Պատերազմ Ուկրաինայում (լայվ բլոգ, թարմացվող)

Ռուսաստանի պաշտպանության նախարարությունը պնդում է, որ բանակը Զապորոժիեի շրջանում հաջողությամբ հարվածներ է հասցրել և ոչնչացրել է HIMARS տեսակի ամերիկյան արտադրության համազարկային կրակի հրթիռային համակարգ: Այդ մասին ասել է նախարարության խոսնակ գեներալ-լեյտենանտ Իգոր Կոնաշենկովը:

Մինչդեռ ուկրաինացիները, իրենց հերթին, հաղորդում են վերջին օրերին արևելյան ճակատում ռուսների գրոհները հաջողությամբ ետ մղելու մասին: Ուկրաինայի գլխավոր շտաբի փոխանցմամբ, մասնավորապես, հաջողվել է կասեցնել ռուսների հարձակումը Կուպյանսկի ուղղությամբ: Բացի այդ, ուկրաինացիներն անընդհատ հարվածներով կանխում են Անտոնովսկի կամուրջը վերանորոգելու ռուսների փորձերը:

Նյու Յորքում ՄԱԿ-ի Գլխավոր ասամբլեայի 77-րդ նստաշրջանին մասնակցող Եվրոպական միության արտաքին քաղաքականության և անվտանգության հարցերով բարձր ներկայացուցիչ Ժոզեպ Բորելը հայտարարել է, թե անհրաժեշտ է ստեղծել անկախ դատարան, որը պատասխանատվության կենթարկի Ուկրաինայում հանցանքներ կատարած ռուսաստանցիներին: Այդ մասին նա ասել է Politico հանդեսին տված հարցազրույցում:

«Մենք կողմ ենք, որ ռուսաստանցիները պատասխանատվություն կրեն իրենց գործողությունների համար: Ռուսաստանը և Ուկրաինան Միջազգային քրեական դատարանի անդամներ չեն, հետևաբար անհրաժեշտ կլինի հատուկ իրավասություն գտնել», - ասել է Բորելը:

Մինչդեռ, Ուկրաինայի նախագահի աշխատակազմի ղեկավարի տեղակալ Անդրեյ Սմիրնովն ասել է, թե Կիևն առաջարկում է «Նյուրնբերգի դատարանի օրինակով կազմավորել միջազգային դատարան, որն Ուկրաինայում կատարած հանցանքների համար պատասխանատվության կենթարկի ռուսաստանցի քաղաքական և ռազմական բարձրաստիճան ղեկավարներին»:

Վաշինգտոնից ստացված հաղորդագրության համաձայն, Թուրքիայի նախագահ Ռեջեփ Թայիփ Էրդողանը PBS ամերիկյան հեռուստակայանին տված հարցազրույցում ասել է, թե Ռուսաստանը ցանկանում է հնարավորինս արագ ավարտել հակամարտությունն Ուկրաինայի հետ:

«Ուզբեկստանում ես հանդիպել եմ նախագահ Վլադիմիր Պուտինին և հանգամանալից բանակցություններ եմ անցկացրել»,- ասել Էրդողանը, նշելով, թե, իր տպավորությամբ, Պուտինն ուզում է հնարավորինս արագ ավարտել» պատերազմը:

Էրդողանի խոսքով, «հիմա այս գործը {պատերազմն Ուկրաինայում} բավական բարդ է ընթանում»:

Դոնեցկի և Լուգանսկի անջատական կազմավորումների ռուսամետ իշխանությունների որոշմամբ սեպտեմբերի 24-ից 27-ը տեղի կունենան «հանրաքվեներ» Ռուսաստանին միանալու հարցով:

«Դոնեցկի ժողովրդական հանրապետության» անունից այդ մասին հայտնել է «հանրապետության ժողովրդական խորհուրդը»:

«Լուգանսկի ժողովրդական հանրապետության» անունից այդ որոշման մասին հայտնել է «ժողովրդական խորհրդի նախագահ» Դենիս Միրոշնիչենկոն:

Նման որոշում է կայացրել նաև Խերսոնի մարզի՝ ռուսների հսկողության տակ գտնվող տարածքի տեղական իշխանությունը: Այդ մասին հայտնել է Խերսոնի մարզի ռազմա-քաղաքացիական վարչակազմի ղեկավար Վլադիմիր Սալդոն:

Ռուսաստանի արտաքին գործերի նախարար Սերգեյ Լավրովն այսօր ասել է, որ Ռուսաստանին միանալու հարցով Դոնբասում հանրաքվեներ անցկացնելու իրավունքը բացառապես վերապահված է այդ շրջանում բնակվող մարդկանց:

«Այս հատուկ ռազմական օպերացիայի ամենաառաջին օրերին մենք ընդգծել ենք, որ այդ տարածքներում ապրող մարդիկ պետք է տնօրինեն իրենց ճակատագիրը: Այս ամբողջ իրավիճակը հաստատում է, որ նրանք հենց դա են ուզում»,- ասել է Լավրովը Ռուսաստանի պետական հեռուստաընկերության թղթակցի հետ զրույցում:

Պաշտոնական Մոսկվան նկատել է տալիս, թե որևէ կերպ չի միջամտում գործընթացին և չի ուղղորդում Դոնեցկի, Լուգանսկի և Խերսոնի շրջաններում «հանրաքվեներ» անցկացնելու նախաձեռնությունը:

Այդ «հանրաքվեները» նախատեսվում է անցկացնել սեպտեմբերի 23-ից 27-ը: Կիևը և արևմտյան երկրները հայտնել են, որ երբևէ չեն ճանաչի այդ «հանրաքվեների» արդյունքը:

Ռուսաստանի ռազմարդյունաբերական համալիրը պետք է հնարավորինս արագ ավելացնի արտադրության ծավալը և կրճատի դրա ժամանակն, ինչպես նաև ապահովի բանակի մատակարարումն անհրաժեշտ սպառազենով և տեխնիկայով:

Այդ մասին այսօր նախագահ Վլադիմիր Պուտինն ասել է ռազմարդյունաբերական ոլորտի բարձրաստիճան պաշտոնյաների հետ խորհրդակցության ընթացքում:

Պուտինը նաև պնդել է, որ ռուսական սպառազենը և տեխնիկան բարձր արդյունավետություն են ցուցադրում Ուկրաինայում ընթացող գործողություններում և հաջողությամբ դիմակայում են արևմտյան սպառազենին:

Միաժամանակ Պուտինը հանձնարարել է ուսումնասիրել արևմտյան տեխնիկան, որը ՆԱՏՕ-ն տրամադրում է Ուկրաինային և դրա միջոցով կատարելագործել հայրենական արտադրության սպառազենը:

Ուկրաինայի ֆուտբոլի ընկերակցության նախագահ Անդրեյ Պավելկոյի փոխանցմամբ, Ռուսաստանին զրկել են ֆուտբոլի Եվրոպայի 2024 թվականի առաջնությանը մասնակցելու իրավունքից:

Այդ առաջնությունը պետք է անցկացվի Գերմանիայում: Ռուսաստանի ներկայացուցչին չեն թույլատրի մասնակցել հավաքականների խմբերի կազմավորման վիճակահանությանը, որը հոկտեմբերի 9-ին տեղի կունենա Մայնի Ֆրանկֆուրտում:

«Առնվազն մինչև 2024 թվականը ռուսները միջազգային մրցումների չեն մասնակցի: Եվրո-2024-ը կանցնի առանց Ռուսաստանի»,- ասել է Պավելկոն:

Եվրո-2024-ը կանցկացվի 2024 թվականի հունիսի 14-ից հուլիսի 14-ը գերմանական տասը քաղաքներում՝ Բեռլինում, Քյոլնում, Մյունխենում, Մայնի Ֆրանկֆուրտում, Համբուրգում, Դորթմունդում, Լայպցիգում, Գելզենկիրխենում, Շտուտգարտում և Դյուսելդորֆում: Եվրոպայի ֆուտբոլի առաջնությանը կմասնակցեն 24 երկրների հավաքականներ:

Ռուսաստանի նախագահ Վլադիմիր Պուտինը հանդես եկավ տեսաուղերձով՝ այսօրվանից հայտարարելով մասնակի զորահավաք և բացատրելով դա երկրի տարածքային ամբողջականությունն ու ինքնիշխանությունը, «ազատագրված տարածքների ժողովրդի» անվտանգությունը պաշտպանելու անհրաժեշտությամբ:

Պուտինը նշեց, որ ռուս զինվորականները գործում են շփման գծում, որի երկարությունը գերազանցում է 1000 կիլոմետրը, և դիմադրում են հավաքական Արևմուտքի ռազմական մեքենային։

Ռուսաստանի նախագահի խոսքով՝ հայտարարված զորահավաքի շրջանակում զորակոչի կենթարկվեն միայն պահեստային զինծառայողները, առաջին հերթին «նրանք, ովքեր ծառայել են զինված ուժերում, ունեն որոշակի ռազմական մասնագիտություններ և համապատասխան փորձ»։ Նա խոստացավ, որ նախքան ստորաբաժանումներ ուղարկելը նրանք պարտադիր լրացուցիչ վերապատրաստում կանցնեն՝ հաշվի առնելով ՀԱՊԿ-ի փորձը։

Պուտինը նաև վստահեցրեց, որ բոլոր ռուսաստանցիները, ովքեր կզորակոչվեն զորահավաքի շրջանակում, կստանան պայմանագրային զինծառայողների կարգավիճակ, վճարումներ և սոցիալական բոլոր երաշխիքները։

Վլադիմիր Պուտինը կրկին զգուշացրեց, որ հարկ եղած դեպքում Ռուսաստանը միջուկային զենք է կիրառելու: «Դա բլեֆ չէ», - ընդգծեց Ռուսաստանի նախագահը:

Ռուսաստանի պաշտպանության նախարար Սերգեյ Շոյգուն մանրամասնել է, որ նախատեսվում է զորակոչել 300 հազար մարդու:

Ամիսների դադարից հետո Ռուսաստանն այսօր հրապարակել է Ուկրաինայում իր զոհերի թիվը՝ 5 հազար 937 մարդ:

Կիևի և արևմտյան պետությունների հաշվարկներով՝ Ռուսաստանի կորուստները անհամեմատ ավելի մեծ են:

Արևմտյան առաջնորդները երեկվանից կոշտ քննադատում են Ուկրաինայի օկուպացված տարածքներում Ռուսաստանին միանալու հարցով հաջորդ շաբաթ նշանակված հանրաքվեները:

Ֆրանսիայի նախագահ Էմանյուել Մակրոնը, մասնավորապես, ցինիկ ծաղր է որակել այս նախաձեռնությունը, Միացյալ Նահանգները հանրաքվեներն անվանել է վիրավորանք Ուկրաինայի տարածքային ամբողջականության և ինքնիշխանության սկզբունքներին: