Պատերազմ Ուկրաինայում (լայվ բլոգ, թարմացվող)

Մոսկվայի և Համայն Ռուսիո Պատրիարք Կիրիլը զայրացած է իր նկատմամբ սահմանված՝ Եվրոպական միություն այցելելու արգելքից:

«Ընդունվել է աննախադեպ վճիռ՝ Պատրիարքին չթողնել Եվրամիություն: Նման բան նույնիսկ «սառը պատերազմի» տարիներին չի եղել», - ասել է Ռուս ուղղափառ եկեղեցու հովիվը Արևելքի Ասորական եկեղեցու Կաթողիկոս-Պատրիարք Մար Ավա երրորդի հետ հանդիպման ընթացքում:

Պատրիարք Կիրիլը չի նշել, թե կոնկրետ ով և ինչ պատճառով է նրան արգելել այցելել Եվրամիություն:

Այս տարվա օգոստոսի 31-ին Գերմանիայի նախագահ Ֆրանկ-Վալտեր Շտայնմայերը խստորեն քննադատել է Պատրիարք Կիրիլին Ուկրաինայի դեմ Կրեմլի նախաձեռնած պատերազմին աջակցելու համար:

Դեռ հունիսի 23-ին Լիտվան արգելել է նրա այցերը: Պաշտոնական Վիլնյուսը հայտարարել է, որ Ռուսաց Պատրիարքը «Ուկրաինայի դեմ պատերազմի ամենաակտիվ ջատագովն է և Վլադիմիր Պուտինի մերձավոր գործընկերն է»:

Հետագայում նմանօրինակ որոշումներ են ընդունել Կանադան և Մեծ Բրիտանիան:

Սպիտակ տունը համաձայն է Լեհաստանի նախագահի գնահատականին, ով ասել է, որ պայթյունը երկրի արևելքում, ըստ երևույթին, եղել է ուկրաինական հակաօդային պաշտպանության հրթիռի ընկնելու հետևանք, սակայն դա չի վերացնում Ռուսաստանի պատասխանատվությունը, որը հրթիռներ է արձակել Ուկրաինայի քաղաքացիական բնակչության ենթակառուցվածքների վրա։ Այս մասին երեկ հայտարարել է Միացյալ Նահանգների Ազգային անվտանգության խորհրդի մամուլի քարտուղար Էդրիեն Ուոթսոնը։

Ուոթսոնի խոսքով՝ Միացյալ Նահանգները լիովին վստահում է Լեհաստանի կառավարության կողմից իրականացվող հետաքննությանը և շնորհակալություն է հայտնում Վարշավային՝ դրա վարմանը պրոֆեսիոնալ մոտեցում ցուցաբերելու համար։

Ըստ խոսնակի՝ ինչպիսին էլ լինեն վերջնական եզրակացությունները, «պարզ է, որ այս ողբերգական միջադեպի վերջնական պատասխանատու կողմը Ռուսաստանն է, որը զանգվածային հրթիռային հարձակում է իրականացնում Ուկրաինայի վրա՝ հատուկ քաղաքացիական ենթակառուցվածքներին հարվածելով»: «Ուկրաինան ունեցել է և ունի ինքնապաշտպանության իրավունք», - հայտարարել է Էդրիեն Ուոթսոնը։

Ուկրաինական լրատվամիջոցները հայտնում են Կիևում, Օդեսայում և Դնեպրում պայթյունների մասին՝ ամբողջ երկրում հայտարարված օդային հարձակման նախազգուշացումից հետո։

Ռուս զինվորականները հրթիռային հարված են հասցրել Օդեսայի մարզում գտնվող ենթակառուցվածքի օբյեկտին, ավելի ուշ հայտնել է տարածաշրջանային ռազմական վարչակազմի ղեկավար Մաքսիմ Մարչենկոն։

Ինչպես տեղեկացրել է Նիկոլաևի շրջանային ռազմական վարչակազմի ղեկավար Վիտալի Կիմը, առաջին հրթիռներն արձակվել են առավոտյան ժամը 8-ի սահմաններում։

ԱՄՆ-ի Զինված ուժերի շտաբերի պետերի միացյալ կոմիտեի նախագահ, բանակի գեներալ Մարկ Միլլին ասել է, որ Միացյալ Նահանգները մտադիր է շարունակել աջակցությունն Ուկրաինային, և դա կտևի այնքան, որքան անհրաժեշտ է:

Միլլին նշել է, թե մոտ ապագայում Ուկրաինայի լիակատար հաղթանակ ակնկալելու հիմքեր չկան, քանի որ Ռուսաստանը՝ չնայած ռազմի դաշտում վերջին ժամանակաշրջանի անհաջողություններին, այնուամենայնիվ Ուկրաինայի տարածքում տակավին ունի հզոր կարողություններ։

«Ռուսաստանը թեկուզ այսօր կարող է ավարտել պատերազմը, բայց չի ցանկանում: Նրանք ուզում են շարունակել պատերազմը, հասցնել մինչև ձմեռ, և մենք, Միացյալ Նահանգները, նախագահի ու պաշտպանության նախարարի ղեկավարմամբ կշարունակենք աջակցել Ուկրաինային այնքան, որքան անհրաժեշտ է այդ երկրի ազատությունը, ինքնիշխանությունը և տարածքային ամբողջականությունը երաշխավորելու համար»,- ասել է գեներալ Միլլին:

Նա նշել է, որ ռուսական կողմի հետ բանակցելու պայմանները պետք է ուկրաինացիներն ընտրեն:

Միացյալ Նահանգները և դաշնակիցները ՄԱԿ-ի Անվտանգության խորհրդում քննադատել են Ռուսաաստանին Ուկրաինայի տարածքը լայնածավալ հրթիռակոծման ենթարկելու համար: Նիստը գումարվել է Լեհաստանում ուկրաինական հակաօդային պաշտպանության հրթիռի ընկնելու հաջորդ օրը:

ՆԱՏՕ-ի երկրները, այդ թվում՝ Լեհաստանը, նշել են, որ ընկած հրթիռը հավանաբար արձակվել է ուկրաինական ՀՕՊ-ի կողմից, և դրա թիրախն են եղել Ուկրաինայի վրա ուղղված ռուսական հրթիռները: Միջադեպի հետևանքով Պշևոդուվ անվամբ լեհական փոքրիկ բնակավայրում երկու մարդ է զոհվել:

«Նշանակություն չունի, թե ինչն էր Պշևոդուվում միջադեպի պատճառը, խաղաղ մարդիկ չէին զոհվի, եթե չլիներ Ուկրաինայի դեմ Ռուսաստանի նախաձեռնած պատերազմը: Այդ անմեղ զոհերի միակ մեղքն այն էր, որ նրանք ապրել են ռուսների համար ռազմական թիրախ դարձած Ուկրաինայի քաղաքացիական ենթակառուցվածքի մոտակայքում», - նիստում աասել է ՄԱԿ-ում Լեհաստանի դեսպան Կշիշտոֆ Շչերսկին:

«Ուկրաինան իր համերաշխությունն է հայտնում եղբայրական Լեհաստանի ժողովրդին: Մենք կողմ ենք այդ ողբերգական միջադեպի ամբողջական և թափանցիկ հետաքննությանը», - հայտարարել է ՄԱԿ-ում Ուկրաիայի դեսպան Սերգեյ Կիսլիցյան:

«Մենք այլևս չենք զարմանում, երբ դուք, անտեսելով փաստերը և տարրական տրամաբանությունը, փորձում եք ամեն ինչում մեղադրել Ռուսաստանին», - ասել է ՄԱԿ-ում Ռուսաստանի դեսպան Վասիլի Նեբենզյան:

«Այս ողբերգությունը երբեք չէր պատահի, եթե չլիներ Ուկրաինայի վրա Ռուսաստանի անիմաստ հարձակումը և ուկրաինական քաղաքացիական ենթակառուցվածքի հրթիռակոծությունը», - հայտարարել է ՄԱԿ-ում Միացյալ Նահանգների դեսպան Լինդա Թոմաս-Գրինֆիլդը:

Ուկրաինայի ենթակառուցվածքների նախարարությունը հաղորդել է ուկրաինական նավահանգիստներում պահեստավորված հացահատիկի արտահանումը Սև ծովով ևս 120 օրով երկարաձգելու համաձայնության մասին:

«Որոշումը քիչ առաջ հաստատվել է Ստամբուլում: Նախաձեռնության երաշխավորներն են մնում ՄԱԿ-ը և Թուրքիան»,- Թվիթերի էջում գրել է նախարար Ալեքսանդր Կուբրակովը:

Նա հատուկ ընդգծել է գործարքի համաձայնեցման խնդրում Թուրքիայի պաշտպանության նախարար Հուլուսի Աքարի դերը:

«Թուրքիայի պաշտպանության նախարարը ևս մեկ կարևոր քայլ է արել համաշխարհային պարենային ճգնաժամը կանխելու համար»,- գրել է Կուբրակովը:

Նախարարի փոխանցմամբ, Ուկրաինան գործընկերներին պաշտոնապես դիմել է գործարքի ժամկետն առնվազն մեկ տարով երկարաձգելու և դրանում Նիկոլաևի նավահանգիստն ընդգրկելու առաջարկով:

Ուկրաինական հացահատիկն այսօրվա դրությամբ փոխադրվում է Օդեսայի, Յուժնիի և Չերնոմորսկի նավահանգիստներից: Չերկարաձգվելու դեպքում գործարքի ժամկետն այսօր սպառվելու էր:

Հացահատիկի գործարքի երկարաձգման լուրը հաստատել է ՄԱԿ-ի գլխավոր քարտուղար Անտոնիո Գուտերեշը:

«Ողջունում եմ Սևծովյան նախաձեռնությունը շարունակելու համաձայնությունը, որով հացահատիկը, պարենը և պարարտանյութը ծովով կարտահանվի անվտանգ ճանապարհով»,- հայտարարել Գուտերեշը:

Լուրը հաստատել է նաև Թուրքիայի նախագահ Ռեջեփ Թայիփ Էրդողանն, ով շնորհակալություն է հայտնել ոչ միայն Կիևին և ՄԱԿ-ին, այլև Մոսկվային:

«Ավելի քան 11 միլիոն տոննա հացահատիկի արտահանումն անցած չորս ամսում վկայում է համաշխարհային պարենային անվտանգության համար այդ նախաձեռնության կարևորության մասին»,- Թվիթերում գրել է Թուրքիայի ղեկավարը:

Ռուսաստանի Դաշնության նախագահ Վլադիմիր Պուտինի մամլո խոսնակ Դմիտրի Պեսկովն ասել է, թե «հրապարակային բանակցություններ» գոյություն չունեն: Նրա խոսքով, առաջարկելով այդօրինակ տարբերակը՝ Կիևը ցույց է տալիս, որ իրականում չի ցանկանում բանակցել:

«Դժվար է ընդհանրապես պատկերացնել հրապարակային բանակցությունները: Նման բանակցություններ չեն լինում, առավել ևս այդ բնագավառում: Միանշանակ է մեկ բան՝ ուկրաինական կողմը ոչ մի բանակցություն չի ուզում, ուստի, հատուկ ռազմական օպերացիան շարունակվում է, և դրա նպատակները պետք է իրականացվեն»,- ասել է Պեսկովը:

Իր մեկնաբանությամբ Կրեմլի խոսնակն արձագանքել է Ուկրաինայի նախագահ Վլադիմիր Զելենսկու երեկվա հայտարարությանն այն մասին, որ Ուկրաինայում պատերազմի ավարտի շուրջ ցանկացած հարց պետք է հրապարակավ քննարկվի: Զելենսկին այդ մասին խոսել է տեսաուղերձում, որով դիմել է Բալիում «Մեծ քսանի» գագաթնաժողովի մասնակիցներին:

Նա նշել է, թե «մի քանի պետությունների ղեկավարներից ստացել է որոշակի ազդակներ ռուսական կողմի հետ բանակցելու հնարավորության մասին»:

Վլադիմիր Զելենսկին այդ երկրների ներկայացուցիչներին ասել է, թե «Ռուսաստանն Ուկրաինայի դեմ վարում է լայնածավալ պատերազմ, հետևաբար, բոլոր բանակցությունները պետք է անցկացվեն, ոչ թե կուլիսների ետևում, այլ՝ հրապարակավ»:

Ուկրաինայի ներկայացուցիչները, հավանաբար, կստանան Լեհաստանում՝ Լյուբլինի մարզի Պշևոդուվ բնակավայրի տարածքում հրթիռի ընկնելու վայր այցելելու հնարավորություն: Միջադեպի հետևանքով երկու լեհ գյուղացի է զոհվել:

Լեհաստանի նախագահ Անջեյ Դուդան երեկ նշել է, որ համաձայնությունը կտրվի, եթե դրան հավանություն տան միջադեպի հանգամանքները քննող երկու երկրները՝ Լեհաստանը և Միացյալ Նահանգները:

«Նախագահ Անջեյ Դուդան առարկություններ չունի ուկրաինացի փորձագետների այցի վերաբերյալ, բայց դա որոշակի ընթացակարգ է ենթադրում և դաշնակիցների հետ համաձայնեցում»,- ասել է Լեհաստանի ազգային անվտանգության խորհրդի քարտուղար Յացեկ Սիևիերան:

Վարշավան հայտնել է, թե, ամենայն հավանականությամբ, Պշևոդուվ գյուղի ֆերմայի մոտ պայթել է ուկրաինական հակաօդային պաշտպանության Ս-300 տեսակի խորհրդային արտադրության հին հրթիռը, որի թիրախն են եղել Ուկրաինայի ուղղությամբ ռուսների արձակած հրթիռները:

Պաշտոնական Կիևը կրկին պնդում է, որ Ուկրաինայում փետրվարից ծավալված ռազմական գործողությունները կդադարեն միայն ռուսական զորքերի՝ երկրի բոլոր գրավյալ շրջաններից, այդ թվում՝ Ղրիմից դուրսբերման դեպքում։

Այս մասին Telegram-ի իր օգտահաշվում այսօր գրել է Ուկրաինայի նախագահի աշխատակազմի ղեկավար Անդրեյ Երմակը։

«Խաղաղություն կլինի միայն այն ժամանակ, երբ մենք ջախջախենք Ուկրաինայում գտնվող ռուսական բանակի ստորաբաժանումները և վերականգնենք 1991 թվականի սահմանները», - գրել է Երմակը։

Միացյալ Նահանգների Պաշտպանության նախարարության բարձրաստիճան ներկայացուցիչը պնդում է, որ Ռուսաստանը պատերազմի այս փուլում նպատակ ունի նվազեցնել ուկրաինական հակաօդային պաշտպանության համակարգի կարողությունները։

«Հրթիռային հարվածների ինտենսիվությունը մեծացնելով՝ ռուսները փորձում են գերծանրաբեռնել և հյուծել ուկրաինական ՀՕՊ համակարգը։ Նրանք հույս ունեն, որ այդ դեպքում ուկրաինացիները կսպառեն հակաօդային պաշտպանության համար նախատեսված հրթիռներ, ինչը ռուսներին հնարավորություն կտա Ուկրաինայի երկնքում գերակայության հասնել», - ամերիկացի լրագրողների հետ զրույցում հայտարարել է ԱՄՆ պաշտպանության փոխնախարար Քոլին Քալը։

Պենտագոնի ղեկավարի տեղակալի խոսքով՝ Վաշինգտոնում ռուսական կողմի այս մտադրության մասին տեղյակ են։