Պատերազմ Ուկրաինայում (լայվ բլոգ, թարմացվող)

Ուկրաինան ՆԱՏՕ-ին անդամակցելու հայտ է ներկայացրել, հայտնել է երկրի նախագահ Վլադիմիր Զելենսկին։

Նա ցանկության է հայտնել, որ դա լինի «արագացված ընթացակարգի» համապատասխան։

«Գործնականում մենք արդեն ապացուցել ենք համապատասխանությունը դաշինքի չափանիշներին։ Դրանք իրական են Ուկրաինայի համար, իրական են մարտի դաշտում, և մեր փոխգործակցության բոլոր ասպեկտներում։ Մենք վստահում ենք միմյանց, մենք օգնում ենք միմյանց և պաշտպանում ենք միմյանց։ Սա դաշինք է», - այսօր հայտարարել է Ուկրաինայի նախագահը։

Ուկրաինայի զինված ուժերի, ազգային գվարդիայի ու սահմանապահ ծառայության ստորաբաժանումները Բելառուսի սահմանի մոտ զորավարժություն են անցկացնում։

Թուրքիան չի ընդունի Դոնեցկի, Լուգանսկի, Խերսոնի և Զապորոժիեի շրջանների ընդունումը Ռուսաստանի կազմ, ասվում է այդ երկրի արտաքին գերատեսչության այսօրվա հայտարարությունում:

«Թուրքիան չի ճանաչել 2014-ին Ղրիմի ապօրինի բռնակցումը և ամեն առիթով ընդգծել է Ուկրաինայի տարածքային ամբողջականության և ինքնիշխանության սկզբունքը պահպանելու կարևորությունը, ուստի, մենք մերժում ենք այս չորս շրջանները Ռուսաստանին միացնելու որոշումը: Այն հակասում է միջազգային օրենքին և չի կարող ընդունելի լինել: Մենք վերստին ընդգծում ենք արդար խաղաղության սկզբունքով և բանակցային գործընթացով այս հետզհետե ահագնացող պատերազմը դադարեցնելու անհրաժեշտությունը»,- նշվում է Թուրքիայի ԱԳՆ տարածած հայտարարությունում:

ՄԱԿ-ում Ուկրաինայի մշտական ներկայացուցիչ Սերգեյ Կիսլիցան հայտարարել է, թե վետոյի ենթարկելով ուկրաինական չորս շրջանների անեքսիան դատապարտող Անվտանգության խորհրդի բանաձևի նախագիծը՝ Ռուսաստանն էլ ավելի է մեկուսացել:

«Միայն Ռուսաստանի դեսպան Վասիլի Նեբենզյան է ձեռքը բարձրացրել նախագծի դեմ, դա մեր բոլորիս հավատարմությունը ՄԱԿ-ի Կանոնադրությանը չեղարկելու, իրականության հետ հաշվի չնստելու հուսահատ փորձ է: Պուտինի բանագնացն ընդամենը կատարում է Մոսկվայում տիկնիկային թատրոնի շոուներ սարքած իր տիրոջ հրահանգը, նա փորձում է հերքել այն, որ ագրեսիվ և արկածախնդիր ռեժիմով ղեկավարվող Ռուսաստանը սլանում է դեպի պարտություն»,- ասել է Ուկրաինայի դեսպանը:

Ուշագրավ է, որ Ռուսաստանի ավանդական դաշնակից Չինաստանը ձեռնպահ է մնացել, բայց դեսպանը հստակ ներկայացրել է Պեկինի դիրքորոշումը:

«Բոլոր երկրների ինքնիշխանությունը և տարածքային ամբողջականությունը պետք երաշխավորվի, ՄԱԿ-ի Կանոնադրության բոլոր դրույթները պետք է պահպանվեն: Անվտանգության հարցերում բոլոր կողմերի օրինական մտահոգությունները է պետք է հաշվի առնվեն: 7 ամիս տևող այս հակամարտության ազդեցությունը և դրա ընդարձակումը չափազանց մտահոգիչ են»,- ասել է ՄԱԿ-ում Չինաստանի մշտական ներկայացուցիչ Չժան Ցզյունը:

«Ապօրինի հանրաքվեները և ուժով ուկրաինական տարածքների բռնակցումը միանշանակ հակասում են ՄԱԿ-ի Կանոնադրությանը և միջազգային իրավունքին: Բայց դրանցով Ուկրաինայի կարգավիճակը կամ պետական սահմանները չեն փոխվի, սա Միացյալ Նահանգների ամուր համոզմունքն է: Սա ՄԱԿ-ի գլխավոր քարտուղարի ամուր համոզմունքն է, սա նաև Անվտանգության խորհրդի անդամների համոզմունքն է, իհարկե, բացառությամբ Ռուսաստանի»,- ասել է ՄԱԿ-ում Միացյալ Նահանգների մշտական ներկայացուցիչ Լինդա Թոմաս-Գրինֆիլդը:

Ուկրաինացի զինծառայողները մտել են Դոնեցկի շրջանում գտնվող Լիման ավանը, որը ռուսներն այս տարվա մայիսին են գրավել:

Ռուսական իշխանամետ տելեգրամ-ալիքները հայտնում են, որ Դաշնության զորքն արդեն հեռացել է Լիմանից, սակայն ոչ Ուկրաինայի գլխավոր շտաբը և ոչ էլ Ռուսաստանի պաշտպանության նախարարությունը պաշտոնապես չեն հաստատել այդ լուրը:

Ուկրաինայի բանակի «Արևելք» խմբավորման հրամանատարության ներկայացուցիչ Սերգեյ Չրևատին այսօր ասել է, թե Լիմանում գտնվել է մոտ 5 և կես հազար ռուսաստանցի զինծառայող: Ուկրաինացիները ռուսներին առաջարկել են միջանցք տրամադրել նրանց դուրս հանելու համար, սակայն ռուսները մերժել են առաջարկը:

Լուգանսկի շրջանային ռազմական վարչակազմի ղեկավար Սերգեյ Գայդայը հայտարարել է, որ հիմա այդ զինծառայողները «կա՛մ պետք է փորձեն ճեղքել ուկրաինացիների դիրքերը և հեռանալ, կա՛մ զոհվեն, կա՛մ հանձնվեն»:

Ամերիկայի Միացյալ Նահանգների նախագահ Ջո Բայդենը վավերացրել է կառավարության ֆինանսավորումը շարունակելու մասին օրենքը, որով ի շարս այլ հատկացումների, նախատեսվում է Ուկրաինային տրամադրել 12 միլիարդ 300 միլիոն դոլարի օգնություն:

Այս գումարն ուղղվելու է Ուկրաինայի ռազմական ծախսերը հոգալու և կառավարության գործունեությունն ապահովելու համար:

Ավելի վաղ օրինագիծը ստացել է Կոնգրեսի հավանությունը: Ներկայացուցիչների պալատում օրենսդիր Ռոզա Դե Լաուրոն ասել է, որ Միացյալ Նահանգները սատարում է Կիևին:

Ռուսաստանի Դաշնության պաշտպանության նախարար Սերգեյ Շոյգուն այսօր հավաստիացրել է, որ մասնակի զորահավաքի ընթացքում կանանց զորակոչելու մտադրություն չկա:

«Նման ծրագիր չկար և ապագայում էլ չի լինի: Կանանց չենք զորակոչելու»,- ասել է նախարարը:

Այդ մասին նա լրագրողների հետ խոսել է Մոսկվայի քաղաքապետ Սերգեյ Սոբյանինի ընկերակցությամբ այցելելով Կուբինկա՝ «Պատրիոտ» և «Ավանգարդ» համալիրներ, որտեղ ծանոթացել է զորակոչիկների և կամավորների ժամանակավոր բնակության պայմաններին:

Ռուսաստանում սահմանադրական ճանաչվեց Ուկրաինայի չորս տարածաշրջանների՝ Դոնեցկի, Լուգանսկի, Զապորոժիեի և Խերսոնի ընդգրկումը Ռուսաստանյան Դաշնության կազմում: Երկրի Սահմանադրական դատարանը հավանություն է տվել փաստաթղթերի փաթեթին, 4 որոշումները հրապարակվել են այսօր, հաղորդում է ՏԱՍՍ լրատվական գործակալությունը:

Սահմանադրական դատարանի որոշումների տեքստերում ասված է, որ այդ պայմանագրերը կիրարկվում են արդեն ստորագրման պահից՝ ուրբաթ օրվանից, նախքան Ռուսաստանի խորհրդարանի կողմից վավերացումը:

ԵՄ առաջնորդները հաջորդ ուրբաթ հանդիպման ժամանակ կքննարկեն Ուկրաինային աջակցության ավելացումը և էներգակիրների գները զսպելու հետագա քայլերը:

Երեկ հրապարակված ԵՄ առաջնորդներին ուղղված հրավեր-նամակում Եվրոպական խորհրդի նախագահ Շառլ Միշելը կոչ է արել Եվրամիությանն՝ ուժեղ արձագանքել վերջին զարգացումներին, այդ թվում՝ Ռուսաստանի կողմից ուկրաինական չորս շրջանների միացման մասին հայտարարությանը:

«Մեր հանդիպման ժամանակ մենք կքննարկենք, թե ինչպես շարունակել վճռական տնտեսական, ռազմական, քաղաքական և ֆինանսական աջակցություն ցուցաբերել Ուկրաինային այնքան ժամանակ, որքան անհրաժեշտ է», - ասել է Միշելը, որը նախագահում է ԵՄ առաջնորդների հանդիպումները:

Պրահայում կայանալիք հանդիպման ժամանակ ԵՄ առաջնորդները նաև առաջարկություններ կներկայացնեն Բրյուսելին այն քայլերի վերաբերյալ, որոնք ԵՄ-ն պետք է ձեռնարկի էներգակիրների գների աճի խնդրի լուծման համար, ասել է Միշելը:

Ռուսաստանը կշարունակի խորհրդակցությունները Զապորոժիեի և Խերսոնի բնակիչների հետ Դաշնության մաս կազմած այդ երկու շրջանների սահմանների հստակեցման շուրջ, ասել է Կրեմլի խոսնակ Դմիտրի Պեսկովը:

«Չեմ կարող այդ հարցին հենց հիմա պատասխանել, բայց ակնհայտ է, որ որոշումը կապված կլինի բացառապես այդ շրջաններում բնակվող մարդկանց ցանկության հետ»,- ասել է խոսնակը:

Նա ավելացրել է, թե ոչ իրավաբանական լեզվով կարելի է ասել, որ Լուգանսկի և Դոնեցկի «ժողովրդական հանրապետությունների» սահմանները հայտնի են 2014 թվականից, իսկ Խերսոնի և Զապորոժիեի շրջանների սահմանները պետք է հստակեցվեն:

Նա նշել է նաև, թե այդ նոր տարածքներում ներքին սահմանների հստակեցման հարցով հանրաքվեներ նախատեսված չեն: