Պատերազմ Ուկրաինայում (լայվ բլոգ, թարմացվող)

Ուկրաինայի նախագահ Վլադիմիր Զելենսկին հանգստյան օրերին աշխատանքից ազատել է երկրի գլխավոր դատախազ Իրինա Վենեդիկտովային և պաշտոնանկ արել Ուկրաինայի Անվտանգության ծառայության ղեկավար Իվան Բականովին։ Բականովը, մասնավորապես, պաշտոնանկ է արվել «ծառայողական պարտականությունները ոչ պատշաճ կատարելու» համար։

Երեկվա ուղերձում մեկնաբանելով իր որոշումը՝ Զելենսկին հայտարարել է, որ աղմկահարույց պաշտոնակությունների պատճառը դատախազությունում, ուժային կառույցներում դավաճանության հոդվածով հարյուրավոր քրեական գործերն են և ռուսների գրաված տարածքներում այդ կառույցների աշխատակիցների համագործակցությունը օկուպանտների հետ։ Սրա համար պատասխան պետք է տան նախ և առաջ այդ կառույցների ղեկավարները, ընդգծել է նա:

Վերլուծաբանները, ուկրաինական տարբեր աղբյուրներ երկար ժամանակ է գրում էին, թե Զելենսկու շրջապատում, կառավարական օղակներում կան մարդիկ, ովքեր համագործակցում են Ուկրաինայի վրա հարձակված Ռուսաստանի հետ:

Ե՛վ Բականովը, և՛ Վենեդիկտովան համարվում էին Ուկրաինայի նախագահի մերձավոր շրջապատից։ Բականովին ուկրաինական լրատվամիջոցներն ընդհանրապես անվանում են Զելենսկու «մանկության ընկերը»։

Ուկրաինայի նախագահ Վլադիմիր Զելենսկին երկրի Անվտանգության ծառայության և Գլխավոր դատախազության ղեկավարների ժամանակավոր պաշտոնակատարներ է նշանակել։ Անվտանգության ծառայության տնօրենի պաշտոնակատար է նշանակվել Վասիլի Մալյուկը, գլխավոր դատախազի պաշտոնակատար՝ Ալեքսեյ Սիմոնենկոն։

Մոսկվայում երեկ բերման են ենթարկել, ապա ազատ արձակել ռուսաստանյան Առաջին հեռուստաալիքի նախկին աշխատակցուհի Մարինա Օվսյաննիկովային, ով մարտին հակապատերազմական բողոքի ակցիա էր անցկացրել «Վրեմյա» հաղորդաշարի ուղիղ եթերում։

Մի քանի օր առաջ էլ Օվսյաննիկովան ակցիա էր իրականացրել Կրեմլի ֆոնին՝ պարզելով «Պուտինը մարդասպան է, նրա զինվորները՝ ֆաշիստներ» գրությամբ պաստառ և Ուկրաինայում սպանված երեխաների լուսանկարներ։

Օվսյաննիկովան ասել է, որ իրեն մեղադրում են «ռուսական բանակը վարկաբեկելու մեջ»։ Սա վարչական իրավախախտում է, որի համար նախատեսված է տուգանք։

H&M հագուստի խանութների ցանցը հեռանում է Ռուսաստանից: Ինչպես հաղորդում է РИА "Новости" լրատվական գործակալությունը, աշխարհում իր տեսակի մեջ երկրորդը համարվող H&M-ի ղեկավարությունը որոշել է ամբողջությամբ դադարեցնել գործունեությունը Ռուսաստանում։

Ուկրաինա ներխուժումից հետո Ռուսաստանի նկատմամբ արևմտյան պատժամիջոցների արդյունքում համաշխարհային տնտեսության տարբեր ճյուղերում առաջատար բազմաթիվ ընկերություններ հայտարարել են երկրից հեռանալու, այնտեղ իրենց գործունեությունը դադարեցնելու կամ սահմանափակելու մասին։

«Կոմերսանտ»-ի փոխանցմամբ՝ հուլիսի 17-ին Կանադան օդանավով Գերմանիա է ուղարկել վերանորոգված գազատուրբինը, որն օգտագործվում է Ռուսաստանից Գերմանիա «Հյուսիսային հոսք» գազատարով գազ մատակարարելու համար։ Գերմանիայից այն Ռուսաստան՝ Լենինգրադի մարզի «Պորտովայա» կոմպրեսորային կայան կհասնի հուլիսի 24-ին:

Ուկրաինայի նախագահ Վլադիմիր Զելենսկին սուր քննադատության է ենթարկել տուրբինը վերադարձնելու որոշումը և Կանադայի վարչապետ Ջասթին Թրյուդոյի հետ հեռախոսազրույցում ասել է, թե Ուկրաինայի քաղաքացիները երբեք չեն համաձայնի դրան, և որ այն ընդունվել է՝ «իրականում խախտելով պատժամիջոցների ռեժիմը»։

Ռուսաստանի պաշտպանության նախարարությունն այսօր առաջին անգամ պաշտոնապես հաստատել է, որ Լեռնային Ղարաբաղում ռուսաստանցի խաղաղապահների առաջին հրամանատար Ռուստամ Մուրադովն այժմ գտնվում է Ուկրաինայում՝ ղեկավարելով այստեղ կռվող երեք խմբավորումներից մեկը։

Ռուսաստանի ռազմական գերատեսչության փոխանցմամբ՝ «Արևելք» խմբավորման հրամանատար Ռուստամ Մուրադովը Ռուսաստանի պաշտպանության նախարար Սերգեյ Շոյգուին հրամանատարական կետում զեկուցել է ընթացիկ իրավիճակի և [խմբավորման] պատասխանատվության գոտում հակառակորդի ջախջախմանն ուղղված մարտական առաջադրանքների կատարման մասին»։

«Այն մասին, որ «Արևելք» խմբավորման հրամանատարը Ռուստամ Մուրադովն է, նախկինում չէր հաղորդվում», - հիշեցնում է «Ինտերֆաքս» գործակալությունը։

Մուրադովը Լեռնային Ղարաբաղում տեղակայված ռուսական զորախմբի հրամանատարությունն իրականացնում էր շուրջ 10 ամիս՝ 2020 թվականի նոյեմբերի 11-ից մինչև 2021-ի սեպտեմբերի 9-ը։

Եվրամիության ղեկավարությունն առաջարկում է ռուսական գազը փոխարինել ադրբեջանականով, հաղորդում է Reuters գործակալությունը՝ վկայակոչելով իր տրամադրության տակ հայտնված պաշտոնական փաստաթղթի նախագիծը։

Գործակալության փոխանցմամբ՝ այդ նախագծով Եվրահանձնաժողովն առաջարկում է ԵՄ անդամ պետություններին համաձայնություն ձեռք բերել Ադրբեջանի հետ՝ մեծացնելով այդ երկրից բնական գազի ներկրման ծավալները։ Նույն փաստաթղթի համաձայն՝ եվրոպացի պաշտոնյաներն առաջարկում են ընդլայնել Ադրբեջանից Եվրոպա գնացող խողովակաշարերի ցանցը։

Փաստաթուղթը շրջանառության մեջ է դրվել Եվրահանձնաժողովի նախագահ Ուրսուլա ֆոն դեր Լայենի և ԵՄ էներգետիկայի հարցերով հանձնակատար Կադրիս Սիմսոնի Բաքու կատարելիք այցի շեմին։

«Վաղը Թեհրանում կայանալիք բանակցությունների ընթացքում Ռուսաստանի նախագահը իր թուրք և իրանցի պաշտոնակիցների հետ քննարկելու է տարածաշրջանային հակամարտությունների թեման», - այսօր տեղեկացրել է Կրեմլի պաշտոնական ներկայացուցիչ Դմիտրի Պեսկովը։

«Մեզ շրջապատող շատ թեժ տարածաշրջանային խնդիրներ կան, որոնց լուծման համար անհրաժեշտ է մեր համագործակցությունը», - նշել է Պեսկովը։

Կրեմլի խոսնակի փոխանցմամբ՝ Վլադիմիր Պուտինը Իրանի և Թուրքիայի նախագահների հետ հանդիպումից բացի վաղը նախատեսում է այցելել նաև Իսլամական Հանրապետության գերագույն հոգևոր առաջնորդ Ալի Խամենեիին։

«Հուսով ենք, որ դա շատ հագեցած երկխոսություն կլինի», - նշել է Դմիտրի Պեսկովը։

Եվրամիությունը համաձայնեցրել է Ուկրաինայի զինված ուժերին 2.5 միլիարդ եվրոյի օգնության նոր փաթեթի տրամադրումը։ Այս մասին Twitter-ի իր օգտահաշվում գրել է ԵՄ խորհրդի նախագահ Շառլ Միշելը։

Որոշումը կայացվել է ԵՄ անդամ պետությունների արտգործնախարարների` երեկ Բրյուսելում կայացած գագաթնաժողովի ընթացքում։ Նախապես ենթադրվում էր, որ ԵՄ կողմից Կիևին տրամադրվող հինգերորդ տրանշի ընդհանուր ծավալը չի գերազանցի 500 միլիոնը։

«Ողջունում եմ ԵՄ արտգործնախարարների այս որոշումը։ Մենք շարունակում ենք նպաստել խաղաղության հաստատմանը, ինչպես նաև մեր արժեքների պաշտպանությանը», - գրել է Շառլ Միշելը։