Պատերազմ Ուկրաինայում (լայվ բլոգ, թարմացվող)

Մեծ յոթնյակի (G7) երկրները և Արժույթի միջազգային հիմնադրամը (ԱՄՀ) չորեքշաբթի օրը խոստացել են պատկառելի ֆինանսական աջակցություն ցուցաբերել Ուկրաինային, որը ծանր հարված է ստացել ռուսական վերջին հրթիռային հարվածներից և ամսական միլիարդավոր դոլարների օգնության կարիք ունի:

Ուկրաինայի նախագահը տեսակապով դիմել է G7-ի երկրների ֆինանսների նախարարներին, ովքեր հավաքվել էին Վաշինգտոնում՝ մասնակցելու Արժույթի միջազգային հիմնադրամի և Համաշխարհային բանկի տարեկան ժողովներին։ «Մենք տեսնում ենք, որ ռուսական ահաբեկչությունները կարող են ակտիվանալ։ Ուստի պետք է ակտիվացնենք մեր համագործակցությունը՝ համապատասխան օգնություն ցուցաբերելու համար՝ վերականգնելու ավերվածը և երաշխավորելու մեր պետության ֆինանսական կայունությունը», - հայտարարել է Վլադիմիր Զելենսկին՝ հավելելով, որ հաջորդ տարի Կիևը կբախվի բյուջեի 38 միլիարդ դոլարի դեֆիցիտի։

ԱՄՀ ղեկավար Քրիստալինա Գեորգիևան ասել է, որ 2023 թվականին Ուկրաինայի ֆինանսավորման կարիքները կկազմեն ամսական 3-4 միլիարդ դոլար:

Այսօր ՆԱՏՕ-ի գլխավոր քարտուղար Յենս Ստոլտենբերգը և ԱՄՆ պաշտպանության նախարար Լլոյդ Օսթինը հայտարարությամբ հանդես կգան Բրյուսելում ընթացող Ուկրաինայի պաշտպանության կոնտակտային խմբի վեցերորդ հանդիպման արդյունքներով։

Մինչ այդ, Ստոլտենբերգը մեկնաբանել է նախօրեին ՄԱԿ-ի Գլխավոր ասամբլեայում տեղի ունեցած քվեարկությունը, որով 143 երկիր դատապարտել է Ռուսաստանի կողմից Ուկրաինայի տարածքների բռնակցումը: «ՄԱԿ-ի քվեարկությունը ուկրաինական տարածքների անօրինական բռնակցման հստակ դատապարտում էր և հստակ կոչ Ռուսաստանին, նախագահ Պուտինին՝ չեղյալ համարել այդ որոշումները և հարգել Ուկրաինայի տարածքային ամբողջականությունը», - ասել է ՆԱՏՕ-ի ղեկավարը:

Ռուսաստանի Դաշնության նախագահ Վլադիմիր Պուտինը Ղազախստանի մայրաքաղաք Աստանայում գումարված Ասիայի փոխգործության և վստահության միջոցների 6-րդ համաժողովում խոսել է աշխարհքաղաքական իրավիճակի մասին:

«Այսօրվա հանդիպումը տեղի է ունենում համաշխարհային քաղաքականության և տնտեսության խոշոր փոփոխությունների պայմաններում: Աշխարհը հիրավի դառնում է բազմաբևեռ, և Ասիան ստանձնում է նշանակալից, եթե ոչ առանցքային դեր, ուժի նոր կենտրոններ են առաջանում: Ասիական երկրները համաշխարհային տնտեսական աճի շարժիչ ուժն են դառնում»,- ասել է Պուտինը:

Ենթադրվում է, որ Ռուսաստանի ղեկավարն Աստանայում կանցկացնի մի շարք երկկողմ հանդիպումներ, այդ թվում՝ Թուրքիայի նախագահ Ռեջեփ Թայիփ Էրդողանի հետ:

Կրեմլի խոսնակ Դմիտրի Պեսկովը նախօրեին ասել է, որ Ռուսաստանի և Թուրքիայի լիդերների հանդիպման օրակարգում անդրադարձ կլինի նաև Ուկրաինային։

Միավորված ազգերի կազմակերպության Գլխավոր ասամբլեան նախօրեին քվեների գերիշխող մեծամասնությամբ դատապարտել է Ռուսաստանի կողմից Ուկրաինայի չորս շրջանների ապօրինի անեքսիան:

ՄԱԿ-ի անդամ հանդիսացող 193 պետությունների երեք քառորդը՝ 143-ը, կողմ են քվեարկել բանաձևին, որով նաև վերահաստատվում է Ուկրաինայի ինքնիշխանությունը, անկախությունը և տարածքային ամբողջականությունը՝ միջազգայնորեն ճանաչված սահմաններում:

«Մենք դարձանք 21-րդ դարում ՄԱԿ-ում պատմական իրադարձության ականատես, 143 կողմ, սա ապշեցուցիչ է, սա շատ վատ է Ռուսաստանի համար»,- ասել է ՄԱԿ-ում Ուկրաինայի դեսպան Սերգեյ Կիսլիցյան:

«Զարմացած չեմ, բայց շատ գոհ եմ արդյունքից, բոլորս շունչներս պահած՝ հետևում էինք կողմ քվեների թվի աճին: Սա հզոր և հստակ ուղերձ է Մոսկվային առ այն, որ Ռուսաստանը չի կարող վախեցնել ամբողջ աշխարհը, սա ուղերձ է առ այն, որ պետք է դադարեցնել ագրեսիան Ուկրաինայի դեմ»,- ասել է ՄԱԿ-ում Միացյալ նահանգների դեսպան Լինդա Թոմաս-Գրինֆիլդը:

Ռուսաստանից զատ բանաձևին դեմ են քվեարկել միայն Սիրիան, Նիկարագուան, Հյուսիսային Կորեան և Բելառուսը:

34 երկրներ, որոց թվում է նաև Հայաստանը, ձեռնպահ են քվեարկել: Մի շարք պետություններ, այդ թվում՝ Ադրբեջանը, քվեարկությանը չեն մասնակցել:

Մեծ Բրիտանիայի պաշտպանության նախարար Բեն Ուոլեսը հայտնել է, որ Լոնդոնը Կիևին կփոխանցի հակաօդային պաշտպանության հրթիռներ, որոնք կիրառվելու են Միացյալ Նահանգների կողմից տրամադրված ՀՕՊ համակարգերի միջոցով:

Այդ մասին նախարարն ասել է այսօր Բրյուսելում՝ ՆԱՏՕ-ի պաշտպանության նախարարների ժողովից առաջ:

«Հրթիռները ՀՕՊ ամերիկյան համակարգերի համար են, ամերիկացիները նույն հրթիռներն են կիրառում: Դրանք կտեղադրվեն ամերիկյան կայանքների վրա», - ասել է Ուոլեսը:

Ուկրաինայի նախագահ Վլադիմիր Զելենսկին ասել է, որ մեծ թվով շրջաններում հաջողվել է վերականգնել ռուսների հրթիռակոծությունների հետևանքով վնասված էլեկտրականության մատակարարման համակարգը, բայց որոշ շրջաններում դեռ կան հոսանքի անջատումներ:

«Վերականգնումը ռուսների երկօրյա հրթիռակոծություններից հետո ամբողջ երկրի տարածքով է շարունակվում: 12 շրջաններում շարքից դուրս էր եկել հոսանքի մատակարարման համակարգը: Այսօրվա դրությամբ մեծ մասում մատակարարումը վերականգնվել է, բայց 4 շրջաններում դեռ աշխատանքը շարունակվում է», - ասել է Զելենսկին:

Ուկրաինայի ղեկավարի փոխանցմամբ, երկրի որոշ տարածքներում էլեկտրականության անջատումներ են իրականացվում ցանցի գերլարված վիճակը մեղմելու և վթարներից խուսափելու համար:

Եվրոպական միության արտաքին քաղաքականության և անվտանգության հարցերով բարձր ներկայացուցիչ Ժոզեպ Բորելը Բրյուգգենում՝ Եվրոպական դիվանագիտական ակադեմիայում, հանդես է եկել ելույթով, որի ընթացքում նախազգուշացրել է, որ Արևմուտքը կտա հզոր ռազմական պատասխան այն դեպքում, եթե ռուսները միջուկային զենք կիրառեն Ուկրաինայում:

«Միջուկային հարձակումը պատասխան կստանա Եվրամիության, ՆԱՏՕ-ի և Միացյալ Նահանգների կողմից: Այն չի լինի միջուկային, բայց ռազմական տեսակետից դրա հզորությունը շատ մեծ կլինի, այնքան մեծ, որ կհանգեցնի ռուսական բանակի ոչնչացմանը»,- ասել է Բորելը:

Եվրամիության դիվանագիտության ղեկավարը նաև արձագանքել է նախագահ Վլադիմիր Պուտինի վերջերս հնչեցրած աղմկահարույց հայտարարությանը, թե «Ռուսաստանը բլեֆի չի դիմում, երբ ասում է, որ բոլոր միջոցներով կպաշտպանի սեփական տարածքը»:

«Արևմտյան երկրներն էլ բլեֆի չեն դիմում, երբ նախազգուշացնում են Ուկրաինայում միջուկային զենքի օգտագործման հետևանքների մասին»,- ասել է Ժոզեպ Բորելը:

Ռուսաստանի արտաքին գործերի նախարար Սերգեյ Լավրովը հայտարարել է, թե Արևմուտքը զարգացող երկրների վրա ճնշում է բանեցրել ՄԱԿ-ի Գլխավոր ասամբլեայում Դոնեցկի, Լուգանսկի, Խերսոնի և Զապորոժիեի տարածքներում հանրաքվեների վերաբերյալ հակառուսական բանաձևն անցկացնելու համար:

Այդ մասին Ռուսաստանի արտաքին գերատեսչության ղեկավարն ասել է Հանրային հեռուստատեսության թղթակցի հետ այսօրվա զրույցում:

«Արևմուտքը՝ բացահայտ և առանց ամոթի, սպառնալով զարգացող երկրներին, կիրառել է դիվանագիտական ահաբեկչության և ձեռքերը ոլորելու մեթոդներ: Մենք այդ ամենը հրաշալի գիտակցում ենք, և սուտ են ամերիկացիների պնդումները, թե նրանք ոչ մեկին չեմ համոզում, թե իբր նրանք {զարգացող երկրները} ինքնուրույն են քվեարկում»,- ասել է Լավրովը:

Գերմանիան Ուկրաինային է փոխանցել Zuzana տեսակի սլովակյան արտադրության 16 հրետանային ինքնագնաց կայանքներ: Դրանք ունեն 155 միլիմետր տրամաչափի հրանոթ, որի հեռահարությունը հասնում է 41 կիլոմետրի:

Սեպտեմբերին Գերմանիան Ուկրաինային տրամադրել է Gepard տեսակի գերմանական արտադրության ևս 6 զենիթային ինքնագնաց կայանք, դրանց ընդհանուր թիվը հասցնելով 30-ի: Գերմանացիները նաև Gepard -ների 59 հազար արկ են փոխանցել ուկրաինացիներին:

Բացի այդ, Բեռլինը Կիևին փոխանցել է M270 MARS տեսակի ամերիկյան արտադրության համազարկային կրակի 5 համակարգ:

Գերմանիան Ուկրաինային փոխանցել է 155 միլիմետր տրամաչափի PzH 2000 (Panzerhaubitze) տեսակի 12 հաուբից և դրանց համար 10 հազար 500 արկ:

Ուկրաինայի զինված ուժերը Բեռլինից, որպես օգնություն, ստացել են Panzerfaust 3 տեսակի հակատանկային 23 հազար 800 հրթիռային համակարգեր, 15 հազար հակահրասայլային ականներ, 54 զրահամեքենա և 3 հազար 200 շարժական ՀՕՊ համակարգեր:

Ըստ վերլուծաբանների՝ այսօրվա դրությամբ Գերմանիան Ուկրաինային ընդհանուր հաշվով տրամադրել է 1 և կես միլիարդ դոլարի ռազմական օգնություն:

Ուկրաինայի նախագահ Վլադիմիր Զելենսկին այսօր ասել է, թե երկիրն ունի ՀՕՊ համակարգի անհրաժեշտ քանակի ընդամենը 10 տոկոսը:

Նա մերժել է Ռուսաստանի հետ դիվանագիտական շփումներ հաստատելու հնարավորությունը: Այդ մասին նա ասել է Եվրոպայի խորհրդի խորհրդարանական վեհաժողովի պատգամավորներին հասցեագրված տեսաուղերձում:

«Մեզ անհրաժեշտ է փակել օդը, մեր կարողությունները բավարար չեն: Գերմանիան և Միացյալ Նահանգները խոստացել են IRIS-T և NASAMS համակարգեր: Մեզ պետք է այդ կարգի օգնության շատ ավելի մեծ ծավալ, մենք հզոր քայլեր ենք սպասում Ֆրանսիայից և Իտալիայից: Այլ ասելու բան չկա: Հավատացեք, այն, ինչ ունենք՝ պահանջվածի սոսկ տասը տոկոսն է»,- ասել է Զելենսկին:

Նրա փոխանցմամբ, Ռուսաստանը պետք է դիվանագիտական առումով ամբողջությամբ մեկուսացվի:

«Ռուսները պետք է ծանր գին վճարեն այս ագրեսիայի համար, հարկ է ճնշում գործադրել Մոսկվայի ռազմական և քաղաքական ղեկավարության վրա»,- ասել է Զելենսկին:

Հոկտեմբերի 10-ին ռուսներն ավելի քան 100 հրթիռ են արձակել ուկրաինական քաղաքների վրա: Զոհվել են տասնյակ մարդիկ: Նախագահ Վլադիմիր Պուտինն ասել է, թե դա պատասխան է Ղրիմի կամրջի պայթեցմանը: