Պատերազմ Ուկրաինայում (լայվ բլոգ, թարմացվող)

CNN ամերիկյան հեռուստատեսության հաղորդագրության համաձայն, Իրանը պատրաստվում է Ռուսաստան ուղարկել մոտ հազար միավոր զենք:

CNN-ը վկայակոչում է «արևմտյան երկրներից մեկի անանուն պաշտոնական ներկայացուցչին», ով ասել է, որ Թեհրանը Մոսկվային կարող է փոխանցել «երկիր-երկիր» տեսակի կարճ հեռահարության բալիստիկ հրթիռներ և հարվածային ԱԹՍ-ներ:

Ռուսաստանին Իրանի փոխանցած սպառազենի վերջին խմբաքանակը ներառել է մոտ 450 ԱԹՍ-ներ:

Ռուսաստանն այդ անօդաչուներով հարվածներ է հասցրել Ուկրաինայի քաղաքացիական ենթակառուցվածքին, գրոհների ընթացքում նաև խաղաղ բնակիչներ են զոհվել:

CNN-ի փոխանցմամբ, այդ սպառազենը մինչև տարեվերջ պետք է հասնի Ռուսաստան:

Կիևում ենթադրում են, որ Ռուսաստանն Ուկրաինայի հյուսիսային սահմանի մոտ կտեղակայի իրանական բալիստիկ հրթիռները: Դրանք տեխնիկական չափորոշիչներով մոտ են ռուսական «Իսկանդեր-Մ» հրթիռներին:

Խերսոնի մարզը զավթած ռուսների տեղական վարչակազմը հայտնել է Կախովսկի շրջանի խաղաղ բնակիչներին նոյեմբերի 6-ից պարտադիր տարհանելու մասին: Ռուսական վարչակազմը դա պատճառաբանում է ռազմական վտանգով:

Ռուսների վարչակազմի այդ հայտարարությունը տարածել է տեղական Տելեգրամ ալիքը:

«Բոլոր բնակիչներին: Անհապաղ լքել բնակավայրը: Կա ռազմական վտանգի բարձր հավանականություն: Տարհանումն իրականացվում է ավտոմոբիլային տրանսպորտով: Գնացեք տարհանման կետեր: Ձեզ հետ վերցրեք փաստաթղթերը, փող, արժեքավոր իրերը և տաք հագուստ: Շրջանում մնացող բնակիչների նկատմամբ նոյեմբերի 6-ից կկիրառվեն հարկադիր տարհանման միջոցներ»,- ասվում է հրամանագրում:

Թուրքիայի դրոշով նավերը կկարողանան առանց որևէ խնդրի շարունակել հացահատիկի արտահանումն ուկրաինական նավահանգիստներից՝ չնայած Ռուսաստանի մասնակցության կասեցմանը, ասել է Թուրքիայի պաշտպանության նախարարը:

Հուլուսի Աքարը նաև հույս է հայտնել, որ կողմերը կկարողանան պայմանավորվել հացահատիկի վերաբերյալ համաձայնագրի կատարման շուրջ ամբողջ ծավալով:

Ուկրաինայի ենթակառուցվածքների նախարար Ալեքսանդր Կուբրակովոնն էլ հայտարարել է, որ նոյեմբերի 3-ին, մեկօրյա դադարից հետո, ուկրաինական գյուղատնտեսական մթերքներով բեռնված նավերի տեղաշարժը կվերսկսվի։ Վաղը միջանցքով անցնելու է 8 նավ։ «Մենք ստացել ենք հաստատում ՄԱԿ-ից»,- հավելել է նախարարը։

Շաբաթ օրը Ռուսաստանը հայտարարեց Թուրքիայի, Ուկրաինայի և ՄԱԿ-ի հետ կնքած հացահատիկի գործարքը կասեցնելու մասին։ Կրեմլը պնդում է, որ այլևս չի կարող երաշխավորել Ուկրաինայից նավերի անվտանգ անցումը Սև ծովով՝ դա բացատրելով Սևաստոպոլում Սևծովյան նավատորմի նավերի վրա հարձակմամբ։

Միացյալ Նահանգների Պետդեպարտամենտը հայտարարել է, որ Կալիֆորնիայի Tetra Tech ընկերության հետ 46,7 միլիոն դոլարի պայմանագիր է կնքել Ուկրաինային ականազերծման հարցում օգնելու համար։

Պետդեպարտամենտը նշում է, որ Tetra Tech-ը ուկրաինացի սակրավորների թիմերին կպատրաստի միջազգային չափանիշներին համապատասխան և նրանց կտրամադրի անհրաժեշտ սարքավորումներ։

«Այս նախագիծը 91,5 միլիոն դոլար արժողությամբ աջակցության ծրագրի մի մասն է, որը նախատեսված է հաջորդ տարվա համար: Այս ծրագրի շրջանակում Պետդեպարտամենտը կօգնի Ուկրաինայի իշխանություններին հաղթահարել հումանիտար խնդիրը», - ասվում է Պետքարտուղարության հայտարարության մեջ։

Միացյալ Նահանգները ենթադրում է, որ Հյուսիսային Կորեան գաղտնի խողովակներով զենք ու զինամթերք է տրամադրում Ռուսաստանին:

Այդ մասին հայտնել է CNN ամերիկյան հեռուստակայանը, որը վկայակոչում է ամերիկյան հետախուզության ծառայողներին և նախագահ Ջո Բայդենի աշխատակազմի պաշտոնյաներին:

Ըստ ամերիկացի հետախույզների, Հյուսիսային Կորեան փորձում է այնպես ներկայացնել, թե սպառազենն, իբր, ուղարկվում է Մերձավոր Արևելք և Հյուսիսային Աֆրիկա, բայց իրականում այն փոխադրվում է Ռուսաստան:

Սեպտեմբերին ամերիկյան հետախուզությունը հաղորդել է, որ Հյուսիսային Կորեան հրետանու արկեր և չկառավարվող հրթիռներ է վաճառել Ռուսաստանին:

Մոսկվան և Փհենյանը չեն մեկնաբանում զենքի մատակարարման գործարքների մասին տեղեկությունները:

Ըստ Արևմուտքի փորձագետների, ռուս-ուկրաինական պատերազմի հետևանքով Ռուսաստանում զենքի և զինամթերքի պակաս է առաջացել:

Հյուսիսային Կորեայի զինված ուժերի հրետանային խմբավորումն ամենախոշորներից մեկն է աշխարհում:

Հյուսիսկորեական հրետանու արկերի մեծ մասի տրամաչափը հիմնականում համընկնում է խորհրդային և ռուսական հրետանու արկերի տրամաչափին:

Ուկրաինայում սպանվել է ռազմական գործողություններին մասնակցող ևս մեկ վրացի։ Լևան Սախելաշվիլիի մահվան լուրը հաստատել է Վրաստանի արտգործնախարարությունը։

Գերատեսչությունը տեղեկացնում է, որ աշխատանքներ են տարվում նրա մարմինը հայրենիք հասցնելու ուղղությամբ:

Վրացական մի շարք աղբյուրների համաձայն՝ Ուկրաինայում՝ այդ երկրի զինված ուժերի կազմում պատերազմին մասնակցում են մի քանի հարյուր վրացի կամավորներ։ Ռազմական գործողությունների մեկնարկից ի վեր Ուկրաինայում սպանվել է 24 վրացի զինվոր։

Վրաստանի իշխանությունները փորձում են կանխել վրաց կամավորականների խմբերի Ուկրաինա մեկնումը։ Ի պատասխան՝ նախագահ Վլադիմիր Զելենսկին պատերազմի մեկնարկից մի քանի օր անց հետ կանչեց Թբիլիսիում Ուկրաինայի դեսպանին՝ վրացական իշխանություններին քննադատելով Կիևին բավարար աջակցություն չցուցաբերելու համար։

Ռուսաստանը հայտնել է, որ վերադառնում է Սևծովյան նախաձեռնությանը, որն անվանում են նաև «հացահատիկի միջանցք»:

Թուրքիայի և ՄԱԿ-ի միջնորդությամբ հուլիսի 22-ին կնքված գործարքն ընձեռել է ռուսների կողմից արգելափակված նավահանգիստների պահեստներից հացահատիկ, եգիպտացորեն, բուսական յուղ և այլ մթերք արտահանելու հնարավորություն:

Հոկտեմբերի 29-ին Սևաստոպոլում անօդաչուների հարվածների են ենթարկվել Ռուաստանի Սևծովյան ռազմական նավատորմի, ինչպես նաև քաղաքացիական նավերը:

Ռուսաստանի դաշնային խորհրդի ղեկավար Վալենտինա Մատվիենկոն այսօր հայտարարել է, թե ուկրաինական բռնակցված տարածքները Ռուսաստանի կազմ մտցնելու հետ կապված բոլոր օրենսդրական միջոցառումներն արդեն ավարտվել են:

«Մենք ընդունել ենք Սահմանադրության փոփոխությունների վերաբերյալ անհրաժեշտ օրենքներ, և այժմ Դոնեցկի, Լուգանսկի հանրապետությունները, Խերսոնի և Զապորոժիեի շրջանները Ռուսաստանի Դաշնության լիիրավ սուբյեկտներ են: Մենք այժմ ունենք 89 տարածաշրջան», - ասել է նա:

Զուգահեռ, անցած 24 ժամվա ընթացքում ռուսական ուժերը ռմբակոծվել են Ուկրաինայի ավելի քան 25 բնակավայրեր։ Դրանց թվում են Կրամատորսկը, Նիկոլաևը, Պոլտավան, Նիկոլսկոյեն, Զապորոժիեի և Դոնեցկի շրջանները: Շարունակվում է նաև կենսական ենթակառուցվածքների ռմբակոծությունը՝ ձմռան շեմին ուկրաինացիներին զրկելով ջերմությունից, ջրից և լույսից։ Երկրում ամենուրեք հովհարային անջատումներ են։

Նախագահ Զելենսկին հայտարարել է, որ Ուկրաինայի էներգետիկ ենթակառուցվածքների 40%-ը ոչնչացվել է ռուսական հարվածների հետևանքով։

«Մենք ամեն ինչ անելու ենք այս ձմռանը մարդկանց էլեկտրաէներգիան և ջերմությունն ապահովելու համար: Բայց մենք պետք է հասկանանք, որ Ռուսաստանն էլ ամեն ինչ կանի ուկրաինացիների բնականոն կյանքը քանդելու համար», - ասել է նա:

Թուրքիայի նախագահ Ռեջեփ Թայիփ Էրդողանը նոյեմբերի 2-ի երեկոյան հեռախոսով զրուցել է իր ուկրաինացի պաշտոնակից Վլադիմիր Զելենսկու հետ:

Անկարայում Թուրքիայի նախագահի գրասենյակը տարածել է հաղորդագրություն, ըստ որի՝ Էրդողանը Զելենսկուն ասել է, թե անհրաժեշտ է գտնել ռուս - ուկրաինական հակամարտության՝ փոխըմբռնման վրա հիմնված արդար դիվանագիտական լուծում:

Այն, ըստ Թուրքիայի ղեկավարի, «պետք է ապահովի Ուկրաինայի տարածքային ամբողջականությունը և լիակատար ինքնիշխանությունը»:

Ուկրաինայի նախագահն իր Տելեգրամ ալիքում գրել է, որ զրույցի ընթացքում շնորհակալություն է հայտնել Էրդողանին «հացահատիկի գործարքի» պահպանմանն ուղղված ակտիվ ջանքերի համար, նաև քննարկել է ուկրաինացի ռազմագերիների փոխանակման հարցը:

Երեկ ՄԱԿ-ի Անվտանգության խորհուրդը չի ընդունել Ռուսաստանի բանաձևի նախագիծը «Ուկրաինայում ԱՄՆ կենսալաբորատորիաների գործունեությունը» հետաքննող հանձնաժողով ստեղծելու մասին։

Նախագիծը չի ստացել պահանջվող 9 ձայնը` ՄԱԿ ԱԽ անդամ 15 երկրներից։ Կողմ են քվեարկել Ռուսաստանը և Չինաստանը։ ԱՄՆ-ը, Մեծ Բրիտանիան և Ֆրանսիան՝ դեմ, մյուս անդամ երկրները՝ ձեռնպահ։

Պաշտոնական Մոսկվան պնդում է, թե մասնավորապես «Ուկրաինայում Միացյալ Նահանգների գաղտնի լաբորատորիաները» կենսաբանական զենք են մշակում, ինչը Վաշինգտոնը և Կիևը կտրականապես հերքում են: