Պատերազմ Ուկրաինայում (լայվ բլոգ, թարմացվող)

ԱՄՆ պետքարտուղար Էնթոնի Բլինքենը կոչ է արել ուկրաինական սևծովյան նավահանգիստներից հացահատիկի արտահանման մասին համաձայնագրի բոլոր կողմերին վերադառնալ դրա իրականացմանը, հայտնել է ԱՄՆ պետդեպարտամենտը։

«Միացյալ Նահանգները ցավում է, որ Ռուսաստանը դադարեցրել է իր մասնակցությունը ՄԱԿ-ի միջնորդությամբ Սևծովյան հացահատիկի նախաձեռնությանը: Մենք կոչ ենք անում բոլոր կողմերին շարունակել կյանք փրկող այս կարևոր նախաձեռնությունը», - ասվում է Բլինքենի հայտարարության մեջ:

Նա նշել է, որ Վաշինգտոնը «խստորեն կոչ է անում» Ռուսաստանի կառավարությանը վերսկսել իր մասնակցությունը նախաձեռնությանը և «ամբողջությամբ կատարել պայմանավորվածությունները»:

Համաձայնագրի չկատարումը ուղղակիորեն կազդի ցածր և միջին եկամուտ ունեցող երկրների և պարենամթերքի համաշխարհային գների վրա, ինչպես նաև կսրի հումանիտար ճգնաժամերը և պարենային անվտանգությունը, ասել է պետքարտուղարը։

Շաբաթ օրը ՌԴ ԱԳՆ-ն հայտնել է, որ Մոսկվան, հաշվի առնելով ուկրաինական անօդաչու թռչող սարքերի հարձակումը Սևաստոպոլում Սևծովյան նավատորմի նավերի վրա, անորոշ ժամանակով կասեցնում է ուկրաինական գյուղատնտեսական արտադրանքի արտահանման սևծովյան նախաձեռնության իրականացումը։ Դրանից հետո ՄԱԿ-ում Ռուսաստանի Դաշնության մշտական ներկայացուցչությունը պաշտոնապես ծանուցել է կառույցի գլխավոր քարտուղարին «հացահատիկային գործարքին» մասնակցության կասեցման մասին։

Ուկրաինայի նախագահ Վլադիմիր Զելենսկին հայտարարել է Դոնեցկի մարզում ռուսական կողմի հարձակումը հետ մղելու մասին։ Հանգստյան օրերին ռուսական մի շարք աղբյուրները տեղեկացրել էին, որ Դոնբասում տեղակայված ստորաբաժանումները մի շարք ուղղություններով փորձել են հարձակման անցնել, առավել կատաղի մարտերը ծավալվել էին Ուգլեդար քաղաքի ուղղությամբ։

«Սահմանապահ ծառայության զինվորականները, որոնք նախկինում տեղակայված էին [Հունգարիայի հետ սահմանին գտնվող] Չոպ քաղաքում, այժմ պաշտպանում են մեր երկիրը Դոնեցկի մարզում։ Վերջին մարտերում նրանք իրենց գերազանց կերպով են դրսևորել։ Այսօր, օրինակ, նրանց հաջողվել է հետ մղել թշնամու հարձակումը՝ հետ մղելով ռուսական ուժերին», - հայտարարել է Զելենսկին՝ նշելով, որ մարտական գործողությունների ընթացքում ուկրաինացի սահմանապահներին նաև հաջողվել է գերիներ վերցնել։

«Չնայած Ռուսաստանի առարկություններին Թուրքիան կշարունակի ջանքեր գործադրել ուկրաինական հացահատիկի արտահանման ուղղությամբ», - այսօր Անկարայում հայտարարել է Թուրքիայի նախագահ Ռեջեփ Թայիփ Էրդողանը։

Թուրքիայի ղեկավարի խոսքով՝ Անկարայի նպատակն է, որպեսզի օգոստոսին Ստամբուլում ձեռք բերված պայմանավորվածությունները շարունակեն գործել, քանի որ դրանց կյանքի կոչումը նպաստում է պարենամթերքի համաշխարհային շուկայում լարվածության թուլացմանը։

«Ստամբուլում ստեղծված միասնական մեխանիզմի շնորհիվ մենք կարողացանք մեղմել պարենային ճգնաժամը՝ շուրջ 9 միլիոն 300 հազար տոննա ուկրաինական հացահատիկ տրամադրելով աշխարհի տարբեր երկրներին։ Եթե անգամ Ռուսաստանը չի ցանկանում շարունակել այս մեխանիզմի գործարկումը, քանի որ կարծում է, որ չի ստանում այն նույն առավելությունները, որոնցից օգտվում են մյուսները, միևնույն է՝ մենք հաստատակամորեն շարունակելու ենք ջանքեր գործադրել մարդկությանը ծառայելու ուղղությամբ», - հայտարարում էր Էրդողանը։

Ռուսաստանը պատրաստակամություն է հայտնել շարունակել երկխոսությունը Թուրքիայի և ՄԱԿ-ի հետ հացահատիկի գործարքի հարցերի շուրջ:

ՄԱԿ-ի, Թուրքիայի և Ուկրաինայի պատվիրակությունները հաստատել են հոկտեմբերի 31-ին ծովային հումանիտար միջանցքով նախապես հայտարարված 14 նավերի փոխարեն 16-ի տեղաշարժի ժամանակացույցը։

Ստամբուլում տեղակայված համատեղ համակարգման կենտրոնի համաձայն՝ 6 նավեր սկսել են շարժվել Ուկրաինայի նավահանգիստներից, բայց դեռ չեն մտել հումանիտար միջանցք։

Ընդհանուր առմամբ, ուկրաինական նավահանգիստներում և հարակից ջրերում տեղաշարժվելու թույլտվության է սպասում 21 նավ՝ մոտ 700 հազար տոննա սննդամթերքի բեռով։

Այսօր առավոտյան Ռուսաստանը զանգվածային հարված է հասցրել Ուկրաինայի ողջ տարածքում, որոշ շրջաններում հարվածներ են հասցվել էներգետիկ օբյեկտներին: Ենթակառուցվածքների զանգվածային հրետակոծության պատճառով էլեկտրաէներգիայի վթարային անջատումներ են մտցվել, հաղորդում է Ուկրաինայի նախագահի գրասենյակը։

Yasno ընկերությունը հաստատել է հոսանքի հնարավոր անջատումները։

Կիևի քաղաքապետ Վիտալի Կլիչկոն ասել է, որ էներգետիկներն աշխատում են վերականգնել էլեկտրամատակարարումը քաղաքում մոտ 350 հազար բնակարան էլեկտրաէներգիայով ապահովող էլեկտրակայանի վնասումից հետո: Կլիչկոյի տեղեկություններով՝ Կիևի մի մասում դադարեցվել է կանոնավոր ջրամատակարարումը։

Խարկովում այսօր առավոտյան ևս երկու պայթյուն է որոտացել, հարվածների հետևանքով դադարեցվել է մետրոպոլիտենի աշխատանքը։ Խարկովի նահանգապետի տեղեկություններով քաղաքին հարվածները հասցվել են C-300 համակարգերով՝ հարևան Բելգորոդի մարզից։

Այսօր առավոտյան հարվածներ են հասցվել նաև Զապորոժիեի, Վիննիցայի, Կիրովոգրադի, Պոլտավայի և Դնեպրոպետրովսկի մարզերին։

Ուկրաինայում ԱՄՆ դեսպան Բրիջիթ Բրինքն ասել է, որ ինչպես միլիոնավոր ուկրաինացիներ՝ Կիևում ամերիկացի դիվանագետներն առավոտն անցկացնում են ապաստարանում։

«Ռուսաստանը շարունակում է իր անհոգի և բարբարոսական հրթիռային հարվածները Ուկրաինայի ժողովրդի դեմ՝ փորձելով երկիրը թողնել ցրտի և մթության մեջ ձմռան նախաշեմին», - գրել է դեսպանը Twitter-ում։

Աշնանային զորակոչի ընթացքում բանակը համալրած ժամկետային զինծառայողները Ռուսաստանին կցված ուկրաինական մարզերում չեն տեղակայվի և չեն մասնակցի այնտեղ ընթացող ռազմական գործողություններին։ Այս մասին հայտարարել է Ռուսաստանի Զինված ուժերի Գլխավոր շտաբի կազմակերպական-զորահավաքային վարչության պետ Եվգենի Բուրդինսկին։

Աշնանային զորակոչը Ռուսաստանում մեկնարկելու է վաղը՝ նոյեմբերի 1-ին։ Զորակոչի մեկնարկը հետաձգվել էր մեկ ամսով՝ սեպտեմբերի 21-ին հայտարարված պահեստայինների զորահավաքի ընթացքում զինկոմիսարիատների ծանրաբեռնվածության պատճառով։

Աշնանային զորակոչի ընթացքում նախատեսվում է շուրջ 120 հազար մարդ զորակոչել ռուսական բանակ։

Թուրքիայի Պաշտպանության նախարարը հայտարարել է, որ ուկրաինական հացահատիկի արտահանման շուրջ օգոստոսին ձեռք բերված պայմանավորվածությունների վերագործարկումը այսօր կքննարկի իր ռուս պաշտոնակից Սերգեյ Շոյգուի հետ։

«Ռուսական նավերի ռմբակոծության հետ կապված բանավեճ կա, ինչի արդյունքում Ռուսաստանը գործարքի իրականացումը դադարեցնելու որոշում է կայացրել։ Այդ պատճառով նավերի տարացնումն ու ստուգումը հետաձգվել է։ Այս ամենի հետևանքով Բոսֆորի ծոցում նավերի լուրջ կուտակումներ են առկա։ Այս բոլոր հարցերը այսօր երեկոյան ես կքննարկեմ պարոն Շոյգուի հետ՝ պատմելով նրան ստեղծված իրավիճակի մասին», -հայտարարել է Հուլուսի Աքարը։

Ռուս զինվորականները գիշերը կամիկաձե անօդաչու սարքերով հարվածել են Պոլտավային, Դնեպրին և Նիկոլաևին, հայտնում են Ուկրաինայի իշխանությունները։

Կան ավերածություններ, տուժածների մասին դեռ տեղեկություններ չկան։

ՌԴ պաշտպանության նախարարությունն այս կապակցությամբ դեռ մեկնաբանություններ չի արել:

«Նովոստի Նիկոլաևը» Telegram ալիքը հրապարակել է այս գիշեր հրթիռակոծությունից ավերածությունների լուսանկարները։

Ըստ հաղորդագրության՝ հարված է հասցվել բնակելի թաղամասում, նաև քաղաքի կենտրոնում գտնվող ուսումնական հաստոտություններից մեկին։ «Փրկարարները տեղում աշխատում են»,- գրում է «Նովոստի Նիկոլաևը»։

Ռուսաստանում զորահավաքի պաշտոնական ավարտից անմիջապես հետո երեկվանից մեկնարկել է աշնանային զորակոչը, որի ընթացքում նախատեսվում է շուրջ 120 հազար մարդ զորակոչել ռուսական բանակ։

Ռուսաստանի Գլխավոր շտաբը նախօրեին հայտարարել էր, որ զինվորական ծառայության զորակոչված քաղաքացիները չեն ուղարկվի Ռուսաստանին բռնակցված ուկրաինական շրջաններ։ Այդուհանդերձ, զինծառայության գործող կանոնակարգը թույլ է տալիս զորակոչից չորս ամիս անց զինծառայողին ուղարկել հակամարտության գոտի։

Ռուսական ուժերի զանգվածային հարվածների հետևանքով խաթարված ջրի և էլեկտրաէներգիայի մատակարարումը Կիևում ամբողջությամբ վերականգնվել է, հայտարարել է քաղաքապետ Վիտալի Կլիչկոն։

Հոկտեմբերի 31-ին ռուսական ուժերը կրկին հրթիռակոծության են ենթարկել Ուկրաինայի մի շարք բնակավայրեր, ինչի հետևանքով Խարկովում, Զապորոժիեում, Կիևի մարզում, Բուկովինայում, Կիրովոգրադի և Չերկասիի մարզերում վնասվել են կարևորագույն, այդ թվում՝ էներգետիկ ենթակառուցվածքներ։