Պատերազմ Ուկրաինայում (լայվ բլոգ, թարմացվող)

«Եվրահանձնաժողովն առաջարկելու է Եվրամիություն ներկրվող ռուսական գազի առավելագույն գին սահմանել», - այսօր հայտարարել է այդ կառույցի ղեկավար Ուրսուլա Ֆոն դեր Լայենը։

Եվրահանձնաժողովի ղեկավարի խոսքով, դա թույլ կտա սահմանափակել Ռուսաստանի՝ էներգակիրների վաճառքից ստացվող եկամուտները։

«Մենք պարտավոր ենք կրճատել Ռուսաստանի եկամուտները, որոնք Պուտինն օգտագործում է Ուկրաինայում դաժան պատերազմը վարելու համար», - հայտարարել է ֆոն դեր Լայենը։

Ռուսաստանի նախագահ Վլադիմիր Պուտինի համոզմամբ՝ ԵՄ տարածքում ռուսական գազի առավելագույն գին սահմանելու որոշումը կարող է հակառակ ազդեցությունն ունենալ։

«Վարչական ճանապարհով Եվրոպայում գազի գնի սահմանափակման փորձերն, այսպես կոչված, «գնային առաստաղի» ձևավորման միջոցով, կհանգեցնեն նոր գնաճի», - հայտարարել է Պուտինը։

Նրա խոսքով՝ նման քայլը «հիմարություն է, որ չունի որևէ հեռանկար»:

Թուրքիայի նախագահը կոչ է անում արևմտյան պետություններին չթերագնահատել Ռուսաստանին և այդ երկրի կարողությունները։ Այս մասին Ռեջեփ Թայիփ Էրդողանը հայտարարել է Բելգրադում կայացած ասուլիսի ժամանակ։

«Մենք փորձում ենք հասկանալ՝ արդյո՞ք Ուկրաինայի և Ռուսաստանի միջև պատերազմը կարող է մոտ ապագայում ավարտվել, թե՝ ոչ։ Այս պահին դա այնքան էլ հավանական չի թվում, սակայն ես ցանկանում եմ դիմել այն մարդկանց, որոնք թերագնահատում են Ռուսաստանին։ Դուք սխալվում եք։ Ռուսաստանը այն երկիրը չէ, որին կարելի է թերագնահատել», - հայտարարում էր Թուրքիայի նախագահը։

Սերբիայի նախագահ Ալեքսանդր Վուչիչի հետ հրավիրված համատեղ ասուլիսի ընթացքում Թուրքիայի նախագահը չշրջանցեց նաև Եվրոպայում ծագած էներգետիկ ճգնաժամի թեման։

«Ռուսաստանն այս պահին դադարեցրել է գազի մատակարարումները։ Գազի գինը Եվրոպայում բարձրացել է, և բոլորը սկսել են անհանգստանալ, թե ինչպես են գոյատևելու գալիք ձմռանը։ Իսկ ինչո՞ւ ավելի շուտ չէիք մտածում այս մասին։ Ռուսաստանը նման կարևոր նշանակություն ունի, դուք այս ամենի մասին ավելի շուտ պետք է մտահոգվեիք», - հայտարարում էր Ռեջեփ Թայիփ Էրդողանը։

Պատերազմի ուսումնասիրման ամերիկյան ինստիտուտի տեղեկություններով՝ ուկրաինական բանակը, ըստ ամենայնի, օգտվել է ռուսական ուժերի տեղափոխումից հարավ՝ Խերսոնի շրջան, և հարվածներ է հասցնում Բալակլեյայի շրջանում։

Աղբյուրը նշում է, որ ուկրաինացիները Բալակլեյայի շրջանում կարողացել են առաջ շարժվել մոտ 20 կմ և մոտ 40 քառակուսի կիլոմետր տարածք ազատագրել։

Ուկրաինայի Զապորոժիեի ատոմակայանի և մերձակա տարածքում վերսկսվել են գնդակոծությունները, կողմերը կրկին միմյանց են մեղադրում դրանց համար։

Էներգոդար քաղաքը, որտեղ գտնվում է կայանը, մնացել է առանց էլեկտրականության։

Ռուսական զորքերը հրթիռային և հրետանային հարվածներ են հասցրել Նիկոպոլ քաղաքին, որը գտնվում է Դնեպր գետի մյուս ափին, Եվրոպայի ամենամեծ ատոմակայանի դիմաց, ասել է Դնեպրոպետրովսկի մարզի ղեկավար Վալենտին Ռեզնիչենկոն։

Ռուսաստանի պաշտպանության նախարարությունը, մինչդեռ, հաղորդում է, որ խափանումը տեղի է ունեցել էլեկտրական ենթակայանի վրա ուկրաինական հարձակման պատճառով:

Պաշտոնական Մինսկը հայտարարում է Եվրամիության անդամ Լեհաստանի հետ սահմանին զորավարժությունների մեկնարկի մասին։

Բելառուսի պաշտպանության նախարարության հաղորդագրության համաձայն, «վարժանքները գործնականում թույլ կտան մշակել մարտական (հատուկ) գործողությունների անցկացումը՝ հակառակորդի կողմից ժամանակավորապես գրավված տարածքների ազատագրման» և սահմանամերձ շրջանների նկատմամբ վերահսկողությունը վերականգնելու ուղղությամբ։

Բելառուսի ռազմական գերատեսչությունը չի հստակեցնում զորավարժություններում ներգրավված զինվորների թիվը, բայց շեշտում է, որ ներգրավված զինտեխնիկան չի գերազանցում միջազգային փաստաթղթերով սահմանված չափորոշիչները։

Միացյալ Նահանգների պաշտպանության նախարար Լլոյդ Օսթինը հայտարարել է, որ Սպիտակ տունը հավանություն է տվել Ուկրաինային ևս 675 միլիոն դոլարի ռազմական օգնության փաթեթին, որը ներառում է 105 մմ տրամաչափով հաուբիցներ, ճշգրիտ կառավարվող GMLRS հրթիռներ և հրետանային զինամթերք։

Պենտագոնի ղեկավարը շեշտել է, որ Վաշինգտոնը «ակնհայտ հաջողություններ» է տեսնում Ուկրաինայում ռուսական զորքերի դեմ գործողություններում։

Օսթինն այս մասին խոսել է Գերմանիայում՝ Ռամշտայն ավիաբազա այցի ընթացքում։

Ռուսաստանցի լրագրող և բարերար Դմիտրի Ալեշկովսկու մուտքը Վրաստան արգելվել է: Այս մասին հայտնել է լրագրողի մայրը՝ հայտնի ընդդիմադիր հանրային գործիչ, պատմաբան Թամարա Էյդելմանը։

Վերջինիս խոսքով՝ Ալեշկովսկին կնոջ և դստեր հետ բնակվում է Թբիլիսիում, երկու օրով մեկնել էր Երևան, և հետդարձի ճանապարհին նրա մուտքն արգելվել է, ինչի պատճառով ստիպված վերադարձել է Հայաստան։

Վրաստանի իշխանությունները վերջին ամիսներին առանց բացատրության բազմաթիվ ռուս ընդդիմադիր ակտիվիստների և լրագրողների թույլ չեն տվել մուտք գործել երկիր։

Վերջին օրերին նույն արգելքը սահմանվել է նաև ռուսաստանցի ընդդիմադիր առաջնորդ Ալեքսեյ Նավալնիի մերձավոր թիմակից, փաստաբան Ֆյոդոր Տելինի նկատմամբ:

Միացյալ Նահանգների պետքարտուղար Էնթոնի Բլինքենն անակնկալ այցով ժամանել է Կիև, այսօր նախատեսված է նրա հանդիպումը Ուկրաինայի նախագահ Վլադիմիր Զելենսկու հետ։

Associated Press լրատվական գործակալության տվյալներով՝ կողմերը կքննարկեն 2,7 միլիարդ դոլարի ամերիկյան օգնության փաթեթը, որը Վաշինգտոնը մտադիր է հատկացնել Ուկրաինային և18 եվրոպական երկրների, որոնց ապագայում Ռուսաստանը կարող է սպառնալ:

Սա ամերիկացի բարձրաստիճան պաշտոնյայի երկրորդ այցն է Ուկրաինա Ռուսաստանի ռազմական ներխուժումից՝ փետրվարի 24-ից ի վեր:

Սեպտեմբերի 19-ից Էստոնիան ամբողջությամբ կսահմանափակի ցամաքային սահմանի հատումը շենգենյան վիզա ունեցող ռուսաստանցիների համար։ Այս մասին հայտարարել է երկրի արտգործնախարար Ուրմաս Ռեյնսալուն։

«Էստոնիայի քաղաքական կամքն է, որպեսզի սեպտեմբերի 19-ին ժամը 00:00-ից ուժի մեջ մտնի ՌԴ քաղաքացիների համար Էստոնիա մուտքի արգելքը։ Դա վերաբերում է այն ռուսաստանցիներին, ովքեր ունեն Էստոնիայի, ինչպես նաև Եվրամիության այլ երկրների կողմից տրված վիզաներ։ Լիտվան, Լատվիան և Լեհաստանը նույնը արգելքը կկիրառեն նույն պահից», - ասել է Ռեյնսալուն Տալլիննում կայացած մամուլի ասուլիսում։

«Մի եկեք Էստոնիա շենգենյան վիզաներով, ձեզ այստեղ չեն ողջունում», - դիմելով ռուսներին՝ ասել է Ռեյնսալուն։

Ավելի վաղ Բալթյան երկրները համատեղ հայտարարություն էին տարածել՝ սահմանը հատող ռուս զբոսաշրջիկներին անվանելով «հանրային անվտանգության սպառնալիք»: