Պատերազմ Ուկրաինայում (լայվ բլոգ, թարմացվող)

Իրանի Իսլամական Հանրապետությունը ափսոսանք է հայտնում Թեհրանի հետ դիվանագիտական հարաբերությունների մակարդակը նվազեցնելու Կիևի կայացրած որոշման առթիվ, այսօր հայտարարել է Իրանի ԱԳՆ պաշտոնական ներկայացուցիչ Նասեր Քանանին։

Իրանցի դիվանագետը կոչ է արել Կիևին «զերծ մնալ երրորդ երկրների ազդեցությունից, որոնք փորձում են խաթարել Իրանի և Ուկրաինայի երկկողմ հարաբերությունները»։

Պաշտոնական Կիևը Իրանի հետ հարաբերությունների մակարդակը նվազեցնելու, մասնավորաբար դեսպան Մանուչեր Մորադիին Ուկրաինայի տարածքում աշխատելու հավատարմագրից զրկելու, ինչպես նաև Կիևում իրանական դեսպանատան աշխատակիցների թվի կրճատման պահանջի մասին հայտարարել էր նախօրեին։ Պատճառն, ըստ ուկրաինական կողմի, ռազմական գործողությունների ընթացքում Ռուսաստանի կողմից իրանական արտադրության անօդաչու թռչող սարքերի կիրառումն է։ Նման առաջին ապացուցված դեպքը արձանագվեց ուրբաթ օրը, երբ իրանական արտադրության Shahhed 129 տեսակի անօդաչուն հարվածեց Օդեսայի նավահանգստին։

«Իրանը համագործակցում է չարիքի հետ», - մեկնաբանելով իրանական դրոնների վաճառքը Ռուսաստանին` նախօրեին հայտարարել է Ուկրաինայի նախագահ Վլադիմիր Զելենսկին։

Ռուսաստանի նախագահ Վլադիմիր Պուտինը այսօր ստորագրել է երկրի Քրեական օրենսգրքում կատարված մի շարք լրացումները, որոնցով խստացվում են դասալքության և դիակապտության համար սահմանված պատիժները, ինչպես նաև պատիժ է սահմանվում կամավորաբար գերի հանձնվելու համար։

Քրեական օրենսգրքում կատարված լրացումների համաձայն` ռազմական գործողությունների ընթացքում սեփական կամքով գերի հանձնվելու համար սահմանվում է 3-ից 10 տարվա ազատազրկում։

Զորահավաքի և ռազմական դրության պայմաններում 2-ից 10 օրով զորամասը լքելու համար պատիժ է սահմանվում մինչև 5 տարվա ազատազրկումը՝ նախկինում գործող մեկ տարվա փոխարեն։ «Օրենսգրքում կատարված նոր լրացումներով դիակապտության համար նախատեսված պատիժը կարող է հասնել 15 տարվա ազատազրկման, եթե կատարվել է զորահավաքի ընթացքում կամ ռազմական դրության պայմաններում», - հաղորդում է «Ինտերֆաքսը»։

Անկարան չի պատրաստվում ճանաչել Դոնեցկի և Լուգանսկի մարզերում անցկացվող հանրաքվեի արդյունքները, հայտարարել է Թուրքիայի նախագահի խոսնակը: Իբրահիմ Քալընը թուրքական NTV հեռուստաալիքի եթերում ասել է՝ Թուրքիայի դիրքորոշումը այս հարցում նույնն է, ինչ Ղրիմի դեպքում:

«Մենք շարունակում ենք աջակցել Ուկրաինայի տարածքային ամբողջականությանն ու ինքնիշխանությանը: Մենք Ուկրաինայի կողքին ենք այս պատերազմում: Միակ երկիրը Թուրքիան է, որը փորձում է վերջ դնել պատերազմին»,- ասել է Քալընը:

«Մեծ յոթնյակի» երկրների ղեկավարները հայտարարել են, որ երբեք չեն ճանաչի Ուկրաինայի օկուպացված տարածքներում կեղծ հանրաքվեները և դրանց հնարավոր բռնակցումը Ռուսաստանին, ասվում է կազմակերպության հայտարարության մեջ։

«Մենք՝ G7-ի առաջնորդներս, խստորեն դատապարտում ենք կեղծ հանրաքվեները, որոնք Ռուսաստանը փորձում է օգտագործել որպես կեղծ առիթ` փոխելու Ուկրաինայի ինքնիշխան տարածքի կարգավիճակը, որը շարունակում է մնալ ռուսական ագրեսիայի օբյեկտ»,- ասվում է հայտարարության մեջ։

G7-ի ղեկավարները «ռուսական օկուպացիոն իշխանությունների այս գործողությունները» համարում են ՄԱԿ-ի կանոնադրության և միջազգային իրավունքի ակնհայտ խախտում:

Ուկրաինայի նախագահ Վլադիմիր Զելենսկին հայտարարել է, որ ռուս զինվորներին, ովքեր կհանձնվեն Ուկրաինային, կվերաբերվեն «քաղաքակիրթ ձևով»։

Իր գիշերային ուղերձում Զելենսկին կոչ է արել ռուսներին փախչել կամ միանգամից հանձնվել ճակատում:

Սա հաջորդում է Ռուսաստանի նախագահի ՔՕ-ում կատարված մի շարք լրացումները ստորագրելուն, որոնցով ռազմական գործողությունների ընթացքում սեփական կամքով գերի հանձնվելու համար սահմանվում է 3-ից 10 տարվա ազատազրկում։

Խոսելով ռուսերեն՝ Վլադիմիր Զելենսկին կոչ է արել ռուսներին հանձնվել Ուկրաինային, այլ ոչ թե հակամարտությունից հետո որպես ռազմական հանցագործ դատվելու վտանգի ենթարկվել:

Ուկրաինան դասալիքների հետ կվերաբերվի միջազգային կոնվենցիաներին համապատասխան և որևէ մեկին չի վերադարձնի Ռուսաստան, եթե նրանք վախենում են հետևանքներից, ասել է նա։

Եթե Ռուսաստանի հատի «կարմիր գիծը», Միացյալ Նահանգները վճռական պատասխան կտա, կիրակի օրը հայտարարել է Սպիտակ տան ազգային անվտանգության հարցերով խորհրդական Ջեյք Սալիվանը։

Նրա խոսքով՝ Մոսկվան «աղետալի հետևանքների» կբախվի, եթե միջուկային զենք օգտագործի Ուկրաինայի դեմ, քանի որ Միացյալ Նահանգները պատրաստ է խստորեն արձագանքել նման քայլին։

«Եթե Ռուսաստանը հատի այս սահմանը, հետևանքները նրա համար աղետալի կլինեն։ ԱՄՆ-ը խստորեն կպատասխանի», - ասել է Սալիվանը NBC-ին տված հարցազրույցում։

Սպիտակ տան անվտանգության հարցերով խորհրդականը չի հստակեցրել, թե ինչ ասել է «վճռական պատասխան», սակայն ասաց, որ Վաշինգտոնը Մոսկվային ասել է «ավելի մանրամասն, թե դա ինչ է նշանակում»:

Սալիվանն ընդգծել է, որ ԱՄՆ-ն այսօր էլ ուղիղ կապ է պահպանում Ռուսաստանի հետ, այդ թվում՝ վերջին մի քանի օրվա ընթացքում, քննարկելու Ուկրաինայում տիրող իրավիճակը, Պուտինի գործողություններն ու սպառնալիքները։

Կիրակի օրը Ռուսաստանում շարունակվել են բողոքի ցույցերն ընդդեմ Ուկրաինայի դեմ պատերազմի զորահավաքի:

Դաղստանի մայրաքաղաք Մախաչկալայում հակամոբիլիզացիոն ցույցերի ժամանակ ոստիկանությունը ձերբակալել է ավելի քան հարյուր ցուցարարների:

Ռուսաստանի այս հանրապետությունում մարդիկ փակել են մայրուղին և վանկարկել «ո՛չ պատերազմին», իսկ ուժայիններն օդ են կրակել:

Խասավյուրտի մոտակայքում գտնվող Էնդիրեյ մեծ գյուղի բնակիչները, բողոքելով զորահավաք դեմ, փակել են Խասավյուրտ-Մախաչկալա մայրուղին։ Ավելի ուշ Մախաչկալայում սկսվել է բողոքի ակցիա՝ հիմնականում կանանց մասնակցությամբ։

Յակուտիայում նույնպես հրապարակում ցույց է անցկացվել։

Միացյալ Նահանգների պետքարտուղարը Ռուսաստանի նախագահի՝ միջուկային զենքի հետ կապված հռետորաբանությունն անվանել է «անպատասխանատու»։

Ամերիկյան CBS հեռուստառադիոընկերությանը տված հարցազրույցում Էնթոնի Բլինքենն ասել է, որ ԱՄՆ-ը մշակել է գործողությունների ծրագիր Ռուսաստանի կողմից միջուկային զենք կիրառելու դեպքում։ Պետքարտուղարը մանրամասներ չի ներկայացրել։

Հարցին, թե արդյոք Վաշինգտոնը մասնավոր կապ է հաստատել Կրեմլի հետ միջուկային պատերազմի սպառնալիքի առնչությամբ, Բլինքենը դրական է պատասխանել. - «Այո։ Շատ կարևոր է, որ Մոսկվան մեզնից լսի և մեզնից տեղեկանա, որ նման քայլի հետևանքները սարսափելի կլինեն։ Եվ մենք դա շատ պարզ հասկացրեցինք»:

«Այս պահի դրությամբ զորակոչային տարիքի տղամարդկանց համար սահմանը փակելու մասին որևէ որոշում չի կայացվել», - այսօր լրագրողների հետ զրույցում նշել է Ռուսաստանի նախագահի մամուլի խոսնակ Դմիտրի Պեսկովը՝ մեկնաբանելով կիրակի օրվանից մամուլում շրջանառվող լուրերը։

Դրանց համաձայն, Ռուսաստանի՝ օտար պետություններին սահմանակից մի շարք մարզերում և ազգային հանրապետություններում կարող է ռազմական դրություն հայտարարվել, ինչը կհանգեցնի նաև սահմանների փակմանը։

«Հարկավոր է շատ զգուշորեն վերաբերվել նման արտահոսքերին։ Մեր հակառակորդներն ու թշնամիները աշխատում են, մեր տնային հիստերիկները ևս այդ գործի վրա են, ուստի պետք է շատ զգուշորեն ամեն ինչ ընկալել՝ ֆեյքերն այսօր ավելի շատ են, քան ճշմարիտ խոսքը», - նշել է Կրեմլի խոսնակը։

Ուկրաինան կրկին հայտարարում է Ռուսաստանի կողմից իրանական դրոնների կիրառման մասին։ Այսօր նման հայտարարությամբ է հանդես եկել Օդեսայի ռազմական վարչակազմի պաշտոնական ներկայացուցիչ Սերգեյ Բրատչուկը։

«Ռուսները ակտիվորեն կիրառում են Իրանում արտադրվող ինքնաոչնչացվող անօդաչու սարքերը։ Դրանք կոչվում են Shaheed 136, սակայն ռուսները այն վերանվանել են «Գերան-2»։ Վերջին օրերին մեկը մյուսին հաջորդող հինգ հարձակում է եղել այդ դրոններով», - հայտարարել է Բարտչուկը՝ պնդելով, որ ռուսական կողմը իրանական անօդաչու սարքերի կիրառմանն է անցել դրանց համեմատաբար ցածր գնի և թանկարժեք հրթիռները տնտեսելու անհրաժեշտությունից դրդված։

Առաջին անգամ իրանական դրոնների կիրառման փաստը նախորդ ուրբաթ պաշտոնապես հաստատեց Ուկրաինայի նախագահ Վլադիմիր Զելենսկին՝ հայտարարելով Թեհրանի հետ դիվանագիտական հարաբերությունների մակարդակը նվազեցնելու մասին։