Պատերազմ Ուկրաինայում (լայվ բլոգ, թարմացվող)

Եվրոպայի խորհրդի խորհրդարանական վեհաժողովը մարդու իրավունքների բնագավառում Վացլավ Հավելի մրցանակը շնորհել է ռուսաստանցի ընդդիմադիր քաղաքական գործիչ և լրագրող Վլադիմիր Կարա-Մուրզային, Ստրասբուրգում ԵԽԽՎ աշնանային նստաշրջանի բացմանը հայտնել է վեհաժողովի նախագահ Տինի Կոկսը:

Մրցանակի վկայագիրը ստացել է Կարա-Մուրզայի ամուսինը՝ Եվգենիան:

Այս տարվա ապրիլին Մոսկվայի Բասմաննի շրջանի դատարանի կարգադրությամբ Վլադիմիր Կարա-Մուրզան կալանավորվել է «Ռուսաստանի Դաշնության Զինված ուժերի մասին գիտակցաբար կեղծ տեղեկություններ տարածելու» հոդվածով:

Ըստ քննիչների, ելույթ ունենալով Արիզոնայի նահանգի օրենսդիր ժողովի ստորին պալատում՝ Լեգիսլատուրայում, «Կարա-Մուրզան ռուսական բանակին անհիմն մեղադրել է Ուկրաինայում արգելված մեթոդներով պատերազմ վարելու համար»:

Բացի այդ, ըստ մեղադրող կողմի, «հրապարակախոսը երկար ժամանակ համագործակցել է ՆԱՏՕ-ի անդամ երկրներից մեկի հետ»: Այդ մեղադրանքով Կարա-Մուրզան կարող է դատապարտվել ընդհուպ 20 տարվա ազատազրկման:

Այսօր դատարանը բավարարել է քննիչների միջնորդությունը և Վլադիմիր Կարա-Մուրզայի կալանքի ժամկետը երկարաձգել է մինչև այս տարվա դեկտեմբերի 12-ը

Չինաստանի արտաքին գործերի նախարարության մամլո խոսնակ Մաո Նինգը հայտարարել է, թե անհրաժեշտ է աջակցել Ուկրաինայի խնդրի խաղաղ կարգավորմանն ուղղված բոլոր ջանքերին: Այդ մասին նա ասել է, արձագանքելով այսօր առավոտյան Կիևին և ուկրաինական մի շարք այլ քաղաքների հրթիռակոծման լուրին:

«Չինաստանը մշտապես ընդգծել է իր դիրքորոշումն Ուկրաինայի հարցում: Մենք միանշանակ կողմ ենք երկրների տարածքային ամբողջականության և ինքնիշխանության սկզբունքներին, և բոլորը պետք է հետևեն դրանց ու հավատարիմ լինեն ՄԱԿ-ի Կանոնադրության պահանջներին: Անվտանգության վերաբերյալ լեգիտիմ մտահոգությունները նույնպես պետք է հաշվի առնվեն: Մենք հուսով ենք, որ կողմերը կկարողանան երկխոսության և քննարկումների եղանակով լուծել տարաձայնությունները: Չինաստանը ցանկանում է շարունակել իր կառուցողական դերակատարությունը լարվածությունը մեղմելու գործում»,- ասել է խոսնակը:

Չինաստանը միջազգային ասպարեզում համարվում է Ռուսաստանի գլխավոր դաշնակիցներից մեկը և ուղիղ ու միանշանակ չի դատապարտել Ռուսաստանի հարձակումն Ուկրաինայի վրա, բայց նաև չի ճանաչել ուկրաինական տարածքների ապօրինի բռնակցումը Ռուսաստանին:

Ուկրաինայի անվտանգության խորհուրդը հետախուզում է հայտարարել Ռուսաստանի նախկին նախագահ և նախկին վարչապետ, ներկայում Անվտանգության խորհրդի փոխնախագահ Դմիտրի Մեդվեդևի նկատմամբ:

Նա մեղադրվում է Ուկրաինայի Քրեական օրենսգրքի 110 հոդվածի երկրորդ մասով (Ուկրաինայի սահմանադրական կարգի բռնի ուժով փոփոխությանը, պետական իշանության զավթմանը, տարածքների սահմանների և պետական սահմանի փոփոխությանն ուղղված գործողությունների ֆինանսավորում):

Հոկտեմբերի 10-ին առավոտյան Ուկրաինայի մի շարք քաղաքներ ռուսների կողմից ենթարկվել են հրթիռային հարվածների, կա առնավազն 10 զոհ և մոտ 60 վիրավոր:

«Ուկրաինական ներկայիս պետությունն իր նացիստական քաղաքական ռեժիմով մշտապես ուղիղ սպառնալիք է լինելու Ռուսաստանի համար: Ուստի, Ռուսաստանի նպատակը պետք է լինի Ուկրաինայի քաղաքական ռեժիմի լիակատար ապամոնտաժումը»,- Տելեգրամ-ալիքում գրել է Դմիտրի Մեդվեդևը:

Միացյալ Նահանգների նախագահ Ջո Բայդենն իր ուկրաինացի գործընկեր Վլադիմիր Զելենսկու հետ հեռախոսազրույցում խոստացել է շարունակել Կիևին անհրաժեշտ օգնություն ցուցաբերել, այդ թվում՝ տրամադրել հակաօդային պաշտպանության համակարգեր, հաղորդում է Սպիտակ տունը։

Բայդենը նաև մատնանշել է դաշնակիցների և գործընկերների հետ շարունակվող աշխատանքը՝ ուղղված Ռուսաստանի Դաշնության դեմ սահմանափակող միջոցներ կիրառելուն։ Բացի այդ, նա խոստացել է աջակցել Ուկրաինային անվտանգության ոլորտում, հատկացնել տնտեսական ու հումանիտար օգնություն։

Ուկրաինային հավելյալ սպառազինություն տրամադրելու պատրաստակամության մասին ԱՄՆ հայտարարությունները, այդ թվում՝ վերջինը, հաստատում են այն փաստը, որ Վաշինգտոնը ամրապնդվել է հակամարտության մասնակցի կարգավիճակում, հայտարարել է Վաշինգտոնում ՌԴ դեսպան Անատոլի Անտոնովը։

«Նման օգնությունը, ինչպես նաև Կիևին ռազմական գործողությունների վարման համար հետախուզական, հրահանգիչների և ցուցումներով օգնությունը Ռուսաստանի և ՆԱՏՕ-ի միջև բախման ռիսկի հետագա սրման և մեծացման ճանապարհն է», - ընդգծել է Անտոնովը՝ կոչ անելով «ԱՄՆ-ին և նրա դաշնակիցներին չհատել այն կարմիր գծերը, որոնց մոտեցել են»:

Նոր Զելանդիան Ուկրաինայի շուրջ ստեղծված իրավիճակի կապակցությամբ պատժամիջոցների ցանկում ներառել է Ռուսաստանից 51 գործարարների, Ռուսաստանին ուկրաինական տարածքների բռնակցմանն առնչվող 24 պաշտոնյաների և 2 ռուսական ընկերությունների:

Արտգործնախարարության հրապարակած թարմացված ցուցակի համաձայն՝ պատժամիջոցների նոր ցուցակում են «Գազպրոմբանկ»-ի խորհրդի նախագահը, «Լուկօյլ»-ի նախկին նախագահ և նախկին գլխավոր տնօրենը, Դոնեցկի, Լուգանսկի, Խերսոնի և Զապորոժիեի շրջաններում նշանակված մի շարք պաշտոնյաներ։

Նախնական տվյալներով՝ ռուսական կողմից ուկրաինական քաղաքների հրթիռակոծության հետևանքով զոհվել է 19 մարդ, ևս 105-ը վիրավորվել է, հայտնում է Ուկրաինայի արտակարգ իրավիճակների պետական ծառայությունը։

Ուկրաինայի 12 շրջաններում և մայրաքաղաք Կիևում հարվածների հետևանքով մի քանի տասնյակ հրդեհ է բռնկվել, որոնք մարվել են։

Կիևի, Լվովի, Սումիի, Տերնոպոլի և Խմելնիցկիի մարզերում 301 բնակավայր դեռ հոսանքազրկված է, 3571 բնակավայրերում էլեկտրամատակարարումը վերականգնվել է:

Անցած մեկ օրվա ընթացքում հրթիռակոծությունից տուժել են ավելի քան 30 քաղաքներ և գյուղեր, այդ թվում՝ Կիևը, Լվովը, Ռովնոն, Ժիտոմիրը, Տերնոպոլը, Խմելնիցկին, Իվանո-Ֆրանկովսկը, Վիննիցան:

Մեծ յոթնյակի (G7) առաջնորդներն այսօր առցանց հանդիպում կանցկացնեն՝ քննարկելու Կիևին աջակցելու իրենց հանձնառությունը երեկ ուկրաինական քաղաքներին հասցված հրթիռային հարվածների ֆոնին, հայտարարել է Սպիտակ տունը:

Հանդիպմանը կմասնակցի նաև Ուկրաինայի նախագահ Վլադիմիր Զելենսկին, ով երկուշաբթի երեկոյան ելույթի ժամանակ ասաց, որ Ռուսաստանի կողմից քանդված բոլոր օբյեկտները կվերականգնվեն, և արևմտյան գործընկերները կարագացնեն Կիևին հակաօդային պաշտպանության առաջադեմ համակարգերի տրամադրումը հարձակումներից պաշտպանվելու համար։

Սպիտակ տան հայտարարությունում նշված է, որ G7-ի ղեկավարների այսօրվա հանդիպումը կլինի առաջինը ուկրաինական զորքերի հակահարձակման մեկնարկից ի վեր։ Սպասվում է, որ Մեծ Բրիտանիայի վարչապետ Լիզ Թրասը ՆԱՏՕ-ի ղեկավարների հրատապ հանդիպման կոչ կանի։

Ճապոնական Nissan ավտոարտադրողը լքում է Ռուսաստանի շուկան՝ ռուսական ակտիվները փոխանցելով ՌԴ արդյունաբերության և առևտրի նախարարությանը ենթակա ձեռնարկությանը։ Այս մասին տեղեկացնում է Ռուսաստանի կառավարությունը:

Նույն սխեմայով անցած ամիսներին Ռուսաստանից հեռացավ նաև ֆրանսիական Renault-ն։

Սանկտ Պետերբուրգի Nissan գործարանը մեքենաների արտադրությունը սկսել է 2009 թվականին։ 2021 թվականին գործարանն արտադրությունն ավելացրել է 17 տոկոսով՝ հասցնելով մինչև 45 հազար մեքենայի։ Անցյալ տարի Ռուսաստանում Nissan մակնիշի մոտ 51,5 հազար ավտոմեքենա է վաճառվել։

Ռուսական ուժերը հոկտեմբերի 11-ին շարունակել են հրթիռային հարվածներ հասցնել ուկրաինական քաղաքներին։

Լվովի շրջանում և Լվով քաղաքում վնասվել է երկու կրիտիկական նշանակության ենթակառուցվածք, հայտնել է Լվովի ռազմական վարչակազմի ղեկավար Մաքսիմ Կոզիցկին։

Լվովի քաղաքապետ Անդրեյ Սադովիի խոսքով՝ հրթիռակոծության հետևանքով քաղաքի 30 տոկոսը մնացել է առանց էլեկտրականության, խափանումներ կան նաև ջրամատակարարման հետ կապված։

Հաղորդվում է, որ պայթյուններ են հնչում նաև Խմելնիցկի և Օդեսայի շրջաններում, իշխանությունները մարդկանց հորդորում են մնալ ապաստարաններում։ Օդեսայի Պրիմորսկի շրջանը ևս առանց հոսանքի է մնացել։

Ռուսաստանի պաշտպանության նախարարությունը հայտարարել է, որ ռուսաստանյան զինված ուժերը շարունակել են հարվածներ հասցնել Ուկրաինայի ռազմական կառավարման և էներգետիկ կառույցներին։

Ռուսաստանի իշխանությունները ահաբեկչական կազմակերպությունների ցանկում են ներառել Meta կորպորացիան, որին են պատկանում Facebook և Instagram սոցիալական ցանցերը։ Այդ ցուցակում ընդգրկվել է նաև «Վեսնա» հակապատերազմական երիտասարդական շարժումը, հայտնում են ռուսաստանյան լրատվամիջոցները։

«Վեսնա»-ն ծայրահեղական կազմակերպություն ճանաչելու և դրա գործունեությունը երկրում արգելելու պահանջով է հանդես եկել Սանկտ Պետերբուրգի դատախազությունը։ Ուկրաինա Ռուսաստանի ներխուժումից ի վեր երիտասարդական շարժումը ակտիվ մասնակցում է հակապատերազմական ցույցերին և ակցիաներին։

Անցած մայիսին շարժման մի խումբ ակտիվիստների դեմ քրեական գործեր են հարուցվել, նրանց երկարամյա ազատազրկում է սպառնում։