Պատերազմ Ուկրաինայում (լայվ բլոգ, թարմացվող)

Ուկրաինական զորքերը մտել են ամիսներ առաջ Ռուսաստանի կողմից օկուպացված Խերսոն։

«Սա ևս մեկ կարևոր հաղթանակ է, որ ընդգծում է, որ Ուկրաինան կհաղթի, ինչ էլ որ Ռուսաստանն ասի կամ անի», - «Թվիթեր»-ում գրել է արտգործնախարարը։

Դմիտրի Կուլեբան նաև տեսանյութ է տարածել, որտեղ երևում է՝ ինչպես են քաղաքի բնակիչները ապամոնտաժում ցուցանակը՝ «Ռուսաստանն այստեղ է ընդմիշտ» գրառմամբ։

Խերսոնից ռուսական զորքերի դուրսբերումից հետո Գենիչեսկը ժամանակավորապես կդառնա բռնակցված Խերսոնի շրջանի վարչական մայրաքաղաքը, այս մասին «ՌԻԱ Նովոստիին» հայտնել է Ռուսաստանի կողմից նշանակված կառավարության խոսնակ Ալեքսանդր Ֆոմինը։

«Այսօր Խերսոնի շրջանի ժամանակավոր վարչական մայրաքաղաքը Գենիչեսկն է, այնտեղ կենտրոնացած են իշխանության բոլոր հիմնական մարմինները»,- ասել է Ֆոմինը։

Փետրվարից ռուսական ուժերի կողմից օկուպացված Գենիչեսկը առողջարանային և նավահանգստային քաղաք է, որը գտնվում է Խերսոնի շրջանի հարավում՝ Ազովի ծովի ափին: Խերսոնն ու ուկրաինական երեք այլ շրջաններ Մոսկվան բռնակցել էր սեպտեմբերի վերջին, դրանից մեկ ամիս անց Ռուսաստանի պաշտպանության նախարարը հրահանգել էր դուրս բերել զորքերը։

Երեկ Կիևը հայտարարել է, որ ուկրաինացի զինվորականները արդեն Խերսոնում են, քաղաքում բարձրացվել է ուկրաինական դրոշը։

Պաշտոնական Մոսկվան ԱՄՆ ևս 200 քաղաքացու նկատմամբ Ռուսաստան մուտքի արգելք է սահմանել, այս մասին տեղեկացնում է ՌԴ արտգործնախարարության մամլո ծառայությունը։

Ռուսաստանյան «սև ցուցակում» ներառվել են ամերիկյան իշխանությունների և օրենսդիրների ներկայացուցիչներ, ինչպես նաև նրանց մերձավոր ազգականները, ռազմարդյունաբերական ոլորտի ղեկավար պաշտոնյաներ, փորձագետներ։

Նրանց թվում են նաև ԱՄՆ նախագահ Ջո Բայդենի երկու եղբայրներն ու քույրը, ԱՄՆ ազդեցիկ սենատոր Բոբ Մենենդեսի հայազգի կինը՝ Նադին Արսլանյանը։ Ռուսաստանի իշխանությունները պնդում են, որ նրանք «աջակցում են Կիևի ռեժիմին և ռուսաֆոբ քարոզարշավին»։

Ուկրաինայի արտգործնախարար Դմիտրի Կուլեբան, ելույթ ունենալով Կամբոջայում Հարավարևելյան Ասիայի գագաթնաժողովում, հայտարարել է, որ Ուկրաինայի ազատագրման համար պայքարը շարունակվելու է։

«Մենք հաղթում ենք մարտերում: Բայց պատերազմը շարունակվում է», - ասել է Կուլեբան։

Ուկրաինացի պաշտոնյայի խոսքերով՝ Ռուսաստանի արտգործնախարար Սերգեյ Լավրովն իրեն չի խնդրել հանդիպել գագաթնաժողովի շրջանակներում։

«Եթե դիմի, մենք մանրակրկիտ կքննարկենք խնդրանքը»,- շեշտել է ուկրաինական դիվանագիտության ղեկավարը՝ հավելելով, որ այդ դեպքում պետք է բարեխղճորեն մոտենա բանակցություններին։

«Չկա որևէ նշան, որ Ռուսաստանը անկեղծորեն բանակցություններ է վարում»,- ասել է Կուլեբան։

«Սեղանի շուրջ նստենք գեղեցիկ լուսանկարի համար. դա արդեն եղել է, մենք դա արել ենք, մենք դա էլ ենք փորձել », - ավելացրել է Ուկրաինայի արտգործնախարարը:

ՌԴ նախագահ Վլադիմիր Պուտինն առաջարկում է «բանակի մասին կեղծ լուրեր» տարածելու համար զրկել ձեռք բերված քաղաքացիությունից:

Նա առաջարկել է լրացնել Քրեական օրենսգրքի այն հոդվածներում, որոնց պատիժը կարող է հիմք հանդիսանալ ձեռք բերված քաղաքացիությունից զրկելու համար։ Ռուսաստանի ղեկավարը համապատասխան ուղղումներ է կատարել ՌԴ քաղաքացիության մասին օրենքի նախագծում, փոխանցում է «ՌԻԱ Նովոստին»՝ վկայակոչելով փաստաթղթի տեքստը։

Այժմ ձեռք բերված քաղաքացիությունից զրկելու հիմք կարող է հանդիսանալ միայն ահաբեկչությանն ու ծայրահեղականությանը վերաբերող մի շարք հոդվածների պատիժը։ Սակայն 2021-ի վերջին Պուտինը օրինագիծ է ներկայացրել՝ ընդլայնելու դավաճանության, թմրամիջոցների ապօրինի շրջանառության և անկարգություններ կազմակերպելու մասին հոդվածների ցանկը։ Այս տարվա ապրիլին այն առաջին ընթերցմամբ ընդունվել է։

Երկրորդ ընթերցմամբ Վլադիմիր Պուտինն առաջարկել է ցուցակում ավելացնել մասնակցությունը «անցանկալի կազմակերպության աշխատանքին», տարածքային ամբողջականության խախտման կոչերի և «բանակի մասին կեղծ լուրերի» տարածման մասին հոդվածը։

Օրինագիծը ներկայումս քննարկում է Պետդուման:

Ուկրաինական երկաթուղիները սկսել են գնացքի տոմսերի վաճառքը «Կիևից առաջին երեք չվերթների համար» դեպի հինգ քաղաքներ՝ Խերսոն, Մարիուպոլ, Դոնեցկ, Լուգանսկ և Սիմֆերոպոլ: Այս մասին հայտնում է «Ուկրզալիզնիցայի» պաշտոնական տելեգրամյան ալիքը։

Նշվում է, որ տոմսերն առայժմ խորհրդանշական բնույթ ունեն, սակայն «երթևեկությունը վերսկսելուն պես երկաթուղին հաղորդագրություն կուղարկի գնացքի մեկնման ամսաթվի և վայրի մասին»:

Նշվում է նաև, որ տոմսերի վաճառքից ստացված հասույթը փոխանցվելու է վագոնների ձեռքբերմանը։

«Մեծ հաճույք է սկսել այս նախագիծը՝ իմանալով, որ մոտ ապագայում հասանելի կլինեն Կիև-Խերսոն տոմսերը», - նշել է ընկերությունը:

Միացյալ Նահանգները նոր պատժամիջոցներ կսահմանի անհատների և ընկերությունների անդրազգային ցանցի նկատմամբ, որոնք ներգրավված են եղել Ռուսաստանի համար Ուկրաինայում ռազմական գործողությունների շարունակմանը նպաստող ռազմական տեխնոլոգիաների գնման և մատակարարման մեջ:

ԱՄՆ ֆինանսների նախարար Ջանեթ Ելենը Բալիում Մեծ քսանյակի (G20) գագաթնաժողովի շրջանակում լրագրողներին ասել է նաև, որ պատժամիջոցները կվերաբերեն 14 մարդու և 28 կազմակերպության, այդ թվում՝ ֆինանսական միջնորդների, սակայն հրաժարվել է ավելի շատ մանրամասներ հաղորդել: Վաշինգտոնը նախատեսում է այդ մասին հայտնել նոյեմբերի 14-ին, ասել է նա։

«Սա մեր զանգվածային ջանքերի մի մասն է՝ հակազդելու ռուսական ռազմական գործողություններին և դադարեցնելու հասանելիությունը հիմնական սարքավորումներին՝ պատժամիջոցների և արտահանման վերահսկողության միջոցով», - ասել է Ելենը լրագրողներին:

Խերսոնի բնակիչները մեծ ոգևորությամբ ողջունում են քաղաքը Կիևի հսկողության տակ վերադարձրած ուկրաինացի զինծառայողներին:

Մինչդեռ, նախագահ Վլադիմիր Զելենսկին հայտարարել է, թե կան մեծ թվով փաստեր, որոնք վկայում են Խերսոնում ռուսների պատերազմի հանցագործությունների մասին: Դրանց թիվը մի քանի հարյուրի է հասնում:

«Քննիչներն արդեն փաստագրել են ռուսների կողմից ավելի քան 400 պատերազմական հանցագործություններ, հայտնաբերվել են զինծառայողների և խաղաղ բնակիչների մարմիններ: Խերսոնի շրջանում ռուսներից հետո մնացել են այն նույն բարբարոսության հետքերը, որոնք տեսել ենք երկրի այլ շրջաններում: Մենք կգտնենք և պատասխանատվության կենթարկենք յուրաքանչյուր մարդասպանին», - ասել է Զելենսկին:

Խերսոնում կամավորները մարդասիրական օգնություն են բաժանում ռուսների օկուպացիան վերապրած բնակիչներին:

Ուկրաինական իշխանությունները Խերսոնում երեկոյան ժամը 5-ից մինչև առավոտյան 8-ը պարետային ժամ են սահմանել: Ռուսները շարունակում են ռմբահարել և հրթիռակոծել Ուկրաինայի բնակավայրերը:

Ռուսաստանի Դաշնության արտաքին գործերի նախարարի տեղակալ Ալեքսանդր Գրուշկոն այսօր ասել է, թե Ուկրաինայի հետ բանակցելու համար զորքն այդ երկրից դուրս բերելու նախապայմանն անընդունելի է:

«Ինչպես նախագահ Վլադիմիր Պուտինն է բազմիցս նշել՝ Մոսկվան պատրաստ է բանակցել, սակայն հարկ է հաշվի առնել գետնի վրա ստեղծված իրողությունները»,- հայտարարել է Գրուշկոն:

Մինչդեռ, Սերգեյ Լավրովի մյուս տեղակալը՝ Սերգեյ Ռյաբկովը, նոյեմբերի 11-ին ասել է, թե Մոսկվան պատրաստ է առանց նախապայմանների բանակցել Կիևի հետ:

Ուկրաինայի նախագահ Վլադիմիր Զելենսկին մի քանի առիթներով հայտարարել է, որ բանակցությունները հնարավոր կլինեն միայն այն դեպքում, եթե ռուսները հեռանան Ուկրաինայի միջազգայնորեն ճանաչված տարածքից, այդ թվում՝ Ղրիմի թերակղզուց:

The Wall Street Journal հանդեսը նոյեմբերի 13-ին հաղորդել է, որ Միացյալ Նահանգները Կիևին հորդորում է «կազմել բանակցային իրատեսական պահանջներ, այդ թվում՝ վերանայել Ղրիմի հարցում կարծր դիրքորոշումը»:

Պաշտոնական Վաշինգտոնը հավաստիացնում է, որ Ուկրաինայի վրա ոչ մի ճնշում չի բանեցնում: Նախագահ Ջո Բայդենը մի քանի անգամ ընդգծել է, որ խաղաղ կարգավորման պայմանները կախված են միայն Ուկրաինայից:

Ռուսաստանի և Ուկրաինայի պաշտոնյաների վերջին դեմ առ դեմ հանդիպումը տեղի է ունեցել Ստամբուլում մարտի 29-ին:

ՆԱՏՕ-ի գլխավոր քարտուղար Յենս Ստոլտենբերգն այսօր Հաագայում (Նիդերլանդներ) ասել է, որ միայն Ուկրաինան պետք է որոշի, թե որ պայմաններն են հարմար Ռուսաստանի հետ պատերազմն ավարտի շուրջ բանակցելու առումով:

Միաժամանակ նա ասել է, թե չնայած ռազմի դաշտում Ուկրաինայի գրանցած վերջին հաջողություններին՝ ոչ մի դեպքում չի կարելի թերագնահատել Ռուսաստանի ուժը:

«Ռուսաստանի հեռանալը Խերսոնից վկայում է ուկրաինական ուժերի անհավանական խիզախության մասին, բայց նաև հիշեցնում է, որ մենք պետք է շարունակենք օգնություն տրամադրել Ուկրաինային: Մենք չպետք է թույլ տանք Մոսկվայի ուժը թերագնահատելու սխալը: Ռուսաստանի Զինված ուժերն ունի նշանակալից կարողություններ և մեծ թվակազմ»,- ասել է Ստոլտենբեգրը:

Հյուսիսատլանտյան դաշինքի ղեկավարի խոսքով, պատերազմների մեծ մասն ի վերջո ավարտվում է բանակցային սեղանի շուրջ, սակայն բանակցող կողմերի դիրքերը վճռվում են ռազմի դաշտում:

Նրա փոխանցմամբ, Ուկրաինան ծանրագույն գին է վճարել թե՛ մարդկային կորուստների և թե՛ կրած վնասների առումով, այնպես որ «հենց ուկրաինացիները պետք է որոշեն, թե որ պայմանները կլինեն ընդունելի ռուսների հետ բանակցելու համար»: