- Հեղինակ՝ Լուսինե Մուսայելյան
Ուկրաինան հայտարարում է, որ շաբաթասկզբից ի վեր ավելի քան 20 բնակավայր է ազատագրել Խարկովի մարզում:
«Մեր զինվորները ներթափանցել են հակառակորդի պաշտպանական գծեր մինչև 50 կիլոմետր խորությամբ»,- հինգշաբթի մամուլի ասուլիսում հայտարարել է գլխավոր շտաբի ներկայացուցիչ Ալեքսեյ Գրոմովը։
Ուկրաինական կողմի այս պնդումները պատերազմի պայմաններում անկախ աղբյուրներից ստուգել առայժմ չի հաջողվել։ Պատերազմի ուսումնասիրման ամերիկյան ինստիտուտն այսօր ավելի վաղ հայտնել է, որ ուկրաինական բանակը, ըստ ամենայնի, օգտվել է ռուսական ուժերի տեղափոխումից հարավ՝ Խերսոնի շրջան, և հարվածներ է հասցնում Բալակլեյայի շրջանում։
Աղբյուրը նշել է, որ ուկրաինացիները Բալակլեյայի շրջանում կարողացել են առաջ շարժվել մոտ 20 կմ և մոտ 40 քառակուսի կիլոմետր տարածք ազատագրել։
- Հեղինակ՝ Լուսինե Մուսայելյան
Թուրքիայի նախագահ Ռեջեփ Թայիփ Էրդողանը հինգշաբթի օրը հայտարարել է, որ Թուրքիան ցանկանում է ճանապարհ հարթել նաև ռուսական հացահատիկի արտահանման համար Ուկրաինայի հետ ՄԱԿ-ի միջնորդությամբ կնքված համաձայնագրի շրջանակներում։
«Հուսով եմ, որ մենք կարող ենք որքան հնարավոր է շուտ սկսել հացահատիկի առաքումը նաև ռուսական կողմից և տեսնել, որ այդ հացահատիկը առաքվում է իսկապես աղքատ երկրներ», - հայտարարել է Էրդողանը` հավելելով, որ հարցը պատրաստվում է հաջորդ շաբաթ ռուսաստանցի պաշտոնակցի հետ քննարկել Ուզբեկստանում։
Ուկրաինան և Ռուսաստանը հուլիսին համաձայնագիր են ստորագրել ուկրաինական երեք նավահանգիստներից հացահատիկի արտահանման շուրջ։ Գործարքը նախատեսում է նաև ռուսական ցորենի ու պարարտանյութի արտահանում, ինչը, սակայն, առայժմ հետաձգվում է:
Արձագանքելով Պուտինի պնդմանը, թե ուկրաինական նավահանգիստներից հացահատիկը ուղարկվում է եվրոպացի սպառողներին, Էրդողանը ասել է․ «Պարոն Պուտինն իրավացի է` հացահատիկային միջանցքով առաքումներ են իրականացվում ոչ թե աղքատ երկրներ, այլ հիմնականում՝ զարգացած»։
Արևմտյան լրատվամիջոցները, վկայակոչելով պաշտոնական տվյալները, հայտնում են, որ սեպտեմբերի 8-ի դրությամբ ընդհանուր առմամբ 105 նավ է դուրս եկել ուկրաինական նավահանգիստներից՝ 2,3 միլիոն տոննա հացահատիկ և այլ սննդամթերք տեղափոխելով համաշխարհային շուկաներ։ DPA-ի տվյալներով` ուկրաինական պարենի ավելի քան 43%-ն ուղղվել է բարձր եկամուտ ունեցող երկրներին, այդ թվում՝ Իսպանիային, Իտալիային, Հարավային Կորեային, Նիդեռլանդներին, Գերմանիային:
- Հեղինակ՝ Լիլիթ Հարությունյան
ԱՄՆ-ն Ուկրաինային կտրամադրի օգնության 20-րդ փաթեթը։ Օգնության ընդհանուր գումարը կհասնի 13 մլրդ դոլարի, սեպտեմբերի 8-ին Կիևում, Ուկրաինայի նախագահի հետ հանդիպմանը, հայտարարել է Միացյալ Նահանգների պետքարտուղար Էնթոնի Բլինքենը։
ԱՄՆ պետքարտուղարն ընդգծել է, որ ուկրաինացիները Ռուսաստանի դեմ զենքը՝ «հրթիռներն ու հրետանին» արդյունավետ են օգտագործում։
- Հեղինակ՝ Լիլիթ Հարությունյան
Լատվիայի Սեյմը հրատապ օրենք է ընդունել Մոսկվայի Պատրիարքարանի Ռուս ուղղափառ եկեղեցուց Լատվիական ուղղափառ եկեղեցու անկախության մասին։ Այն ներկայացրել է երկրի նախագահ Էգիլս Լևիտսը։
«Լատվիայի անկախ, ժողովրդավարական և իրավական պետության մեջ մեր ուղղափառներին անհրաժեշտ է իրենց ինքնուրույն և անկախ եկեղեցին», - ասել է Լատվիայի նախագահը։
Լատվիայի իշխանություններն ավելի վաղ դատապարտել էին Մոսկվայի Պատրիարքարանին Ուկրաինայի տարածքում Ռուսաստանի գործողություններին աջակցելու համար։ Օրերս Լևիտսը հայտարարել էր, որ Ռիգան ցանկանում է բացառել Մոսկվայի Պատրիարքարանի ցանկացած ազդեցություն Լատվիայի եկեղեցու վրա։
Ընդունված փոփոխությունները հաստատում են Լատվիայի Ուղղափառ եկեղեցու լիակատար ինքնուրույն և անկախ կարգավիճակը՝ իր բոլոր թեմերով և հաստատություններով։ Օրենսդրական փոփոխությունները չեն վերաբերում կանոնական խնդիրներին։
Լատվիայի Ուղղափառ եկեղեցին մինչև հոկտեմբերի 31-ը պետք է իր կանոնադրությունը համապատասխանեցնի օրենքի նոր պահանջներին։
Լատվիական Ուղղափառ եկեղեցին Ռուս ուղղափառ եկեղեցու կազմում ինքնակառավարման կարգավիճակ է ստացել 1992 թվականին։
- Հեղինակ՝ Լիլիթ Հարությունյան
Ռուսաստանի նախագահ Վլադիմիր Պուտինի պաշտոնանկությունը պահանջող՝ Սանկտ Պետերբուրգի 7 պատգամավորները հրավիրվել են ոստիկանություն՝ բանակը վարկաբեկելու մեղադրանքով։
Ավելի վաղ Սանկտ Պետերբուրգի Սմոլնի մունիցիպալ կազմավորման 7 օրենսդիրները հայտարարել էին, որ դիմել են Պետդումա Պուտինին պետական դավաճանության համար մեղադրանք առաջադրելու ու նրան պաշտոնանկ անելու պահանջով։
Որոշումը ստորագրած պատգամավորներից Դմիտրի Պալյուգան Թվիթերում հրապարակել ՌԴ օրենսդիր մարմնին դիմելու վերաբերյալ իրենց որոշումը։
Պատգամավորների կարծիքով՝ Ուկրաինա ներխուժելու Պուտինի որոշումը վնաս է հացնում Ռուսաստանի և նրա քաղաքացիների անվտանգությանը, նպաստել է ՆԱՏՕ-ի ընդլայնմանն ու Ուկրաինայի ռազմականացմանը՝ այլ երկրների օգնությամբ, հակառակ «հատուկ ռազմական գործողության» հռչակված նպատակների:
Ուկրաինայի նախագահ Վլադիմիր Զելենսկին հանդիպել է Baykar ընկերության գործադիր տնօրեն Հալուք Բայրաքթարի հետ, որի ընթացքում քննարկել են Ուկրաինայում Baykar գործարանի կառուցման մանրամասները, հանդիպումից հետո սոցցանցում կատարած գրառմամբ հայտնել է Զելենսկին։
Հանդիպմանն անդրադարձել են ընկերության հետ Ուկրաինայի հետագա համագործակցությունը՝ ուկրաինական բանակի պաշտպանական կարողությունների ամրապնդման նպատակով, հայտնել են նախագահի մամուլի ծառայությունից։
- Հեղինակ՝ Գեւորգ Ստամբոլցյան
«Սեպտեմբերի 9-ի դրությամբ Խարկովի մարզում իրականացված հակահարձակման ընթացքում ուկրաինական բանակին հաջողվել է շուրջ 2500 քառակուսի կիոլմետր տարածք վերագրավել», - պնդում են Վաշինգտոնում գործող Պատերազմի ուսումնասիրության ինստիտուտի (ISW) փորձագետները։
Ամերիկացի մասնագետների պնդմամբ` ուկրաինական զորքերին հաջողվել է հասնել Կուպյանսկ քաղաքի մերձակայքին։
- Հեղինակ՝ Գեւորգ Ստամբոլցյան
Միացյալ Նահանգների Պաշտպանության նախարար Լլոյդ Օսթինը նախօրեին, Չեխիա կատարած այցի ընթացքում հաստատել է, որ վերջին օրերին ուկրաինական բանակին հաջողվել է որոշակի հաջողություններ արձանագրել ռազմի դաշտում։ Պենտագոնի ղեկավարի խոսքով՝ դա հնարավոր է դարձել Ուկրաինա մատակարարված արևմտյան սպառազինության կիրառման շնորհիվ։
«HIMARS հրթիռային համակարգերը շատ առանձնահատուկ դեր են խաղացել՝ թույլ տալով ուկրաինացիներին հարվածել երկրի ներսում գտնվող այն թիրախներին, որոնք կարևոր նշանակություն ունեին։ Այդ իսկ պատճառով նրանք այդ սպառազինությունը, ինչպես նաև HARM տեսակի հրթիռները կիրառել են ռազմի դաշտում դինամիկան փոխելու նպատակով։ Մենք հաջողություններ ենք տեսնում Խերսոնում, որոշակի հաջողություններ կան նաև Խարկովի մարզում և դա շատ հուսադրող է», -հայտարարում էր Միացյալ Նահանգների պաշտպանության նախարարը։
- Հեղինակ՝ Գեւորգ Ստամբոլցյան
«Վերջին օրերին Խարկովի մարզում ձեռնարկած հակահարձակման ընթացքում ուկրաինական զորքերին հաջողվել է շուրջ երեք տասնյակ բնակավայր ազատագրել», - այսօր հայտարարել է Ուկրաինայի Զինված ուժերի Գլխավոր շտաբի պաշտոնական ներկայացուցիչ Ալեքսանդր Շտուպունը։
«Ընդհանուր առմամբ վերջին մի քանի օրերին Ուկրաինայի տարածքից շուրջ հազար քառակուսի կիլոմետր ազատագրվել է զավթիչներից։ Որոշ ուղղություններում Պաշտպանության ուժերի ստորաբաժանումները թշնամու դիրքերում խորացել են ավելի քան 50 կիլոմետրով։ Խարկովի մարզի ավելի քան 30 բնակավայրեր, որոնք ժամանակավորապես գրավվել էին Ռուսաստանի կողմից, ազատագրվել են կամ անցել են մեր վերահսկողության տակ», - հայտարարել է Շտուպունը։
- Հեղինակ՝ Գեւորգ Ստամբոլցյան
«Վերջին 24 ժամերին Ռուսաստանի Զինված ուժերը Ուկրաինայի տարածքում վեց զինապահեստ և յոթ հրամանատարական կետ են ոչնչացրել», - այսօր հայտարարել է Ռուսաստանի ՊՆ պաշտոնական ներկայացուցիչ Իգոր Կոնաշենկովը։
Նրա խոսքով՝ ոչնչացված զինապահեստները գտնվել են Դոնեցկի, Դնեպրոպետրովսկի և Զապորոժիեի մարզերում։ Բացի այդ, ըստ Կոնաշենկովի, Նիկոլաևի մարզի Կալուգա գյուղի մոտ ոչնչացվել է հակաօդային պաշտպանության ռադարային կայաններից մեկը, որն օգտագործվում էր օդային թիրախների հայտնաբերման նպատակով։