Պատերազմ Ուկրաինայում (լայվ բլոգ, թարմացվող)

Հունգարիայի կառավարությունը մտադիր չէ սահմանափակել Ռուսաստանի քաղաքացիների մուտքը, հայտարարել է երկրի արտաքին գործերի և առևտրի նախարար Պետեր Սիյարտոն էստոնացի գործընկերոջ հետ հեռախոսազրույցից հետո:

«Մենք կիսում ենք Գերմանիայի կանցլերի տեսակետը և չենք ծրագրում որևէ սահմանափակում», - ռուսական ՏԱՍՍ գործակալության փոխանցմամբ՝ Ֆեյսբուքում գրել է Սիյարտոն:

Հունգարիայի արտաքին գործերի և առևտրի նախարարն ասել է, որ Ռուսաստանի նկատմամբ սահմանված պատժամիջոցները չեն նպաստում ուկրաինական ճգնաժամի կարգավորմանը։

Միացյալ Նահանգների նախագահ Ջո Բայդենն այսօր զանգահարելու է ուկրաինացի պաշտոնակից Վլադիմիր Զելենսկուն:

Սպիտակ տան ղեկավարը մանրամասներ կներկայացնի Ուկրաինային փոխանցվելիք ամերիկյան ռազմական օգնության վերաբերյալ, հայտնել է Ազգային անվտանգության խորհրդի ռազմավարական հաղորդակցության գծով համակարգող Ջոն Քիրբին:

«Նախագահը, բնականաբար, նաև կշնորհավորի Վլադիմիր Զելենսկուն Ուկրաինայի անկախության օրվա կապակցությամբ», - ասել է Քիրբին:

Ուկրաինայի բժշկական հաստատությունները պատերազմի մեկնարկից ի վեր ռուսական բանակի հարձակմանն են ենթարկվել ավելի քան 400 անգամ, ինչի հետևանքով առնվազն 98 մարդ է զոհվել՝ ինչպես բժիշկներ, այնպես էլ հիվանդներ, հայտնում է Առողջապահության համաշխարհային կազմակերպությունն (ԱՀԿ) իր զեկույցում:

Ըստ զեկույցի՝ թիրախավորվել են նաև շտապօգնության մեքենաներն ու դեղորայքի պահեստները: Ու չնայած կրած լուրջ վնասներին՝ Ուկրաինայի առողջապահական համակարգը կոլապսի չի ենթարկվել, հայտարարել է ԱՀԿ ղեկավար Թեդրոս Գեբրեյեսուսը:

ՄԱԿ-ի գլխավոր քարտուղար Անտոնիո Գուտերեշը դարձյալ խորը մտահոգություն է հայտնել Զապորոժիեի ատոմակայանում ստեղծված իրավիճակի վերաբերյալ։

Իր Թվիթերում այսօր Գուտերեշը գրել է, որ հետագա էսկալացիան կարող է ինքնաոչնչացման հանգեցնել՝ նկատի ունենալով Եվրոպայի ամենամեծ ատոմակայանի վթարի դեպքում զանգվածային աղետալի հետևանքները։

«ՄԱԿ-ի քարտուղարությունը պատրաստ է աջակցել Կիևից դեպի ատոմակայան յուրաքանչյուր առաքելության», - գրել է ՄԱԿ-ի գլխավոր քարտուղարը։

ՄԱԿ-ի Անվտանգության խորհուրդը նախօրեին քննարկել է Զապորոժիեի ատոմակայանի վիճակը։

Առնվազն 25 մարդ է զոհվել, ևս երեք տասնյակ վիրավորներ կան չորեքշաբթի երեկոյան ռուսական ուժերի կողմից Ուկրաինայի Դնեպրոպետրովսկի մարզի Չապլինո երկաթուղային կայարանը հրետակոծելու հետևանքով։

Ուկրաինայի նախագահի աշխատակազմի ղեկավարի տեղակալ Կիրիլ Տիմոշենկոն հայտնել է, որ զոհվածների թվում երկու երեխա կա։

Ուկրաինայի արտգործնախարար Դմիտրի Կուլեբան հրետակոծված վայրի լուսանկար է հրապարակել։ «Ռուս ահաբեկիչները շարունակում են սպանել Ուկրաինայի խաղաղ բնակիչներին», - Թվիթերում գրել է Կուլեբան։

Ուկրաինայի նախագահ Վլադիմիր Զելենսկին, տեսակապով ելույթ ունենալով ՄԱԿ-ի Անվտանգության խորհրդի նիստում, ասել է, որ այդ պահին ստացված տեղեկատվության համաձայն՝ մարդատար չորս վագոններում հրդեհ է բռնկվել։ «Ահա թե ինչպես է Ռուսաստանը պատրաստվում ՄԱԿ-ի Անվտանգության խորհրդի նիստին»,- ասել է Զելենսկին։

Ռուսաստանի պաշտպանության նախարարությունը, մինչդեռ, այսօր հայտարարել է, որ Չապլինո կայարանում զինվորական էշելոնին «Իսկանդեր» հրթիռով հասցված հարվածի արդյունքում Ուկրաինայի զինված ուժերի 200-ից ավելի պահեստազորայիններ են սպանվել և ոչնչացվել է 10 միավոր զինտեխնիկա, որոնք ուղևորվում էին դեպի Դոնբասում ռազմական գործողությունների գոտի:

Կանադան Գերմանիային կփոխանցի ևս 5 տուրբին` «Հյուսիսային հոսք» գազատարի համար, հայտարարել է Կանադայի արտգործնախարարը։

Կանադայի կառավարությունը տուրբինների վերադարձը անհրաժեշտ քայլ է համարել Գերմանիա գազամատակարարումն ապահովելու համար։

Հուլիսին Կանադայի իշխանությունները, Բեռլինի խնդրանքով, թույլատրել են Մոնրեալում տեխնիկական սպասարկում անցնող մեկ տուրբին ուղարկել Գերմանիա՝ «Գազպրոմին» փոխանցելու համար։ Ռուսական կողմն այն չի ընդունել՝ պատճառաբանելով տեխնիկական խնդիրները։ Ուկրաինան կոչ է արել Կանադային՝ չվերադարձնել տուրբինները, և Ռուսաստանին մեղադրում է Գերմանիային շանտաժի ենթարկելու մեջ։

Ռուս ուղղափառ եկեղեցու առաջնորդ Կիրիլ պատրիարքը չեղարկել է իր մասնակցությունը հաջորդ ամիս Ղազախստանում կայանալիք միջկրոնական համաժողովին, որտեղ նախատեսված էր նրա հանդիպումը Հռոմի պապ Ֆրանցիսկոսի հետ։

Մոսկվայի պատրիարքարանի արտաքին կապերի ղեկավար, Վոլոկոլամսկի միտրոպոլիտն Անտոնին ասել է, որ պատրիարք Կիրիլը չի մասնակցի սեպտեմբերի 13-15-ը կայանալիք կրոնական համաշխարհային առաջնորդների համաժողովին, և հետևաբար Հռոմի պապի հետ որևէ հանդիպում տեղի չի ունենա։

Կիրիլը հոգևոր և գաղափարախոսական քարոզչությամբ արդարացնում է Ռուսաստանի ներխուժումը Ուկրաինա` այն կոչելով «մետաֆիզիկական պայքար Արևմուտքի դեմ»։ Նա օրհնել է պատերազմ մեկնող ռուս զինվորներին։

Հռոմի պապը դատապարտել է պատերազմը, բայց փորձում է բաց պահել Մոսկվայի հետ երկխոսության պատուհանը, որի համար արժանացել է Կիևի քննադատությանը։

Ֆրանցիսկոս պապը անցած ամիս ասել էր, թե Կիրիլին կհանդիպի Ղազախստանի համաժողովում, ինչը կլիներ Հռոմի պապի և ռուս պատրիարքի պատմության մեջ երկրորդ հանդիպումը։

Ռուսաստանի նախագահ Վլադիմիր Պուտինը հրամանագիր է ստորագրել, ըստ որի ավելացվում է երկրի զինված ուժերում ծառայողների քանակը։ Ներկայիս 1 միլիոն 900 հազարի փոխարեն` 2023 թվականի հունվարի 1-ից ռուսական բանակում ծառայելու է 2 միլիոն 40 հազար մարդ։

Իրավական տեղեկագրում հրապարակված հրամանագրի տեքստից հնարավոր չէ հասկանալ նման որոշում ընդունելու դրդապատճառները։ Միայն նշված է, որ հրամանագիրը ստորագրվել է «Պաշտպանության մասին» օրենքին համապատասխան։

Գալիք տարվանից ռուսական բանակի 2 միլիոն 40 հազար թվաքանակից 1 միլիոն 150 հազարը լինելու են զինվորականներ, մնացածը՝ քաղաքացիական անձնակազմ։

Ուկրաինայի իշխանությունները հայտարարել են, որ Զապորոժիեի ատոմակայանի աշխատող վերջին երկու ռեակտորներն անջատվել են՝ հարակից հրդեհների և էլեկտրահաղորդման գծերի վնասման պատճառով։ Այս փաստը խորացրել է մտահոգությունները, որ ԱԷԿ-ում կարող է միջադեպ գրանցվել։

Ավելի վաղ՝ երեկ հաղորդվել էր, որ ատոմակայանն անջատվել է ուկրաինական էլեկտրացանցից:

Այս ամենի ֆոնին օտարերկրյա՝ նախևառաջ եվրոպական տարբեր պաշտոնյաներ շարունակում են ճնշում գործադրել Մոսկվայի ու Կիևի նկատմամբ՝ քայլեր ձեռնարկելու, որպեսզի Եվրոպայի ամենամեծ ԱԷԿ-ը զերծ մնա վթարից։

Human Rights Watch իրավապաշտպան կազմակերպությունը մեղադրել է Ռուսաստանին Ուկրաինայի դեմ պատերազմում կասետային ռումբեր լայնորեն օգտագործելու մեջ, ինչի հետևանքով վնասվել են հարյուրավոր քաղաքացիական անձինք։

Ժամեր առաջ հրապարակված զեկույցի համաձայն` աշխարհի տարբեր հատվածներում ներկայումս ընթացող ռազմական գործողություններից կասետային ռումբեր կիրառվում են միայն ուկրաինական պատերազմում։

Կազմակերպությունը մեղադրել է նաև Ուկրաինային նման ռումբեր կիրառելու մեջ՝ առնվազն երեք անգամ:

Human Rights Watch-ը կոչ է արել Մոսկվային ու Կիևին միանալ կասետային ռումբերի կիրառումն արգելող 2008 թվականի միջազգային պայմանագրին։