Պատերազմ Ուկրաինայում (լայվ բլոգ, թարմացվող)

Ռուսաստանի Դաշնությունում Ամերիկայի Միացյալ Նահանգների դեսպանատունը հայրենակիցներին կոչ է անում «առանց հապաղելու հեռանալ Ռուսաստանի տարածքից, իսկ այլ երկրներում գտնվողներին՝ չայցելել Ռուսաստան»:

Այդ մասին հայտարարությունը երեկվանից տեղադրվել է Մոսկվայում ԱՄՆ դեսպանատան կայքէջում:

Հաղորդագրությունում նշվում է, որ Ռուսաստանում մասնակի զորահավաք է, և երկքաղաքացիություն ունեցողներին ռուսական իշխանությունները կարող են ուժով զինվորագրել, ընդ որում՝ զրկել ԱՄՆ հյուպատոսարանի հետ կապ հաստատելու հնարավորությունից և արգելել դուրս մեկնել երկրից:

Դեսպանատունը նաև կոչ է անում ամերիկացիներին հաշվի առնել, որ Ռուսաստանում հավաքների և կարծիքներ արտահայտելու ազատությունը խիստ սահմանափակված է, և չմասնակցել զորահավաքի դեմ բողոքի ակցիաներին, ինչպես նաև չլուսանկարվել դրանց ընթացքում:

Ուկրաինայում մարդուժի և տեխնիկայի մեծ կորուստներից առաջացած պարապը լրացնելու համար Ռուսաստանը Հյուսիսային Եվրոպայում գտնվող ռազմակայանների զինծառայողների մոտ 80 տոկոսին փոխադրել է ռազմաճակատ, հղում անելով արևմտյան վերլուծաբաններին, հայտնում է The Foreign Policy հեղինակավոր ամերիկյան հանդեսը:

Փետրվարի 24-ին մեկնարկած պատերազմից առաջ Ռուսաստանը Բալթյան երկրների և Ֆինլանդիայի մոտակայքում պահել է մոտ 30 հազար զինծառայող, հիմա նրանց 80 տոկոսն Ուկրաինայում է:

Նախկինում Ռուսաստանի զինուժի ամենախիտ կուտակումներից մեկը ՆԱՏՕ-ի հետ սահմաններին էր, բայց հիմա այնտեղ մնացել են նվազագույն անհրաժեշտ թվով զինծառայողներ:

«Կրճատումը, որի ականատեսն ենք անցած 7 ամիսների ընթացքում, հիրավի շատ մեծ է», - ասել է սկանդինավյան երկրներից մեկը ներկայացնող մի անանուն փորձագետ, ավելացնելով, թե «Ռուսաստանն այստեղ տասնամյակներ շարունակ ուներ ցամաքային հզոր զորամիավորում, որը հիմա գործնականում գրեթե անհետացել է»:

Փորձագետը միաժամանակ նշել է, որ Մոսկվան այս շրջանում տակավին ունի շատ հզոր օդուժի ներկայություն:

ՄԱԿ-ի գլխավոր քարտուղար Անտոնիո Գուտերեշը հայտարարել է, որ Մոսկվայի գործողությունները վտանգում են տարածաշրջանում խաղաղության հաստատման հեռանկարները:

Եթե Ռուսաստանը շարունակի Ուկրաինայի չորս շրջանները միացնելու իր ծրագրերը, դա կնշանակի վտանգավոր էսկալացիա, որը կվտանգի տարածաշրջանում խաղաղության հեռանկարները, երեկ ասել է ՄԱԿ-ի գլխավոր քարտուղարը:

«Ուկրաինայի Դոնեցկի, Լուգանսկի, Խերսոնի և Զապորոժիեի շրջանները բռնակցելու ցանկացած որոշում իրավական ուժ չի ունենա և արժանի է դատապարտման», - լրագրողներին ասել է Անտոնիո Գուտերեշը։

ՄԱԿ-ում Ռուսաստանի մշտական ներկայացուցչությունը Գուտերեշին մեղադրել է կազմակերպության կանոնադրությունը խախտելու մեջ։

«Մենք ցավում ենք ՄԱԿ-ի գլխավոր քարտուղարի հայտարարության համար: Ուկրաինայի շուրջ ստեղծված իրավիճակի վերաբերյալ ՄԱԿ-ի գլխավոր քարտուղարը հետևողականորեն ցուցաբերում է նույն ընտրողական մոտեցումը, ինչ հավաքական Արևմուտքի երկրները՝ բառացիորեն դնելով իրեն նույն շարքում նրանց հետ» - ասվում է ռուսական առաքելության հայտարարության մեջ։

Ռուսաստանի նախագահ Վլադիմիր Պուտինն այսօր հրամանագրեր է ստորագրել Ուկրաինայի Զապորոժիեի և Խերսոնի շրջանների անկախությունը ճանաչելու մասին:

Փաստաթղթերում նշվում է, որ Ռուսաստանի Դաշնության նախագահն այս որոշումը կայացրել է միջազգային իրավունքի սկզբունքներին և նորմերին համապատասխան, ճանաչելով և հաստատելով ՄԱԿ-ի կանոնադրությամբ ամրագրված ժողովուրդների իրավահավասարության և ինքնորոշման սկզբունքը՝ հաշվի առնելով տարածաշրջանի բնակիչների կամքը հանրաքվեի ժամանակ։

Դոնեցկի և Լուգանսկի անկախությունը Ռուսաստանը ճանաչել է այս տարվա փետրվարին:

Առնվազն 23 մարդ է զոհվել, շուրջ երեք տասնյակը վիրավորվել այսօր առավոտյան Զապորոժիեի մոտ քաղաքացիական ավտոշարասյունը հրթիռակոծելու հետևանքով։

Զապորոժիեի մարզի ռազմական վարչակազմի ղեկավար Ալեքսանդր Ստարուխը հայտնել է, որ շարասյունը հրթիռակոծել է ռուսական կողմը։ Տելեգրամի իր էջում նա գրել է, որ մարդիկ հերթ էին կանգնել ժամանակավորապես օկուպացված տարածք մտնելու, օգնություն տանելու, իրենց հարազատներին դուրս բերելու համար։

Ուկրաինայի նախագահի աշխատակազմի ղեկավարի տեղակալ Կիրիլ Տիմոշենկոն ասել է, որ Զապորոժիեի վրա 13 հրթիռ է արձակվել։

Ռուսական կողմը խաղաղ բնակիչներին հրթիռակոծելու մեջ մեղադրում է Ուկրաինային։ Զապորոժիեի օկուպացված շրջանի ներկայացուցիչ Վլադիմիր Ռոգովն ասել է, թե տեսնելով, որ մարդիկ զանգվածաբար գնում են Զապորոժիեի մարզի «ազատագրված շրջանը», նրանք հարվածել են տասնյակ ավտոմեքենաների շարասյանը։

Ռուսաստանի նախագահ Վլադիմիր Պուտինն այսօր սկսում է Ուկրաինայի գրավյալ տարածքների պաշտոնապես բռնազավթումը։

Այսօր նա հրամանագիր ստորագրեց Զապորոժիեի և Խերսոնի շրջանների անկախությունը ճանաչելու մասին: Ավելի վաղ՝ փետրվարին, ՌԴ նախագահը ճանաչել էր Դոնեցկի ու Լուգանսկի անկախությունը։

Հիմա հիմք ընդունելով Ուկրաինայի տարածքներում վերջերս անցկացված այսպես կոչված հանրաքվեների արդյունքները՝ որոշում կընդունվի այդ տարածքները Ռուսաստանին միացնելու մասին։

Ակնկալվում է, որ ՄԱԿ-ի անվտանգության խորհուրդը այսօր քննարկելու է «Հյուսիսային հոսք» գազատարի իրավիճակը։

Բալթիկ ծովի հատակով անցնող գազատարի երեք ճյուղերում աննախադեպ խաթարումներ կան ու գազի մեծ արտահոսք, որից առաջացած պղպջակները երևում են ծովի մակերևույթին։

«Հյուսիսային հոսք-1» գազատարի օպերատոր ընկերությունը՝ Nord Stream AG-ը հայտարարել է, որ գազի արտահոսքը դադարելուց հետո անհապաղ պետք է հետաքննություն անցկացվի։

Ռուսական գազը Գերմանիա մատակարարող գազատարից արդեն չորս տեղ արտահոսք կա։ Ռադարների արձանագրած տվյալների համաձայն՝ գազի արտահոսքը Բալթիկ ծովի հատակում պայթյունների հետևանք է։

Ռուսաստանի նախագահ Վլադիմիր Պուտինը երեկ հայտարարել է, որ գազատարի դեմ իրականացված դիվերսիան միջազգային ահաբեկչություն է։

Նախագահ Վլադիմիր Պուտինը ստորագրեց չորս համաձայնագրերը՝ ուկրաինական օկուպացված տարածքները` Դոնեցկը, Լուգանսկը, Զապորոժիեն ու Խերսոնը Ռուսաստանին միավորելու մասին։

«Վստահ եմ՝ այս որոշումները կհաստատվեն նաև Դաշնային խորհրդում, քանի որ դա միլիոնավոր մարդկանց ցանկությունն է արտահայտում», -ասել է Կրեմլի ղեկավարը՝ հիշեցնելով օկուպացված տարածքներում անցկացված հանրաքվեները։

Ռուսաստանի նախագահ Վլադիմիր Պուտինը այսօր ստորագրելով Դոնեցկը, Լուգանսկը, Զապորոժիեն ու Խերսոնը Ռուսաստանին միացնելու փաստաթուղթը՝ Կիևին կոչ է արել անհապաղ դադարեցնել ռազմական գործողությունները և վերադառնալ բանակցությունների։

Նա ասել է, որ ռուսական կողմը պատրաստ է բանակցությունների, բայց միաժամանակ ընդգծել, որ այդ Ուկրաինայի այդ չորս շրջաններում անցկացված այսպես կոչված «հանրաքվեների» արդյունքները քննարկման ենթակա չեն։

Նրա խոսքերով՝ Դոնբասի, Խերսոնի ու Զապորոժիեի բնակիչները դառնում են Ռուսաստանի քաղաքացիներ։

Ուկրաինայի նախագահ Վլադիմիր Զելենսկու գլխավորությամբ տեղի է ունեցել Ուկրաինայի Ազգային անվտանգության և պաշտպանության խորհրդի նիստ։

Ուկրաինայի նախագահի պաշտոնական կայքէջը տեղեկացնում է, որ քննարկվել են անհրաժեշտ միջոցները, որոնք հարկավոր է ձեռնարկել՝ ապահովելու Եվրաատլանտյան տարածության և Ուկրաինայի անվտանգությունը։ Նշված է, որ այդ միջոցները պետք է ներառեն Ուկրաինայի դաշնակիցների կողմից Ռուսաստանի դեմ միջուկային զսպման ռազմավարության իրականացում։