Պատերազմ Ուկրաինայում (լայվ բլոգ, թարմացվող)

Ամերիկյան վարչակազմը քննարկել է Միացյալ Նահանգների պատասխանը, եթե Ռուսաստանը մարտավարական միջուկային զենք կիրառի Ուկրաինայում, հայտարարել է ԱՄՆ նախագահ Ջո Բայդենը՝ ընդգծելով, որ չի պատրաստվում խոսել այդ մասին։

«Դրա մասին քննարկումներ են եղել, բայց անպատասխանատու կլինի խոսել այն մասին, թե ինչ կարող ենք և ինչ չենք կարող անել», - ասել է Բայդենը CNN-ին տված հարցազրույցում, որը հեռարձակվել է երեքշաբթի երեկոյան։

Ջո Բայդենը Ռուսաստանի նախագահ Վլադիմիր Պուտինին անվանել է «ռացիոնալ խաղացող», ով, այնուամենայնիվ, սխալ է հաշվարկել Ուկրաինա ներխուժումը՝ ճիշտ չգնահատելով ուկրաինացի ժողովրդի դիմադրությունը ճնշելու իր կարողությունը։

Միացյալ Նահանգների պետքարտուղար Էնթոնի Բլինքենը և քաղաքական հարցերով նրա տեղակալ Վիկտորիա Նուլանդը երեկ Վաշինգտոնում հանդիպել են ԱՄՆ-ում դիվանագիտական առաքելությունների պաշտոնյաների հետ՝ կոչ անելով նրանց աջակցել ՄԱԿ-ի բանաձևին, որը դատապարտում է Ռուսաստանի կողմից ուկրաինական տարածքների բռնակցումը:

Առցանց հանդիպմանը մասնակցել են ավելի քան 100 պետություններ ներկայացնող 165 դիվանագետներ։

Բանաձևի քվեարկությունը տեղի կունենա առաջիկա օրերին՝ ՄԱԿ-ի Գլխավոր ասամբլեայի արտակարգ նիստի շրջանակում։

Ղրիմի կամրջի պայթյունի կազմակերպիչը Ուկրաինայի ռազմական հետախուզության ղեկավար Կիրիլ Բուդանովն է, պայթուցիկները Օդեսայից տեղափոխել են Բուլղարիայի, Վրաստանի և Հայաստանի տարածքով, ՏԱՍՍ-ին հայտնել են Ռուսաստանի Անվտանգության դաշնային ծառայությունից:

Ըստ ծառայության՝ ձերբակալվել են հարձակման նախապատրաստման ութ մասնակիցներ։

«Ներկայումս քրեական գործի շրջանակներում կալանավորվել են Ռուսաստանի հինգ, Ուկրաինայի և Հայաստանի երեք քաղաքացիներ, որոնք մասնակցել են հանցագործության նախապատրաստմանը», - ասել են ՌԴ Անվտանգության դաշնային ծառայությունից:

Ըստ հաղորդման՝ Հայաստանի քաղաքացին Արթուր Տերչանյանն է՝ ծնված 1985 թվականին: Հայաստանի Պետեկամուտների կոմիտեն ժամեր անց ճշտեց, որ քաղաքացու ազգանունը Թերջանյան է:

Ընդհանուր առմամբ, այժմ բացահայտվել է նախապատրաստման առնվազն 12 մասնակից։

Ատոմային էներգիայի միջազգային գործակալության գլխավոր տնօրեն Ռաֆայել Գրոսին Թվիթերում գրել է, որ Զապորոժիեի ատոմակայանի արտաքին էլեկտրասնուցումը կրկին անջատվել է, նշելով՝ վերջին հինգ օրվա մեջ սա արդեն երկրորդ դեպքն է։ Միջուկային անվտանգությունը հիմա ապահովվում է պահուստային դիզել գեներատորի էլեկտրաէներգիայի շնորհիվ։

Ռաֆայել Գրոսին նշել է, որ ատոմակայանի էլեկտրասնուցման աղբյուրների կրկնվող անջատումները խորը մտահոգություն են առաջացնում, և ընդգծել է միջուկային անվտանգության ու պաշտպանության գոտի ստեղծելու հրատապ անհրաժեշտությունը։

Նախօրեին Գրոսին Մոսկվայում հանդիպել էր Ռուսաստանի նախագահ Վլադիմիր Պուտինի հետ։

ՆԱՏՕ-ի անդամ ու համագործակցող երկրների՝ շուրջ 50 պետության պաշտպանության նախարարներ այսօր հավաքվել են Բրյուսելում՝ քննարկելու Ուկրաինայի օդային պաշտպանությունն ամրապնդելու հնարավորությունները։

Հավաքն անցնում է Ռուսաստանի վերջին հուժկու ռմբակոծություններից հետո, որոնց թիրախում էին հայտնվել ուկրաինական խաղաղ բնակավայրերը, այդ թվում՝ Կիևի բնակելի թաղամասերն ու ենթակառուցվածքները։

«Քաղաքացիական բնակավայրերի այս հրթիռակոծումը ցույց է տալիս Ռուսաստանի թուլությունը», - հավաքի նախօրեին հայտարարել է Հյուսիսատլանտյան դաշինքի գլխավոր քարտուղար Յենս Ստոլտենբերգը, ընդգծելով՝ Արևմուտքը պատրաստ է անգամ երկար պատերազմի. - «Մենք անսասան ենք Ուկրաինային օգնելու մեր հաստատակամության մեջ, պատրաստ ենք տևական ճանապարհի և կաջակցենք նրանց այնքան, որքան որ դրա կարիքը կլինի»։

Գեմանիայի պաշտպանության նախարարն այսօր հաստատել է, որ նախօրեին արդեն Ուկրաինա է հասել գերմանական IRIS-T հակաօդային պաշտպանության համակարգը, որի մատակարարման մասին պայմանավորվածությունը ձեռք էր բերվել դեռ պատերազմից առաջ։ «Հաջորդ տարի մենք ևս երեք նման համակարգ կմատակարարենք», - այսօր ասել է Քրիստին Լամբեխտը։

Կիևին հակաօդային պաշտպանության համակարգեր մատակարարելու բանակցություններ են ընթանում նաև Միացյալ Նահանգների հետ:

Պաշտոնական Մոսկվան, իր հերթին, այսօր կրկին հայտարարել է, թե կանգ առնելու նպատակ չունի: «Փետրվարի 24-ին մեր առջև դրված նպատակները մնում են անփոփոխ», - այսօր հայտարարել է Կրեմլի խոսնակ Դմիտրի Պեսկովը։

Ավստրալիայի վարչապետ Էնթոնի Ալբանիզն այսօր հայտնել է, որ կառավարությունը դիտարկում է զինվորական հրահանգիչներ Ուկրաինա ուղարկելու հնարավորությունը։

Նա «Channel-7» հեռուստաընկերությանն ասել է, որ երեքշաբթի խոսել է Ուկրաինայի նախագահ Վլադիմիր Զելենսկու հետ, տեսնելու, թե Ավստրալիան հետագա ինչ օգնություն կարող է ցուցաբերել Ուկրաինային՝ դիմակայելու համար Ռուսաստանի ագրեսիային։

«Այս պայքարը միայն Ուկրաինայի ինքնիշխանության համար չէ։ Սա պայքար է միջազգային իրավունքի գերակայության, ինքնիշխան սահմանները հարգելու համար, և ահա թե ինչու է աշխարհը միասնական Ուկրաինային աջակցելու հարցում՝ ընդդեմ ռուսական ագրեսիայի, որը դեմ է միջազգային օրենքի գերակայությանը, և որը սարսափելի կերպով թիրախավորում է քաղաքացիական անձանց»,- նշել է Ավստրալիայի վարչապետը։

ՆԱՏՕ-ից դուրս երկրների թվում Ավստրալիան Ուկրաինային ամենամեծ աջակցությունը ցուցաբերող երկիրն է՝ 388 միլիոն դոլարի օգնություն, որից 244-ը ռազմական աջակցություն է։

Հռոմի պապ Ֆրանցիսկոսը դատապարտել է ռուսական ուժերի՝ Ուկրաինայի բնակավայրերի վերջին «անողոք ռմբակոծությունները», որոնց հետևանքով առնվազն 26 մարդ է զոհվել։ Նա կանգ առնելու կոչ է արել նրանց, ում ձեռքում է «պատերազմի ճակատագիրը»։

«Իմ սիրտը միշտ ուկրաինացի ժողովրդի հետ է, հատկապես այն վայրերի բնակիչների, որոնք ենթարկվեցին անողոք ռմբակոծությունների»,- ասել է Հռոմի պապը Սուրբ Պետրոսի տաճարի հրապարակում հավաքված հազարավոր հավատացյալներին։

«Ուկրաինայի վերջին ռազմական հաղթանակները ռուսական օկուպանտների դեմ արտասավոր էին և ազդեցություն են գործել պատերազմի ընթացքի վրա, չնայած Մոսկվայի վերջին հրթիռակոծությունների չարությանն ու դաժանությանը», - ասել է Պենտագոնի ղեկավարը:

Լլոյդ Օսթինն այս մասին խոսել է՝ ելույթ ունենալով Բրյուսելում մեկնարկած Ուկրաինայի աջակցության շփման խմբի հանդիպմանը, որին ավելի քան հինգ տասնյակ երկրների ներկայացուցիչներ են մասնակցում՝ ներառյալ ՆԱՏՕ-ի պաշտպանության նախարարները։ Քննարկվող հիմնական հարցերից մեկը Ուկրաինայի հակաօդային պաշտպանությունը ամրապնդելն է՝ ռուսական հրթիռների հարձակումներից պաշտպանվելու համար։

Օսթինը նշել է, որ շփման խումբը վճռական է աջակցելու Ուկրաինայի պաշտպաններին։

«Մենք կշարունակենք ամրապնդել Ուկրաինայի պաշպանունակությունը այսօրվա անհապաղ կարիքների և երկարաժամկետ հեռանկարների համար»,- ընդգծել է նա։

Երեկ շարունակվել են ռուսական ուժերի հրետակոծությունները։ Ավդևկա քաղաքը ռմբակոծելու հետևանքով առնվազն 7 մարդ է զոհվել, ևս 9-ը վիրավորվել են, հայտնում են տեղի իշխանությունները:

Դոնեցկի մարզի վարչակազմի ղեկավար Պավել Կիրիլենկոն ասել է, որ ռմբակոծվել է քաղաքի կենտրոնական շուկան, որտեղ ցերեկային ժամերին շատ մարդ է լինում։

Ձայների 143 կողմ, 5 դեմ հարաբերակցությամբ ՄԱԿ-ը հավանություն տվեց բանաձևին, որը դատապարտում է Ուկրաինայի հինգ շրջանների բռնազավթումը Ռուսաստանի կողմից: Ռուս դիվանագետից բացի փաստաթղթին դեմ են արտահայտվել միայն Բելառուսը, Սիրիան, Նիկարագուան ու Հյուսիսային Կորեան:

Հայաստանը ձեռնպահ է քվեարկել` 34 պետությունների հետ, որոնց շարքում են Հնդկաստանը, Չինաստանը, Կենտրոնական Ասիայի պետություններն ու աֆրիկյան մի շարք երկրներ: Ադրբեջանը, Իրանը, Թուրքմենստանն ու Վենեսուելան քվեարկությանը չեն մասնակցել: