Պատերազմ Ուկրաինայում (լայվ բլոգ, թարմացվող)

Խերսոնի մարզի հյուսիսում ուկրաինական ուժերը ամբողջովին վերահսկողության տակ են վերցրել Արխանգելսկոյե և Միրոլյուբովկա բնակավայրերը, հայտարարել է Ուկրաինայի նախագահ Վլադիմիր Զելենսկին անցած գիշերվա ուղերձում:

Տարբեր աղբյուրներ, այդ թվում՝ ռուսամետ ուժերից, հայտնում են, որ ուկրաինական ուժերը հետ են գրավել նաև Զոլոտայա Բալկա գյուղը՝ դուրս գալով Դնեպրի ափ։

Ուկրինական զինված ուժերի «Հարավ» խմբավորումը այսօր առավոտվա հաղորդագրությունում իրավիճակի մանրամասներ չի հայտնում, նշելով միայն, որ կան մասնակի հաջողություններ։

Զինվորականները սոցցանցերի օգտատերերին և այլ հարթակների նաև հորդորում են նախապես ոչինչ չհաղորդել ուկրաինական ուժերի հակահարձակումների մասին, նշելով, որ նման տեղեկատվությունը կարող է կյանքի գին լինել զինվորների ու այդ շրջանների խաղաղ բնակիչների համար։

Ռուսաստանի շրջանների ղեկավարներն ունեն իրենց տեսակետները հայտնելու իրավունք, բայց նույնիսկ ամենածանր պահերին պետք չէ տեղի տալ զգացմունքներին: Այդ մեկնաբանությամբ նախագահ Վլադիմիր Պուտինի խոսնակ Դմիտրի Պեսկովն արձագանքել է Ուկրաինայում «հատուկ ռազմական օպերացիայի» ընթացքում ավելի կոշտ գործողությունների դիմելու, ընդհուպ սահմանամերձ շրջաններում ռազմական դրություն հաստատելու և փոքր հզորության միջուկային զենք կիրառելու անհրաժեշտության մասին Չեչնիայի ղեկավար Ռազման Կադիրովի հայտարարությանը:

«Չեչնիան շատ բան է արել և շարունակում է անել այս հատուկ ռազմական օպերացիայի համար,- ասել է խոսնակը:

Նրա փոխանցմամբ, միջուկային զենքի կիրառումը հնարավոր է միայն համապատասխան հաստատված հայեցակարգով նախատեսված պայմաններում, և որևէ այլ մեկնաբանություն այս հարցում հնարավոր չէ:

Ռուսաստանի Դաշնության խորհրդարանի ստորին պալատը՝ Պետական դուման, այսօր միաձայն հաստատեց Ուկրաինայի Խերսոնի, Զապորոժիեի, Դոնեցկի և Լուգանսկի շրջանների ընդգրկումը Ռուսաստանի կազմում:

Դումայի վավերացրած օրենքների համաձայն, այդ շրջանների բնակիչները հետայսու համարվում են Ռուսաստանի Դաշնության քաղաքացիներ: Նրանք կարող են մեկ ամսվա ընթացքում ներկայացնել Ռուսաստանի քաղաքացիությունից հրաժարվելու դիմումներ:

ՌԴ քաղաքացիության ընդունումը հնարավոր է միայն համապատասխան դիմում ներկայացնելու և քաղաքացու երդում տալու եղանակով:

Չորս դաշնային սահմանադրական օրենքների քվեարկության արդյունքներն ընդունվել են ծափողջույններով: Դրանից հետո Պետական դումայի պատգամավորները հոտնկայս լսել են Դաշնության օրհներգը:

Դոնեցկի և Լուգանսկի շրջանները Ռուսաստանի կազմում կունենան հանրապետությունների կարգավիճակ, իսկ Զապորժիեի և Խերսոնի տարածքներն ընդունվում են որպես շրջաններ:

Մասնակի զորակոչով զինվորագրված ռուսաստանցիների առաջին խումբը տեղակայվել է Լուգանսկի «ժողովրդական հանրապետության» տարածքում: Այդ մասին Տելեգրամ ալիքում հայտնել է ՌԴ պաշտպանության նախարարությունը:

Գերատեսչությունը նշել է, որ ուսումնական փուլից հետո այդ զինծառայողները կսկսեն «վերահսկել հատուկ ռազմական օպերացիայի ընթացքում ազատագրված տարածքները»:

Նախագահ Վլադիմիր Պուտինը սեպտեմբերի 21-ին է արձակել Ռուսաստանում մասնակի զորահավաք անցկացնելու հրամանագիրը:

Պաշտպանության նախարար Սերգեյ Շոյգուի փոխանցմամբ, այդ զորահավաքով բանակում ծառայության կանցնի մոտ 300 հազար մարդ:

Ռուսաստանի զինված ուժերի գլխավոր շտաբի պարզաբանմամբ, զորակոչվում են մինչև 35 տարեկան շարքայինները և սերժանտները, մինչև 50 տարեկան կրտսեր սպաները և մինչև 55 տարեկան բարձրաստիճան սպաները:

Լիտվայում Ռուսաստանի գործերի ժամանակավոր հավատարմատար Սերգեյ Ռյաբոկոնը հայտարարվել է persona non grata՝ անցանկալի անձ և պետք է հեռանա հանրապետության տարածքից: Այդ մասին հայտնել է Լիտվայի արտաքին գործերի նախարարությունը:

Ըստ գերատեսչության, «վերջին ժամանակաշրջանում ռուսաստանցի ժամանակավոր հավատարմատարի գործունեությունը և նրա մեկնաբանությունները հակասում են դիվանագետի կարգավիճակին և ընդունվում են իբրև միջամտություն հյուրընկալող երկրի ներքին գործերին»:

Սերգեյ Ռյաբոկոնը պարտավոր է հինգ օրում հեռանալ Լիտվայից: Ռուսաստանը հայտարարել է, թե անխուսափելիորեն կընդունի պատասխան որոշում Ռյաբոկոնին անցանկալի անձ հայտարարելու և արտաքսելու կապակցությամբ:

Չեխիայի արտաքին գործերի նախարարությունը Ռուսաստանի տարածքում գտնվող քաղաքացիներին կոչ է արել անվտանգության իրավիճակի հավանական վատթարացման և Եվրամիության ու ՆԱՏՕ-ի անդամ երկրների քաղաքացիներին սպառնացող հանգամանքների բերումով անհապաղ հեռանալ Դաշնությունից:

Չեխիայի այն քաղաքացիներին, ովքեր կորոշեն մնալ Ռուսաստանում, արտաքին գերատեսչությունը հորդորում է առավել զգոն լինել, տեղեկությունները ստանալ ստուգված լրատվամիջոցներից և կազմել արտակարգ իրավիճակում Ռուսաստանից հեռանալու ծրագիր:

Նախարարությունը նաև զգուշացնում է, որ երկքաղաքացիություն ունեցող Չեխիայի քաղաքացիներին ռուսական իշխանությունները կարող են զորակոչել, քանի որ առաջնայինը կհամարվի Ռուսաստանի Դաշնության քաղաքացիությունը:

Գերատեսչությունը նշել է, որ զորակոչի ենթարկվելու դեպքում Մոսկվայում Չեխիայի դեսպանությունը չի կարողանա լիարժեք պաշտպանություն տալ այդ քաղաքացուն:

Ռուսաստանի ներքին գործերի նախարարությունը հետախուզում է հայտարարել Հանրային հեռուստաընկերության նախկին խմբագիր, ուղիղ եթերում պատերազմի դեմ բողոքի ակցիա կազմակերպած Մարինա Օվսյաննիկովայի նկատմամբ:

Օվսյաննիկովայի համար դատարանը որպես խափանման միջոց էր ընտրել տնային կալանքը:

Հանրային հեռուստաընկերության «Վրեմյա» լրատվական ծրագրի թողարկման ընթացքում «Ոչ պատերազմին, այստեղ ձեզ խաբում են» պաստառով ուղիղ եթերում հայտնվելու համար նա տուգանք է վճարել:

Դրանից հետո նա Մոսկվայում բողոքի ցույց է անցկացրել, ինչի համար մեղադրվել է «Ռուսաստանի զինված ուժերի մասին վարկաբեկող տեղեկություններ տարածելու» հոդվածով, որով կարող է դատապարտվել մինչև 10 տարվա ազատազրկման:

Այժմ Օվսյաննիկովան հետախուզման մեջ է, քանի որ խախտել է տնային կալանքի պայմանները և անհետացել է տնից: Նրա անհետանալու մասին հայտնել է նախկին ամուսինը՝ Իգոր Օվսյաննիկովը, ով ասել է, որ «Մարինան և 11-ամյա դուստրը տնից հեռացել են անհայտ ուղղությամբ»:

Ռուսաստանի Արևմտյան զինտարածքի հրամանատար է նշանակվել գեներալ-լեյտենանտ Ռոման Բերդնիկովը: Նա փոխարինել է գեներալ-գնդապետ, Ռուսաստանի հերոս Ռոման Ժուրավլևին:

Ռուսական լրատվամիջոցները ենթադրում են, որ Զինված ուժերի ղեկավարների շրջանում վերջին շաբաթներին տեղի ունեցած կադրային փոփոխությունները վկայում են Ուկրաինայի բանակի հակագրոհները զսպելու անկարողության մասին, ինչը երկրի քաղաքական գերագույն ղեկավարների դժգոհությունն է առաջացրել:

Ժուրավլևի հրամանատարությամբ Արևմտյան զինտարածքի ստորաբաժանումները մասնակցել են Ուկրաինայում վերջին ռազմական գործողություններին, այդ թվում՝ Լիմանի ուղղությամբ, որտեղից ուկրաինական բանակի ճնշման հետևանքով նահանջել են:

Սեպտեմբերի 24-ին «այլ աշխատանքի անցնելու կապակցությամբ» ՌԴ պաշտպանության փոխնախարարի պաշտոնից ազատվել է բանակի գեներալ Դմիտրի Բուլգակովը:

Եվրոպական միությունն առաջիկա օրերին կկազմի Ռուսաստանի նկատմամբ նոր պատժամիջոցների փաթեթը, և Ֆրանսիան հուսով է, որ այն արագ կընդունվի:

Այդ մասին Ֆրանսիայի Ազգային ժողովում ասել է երկրի արտգործնախարար Կատրին Կոլոննան:

«Ֆրանսիան ցանկանում է արագ ընդունել պատժամիջոցների նոր եվրոպական փաթեթը: Առաջիկա օրերին այդ աշխատանքը կավարտվի».- ասել է նախարարը:

Նրա փոխանցմամբ, Ֆրանսիան և Եվրամիությունը Ռուսաստանը հանդեպ վարում են «աննախադեպ կոշտ սանկցիոն քաղաքականություն»:

«Պատժամիջոցների նպատակն է առավելագույն ճնշում բանեցնել և Ռուսաստանին զրկել հակամարտությունը շրունակելու հնարավորությունից»,- ասել է Կատրին Կոլոննան և ավելացրել, թե «մյուս կողմից, ոչ Ֆրանսիան և ոչ էլ Մեծ 7-ի որևէ այլ երկիր պատերազմի մեջ չեն Ռուսաստանի հետ»:

Ռուսաստանի պաշտպանության նախարար Սերգեյ Շոյգուն այսօր ասել է, որ արդեն ավելի քան 200 հազար պահեստազորային է հավաքագրվել:

Պաշտպանության նախարարությունում անցկացված խորհրդակցությունում Շոյգուն նշել է, որ մինչ Ուկրաինայում տեղակայվելը նրանք վերապատրաստվում են 80 փորձադաշտերում և 6 ուսումնական կենտրոններում։