Պատերազմ Ուկրաինայում (լայվ բլոգ, թարմացվող)

Ուկրաինական «Էներգոատոմ» ընկերությունը հայտնել է, որ ռուս զինվորականները առնվազն 14 միավոր ռազմական ծանր տեխնիկա, զինամթերք, զենք ու պայթուցիկ նյութեր են մտցրել Զապորոժիեի ատոմակայանի մասնաշենքերից մեկը։

«Բերված ծանր տեխնիկան իր ամբողջ զինամթերքով այս պահին գտնվում է տուրբոգեներատորի աշխատանքը ապահովող սարքավորումների մոտ»,- հայտարարել է «Էներգոատոմը»։

Ավելի վաղ հաղորդվել էր, որ ռուսները ատոմակայանի տարածքում փորձում են զինտեխնիկա թաքցնել ուկրաինական ուժերի հարվածներից։

Զապորոժիեի ԱԷԿ-ը Եվրոպայի ամենամեծ ատոմակայանն է։

ՄԱԿ-ի և Թուրքիայի միջնորդությամբ Ուկրաինան ու Ռուսաստանը համաձայնության են հասել ուկրաինական հացահատիկի արտահանման շուրջ, կողմերը պատրաստվում են առաջիկա ժամերին համապատասխան փաստաթուղթ ստորագրել Ստամբուլում: Այս մասին երեկ ուշ երեկոյան հայտարարել է Թուրքիայի նախագահի գրասենյակը։

«Հացահատիկի արտահանման մասին պայմանագրի ստորագրման արարողությունը, որին ներկա կլինեն նախագահ Ռեջեփ Էրդողանը և ՄԱԿ-ի գլխավոր քարտուղար Անտոնիու Գուտերեշը, տեղի կունենա ուրբաթ օրը՝ Ուկրաինայի և Ռուսաստանի ներկայացուցիչների մասնակցությամբ», - ասվում է թուրքական կողմի պաշտոնական հաղորդագրությունում։

Ճապոնիայի պաշտպանության նախարարությունը հրապարակել է իր տարեկան զեկույցը, որն ունի առանձին գլուխ՝ նվիրված Ուկրաինա ռուսական ներխուժմանը, հաղորդում է France-Presse լրատվական գործակալությունը։

Ինչպես գրում են ճապոնացի ռազմական վերլուծաբանները, Մոսկվայի գործողությունները վտանգ են ներկայացնում այն առումով, որ այլ երկրներ կարող են կարծել, թե «ընդունելի են ստատուս քվոն ուժով միակողմանիորեն փոխելու փորձերը»։ Տոկիոն մտավախություն ունի, որ այդ ազդանշանը ստացողներից մեկը կարող է լինել Չինաստանը, որը կարող է ուժով փորձել վերահսկողություն հաստատել Թայվանի նկատմամբ։

Տոկիոն վտանգ է տեսնում նաև Ճապոնիայի շուրջ ռազմավարական լանդշաֆտի փոփոխության հետ կապված, մասնավորապես՝ Ռուսաստանի և Չինաստանի միջև հարաբերությունների հետագա խորացման մեջ։

Ռուսաստանի կառավարությունը ոչ-բարեկամական երկրներին ցանկում ավելացրել է Հունաստանը, Դանիան, Սլովենիան, Խորվաթիան և Սլովակիան՝ ցանկում ընդգրկված երկրների թիվը հասցնելով 48-ի։

Կառավարության նոր որոշումը հինգ երկրների համար սահմանափակում է Ռուսաստանում դիվանագիտական ներկայացուցչություններում աշխատողներ ընդունելու հնարավորությունը։ Փաստաթղթի համաձայն՝ Սլովենիան և Խորվաթիան չեն կարողանա իրենց դիվանագիտական ներկայացուցչություններում և հյուպատոսություններում աշխատողներ ընդունել Ռուսաստանից։ Հունաստանին թույլատրվել է աշխատանքային պայմանագրեր կնքել 34 աշխատակցի հետ, Դանիային՝ 20, Սլովակիային՝ 16։

«Հյուսիսային հոսք 2» գազատարի գործարկումը միանգամայն անհնար է՝ դա կնշանակի սպիտակ դրոշ բարձրացնել։ Այսպիսի հայտարարությամբ է հանդես եկել Գերմանիայի փոխկանցլեր Ռոբերտ Հաբեկը, պնդելով՝ Եվրոպան չի կարող թույլ տալ, որ իր կախվածությունը ռուսական գազից մեծանա։

Անցած օրերին Ռուսաստանի նախագահ Վլադիմիր Պուտինն առաջարկել էր գործարկել «Հյուսիսային հոսք 2»-ը, ինչը, Կրեմլի ղեկավարի համոզմամբ, կնպաստի Եվրոպայում էներգետիկ ճգնաժամի լուծմանը։

Գերմանիայի փոխկանցլերի խոսքով՝ Բեռլինը «Հյուսիսային հոսք 1»-ի աշխատանքի վերսկսումը հուսալի չի համարում, քանի որ, ինչպես շեշտել է Հաբեկը, Պուտինը բազմիցս օգտագործել է գազի մատակարարումները որպես գործիք, ուստի պետք է այլընտրանք գտնել ռուսական էներգետիկ ռեսուրսներին։

Ռուսաստանի պաշտպանության նախարար Սերգեյ Շոյգուն ժամանել է Ստամբուլ՝ ստորագրելու ուկրաինական հացահատիկի արտահանման հարցով պայմանագիրը։ Ռուսաստանի ռազմական գերատեսչության փոխանցմամբ՝ Շոյգուն նախատեսում է նաև առանձնազրույց ունենալ թուրք պաշտոնակցի հետ։

Թուրքիայի նախագահի գրասենյակը երեկ ուշ երեկոյան հայտարարել է, որ ՄԱԿ-ի և Թուրքիայի միջնորդությամբ Ուկրաինան ու Ռուսաստանը համաձայնության են հասել ուկրաինական հացահատիկի արտահանման շուրջ, կողմերը պատրաստվում են այսօր՝ առաջիկա ժամերին համապատասխան փաստաթուղթ ստորագրել Ստամբուլում:

Mango հագուստի ապրանքանիշը թուրքական ընկերության օգնությամբ վերադառնում է ռուսական շուկա: Թուրքական Fiba Retail ընկերությունը, որը Ռուսաստանում զբաղվում էր բրիտանական Marks & Spencer (M&S) հագուստի ապրանքանիշի առաջմղամբ, բրիտանական արտադրանքի փոխարենը այժմ կզբաղվի իսպանական հագուստի վաճառքով։

Fiba Retail-ի կառավարման ներքո Ռուսաստանում գործում էր M&S-ի 48 խանութ, այդ թվում 33-ը՝ Մոսկվայում, 5-ը՝ Սանկտ Պետերբուրգում: Այժմ, ինչպես հաղորդվում է, այդ խանութներում M&S-ի փոխարեն կարող են վաճառվել Mango-ի ապրանքները:

Ուկրաինայում պատերազմի սկսվելուց հետո բրիտանական բրենդը որոշել է լքել ռուսաստանյան շուկան։ Իսպանական Mango-ն նույնպես մարտին դադարեցրել է իր արտադրանքի վաճառքը ռուսական խանութներում՝ պահպանելով միայն առցանց վաճառքը:

ԱՄՆ ռազմական գերատեսչության բարձրաստիճան պաշտոնյայի խոսքերով՝ Ռուսաստանը օրական հարյուրավոր զինվորականներ է կորցնում ուկրաինական պատերազմում և փետրվարի 24-ից ի վեր զոհվել են հազարավոր լեյտենանտներ, կապիտաններ, սպանվել են նաև հարյուրավոր գնդապետներ և «բազմաթիվ» գեներալներ: Այս մասին, անանուն մնալու պայմանով, Reuters-ի հետ զրույցում հայտարարել է ամերիկացի պաշտոնյան։

Մոսկվան ու Կիևը չեն բացահայտում պատերազմում իրենց զոհերի թիվը։ Ռուսաստանի պաշտպանության նախարարությունը վերջին անգամ տվյալներ է հրապարակել մարտի 25-ին՝ հայտարարելով, որ ռազմական գործողությունների ընթացքում սպանվել է 1351 մարդ, վիրավորվել` 3825-ը։ Ուկրաինայի ռազմական գերատեսչությունը զինվորականների շրջանում կորուստների վերաբերյալ առ այսօր որևէ տեղեկատվություն չի ներկայացրել:

Ռուսաստանի, Ուկրաինայի, Թուրքիայի և ՄԱԿ-ի միջև Ստամբուլում հացահատիկային միջանցքի մասին համաձայնագիր է ստորագրվել։

Փաստաթղթի ստորագրման արարողությանը Ռուսաստանի կողմից մասնակցել է պաշտպանության նախարար Սերգեյ Շոյգուն, Ուկրաինայից ներկա էր ենթակառուցվածքների նախարար Ալեքսանդր Կուբրակովը, գործարքի միջնորդ Թուրքիայից փաստաթուղթը ստորագրել է նախագահ Ռեջեփ Էրդողանը, բանակցությունները նախաձեռնած ՄԱԿ-ը ներկայացնում էր կառույցի գլխավոր քարտուղար Անտոնիո Գուտերեշը։

Ստորագրված փաստաթղթերի համաձայն՝ Սև ծովում պետք է ապաշրջափակվեն ուկրաինական երեք նավահանգիստներ՝ Օդեսան, Չեռնոմորսկը և Յուժնին։ Ռուսաստանը դրանք շրջափակել է պատերազմի սկզբից։ Մոսկվան ու Կիևը երաշխավորում են բեռնատար նավերի անցման երթուղու հրադադարը, պարտավորվում նաև ականազերծել այդ երթուղիները։ Հացահատիկի բեռնումը կվերահսկեն Ուկրաինայի, Թուրքիայի եւ ՄԱԿ-ի ներկայացուցիչներից կազմված խմբերը, բեռնատար նավերը կուղեկցեն բացառապես ուկրաինական նավատորմի նավերը։

Թուրքական կողմն իր հերթին պետք է ստուգի Ուկրաինայի նավահանգիստներ ժամանող դատարկ նավերը։ Այդկերպ թուրքական կողմը կփորձի փարատել Ռուսաստանի մտավախությունը, որ այդ նավերը կարող են օգտագործվել իբր արևմտյան զենք տեղափոխելու համար:

Եվրամիությունը հաստատեց Ուկրաինային ևս 500 միլիոն եվրոյի ռազմական օգնության փաթեթը։ Պատերազմի մեկնարկից ի վեր սա Բրյուսելի կողմից Կիևին հատկացվող օգնության արդեն հինգերորդ փաթեթն է՝ ընդհանուր գումարը հասցնելով 2,5 միլիարդ եվրոյի։

Եվրամիությունից բացի, Ուկրաինային աննախադեպ օգնություն է հատկացնում Միացյալ Նահանգները՝ ավելի վաղ հաստատված 40 միլիարդ դոլարի օգնության փաթեթի շրջանակներում։ Այդ փաթեթը նախատեսում է 24 միլիարդ դոլարի հատկացում սպառազինության ձեռքբերման, ուկրաինական բանակի ֆինանսավորման համար։ Մնացած միջոցները կուղղվեն տնտեսական ծրագրերին, հումանիտար խնդիրների լուծմանը։