Պատերազմ Ուկրաինայում (լայվ բլոգ, թարմացվող)

Զապորոժիեում գիշերային հրետակոծության հետևանքով կա առնվազն 12 զոհ, ևս 49 հոգի հոսպիտալացվել է, այդ թվում՝ վեց երեխա։

Զապորոժիեի շրջանային վարչակազմի ղեկավար Ալեքսանդր Ստարուխի խոսքով՝ ռուս զինվորականները 12 հրթիռ են արձակել քաղաքի վրա, որոնց մեծ մասը խոցել է բնակելի շենքերը, դրանք լրջորեն տուժել են: Նրա փոխանցմամբ՝ մասնակի ավերվել է մասնավոր հատվածում գտնվող ինը հարկանի շենքը և հինգ տուն, հարվածներ են հասցվել ենթակառուցվածքային օբյեկտներին:

Գերմանիայի պաշտպանության նախարար Քրիստին Լամբրեխտը հայտարարել է Հունաստանից և Սլովակիայից Ուկրաինային հակաօդային պաշտպանության ժամանակակից «IRIS-T» համակարգի և 100 տանկ մատակարարելու մասին։

Նա կառավարության ծրագրերի մասին խոսել է Լիտվա կատարած այցի ժամանակ:

Գերմանիայի պաշտպանության նախարարության ղեկավարը հայտարարել է նաև նոր բրիգադի ստեղծման մասին, որն անհրաժեշտության դեպքում կարող է արագ տեղափոխվել Լիտվա։

«Մենք ապրում ենք լուրջ ժամանակներում, և նման ժամանակներում կարևոր է նաև իմանալ, թե պաշտպանության մեջ որտեղ ունենք բացեր: ՀՕՊ-ն այն ոլորտներից է, որտեղ անհրաժեշտ է գործել»,- ասել է Լամբրեխտը գերմանացի զինվորականների հետ հանդիպման ժամանակ:

Ռուսաստանի նախագահ Վլադիմիր Պուտինը մեղադրել է Ուկրաինայի հատուկ ծառայություններին Ղրիմի (Կերչ) կամրջի վրա հոկտեմբերի 8-ին պայթյուն կազմակերպելու մեջ։

Ռուսական հեռուստաալիքները ցուցադրել են կիրակի երեկոյան Պուտինի հանդիպումը Քննչական կոմիտեի ղեկավար Ալեքսանդր Բաստրիկինի հետ։ Պուտինի հետ հանդիպմանը Բաստրիկինը հայտարարել է, թե պայթյունին ներգրավված են եղել ոչ միայն Ուկրաինայի հատուկ ծառայությունները, այլ նաև Ռուսաստանի և արտասահմանյան երկրների որոշ քաղաքացիներ։

Ըստ նրա՝ պայթյունի գործը հարուցվել է «ահաբեկչություն» հոդվածով, իսկ մեղավորներն արդեն բացահայտվել են։ Անուններ, սակայն, այդ հանդիպմանը չեն հնչել։ Պուտինը Ղրիմի կամրջի պայթյունն, իր հերթին, անվանել է «ահաբեկչական հարձակում, որի նպատակն է ոչնչացնել կարևոր ենթակառուցվածքները»։

«Հեղինակները, կատարողները, հաճախորդները Ուկրաինայի հատուկ ծառայություններն են»,- հավելել է Պուտինը։

Կիևի կենտրոնում պայթյուններ են որոտացել, հաղորդում են Ուկրաինայի մայրաքաղաքի իշխանությունները:

Քաղաքապետ Վիտալի Կլիչկոն իր Տելեգրամ ալիքում տեղեկացնում է, որ «մի քանի պայթյուն» է որոտացել Կիևի Շևչենկոյի շրջանում։

Ուկրաինայի արտակարգ իրավիճակների պետական ծառայության ներկայացուցիչ Սվետլանա Վոդոլագան հեռուստաալիքներից մեկին հայտնել է, որ Կիևի հրթիռակոծության հետևանքով կան վիրավորներ և զոհեր։ Ներքին գործերի նախարարի խորհրդական Ռոստիսլավ Սմիրնովի խոսքով՝ մայրաքաղաքի Շևչենկոյի շրջանում զոհվել է 8 մարդ, ևս 24 խաղաղ բնակիչ վիրավորվել է։

Վերջին անգամ Կիևը հրթիռակոծվել էր հունիսի վերջին` 14 հրթիռներից մեկը Շևչենկոյի շրջանում հարվածել էր բարձրահարկ շենքին, մեկ մարդ մահացել էր, վեցը՝ վիրավորվել։

Ռուսաստանը վաղ առավոտից հարվածներ է հասցնում ուկրաինական քաղաքներին, այդ թվում` մայրաքաղաք Կիևին:

Նախօրեին Կրեմլն ուկրաինացիներին է մեղադրել Ռուսաստանը և Ղրիմի թերակղզին կապող կամուրջը պայթեցնելու համար:

Ուկրաինական քաղաքների հրթիռակոծությունների հետևանքով կա առնվազն 5 զոհ, մոտ 30 քաղաքացի վիրավորվել է: Ավերվել են մեծ թվով շինություններ: Կիևից զատ հարվածների են ենթարկվել Դնեպրը, Խարկովը, Ժիտոմիրը, Նիկոլաևը և Արևմտյան Ուկրաինայի մի շարք բնակավայրեր:

Ուկրաինայի զինված ուժերի գլխավոր հրամանատար Վալերի Զալուժնին ասել է, որ ռուսներն ուկրաինական թիրախների վրա արձակել են առնվազն 75 հրթիռ: Նրա խոսքով՝ հակաօդային պաշտպանությունը կարողացել է ոչնչացնել դրանցից ավելի քան 40-ը:

Ուկրաինայի նախագահ Վլադիմիր Զելենսկին հայտարարել է, թե Ռուսաստանն իր երկրին հարվածներ հասցնելով, ցանկանում է հնարավորինս մեծ թվով մարդկանց սպանել և ոչնչացնել էներգետիկ համակարգը:

Այդ մասին Զելենսկին ասել է հատուկ ուղերձում, որը տեսագրել է նախագահական նստավայրի շենքի մոտ:

«Ուկրաինացիներ, ուկրաինուհիներ, այսօր դժվար առավոտ է, մենք գործ ունենք ահաբեկիչների հետ, նրանք երկու թիրախ են ընտրել: Առաջինը մեր քաղաքների էներգահամակարգն է, երկրորդը՝ մարդիկ: Նրանք փորձում են մեզ հնարավորինս մեծ կորուստներ պատճառել, ջնջել երկրի երեեսից: Բայց մենք ուկրաինացիներ ենք, օգնում ենք իրար, հավատում ենք մեզ»,- ասել է Զելենսկին, ավելացնելով, թե ուկրաինացիները կվերականգնեն ամեն բան, ինչն ավերվել է:

«Նրանք կարող ենք ժամանակավոր խափանել հոսանքի մատակարարումը, բայց երբեք չեն խափանի մեր վստահություընը, մեր հավատն առ հաղթանակ»,- ասել է Զելենսկին:

Նախագահը բնակիչներին կոչ է արել մնալ ռմբապաստարաններում և պահպանել անվտանգության կանոնները:

«Հիշեք, Ուկրաինան կար մինչև այս թշնամու հայտնվելը և կլինի նաև նրանից հետո: Փառք Ուկրաինանին»,- ասել է Զելենսկին:

Պաշտոնական Մոսկվան և Մինսկը պայմանավորվել են համատեղ զորք տեղակայել, այսօր հայտարարել է Բելառուսի նախագահ Ալեքսանդր Լուկաշենկոն Անվտանգության հարցերով նիստի ժամանակ։

«Միութենական պետության արևմտյան սահմաններին լարված իրադրության պատճառով մենք որոշել ենք համատեղ՝ Ռուսաստանի Դաշնության ու Բելառուսի Հանրապետության զորք տեղակայել։ Ամեն ինչ արվում է առկա փաստաթղթերի համաձայն․ եթե վտանգի աստիճանը հասնում է ներկայիս մակարդակին, մենք սկսում ենք Միութենական պետության խմբավորում տեղակայել», - ասել է Լուկաշենկոն։

Վերջինիս խոսքով՝ այս մասին ինքն ու Պուտինը պայմանավորվել են անցած շաբաթավերջին Սանկտ Պետերբուրգում՝ ԱՊՀ ոչ պաշտոնական գագաթնաժողովից հետո։

«Համատեղ այդ խմբավորման հիմքը բանակն է՝ Բելառուսի զինված ուժերը։ Պետք է ձեզ տեղեկացնեմ, որ ես հանձնարարական եմ տվել, և մենք արդեն երկու օր է՝ սկսել ենք կազմավորել այդ խմբավորումը»,- ասել է Լուկաշենկոն։

Թե ինչ կազմ է ունենալու համատեղ զորախումբը, կոնկրետ որտեղ և երբ է տեղակայվելու, Բելառուսի նախագահը չի հստակեցրել։

Ուկրաինայի նախագահ Վլադիմիր Զելենսկին այսօր հայտնել է, որ «Մեծ յոթնյակում» նախագահող Գերմանիայի կանցլեր Օլաֆ Շոլցի հետ պայմանավորվել է կազմակերպել խմբի մասնակիցների շտապ խորհրդակցություն, որի օրակարգում կլինի Ուկրաինայի վրա ռուսների վերջին զանգվածային հրթիռային գրոհը:

«Քննարկումը տեղի կունենա վաղը՝ հոկտեմբերի 11-ին Բեռլինի ժամանակով ժամը 14:00-ին»,- հայտնել է Գերմանիայի կառավարության խոսնակ Շտեֆեն Հեբեշտրայտը:

Մեծ Բրիտանիան, Միացյալ Նահանգները և Եվրոպական միությունն արդեն խստորեն դատապարտել են հարձակումը, որի ընթացքում ուկրաինական ենթակառուցվածքների վրա ռուսների արձակած հրթիռներից մարդիկ են զոհվել:

Եվրոպական հանձնաժողովի նախագահ Ուրսուլա ֆոն դեր Լայենն ասել է, թե էներգակիրների գնաճն այն գինն է, որը Ռուսաստանի նախագահ Վլադիմիր Պուտինը եվրոպացիներից պահանջում է վճարել Ուկրաինայում պատերազմին ընդդիմանալու համար:

«Մենք պետք է պաշտպանենք Եվրոպայի քաղաքացիներին Պուտինի հայտարարած էներգետիկ պատերազմից: Նա էներգետիկ շուկաներում ամեն կերպ դիմում է զեղծարարությունների: Հենց Պուտինի պատճառով են բարձրանում էլեկտրականության և գազի գները: Նա մեզ պարտադրում է Ուկրաինայի դեմ պատերազմին ընդդիմանալու համար: Բայց նա ձախողվել է մեզ պառակտելու հարցում և ինչ էլ անի՝ հաջողության չի հասնի»,- հայտարարել է Ուրսուլա ֆոն դեր Լայենը:

Նրա խոսքով, Եվրամիությունը դիմել է անհրաժեշտ քայլերի սրընթաց գնաճի կապակցությամբ:

Եվրոպան ոչ միայն արդեն հրաժարվել է ռուսական ածխից, այլև նախկինում ստացվող ռուսական նավթի ընդամենը 10-ը տոկոսն է գնում:

Ժամանակին Ռուսաստանը տրամադրել է Եվրոպայում սպառվող գազի 40 տոկոսն, իսկ այս 7 ամիսների ընթացքում դա իջեցվել է մինչև 7.5 տոկոս:

Եվրոպական հանձնաժողովի նախագահը հավաստիացրել է, որ Եվրոպան կապահովի էներգակիրների նոր հուսալի աղբյուրներ և կերաշխավորի էներգետիկ անկախությունը Ռուսաստանից:

Ռուսաստանի Դաշնության նախագահ Վլադիմիր Պուտինը վաղը՝ հոկտեմբերի 11-ին, Սանկտ Պետերբուրգում կընդունի Ատոմային էներգիայի միջազգային գործակալության գլխավոր տնօրեն Ռաֆայել Գրոսիին: Այդ մասին հայտնել է նախագահի խոսնակ Դմիտրի Պեսկովը:

«Վաղը նախագահը մի քանի հանդիպում ունի: ԱԷՄԳ գլխավոր տնօրեն Ռաֆայել Գրոսին կլինի Ռուսաստանում, և ծրագրվում է, որ նա կհանդիպի նախագահ Պուտինի հետ: Նախագահը վաղը Սանկտ Պետերբուրգում է աշխատելու»,- ասել է Պեսկովը:

Գրոսին և Պուտինը քննարկելու են Զապորոժիեի ատոմակայանի անվտանգության հարցը: ԱԷՄԳ-ն սեպտեմբերին Կիևին և Մոսկվային հորդորել է Զապորոժիեի ԱԷԿ-ի շրջանը հայտարարել ապառազմականացված գոտի: