Պատերազմ Ուկրաինայում (լայվ բլոգ, թարմացվող)

Էստոնիայի իշխանություններն այսօր կեսգիշերից դադարեցրել են Էստոնիայի հյուպատոսությունների կողմից տրված շենգենյան վիզա ունեցող Ռուսաստանի քաղաքացիների մուտքը երկիր։ Որոշումն ընդունել էր Բալթյան հանրապետության կառավարությունը օգոստոսի 11-ին։

Էստոնիայի վարչապետն այս կապակցությամբ ասել էր, որ ռուսները, հաշվի առնելով ուկրաինական իրադարձությունները, պետք է հասկանան, որ ԵՄ մուտք գործելը մարդու իրավունքների և ազատ տեղաշարժի խնդիր չէ, այլ արտոնություն նրանց համար, ում համայնքում պատրաստ են ընդունել որպես հյուր կամ բիզնես գործընկեր:

Ուկրաինայի նախագահ Վլադիմիր Զելենսկին այս ամսվա սկզբին, The Washington Post պարբերականին տված հարցազրույցում, առաջարկել էր ամբողջ Եվրոպայում արգելել Ռուսաստանի քաղաքացիների մուտքը:

Մոսկվան խիստ է արձագանքել այդ կոչին և դատապարտել է նման հայացքներ արտահայտող եվրոպացի գործիչներին:

Եվրոպայում շարունակվում է քննարկումը պատերազմի ֆոնին ռուսների համար շենգենյան վիզաների տրամադրման հնարավոր արգելքի թեմայի շուրջ։ Լատվիան, Էստոնիան, Լիտվան և Ֆինլանդիան կողմ են համաեվրոպական արգելքին։

Գերմանիայի կանցլեր Օլաֆ Շոլցը դեմ է արտահայտվել ռուսների համար շենգենյան վիզաների տրամադրման արգելքին։

ԱՄՆ-ը և եվրոպական մի քանի երկրներ Ուկրաինայում տիրող իրավիճակի հարցով օգոստոսի 24-ին ՄԱԿ-ի Անվտանգության խորհրդի նիստ են խնդրել, ռուսական ՏԱՍՍ գործակալությանը հայտնել է համաշխարհային կազմակերպության աղբյուրը։

«Համապատասխան հարցում է ուղարկվել ՄԱԿ-ի Անվտանգության խորհրդի նախագահին»,- ասել է նա:

Սպասվում է, որ այլ հարցերի հետ միասին կքննարկվեն ՄԱԿ-ի գլխավոր քարտուղար Անտոնիո Գուտերեշի Ուկրաինա կատարած այցի արդյունքները։

Վերջին անգամ ՄԱԿ-ի Անվտանգության խորհուրդը Ռուսաստանի նախաձեռնությամբ օգոստոսի 11-ին էր հավաքվել Ուկրաինայում ստեղծված իրավիճակը քննարկելու համար։ Այն ժամանակ գլխավոր թեման Զապորոժիեի ԱԷԿ-ի շուրջ ստեղծված իրավիճակն էր։

Այսօր Լվովում կայանալու է Ուկրաինայի և Թուրքիայի նախագահներ Վլադիմիր Զելենսկու և Ռեջեփ Թայիփ Էրդողանի, ինչպես նաև ՄԱԿ-ի Գլխավոր քարտուղար Անտոնիո Գուտերեշի եռակողմ հանդիպումը։

Թուրքիայի նախագահի աշխատակազմի տեղեկություններով՝ բանակցությունների ընթացքում կողմերը քննարկելու են Ուկրաինայում ծագած ճգնաժամի հանգուցալուծման հեռանկարները, ինչպես նաև ուկրաինական նավահանգիստներից գյուղմթերքի դուրսբերման շարունակվող գործընթացը։

Ըստ Ռուսաստանի պաշտոնական ՏԱՍՍ գործակալության, Անկարայում գտնվող դիվանագիտական աղբյուրները պնդում են, որ Լվովում կայանալիք բանակցությունների ընթացքում Ռեջեփ Թայիփ Էրդողանը կարող է հանդես գալ ռուս-ուկրաինական բանակցությունների ստամբուլյան ձևաչափի վերականգնման առաջարկով։

Կիևի և Մոսկվայի միջև ընթացող բանակցությունները դադարեցվել էին մարտի վերջին՝ ուկրաինական Բուչա քաղաքում տեղի ունեցած իրադարձություններից հետո։

Գյուղմթերքով բեռնված հերթական նավը լքել է ուկրաինական նավահանգիստներից մեկը, հաղորդել է Թուրքիայի պաշտպանության նախարարությունը։

Բելիզի դրոշի ներքո նավարկով I Maria բեռնանավը այսօր առավոտյան դուրս է եկել Չերնոմորսկի նավահանգստից։ Այն բեռնված է ուկրաինական եգիպտացորենով։

Այսպիսով, Ուկրաինայի, Ռուսաստանի, Թուրքիայի և ՄԱԿ-ի միջև կնքված քառակողմ համաձայնագրի շրջանակներում ուկրաինական նավահանգիստները լքած նավերի թիվը հասել է 25-ի։

Նույն աղբյուրի փոխանցմամբ, այսօր ևս չորս նավեր կժամանեն ուկրաինական նավահանգիստներ՝ առաջիկա օրերին գյուղմթերքով բեռնվելու համար:

Ռուսաստանի պաշտպանության նախարարությունը պնդում է, որ Կիևը սադրանք է նախապատրաստում Եվրոպայի խոշորագույն՝ Զապորոժիեի ատոմակայանում։ Այն, ըստ Ռուսաստանի ռազմական գերատեսչության, կարող է տեղի ունենալ ՄԱԿ-ի Գլխավոր քարտուղար Անտոնիո Գուտերեշի` վաղը կայանալիք այցի ժամանակ։

«Օգոստոսի 19-ին, ՄԱԿ-ի Գլխավոր քարտուղար Անտոնիո Գուտերեշի՝ Զապորոժիեի ատոմակայան կատարելիք այցի ընթացքում, Կիևի վարչակազմը մեծ հնչեղություն ունեցող սադրանք է նախապատրաստում։ Դրա հետևանքով Ռուսաստանի հասցեին ատոմակայանում տեխնոգեն աղետ հրահրելու մեղադրանք է ուղղվելու», - նշված է Ռուսաստանի ՊՆ այսօր առավոտյան տարածած հայտարարության մեջ։

«Ուկրաինայի ԶՈւ 44-րդ հրետանային բրիգադը մտադիր է Նիկոպոլում գտնվող կրակային դիրքերից օգոստոսի 19-ին հարվածներ հասցնել Զոպորոժիեի ատոմակայանին։ Այդ հարվածների հետևանքների մեղքը բարդվելու է Ռուսաստանի Զինված ուժերի վրա», - այսօր Մոսկվայում հայտարարել է Ռուսաստանի Պաշտպանության նախարարության պաշտոնական ներկայացուցիչ Իգոր Կոնաշենկովը։

Ռուսական բանակն այսօր առավոտյան հրետակոծել է Ուկրաինայի մեծությամբ երկրորդ քաղաքի՝ Խարկովի շրջաններից մեկը։

Ուկրաինայի արտակարգ իրավիճակների պետական ծառայության տվյալներով` ռուսական հրթիռը հարվածել է Սալտովի շրջանում գտնվող բազմահարկ շենքերից մեկի հարակից տարածքին, որից հետո ուժեղ հրդեհ է բռնկվել։

«Նախնական տեղեկությունների համաձայն` հարվածի հետևանքով զոհվել է 7 մարդ,13-ը վիրավորվել են», - փոխանցում է BBC-ն։

Ուկրաինայի նախագահ Վլադիմիր Զելենսկին Խարկովի հրետակոծությունը մեկնաբանել է սոցիալական ցանցերում՝ այն «քաղաքացիական անձանց հասցված ստոր և ցինիկ հարված որակելով»։

Զելենսկու պնդմամբ` հարվածի թիրախում հայտնված շինությունում հանրակացարան էր տեղակայված։ Ռուսական կողմը Խարկովի հրետակոծությունն առայժմ չի մեկնաբանում։

Գերմանիայի դաշնային կանցլեր Օլաֆ Շոլցը չորեքշաբթի երեկոյան Բեռլինից 40 կիլոմետր հյուսիս գտնվող Նոյռուպին քաղաք կատարած այցի ընթացքում չի կարողացել ավարտել իր ելույթը՝ կենտրոնական հրապարակում հավաքված քաղաքացիների սուլոցների և վիրավորական բացականչությունների պատճառով։

Շոլցը 30 հազար բնակիչ ունեցող Նոյռուպին էր ժամանել «Քաղաքացիական երկխոսություն» նախաձեռնության շրջանակներում կազմակերպված հանդիպմանը մասնակցելու համար։ Հրապարակում հավաքված քաղաքացիները, սակայն, Շոլցին դիմավորել են «Ստախոս» և «Կորիր այստեղից» վանկարկումներով։

Գերմանական աղբյուրների փոխանցմամբ` տեղի բնակիչների դժգոհության գլխավոր պատճառը Ուկրաինայում ծավալված պատերազմի ֆոնին արձանագրվող աննախադեպ գնաճն էր։

Թուրքական աղբյուրների պնդմամբ` Ռեջեպ Թայիփ Էրդողանը այսօր Լվովում նախատեսված բանակցությունների ընթացքում հանդես է գալու Ռուսաստանի և Ուկրաինայի նախագահների դեմ առ դեմ հանդիպում կազմակերպելու առաջարկով։ Այս մասին տեղեկացրել է թուրքական A Haber հեռուստաընկերությունը՝ վկայակոչելով դիվանագիտական աղբյուրները։

Մեկ այլ թուրքական հեռուստաընկերության՝ CNN Turk-ի տեղեկություններով` Պուտին-Զելենսկի հնարավոր հանդիպման դեպքում կողմերը պետք է ուկրաինական ճգնաժամի հաղթահարման ճանապարհային քարտեզ մշակեն։ Թուրքական NTV հեռուստաընկերության փոխանցմամբ էլ` Լվովում Էրդողանը կարող է առաջարկել Մոսկվայի և Կիևի միջև կրակի դադարեցման համաձայնագիր կնքել, ինչպես նաև ձեռնամուխ լինել գերիների փոխանակմանը։

«Կրակի հաստատուն դադարեցման հեռանկարը կախված է, թե ինչ ուղերձներ կստանան այսօր Թուրքիայի նախագահն ու ՄԱԿ-ի Գլխավոր քարտուղարը Վլադիմիր Զելենսկուց», - հաղորդում է CNN Turk-ը։

Մոսկվան մերժում է Զապորոժիեի ԱԷԿ-ի շուրջ ապառազմականացված գոտի ստեղծելու ՄԱԿ-ի առաջարկը:

Ռուսաստանի ԱԳՆ տեղեկատվության և մամուլի վարչության փոխտնօրեն Իվան Նեչաևը այս առաջարկը «անընդունելի» է որակել՝ պնդելով, որ նման քայլն «ատոմակայանն է՛լ ավելի խոցելի կդարձնի»։

Լվովում Ուկրաինայի նախագահ Վլադիմիր Զելենսկու, Թուրքիայի նախագահ Ռեջեփ Թայիփ Էրդողանի և ՄԱԿ-ի գլխավոր քարտուղար Անտոնիո Գուտերեշի հանդիպման ընթացքում քննարկվել է ռուս-ուկրաինական հակամարտության կարգավորման հարցը:

Ըստ Էրդողանի, քննարկվել է հացահատիկի փոխադրման շուրջ համաձայնության կայացումից հետո ստեղծված դրական մթնոլորտը պատերազմի դադարեցմանը ծառայեցնելու հնարավորությունը:

«Մեր եռակողմ հանդիպման հիմնական թեման այս պատերազմի հնարավոր ավարտն է»,- ասել է Էրդողանը:

CNN Turk հեռուստաընկերության հաղորդագրության համաձայն, Թուրքիայի ղեկավարը համոզմունք է հայտնել, որ հակամարտությունը պետք է կարգավորել դիվանագիտական ճանապարհով՝ բանակցությունների սեղանի շուրջ:

Հուլիսի 22-ին Ստամբուլում Ուկրաինան և Ռուսաստանը՝ Թուրքիայի և ՄԱԿ-ի միջնորդությամբ, կնքել են համաձայնություն, որով այժմ իրականացվում է պարենի փոխադրումը ռուսների կողմից պաշարված ուկրաինական նավահանգիստներից:

«Մենք խոսել ենք այն աշխատանքի մասին, որն անհրաժեշտ է կատարել ստամբուլյան համաձայնությունն ամուր խաղաղության վերածելու համար: Ես ընդգծել եմ, որ միջազգային համայնքը պարտավոր է մեծ ջանքեր գործադրել և արագացնել դիվանագիտական գործընթացը»,- Լվովում ասել է Թուրքիայի նախագահ Էրդողանը: