Պատերազմ Ուկրաինայում (լայվ բլոգ, թարմացվող)

Ուկրաինայի նախագահ Վլադիմիր Զելենսկին հրամանագիր է ստորագրել, որտեղ ասվում է, թե անհնարին է բանակցել Ռուսաստանի ներկայիս նախագահ Վլադիմիր Պուտինի հետ։

Զելենսկու հրամանագիրը հրապարակվել է այսօր, իսկ որոշումը ընդունվել էր Ուկրաինայի Ազգային անվտանգության և պաշտպանության խորհրդի սեպտեմբերի 30-ի նիստում, երբ Պուտինը ստորագրեց Ուկրաինայի չորս շրջանները բռնակցելու փաստաթուղթը։

Սպիտակ տունը հայտնում է, որ ԱՄՆ նախագահ Ջո Բայդենը հեռախոսազրույց է ունեցել Ուկրաինայի նախագահ Վլադիմիր Զելենսկու հետ։

Բայդենն ասել է, որ «ԱՄՆ-ն երբեք չի ճանաչի ուկրաինական տարածքների Ռուսաստանի բռնակցումը»։ Նա նաև հայտնել է Ուկրաինային ևս 625 միլիոն դոլարի ռազմական նոր աջակցություն տրամադրելու մասին, ներառյալ HIMARS հրթիռա-հրետանային համակարգեր։

Բելառուսի նախագահ Ալեքսանդր Լուկաշենկոն խոստովանել է, որ իր երկիրը մասնակցում է Ռուսաստանի վարած հատուկ ռազմական օպերացիային, բայց զինվորներ չի ուղարկել:

«Ինչ վերաբերում է մեր մասնակցությանը {Ուկրաինայում Ռուսաստանի հատուկ ռազմական գործողությանը}, ապա այո, մենք այնտեղ մասնակցում ենք: Դա չենք թաքցնում: Մենք ոչ մեկին չենք սպանում, մենք մեր զինվորներին չենք ուղարկում, մենք չենք խախտում մեր պարտավորությունները»,- ասել է նախագահը ռազմական հարցերով խորհրդակցության ընթացքում:

Նրա խոսքով, Բելառուսի նպատակն է կանխել պատերազմի տարածումը Բելառուսի վրա:

«Մենք պետք է թույլ չտանք, որ Լեհաստանի, Լիտվայի և Լատվիայի կողմից Բելառուսին թիկունքից հարվածեն: Եվ ինչպես ես արդել ասել եմ՝ ռուսների թիկունքին էլ ոչ ոք չի հարվածի Բելառուսից».- հայտարարել է Ալեքսանդր Լուկաշենկոն:

Բելառուսում, ըստ Լուկաշենկոյի, նաև բուժօգնություն են տրամադրում Ուկրաինայում պատերազմից տուժածներին՝ «և ոչ միայն ռուսաստանցիներին»:

Բացի այդ, նրա խոսքով, Բելառուսը մարդասիրական օգնություն է տրամադրում փախստականներին, «խեղճ մարդկանց, ովքեր ամեն օր՝ 400-500 հոգով են ժամանում»:

Ռուսաստանի նախագահ Վլադիմիր Պուտինը ստորագրել է օրենքներ Դոնեցկի և Լուգանսկի, ինչպես նաև Զապորոժիեի և Խերսոնի շրջանները Ռուսաստանի Դաշնության կազմում ընդունելու մասին։ Փաստաթղթերը հրապարակվել են այսօր։

Պուտինը նաև ստորագրել է օրենքներ այս չորս մարզերը Ռուսաստանի Դաշնության կազմում ընդունելու մասին համաձայնագրերի վավերացման մասին:

Օրենքների համաձայն, նոր շրջանների բնակիչները Ռուսաստանի կազմում այդ տարածքների ընդգրկման օրից՝ սեպտեմբերի 30-ից, ճանաչվում են որպես Ռուսաստանի քաղաքացիներ։ ՌԴ քաղաքացիությունից հրաժարվել ցանկացողներին մեկ ամիս ժամանակ է տրվել դիմումներ ներկայացնելու համար։ Միաժամանակ նշվում է, որ քաղաքացիության ձեռք բերումը հնարավոր է դիմում ներկայացնելու և Ռուսաստանի Դաշնության քաղաքացու երդում տալու պայմանով։

Չորս շրջանները Ռուսաստանի կազմում ընդունելու օրվանից մինչև 2026 թվականի հունվարի 1-ը կգործի անցումային շրջան։

Գերմանիայի կանցլեր Օլաֆ Շոլցը կրկին հայտարարել է, որ «Ուկրաինայի ինքնիշխանությունն ու տարածքային ամբողջականությունն անձեռնմխելի են»։

«Ֆիկտիվ հանրաքվեները և Ուկրաինայի մի մասի բռնակցման ռուսական նախաձեռնությունը խախտում են միջազգային իրավունքը և արժեք չունեն։ Դրանք մեզ համար ոչ մի իրավական ուժ չունեն», - ասել է նա Նիդերլանդների վարչապետ Մարկ Ռյուտեի հետ համատեղ ասուլիսի ժամանակ։

Շոլցը նշել է, որ Գերմանիան և Նիդերլանդները կշարունակեն աջակցել Ուկրաինային ռուսական ագրեսիային հակազդելու հարցում։ Նրա խոսքով՝ երկու երկրները պատրաստում են ականազերծման ուկրաինացի մասնագետների և կշարունակեն սերտ համագործակցությունը Կիևին զենք մատակարարելու հարցում, ինչպես արդեն արվել է հաուբիցների դեպքում։

Եվրամիությունը համաձայնեցրել է Ռուսաստանի դեմ պատժամիջոցների հերթական փաթեթը, որն 8-րդն է փետրվարին Ուկրաինա Ռուսաստանի ռազմական ներխուժումից ի վեր։

Եվրամիությունում Չեխիայի դեսպան Էդիտա Հրդան հայտարարել է, որ պատժամիջոցների հերթական փաթեթն այժմ վերջնական հաստատման փուլում է, այն կարող է հրապարակվել և ուժի մեջ մտնել արդեն վաղը:

Փաստաթղթի մանրամասները դեռ հայտնի չեն, սակայն Եվրամիության պաշտոնյաների հայտարարությունների համաձայն՝ սահմանափակումները կարող են թիրախավորել Ռուսաստանի կողմից ուկրաինական չորս շրջանների բռնակցման գործում դերակատարում ունեցած անձանց:

Վրաստանի հետ սահմանին մնացած մեքենաները Հյուսիսային Օսիայի Պետական երթևեկության անվտանգության տեսչության կողմից տարհանվում են տուգանային կայաններ, հայտնում է Meduza-ն։

Աղբյուրի համաձայն՝ հյուսիսօսական իրավապահները խոստանում են ավտոմեքենաներ վերադարձնել սեփականատերերին՝ համապատասխան փաստաթղթեր ներկայացնելու դեպքում։

ՌԴ Պետդումայի նախագահ Վյաչեսլավ Վոլոդինը ավելի վաղ առաջարկել էր ՌԴ սահմանին գտնվող քաղաքացիների կողմից լքված մեքենաները փոխանցել բանակ զորակոչվածների ընտանիքներին։

Հյուսիսային Կովկասի մաքսային դեպարտամենտի մամուլի ծառայությունը այսօր տեղեկացրել է, որ Ռուսաստանի և Վրաստանի սահմանին մարդատար ավտոմեքենաների խցանում այլևս չկա, ավելի վաղ իրավիճակի կայունացման մասին հայտարարել էին նաև Վրաստանի իշխանությունները։

Այսօր Պրահայում կայանալիք Եվրոպական քաղաքական համայնքի (ԵՔՀ) գագաթնաժողովում երկրների ղեկավարները Մոսկվային ազդանշան կուղարկեն առանց Ռուսաստանի նոր աշխարհակարգի որոնման մասին, Reuters-ի փոխանցմամբ՝ լրագրողներին ասել է Եվրամիության արտաքին քաղաքականության և անվտանգության հարցերով գերագույն հանձնակատար Ժոզեպ Բորելը։

«Այս հանդիպումը նոր կարգ է փնտրում առանց Ռուսաստանի», - ասել է նա։

ԵՔՀ առաջին հանդիպմանը կմասնակցեն 44 երկրների, այդ թվում՝ ԵՄ անդամ 27 երկրների, ինչպես նաև Ադրբեջանի, Հայաստանի, Մեծ Բրիտանիայի, Վրաստանի, Կոսովոյի, Մոլդովայի, Սերբիայի, Թուրքիայի և Ուկրաինայի ղեկավարները։

Ռուսաստանի զինուժի կողմից Զապորոժիեի գիշերային հրետակոծության հետևանքով տուժել է 10 մարդ, որոնցից 8-ն այժմ գտնվում է հիվանդանոցում, հայտնել է Զապորոժիեի քաղաքային խորհրդի քարտուղար Անատոլի Կուրտևը։ Եվս երկուսը հրաժարվել են հոսպիտալացումից։

«Հիվանդանոցներում գտնվողների վիճակը միջին և թեթև ծանրության է», - հավելել է Կուրտևը:

Ավելի վաղ մարզպետարանը հայտնել էր երկու կնոջ մահվան մասին, որոնցից մեկը մահացել էր շտապօգնության մեքենայում։

Ռուսաստանի պաշտպանության նախարարությունը դեռ չի մեկնաբանել իրավիճակը։

Ռուսական կողմը Ուկրաինայի զինված ուժերին է մեղադրում հրետակոծության մեջ, պնդելով, որ «այն բանից հետո, երբ Զապորոժիեի շրջանի բնակիչները հանրաքվեով քվեարկեցին Ռուսաստանի Դաշնության կազմի մեջ մտնելու օգտին, ուկրաինական զինուժն է՛լ ավելի ուժեղացրեց շրջանի գնդակոծությունը»։ Այս մասին ՏԱՍՍ-ին ասել է «Մենք Ռուսաստանի հետ ենք» շարժման նախագահ Վլադիմիր Ռոգովը՝ միաժամանակ հավելելով, որ վերջին շրջանում հատկապես ակտիվորեն են տարվում Զապորոժիեի շրջանում ուկրաինական զինամթերքի պահեստների և զենքի ոչնչացման աշխատանքները, որոնք կենտրոնացած են շփման գծում։

Վլադիմիր Պուտինն իր ծննդյան 70-ամյակը կնշի Սանկտ Պետերբուրգում՝ ԱՊՀ երկրների ղեկավարների հետ, լրագրողների հետ զրույցում հայտարարել է Կրեմլի խոսնակը: Դմիտրի Պեսկովը նշել է, որ Ռուսաստանի նախագահի հոբելյանը համընկնում է ԱՊՀ ոչ-պաշտոնական գագաթնաժողովի հետ։

ԱՊՀ երկրների ղեկավարների ոչ պաշտոնական հանդիպումը նախատեսված է հոկտեմբերի 7-ին, այն կանցկացվի Սանկտ Պետերբուրգի Կոնստանտինովսկի պալատում: