Պատերազմ Ուկրաինայում (լայվ բլոգ, թարմացվող)

Աշխարհի ամենաազդեցիկ միջազգային տնտեսական կառույցներից մեկը՝ Տնտեսական համագործակցության և զարգացման կազմակերպությունը (OECD) այսօր հրապարակված զեկույցում պնդում է, որ ռուս-ուկրաինական պատերազմի հետևանքները համաշխարհային տնտեսության համար շատ ավելի ծանր են լինելու, քան ակնկալվում էր։

Կազմակերպության փորձագետների պնդմամբ՝ 2023 թվականին համաշխարհային տնտեսության աճի ցուցանիշը չի գերազանցի 2.2 նախկինում կանխատեսված 2.8-ի դիմաց։ «Համաշխարհային տնտեսությունը բարձր գին է վճարում Ուկրաինայի դեմ Ռուսաստանի ոչնչով չարդարացված և անօրինական ագրեսիայի համար», - նշում են զեկույցի հեղինակները։

Վլադիկավկազից ստացված հաղորդագրության համաձայն, Ռուսաստանը Հյուսիսային Օսիայում՝ Վերին Լարսի անցակետում կտեղակայի զինկոմիսարիատի մոբիլիզացիոն կենտրոն, հայտնել է ՌԴ ներքին գործերի նախարարության տարածաշրջանային վարչությունը:

Ռուսաստանի Դաշնության և Վրաստանի սահմանին երեք օրում գոյացել է մոտ երկու հազար ավտոմեքենաների հերթ: Ոտքով սահմանն անցնելու արգելք դեռ չկա:

Սեպտեմբերի 21-ին Ռուսաստանի նախագահ Վլադիմիր Պուտինը հայտարարել է մասնավոր զորահավաքի մասին: Այդ օրվանից առ այսօր Ղազախստան է ժամանել 98 հազար ռուսաստանցի, իսկ Ղազախստանից դուրս է մեկնել 64 հազար 234 ռուսաստանցի:

Պուտինի հրամանագրից հետո հազարավոր ռուսաստանցիներ փորձել են տեղափոխվել Վրաստան, Ղազախստան, Հայաստան, Ղրղըզստան և այլ երկրներ: Ռուս-ղազախական սահմանային անցակետերի մոտ՝ ռուսական տարածքի կողմից, ավտոմեքենաների բազմակիլոմետրանոց հերթեր են առաջացել:

Ղազախստանի ներքին գործերի նախարարության տվյալներով, 2018-19 թվականներին մոտ 3 միլիոն ռուսաստանցի է այցելել Ղազախստան, մինչդեռ, 2022 թվականի 9 ամիսների ընթացքում Ղազախստան ժամանած ռուսաստանցիների թիվը հասել է 1 միլիոն 700 հազարի:

Նախագահ Կասիմ-Ժոնարտ Տոկաևն ասել է, որ երկրում գտնվում են մեծ թվով ռուսաստանցիներ, «ովքեր Ռուսաստանից դուրս են մեկնել այնտեղ ստեղծված անհուսալի վիճակի բերումով»:

Ռուսաստանի պաշտպանության նախարարությունը հայտարարել է, թե չի դիմել Վրաստանի, Ղազախստանի և որևէ այլ երկրի իշխանություններին՝ այնտեղ ապաստանած ռուսաստանցի զորակոչիկներին Ռուսաստան վերադարձնելու խնդրանքով:

«Պաշտպանության նախարարությունը մասնակի զորահավաքի իրականացման շրջանակներում ուրիշ պետություններին չի դիմել ռուսաստանցիներին ուժով Ռուսաստան վերադարձնելու խնդրանքով, նման հնարավորություն չի ծրագրել և չի ծրագրում», - ասվում է պաշտպանական գերատեսչության այսօրվա հաղորդագրությունում:

Ֆրանսիայի արտաքին գործերի նախարար Կատրին Կոլոննան այցելել է Կիև, որտեղ հանդիպել է իր ուկրաինացի պաշտոնակից Դմիտրո Կուլեբային:

Կոլոննան հավաստիացրել է, որ Ֆրանսիան անվերապահորեն կշարունակի աջակցել Ուկրաինային:

Փարիզը Կիևին արդեն տրամադրել է ավելի քան 2 միլիարդ դոլարի մարդասիրական, ռազմական, ֆինանսական, դիվանագիտական և տնտեսական օգնություն:

«Մենք լայնածավալ աջակցություն ենք հատկացնում և դրա համար մոբիլիզացրել ենք Ֆրանսիայի պետության բոլոր կարողությունները: Այս օգնությունը կշարունակվի»,- ասել է Կոլոննան:

Երկու նախարարները նաև նշել են, որ միջազգային համայնքը ոչ մի պարագայում չի ճանաչի ռուսների կողմից Ուկրաինայի զավթված տարածքներում Ռուսաստանին միանալու հարցով կեղծ հանրաքվեների արդյունքները:

Կրեմլի խոսնակ Դմիտրի Պեսկովն ասել է, որ Ռուսաստանի օրենսդիրները և իրավական համակարգը պատրաստ են հավանական փոփոխությունների, որոնք հնարավոր Դոնեցկի և Լուգանսկի «ժողովրդական հանրապետություններում», ինչպես նաև Խերսոնի և Զապորոժիեի շրջաններում Ռուսաստանին միանալու հարցով հանրաքվեներից հետո:

«Մեր օրենսդրությունը նախատեսում է տարբերակներ, բնականաբար, մեր օրենսդիրները և իրավական համակարգը պատրաստ են», - ասել է Պեսկովը:

Հռոմի պապ Ֆրանցիսկոսը Սուրբ Պետրոսի տաճարի հրապարակում հավաքված հավատացյալներին ասել է, որ աղոթում է Ուկրաինայի ժողովրդի համար։ «Իմ մտքերն ուղղված են տանջահար Ուկրաինային, որն այնքան տառապում է, և այն խեղճ մարդկանց, որոնց դաժանորեն դատում են», -ասել է նա։

Հռոմի պապը նաև հայտնել է, որ Ուկրաինային մարդասիրական օգնություն առաքող իր բարեգործական կազմակերպության ղեկավար կարդինալ Կոնրադ Կրայևսկին, ով անցած շաբաթ թեթև հրաձգության տակ էր ընկել, իրեն «սարսափելի բաներ» է պատմել։

Վրաստանի արտգործնախարարությունն այսօր հայտարարել է, որ դատապարտում է Ուկրաինայի օկուպացված տարածքներում Ռուսաստանի կազմակերպած անօրինական հանրաքվեները։

«Ուկրաինական տարածքի բռնազավթման այդ փորձերը անընդունելի են։ Վրաստանը վճռական պաշտպանում է Ուկրաինայի ինքնիշխանությունը և տարածքային ամբողջականությունը», - նշված է Վրաստանի ԱԳՆ-ի Թվիթերի էջում տեղադրված հայտարարությունում։

Ռուսաստանի Պետդումայի խոսնակ Վյաչեսլավ Վոլոդինն իր Տելեգրամ ալիքում կողմ է արտահայտվել մասնակի մոբիլիզացիայի պատճառով զինվորական ծառայության ենթակա անձանց համար սահմանների փակմանը։

«Զինվորական հաշվառման մեջ գտնվող քաղաքացիներին զորահավաք հայտարարվելու պահից արգելվում է լքել իրենց բնակության վայրը առանց զինկոմիսարիատների թույլտվության: Օրենքի նման նորմ կա, և դրանով պետք է առաջնորդվեն բոլոր զինապարտները», - գրել է Վոլոդինը։

Վաղը Կրեմլում տեղի կունենա նախագահ Վլադիմիր Պուտինի և Պետական դումայի պատգամավորների հանդիպումը, որի օրակարգում Ուկրաինայի զավթված տարածքներում Ռուսաստանին միանալու հարցով հանրաքվեների արդյունքների վերաբերյալ նախատեսված քայլերն են:

Վաղը Կրեմլում կստորագրվեն փաստաթղթեր Ռուսաստանի Դաշնության կազմ նոր տարածքների ընդգրկման մասին: Այդ տեղեկությունը հայտնել է Կրեմլի խոսնակ Դմիտրի Պեսկովը:

Մի անանուն օրենսդիր ՏԱՍՍ լրատվական գործակալությանն էլ հայտնել է, որ նախագահը մտադիր է հատուկ ուղերձով դիմել խորհրդարանի երկու պալատներին՝ Դաշնության խորհրդին և Պետական դումային: