Պատերազմ Ուկրաինայում (լայվ բլոգ, թարմացվող)

Ֆրանսիայի նախագահ Էմանյուել Մակրոնը Ռուսաստանի նախագահ Վլադիմիր Պուտինի հետ հեռախոսազրույցում մտահոգություն է հայտնել Զապորոժիեի ատոմակայանի անվտանգության կապակցությամբ: Այդ մասին հաղորդել է Ելիսեյան պալատը:

«Ֆրանսիայի նախագահն ընդգծել է Ատոմային էներգիայի միջազգային գործակալության (ՄԱԳԱՏԷ) փորձագետների թիմը Զապորոժիե անհապաղ գործուղելու անհրաժեշտությունը»,- ասվում է Ելիսեյան պալատի հրապարակած հաղորդագրությունում:

Մակրոնը մտադիր է առաջիկա օրերին ևս մեկ անգամ Պուտինի հետ քննարկել ՄԱԳԱՏԷ-ի փորձագետների թիմը Զապորոժիեի ԱԷԿ ուղարկելու թեման:

Ռուսական կողմը նշում է, որ հեռախոսազրույցը տեղի է ունեցել Մակրոնի նախաձեռնությամբ:

ՄԱԿ-ի գլխավոր քարտուղար Անտոնիո Գուտերեշն այսօր Օդեսայում ասել է, թե դեռ շատ անելիք կա Ուկրաինայից պարենը և Ռուսաստանից պարարտանյութը համաշխարհային շուկաներ հասցնելու համար:

«Դա համաձայնություն է, որը կնքել են միմյանց դեմ դաժան հակամարտության մեջ ներքաշված կողմեր: Դա իր ծավալով ու նշանակությամբ աննախադեպ է: Բայց դեռ շատ անելիք կա: Ուկրաինայից և Ռուսաստանից պարենի և պարարտանյութի արտահանման ավելացումը կարևոր է միջազգային շուկաները կայունացնելու և գներն իջեցնելու համար» ,- ասել է Գուտերեշը:

Ուկրաինայի նախագահի և ՄԱԿ-ի գլխավոր քարտուղարի հետ երեկվա հանդիպումից հետո Թուրքիայի նախագահը կրկին փորձում է միջնորդ դառնալ ռուս - ուկրաինական հակամարտության կարգավորման հարցում։ «Ինչպես Սոչիում Պուտինին էի ասել, այնպես էլ Զելենսկուն եմ հիշեցրել, որ կարող ենք հյուրընկալել երկու նախագահների հանդիպումը», - այսօր ասել է Ռեջեփ Թայիփ Էրդողանը Ուկրաինայից վերադարձի ճանապարհին:

Էրդողանը լրագրողների հետ զրույցում նշել է՝ վստահ է, որ պատերազմը կարելի է կանգնեցնել դիվանագիտական և բանակցային ճանապարհով, և Անկարան պատրաստ է շարունակել ջանքերն այս ուղղությամբ:

Վաշինգտոնի սանկցիոն քաղաքականության համակարգող Ջեյմս Օ'Բրայենը ճեպազրույցում նշել է, որ Միացյալ Նահանգները կարող է ապագայում նոր խիստ պատժամիջոցներ սահմանել Ուկրաինայի վրա հարձակված Ռուսաստանի նկատմամբ:

Նա միաժամանակ նշել է, թե պատժամիջոցների սահմանումը կապված է բազմաթիվ խնդիրների հետ:

Այդպես նա արձագանքել է այն հարցին, թե ճի՞շտ է արդյոք, որ Պետական դեպարտամենտը Կոնգրեսին հորդորում է չընդգրկել Ռուսաստանը միջազգային ահաբեկչությունը հովանավորող երկրների ցանկում, քանի որ դա կարող է վնաս հասցնել ուկրաինական պարենը Սև ծովով դուրս հանելու Ուկրաինայի, Ռուսաստանի, Թուրքիայի և ՄԱԿ-ի գործարքին:

«Մենք շարունակում ենք ուկրաինացիների և կոնգրեսականների հետ քննարկել սանկցիաները խստացնելու թեման: Մեր ծրագիրը հստակ է՝ շարունակել նորանոր պատժամիջոցների սահմանումը, և այդ մոտեցումը չի փոխվի, քանի դեռ Ռուսաստանը չի դադարեցնի պատերազմը»,- նշել է Օ'Բրայենը:

Ամերիկայի Միացյալ Նահանգները հայտարարում է, որ Ուկրաինային 775 միլիոն դոլարի օգնության նոր փաթեթ է տրամադրելու՝ օգնելու վերականգնել տարածքները և հակահարձակում իրականացնել ռուսական ուժերի դեմ:

Օգոստոսի 19-ին ԱՄՆ պաշտպանության բարձրաստիճան պաշտոնյան լրագրողներին ասել է, որ փաթեթը կներառի 15 Scan Eagle հսկողության անօդաչու թռչող սարք, 40 ականակայուն, ականազազերծող մեքենաներ և 2000 զրահատեխնիկա։

Օգնության փաթեթը ներառում է նաև 1500 հակատանկային հրթիռ, 1000 Javelin հրթիռ:

Այսօր վաղ առավոտյան ուկրաինական ԱԹՍ-ն հարվածել է Ղրիմում՝ Սևաստոպոլում տեղակայված Ռուսաստանի Սևծովյան նավատորմի կենտրոնակայանի շենքին: Այդ մասին հայտնել է Մոսկվայի կողմից Սևաստոպոլի ղեկավար նշանակված Միխայիլ Ռազվոզժաևը: Նրա փոխանցմամբ, անօդաչուի հարվածից ավերվել է շենքի տանիքը, տուժածներ չկան:

Այս հարվածները վկայում են ռազմաճակատի մոտ, ինչպես նաև դրանից հեռու տեղակայված ռուսական ռազմական ենթակառուցվածքներին հարվածներ հասցնելու Ուկրաինայի բանակի հետզհետե աճող կարողությունների մասին:

Ռուսներն ուկրաինացիների կողմից զինամթերքի պահեստի պայթեցման հետևանքով ստիպված տարհանել են երկու գյուղերի բնակիչներին:

Կիևը մտահոգություն է հայտնում Զապորոժիեի ատոմակայանի շրջանում ռուսների մարտական ակտիվության հարցում, նշելով, որ գրավելով ԱԷԿ-ը և ամրապնդվելով դրան հարող տարածքում՝ ռուսներն այնտեղից են կրակ բացում, գիտակցելով, որ ուկրաինացիները չեն համարձակվի պատասխան կրակով վտանգել այդ կառույցը:

Կիևում ասում են, թե Մոսկվան ցանկանում է ԱԷԿ-ն անջատել ուկրաինական էներգացանցից և միացնել ռուսականին, և պատճառ գտնելու համար սադրանք է կազմակերպելու ԱԷԿ-ի մոտակայքում:

Ուկրաինայի ներքին համախառն արդյունքը մինչև տարեվերջ կնվազի 35-40 տոկոսով: Այդ մասին, ըստ Ukrinform պետական լրատվական գործակալության, ասել է Ուկրաինայի առաջին փոխվարչապետ, էկոնոմիկայի նախարար Յուլիա Սվիրիդենկոն: Կրճատման պատճառը փետրվարի 24-ին մեկնարկած ռուս-ուկրաինական պատերազմն է:

Սվիրիդենկոն հավաստիացրել է, որ պետությունը ձեռնարկություններին օգնելու ծրագրեր է կազմել:

Ուկրաինայում իրականացվում է արտադրությունը դեպի արևմտյան շրջաններ տեղափոխելու լայնածավալ ծրագիրը: Մոտ 700 ընկերություններ արդեն հաստատվել են արևմտյան շրջաններում:

Ռուսաստանի Խանտի-Մանսիական ինքնավար շրջանից Դաշնության խորհրդի անդամ ընտրված Էդուարդ Իսակովը հարազատ դստերը՝ Դիանային անվանել է «դավաճան», ասելով, թե «նա ծախել է հորը, ընտանիքը և Հայրենիքը»:

Սենատորն այդպիսի հայտարարություն է հրապարակել այն բանից հետո, երբ Դիանա Իսակովան BBC ռադիոկայանին և «Մեդուզա» կայքին տված հարցազրույցում ասել է, թե դատապարտել է Ուկրաինայի դեմ Կրեմլի նախաձեռնած պատերազմը և վերջերս հեռացել է Ռուսաստանից:

Սենատորն ասել է, թե երբ իմացել է «հատուկ ռազմական գործողության» նկատմամբ դստեր վերաբերմունքի մասին, փորձել է հետը զրուցել, բացատրել այդ «օպերացիայի» անհրաժեշտությունը, առաջարկել է միասին այցելել «խորհրդային ժողովրդի ռազմական փառքի վայրեր», բայց այդ ամենը Դիանայի կողմից մերժվել է:

Էդուարդ Իսակովն ասել է, թե Դիանան իր դուստրն է առաջին ամուսնությունից, և նա Դիանայի դաստիարակությամբ չի զբաղվել: Նա պնդել է, թե աղջիկը հոգեկան հիվանդ է և ներկայանում է որպես ԼԳԲՏ համայնքի աջակից:

«Այն պահից, երբ ես իմացա, որ նա հակառուսական դիրք է գրավել, ես նրա հետ չեմ շփվում, նյութապես չեմ օգնում, կացարան չեմ տրամադրում»,- ասել է Էդուարդ Իսակովը:

Ռուսաստանի պաշտպանության նախարարությունն այսօր հայտարարել է, թե ուկրաինական կողմը թունավոր նյութ է կիրառել Զապորոժիեի շրջանում իրենց խնդիրները կատարող ռուսաստանցի զինծառայողների նկատմամբ: Ըստ նախարարության, «զինծառայողները թունավորման նախանշաններով տեղափոխվել է հոսպիտալ»:

«Դոնբասում և այլ շրջաններում ռազմական պարտություններ կրելու պայմաններում Զելենսկու ռեժիմն արտոնել է քիմիական թունավոր նյութերի կիրառմամբ ահաբեկչական հարձակումները ռուսաստանցի զինծառայողների և խաղաղ բնակիչների վրա»,- հայտարարել է Ռուսաստանի պաշտպանության նախարարությունը:

Ըստ հաղորդագրության, դա տեղի է ունեցել հուլիսի 31-ին Զապորոժիեի շրջանի Վասիլևկա գյուղի մոտ, որտեղից մի խումբ ռուսաստանցի զինծառայողների՝ «սուր թունավորում» ախտանշանով շտապ տեղափոխել են հոսպիտալ:

«Ստուգումների ընթացքում զինծառայողների օրգանիզմում հայտնաբերվել է թունավոր նյութ՝ «Բ» տեսակի բոտուլոտոքսին: Ռուսաստանի պաշտպանության նախարարության ռազմական բժշկության գիտահետազոտական գլխավոր ինստիտուտի մասնագետները լրացուցիչ հետազոտություններ են անցկացրել և միանշանակ հաստատել, որ հայտնաբերված թունավոր նյութը՝ «Բ» տեսակի արհեստական ծագման բոտուլոտոքսին է»,- ասվում է նախարարության հաղորդագրությունում: