրի Մեդվեդևը "Аргументы и факты" պարբերականին տված հարցազրույցում։

«Ղրիմի նկատմամբ ոտնձգության ցանկացած փորձ նշանակում է պատերազմ հայտարարել մեր երկրին: Եվ եթե ՆԱՏՕ-ի անդամ երկիրն անի դա, ապա դա հակամարտություն է ամբողջ Հյուսիսատլանտյան դաշինքի հետ: Երրորդ համաշխարհային պատերազմ: Տոտալ աղետ», - ասել է Մեդվեդևը:

ՆԱՏՕ-ին Շվեդիայի և Ֆինլանդիայի հնարավոր անդամակցության առնչությամբ Մեդվեդևն ասել է, որ Ռուսաստանին առանձնապես նոր բան չի սպառնում: «Ռուսաստանի հետ այդ երկրների ավելի վաղ ունեցած հարաբերությունները կարելի է անվանել բավականին հարգալից և փոխշահավետ», - նշել է ՌԴ նախկին նախագահը՝ հավելելով, որ սկանդինավյան երկու երկրների հետ տարածքային վեճեր և դրանց համար առիթներ չկան:

Ուկրաինական հետախուզությունը հայտնում է ռուսական կողմի հետ գերիների նոր խմբերի փոխանակման մասին: Ըստ աղբյուրի` 15 գերիներ փոխանակվել են 17-ի հետ։

«Տուն են վերադարձել ուկրաինացի 16 զինծառայողներ և մեկ քաղաքացիական անձ։ Զինծառայողներից երկուսը սպա են, 14-ը զինվորներ»,- հայտնում է Ուկրաինայի պաշտպանության նախարարության հետախուզության գլխավոր վարչությունը։

Հաղորդագրությունում նաև նշված է, որ ազատ արձակվածներից հինգը ծանր վիրավորներ են, որոնք անհապաղ բուժվելու կարիք ունեն։

Ռուսական կողմը գերիների փոխանակման մասին չի հաղորդել։

Բավարիայի Ալպերում Մեծ յոթնյակի գագաթնաժողովի ավարտին Գերմանիայի կանցլեր Օլաֆ Շոլցն ասել է, որ Ռուսաստանի վրա Արևմուտքի ճնշումները միայն ուժեղացվելու են և Պուտինի համար իրավիճակից դուրս գալու միակ միջոցը Ուկրաինայում իր պլանների ձախողումն ընդունելն է։

Շոլցն ընդգծել է, որ յուրաքանչյուր երկիր իր զարգացման ճանապարհը ընտրելու իրավունք ունի, առանց հարևանի կողմից հարձակման ենթարկվելու սպառնալիքի։

Մեծ յոթնյակի առաջնորդները համաձայնեցրել են Ռուսաստանի համար ցավալի մի շարք հետագա քայլերը, այդ թվում՝ ռուսական ոսկին գնելու արգելքը։

Գերմանիայի կանցլերի խոսքերով՝ Կրեմենչուգի առևտրի կենտրոնի վրա ռուսական ուժերի նախօրեին կատարած հրթիռային հարձակումը Ուկրաինայի բնակչության հանդեպ Պուտինի դաժանության ևս մեկ ապացույց է։

Ուկրաինայի նախագահի աշխատակազմի ղեկավարի տեղակալ Կիրիլ Տիմոշենկոն այսօրվա ճեպազրույցում ասել է, որ հրթիռակոծման հետևանքով արդեն հայտնի է 20 զոհի և 59 վիրավորների մասին։ Վիրավորներից 25-ը հոսպիտալացվել են։ Տիմոշենկոյի ասելով՝ անհետ կորածների հարազատներից ևս 40 դիմումներ կան։

Ռուսաստանն ընդլայնեց ԱՄՆ-ի դեմ սահմանած պատժամիջոցները` ցանկում ավելացնելով ևս 25 մարդու անուններ, այդ թվում` ԱՄՆ նախագահի կնոջ և դստեր՝ Ջիլլ և Էշլի Բայդենների մուտքը Ռուսաստան արգելվել է։

Ցանկում ընդգրկվել են նաև կոնգրեսականներ, սենատորներ, նախկին պաշտոնյաներ, համալսարանների դասախոսներ։

Ռուսաստանի արտգործնախարարության հաղորդագրությունում նշված է, որ սա պատասխան քայլ է Ռուսաստանի քաղաքական և հասարակական գործիչների դեմ ԱՄՆ-ի մշտապես ընդլայնվող պատժամիջոցներին։

Այսօրվա դրությամբ Մոսկվան 1048 ամերիկացիների հանդեպ պատժամիջոցներ է սահմանել` արգելելով նրանց մուտքը Ռուսաստան։