Պատերազմ Ուկրաինայում (լայվ բլոգ, թարմացվող)

Ռուսաստանի պաշտպանության նախարարությունը պնդում է, որ վերջին 24 ժամերի ընթացքում բանակային ստորաբաժանումները հարձակողական գործողություններ են ձեռնարկել Դոնեցկի մերձակայքում։

«Դոնեցկի հանրապետությունում իրականացված հարձակողական գործողությունների ընթացքում ռուսական զորքերին հաջողվել է 120 ուկրաինացի զինծառայող, երկու տանկ, երեք զրահամեքենա և յոթ ավտոմեքենա ոչնչացնել», - այսօր հայտարարել է Ռուսաստանի պաշտպանության նախարարության պաշտոնական ներկայացուցիչ գեներալ Իգոր Կոնաշենկովը։

Ռուսաստանի ՊՆ խոսնակը նաև տեղեկացրել է, որ ռուսական զորքերին հաջողվել է հետ մղել Լուգանսկի և Խարկովի ուղղություններում ձեռնարկված ուկրաինական հարձակումները, ինչպես նաև ոչնչացնել Խարկովի մարզում գտնվող 9 հրամանատարական կետեր, որոնց միջոցով ուկրաինական բանակը համակարգում էր ռազմական գործողությունների ընթացքը։

Այսօր կայացել է Ուկրաինայի և Թուրքիայի նախագահնել Վլադիմիր Զելենսկու և Ռեջեփ Թայիփ Էրդողանի հեռախոսազրույցը։

Թուրքիայի նախագահի աշխատակազմի փոխանցմամբ, զրույցի ընթացքում էրդողանն իր երախտագիտությունն է հայտնել Զելենսկուն՝ ուկրաինական գյուղմթերքի արտահանման գործարքի երկարաձգման շուրջ բանակցությունների ընթացքում ցուցաբերած կառուցողական մոտեցման համար։

Հիշատակելով հացահատիկի գործարքի և գերիների փոխանակման շուրջ բանակցությունների ընթացքում առկա փոխըմբռնումը՝ Էրդողանն ընդգծել է․ - «Այդ փոխըմբռնումը բանակցային ողջ գործընթացի, մասնավորաբար, հրադադարի կնքման վրա տարածելը կբխի բոլոր կողմերի շահերից»։

Ուկրաինան սկսել է Խերսոնի և Նիկոլաևի շրջանների ազատագրված շրջանների բնակիչների կամավոր տարհանումը։ Այս մասին Նիկոլաևում կայացած ճեպազրույցում հայտարարել են տեղի իշխանությունների ներկայացուցիչները:

Նրանց ներկայացմամբ՝ ժամանակավոր տեղափոխումը տեղի կունենա պետության հաշվին։

Ռուսական զորքերից ազատագրված շրջանների բնակիչներին առաջարկում են ժամանակավորապես մեկնել Կրիվոյ Ռոգ կամ Ուկրաինայի արևմտյան շրջաններ։ Դա պայմանավորված է զավթված տարածքներում, հատկապես ձմեռային պայմաններում, դժվար կենսապայմաններով, նշում են իշխանությունները։

Ատոմային էներգիայի միջազգային գործակալությունը (ԱԷՄԳ) հաղորդել է Զապորոժիեի ԱԷԿ-ի շրջանում ավելի քան տասը հզոր պայթյունների մասին: Դրանք տեղի են ունեցել երեկ երեկոյան և այսօր առավոտյան:

ԱԷՄԳ-ն նշել է, որ ԱԷԿ-ի առանցքային համակարգերը չեն վտանգվել: Տուժածների մասին տեղեկություններ չկան:

Ռուսաստանն այդ հրետանային հարվածների համար Ուկրաինային է մեղադրել: «Ռոսներգոատոմ» դաշնային գործակալությունը պնդում է, որ արկերից մեկը հարվածել է թարմ միջուկային վառելիքի պահեստավորման հատուկ շինության տանիքին:

Ուկրաինայի «Էներգոատոմը» պնդում է, որ ԱԷԿ-ը հրետակոծել են ռուսները, որոնց նպատակն է շարքից հանել 5-րդ և 6-րդ էներգաբլոկների վերագործարկման համար կարևոր նշանակություն ունեցող ենթակառուցվածքը:

Կիևը նշում է, որ ռուսական կողմը ցանկանում է այդպես ուկրաինացիներին զրկել ԱԷԿ-ի արտադրելիք էլեկտրաէներգիան օգտագործելու հնարավորությունից:

Ռուսական բանակը վերջին շաբաթների ընթացքում գրեթե ամեն օր հրթիռակոծում է Ուկրաինայի էլեկտրաէներգիայի և ջրի մատակարարման համակարգերը և ձմռան ամիսներին անտանելի պայմաններ է ստեղծում բնակչության համար:

Պաշտոնական Բեռլինը Վարշավային Patriot հակահրթիռային պաշտպանության համակարգեր է առաջարկել՝ օգնելու նրան պաշտպանել իր օդային տարածքը, հայտարարել է Գերմանիայի պաշտպանության նախարար Քրիստինա Լամբրեխտը։

Գերմանիայի կառավարությունն արդեն հայտարարել էր, որ անցած շաբաթ տեղի ունեցած միջադեպից հետո իր հարևանին կառաջարկի լրացուցիչ օգնություն օդային տարածքը պաշտպանելու համար:

«Մենք Լեհաստանին առաջարկել ենք հակաօդային պաշտպանության օգնություն՝ մեր Eurofighters և Patriot հակաօդային պաշտպանության համակարգերով», - ասել է Լամբրեխտը գերմանական թերթերին տված հարցազրույցում։

«Ազատության» ռուսական ծառայությունը՝ հղում անելով «Նովայա գազետա. Եվրոպա» պարբերականին, հաղորդում է, որ առնվազն 159 ռուսաստանցի երեխաներ կորցրել են մասնակի զորահավաքով Ուկրաինա ուղարկված իրենց հայրերին:

Հայրերից զրկվել են առնվազն 91 ընտանիքների զավակներ: Այդ ընտանիքներից 15-ը բազմազավակ են:

Սեպտեմբերի 21-ին նախագահ Վլադիմիր Պուտինի հայտարարած մասնակի զորահավաքից հետո Ուկրաինայում զոհվել է առնվազն 217 զորակոչված:

«Նովայա գազետա. Եվրոպա» պարբերականը վերլուծել է միայն բաց աղբյուրների հրապարակած տվյալները, հետևաբար, զոհերի իրական թիվը կարող է ավելի մեծ լինել:

Պարբերականը նշում է, որ Ուկրաինայում այդ զինծառայողների կյանքը ռազմաճակատ հասնելուց հետո միջինը տևել է 23.5 օր:

Պատերազմի գրեթե ինը ամիսների ընթացքում Ուկրաինայում զոհվել է 437 երեխա, ավելի քան 800-ը՝ վիրավորվել, հայտնում է երկրի գլխավոր դատախազությունը։

Նախագահ Զելենսկին էլ ասում է, թե այս ընթացքում Ռուսաստանը ավելի քան 4700 հրթիռ է արձակել Ուկրաինայի ուղղությամբ։ Հեռավար դիմելով Ֆրանկոֆոնիայի գագաթնաժողովի մասնակիցներին՝ Զելենսկին կրկին օգնություն է խնդրել միջազգային հանրությունից խաղաղության ուկրաինական բանաձևն իրագործելու համար։ Դա ենթադրում է, որ ռուսական զորքերը պետք է դուրս բերվեն ուկրաինական տարածքներից, այդ թվում՝ Ղրիմից. - «Այն բավականին կառուցողական է և իրատեսական, ի տարբերություն բանակցություններ վերսկսելու մասին ռուսական դատարկ և կեղծ հռետորաբանության։ Մենք ամեն ինչ կանենք, որպեսզի աշխարհը ընդունի խաղաղության ուկրաինական բանաձևը»։

Եթե ՆԱՏՕ-ի երկրները ցանկանում են, որ պատերազմին փոխարինեն բանակցությունները, ուրեմն պետք է շարունակել ռազմական աջակցությունը Կիևին, հայտարարել է ռազմական դաշինքի գլխավոր քարտուղարը։ Յենս Ստոլտենբերգի խոսքով, ինչ-որ փուլում բանակցություններ սկսվելու են, և այդ բանակցությունների արդյունքը կախված է լինելու ճակատում ստեղծված իրվիճակից. - «Այսպիսով, եթե մենք ցանկանում ենք Ուկրաինայի համար ընդունելի արդյունք, արդյունք, որը երաշխավորում է Ուկրաինայի ինքնիշխանությունը, անկախությունը և ժողովրդավարությունը, դրան հասնելու լավագույն միջոցը Ուկրաինային ռազմական աջակցություն տրամադրելն է»:

Ֆրանսիայի ռազմական գերատեսչության ղեկավար Սեբաստիան Լեքորնյուն իր հերթին Le Journal du Dimanche-ին ասել է, որ պատերազմը կավարտվի բանակցային սեղանի շուրջ, սակայն Ուկրաինա՛ն պետք է որոշի, թե երբ է բանակցութունները վերսկսելու ճիշտ ժամանակը. - «Այս պատերազմում կա ագրեսոր։ Եթե մենք հավատում ենք միջազգային իրավունքին և հարգում ենք սահմանները, ապա հարձակման ենթարկված պետությունն է որոշում բանակցությունների ժամանակացույցը։ Կգա մի պահ, երբ հարկ կլինի նստել բանակցային սեղանի շուրջ»։

ՆԱՏՕ-ի Խորհրդարանական վեհաժողովը (ԽՎ) դաշինքի անդամ երկրների կառավարություններին ու խորհրդարաններին կոչ է արել պաշտոնապես հայտարարել, որ «Ռուսաստանը ներկայիս ռեժիմի օրոք ահաբեկչական պետություն է»։ Համապատասխան բանաձևն ընդունվել է երեկ երեկոյան։

Երեկ Խորհրդարանական վեհաժողովի նախագահ ընտրված ֆրանսիացի սենատոր Ժոել Գարիո-Մայլամը հայտարարել է, որ միջազգային տրիբունալը պետք է դատի Ռուսաստանի ղեկավարությանը որպես ահաբեկիչների:

Ընտրությանը հաջորդած ելույթում միջազգային իրավունքի մասնագետ Ջոել Գարիո-Մայլամը շեշտել է. - «Ռուս առաջնորդները գործում են իրական ահաբեկիչների պես՝ ցուցադրելով աննախադեպ բարբարոսություն, հարձակվելով խաղաղ բնակչության և ենթակառուցվածքների վրա: Մենք պետք է գործենք, և նրանք պետք է դատվեն որպես ահաբեկիչներ միջազգային տրիբունալներում»:

Երեկ ընդունված բանաձևը նաև կոչ է անում ստեղծել միջազգային տրիբունալ Ուկրաինայում Ռուսաստանի ռազմական հանցագործությունները հետաքննելու համար:

ՆԱՏՕ-ի Խորհրդարանական վեհաժողովի ընդունած բանաձևն իրավական ուժ չունի, այն պարզապես կոչ է անդամ պետությունների կառավարություններին։

Վերջին ռմբակոծություններից հետո Զապորոժիեի ատոմակայանի ստուգման արդյունքների հիման վրա ՄԱԿ-ի Ատոմային էներգիայի միջազգային գործակալության (ԱԷՄԳ) փորձագետները միջուկային անվտանգությանն ուղղակի սպառնալիք չեն արձանագրել, ասվում է գործակալության ղեկավար Ռաֆայել Գրոսիի հայտարարությունում։

Գրոսիի խոսքով՝ ատոմակայանի տարածքում զգալի վնասներ են եղել, սակայն առանցքային սարքավորումները չեն տուժել, ճառագայթման արտահոսքի վտանգ չկա։

ԱԷՄԳ-ը շարունակում է պահանջել ատոմակայանում ստեղծել անվտանգության գոտի։ Ռուսական և ուկրաինական կողմերը ռմբակոծության մեջ միմյանց են մեղադրում:

Ուկրաինայի նախագահ Վլադիմիր Զելենսկին երեկ Ֆրանսիայի նախագահ Էմանյուել Մակրոնի հետ քննարկել է ատոմակայանում ստեղծված իրավիճակը։ Այս զրույցի մանրամասները չեն հրապարակվում։

Կրեմլը հայտնել է, որ Զապորոժիեի ատոմակայանի շուրջ անվտանգության գոտի ստեղծելու հարցով բանակցություններում էական առաջխաղացում չկա: Այդ մասին ասել է նախագահ Վլադիմիր Պուտինի խոսնակ Դմիտրի Պեսկովը:

Նրա փոխանցմամբ, հարկ է հասկանալ, թե ինչ է նշանակում «անվտանգության գոտի»: Հակամարտության առաջին փուլում, ըստ Պեսկովի, «Ուկրաինան Ռուսաստանին կոչ էր անում հեռացնել ծանր սպառազենը, որն այնտեղ չի էլ եղել»: «Դա հետո բոլորն են հակացել», - նշել է նա:

Ուստի, Պեսկովի խոսքով, անվտանգությանն անդրադառնալիս պետք է խոսել ատոմակայանի ուղղությամբ կրակ բացողների մասին:

«Ովքե՞ր են: Նրանք ուկրաինացի հրետանավորներն են, նրանց հեռանալն է պետք պահանջել, որ Ուկրաինան հեռացնի այնտեղից ծանր սպառազենը և դադարեցնի կրակը, դադարեցնի վտանգի ենթարկել ամբողջ Եվրոպայի մայրցամաքը»,- հայտարարել է Կրեմլի խոսնակը:

Ռուսները Զապորոժիեի ԱԷԿ-ը գրավել են Ուկրաինա ներխուժելու առաջին օրերին: Այդ ԱԷԿ-ն ամենախոշորն է Եվրոպայում: Դրա աշխատող անձնակազմն ուկրաինացիներ են:

ՄԱԿ-ի Ատոմային էներգիայի միջազգային գործակալությունը կողմերին կոչ է արել անհապաղ դադարեցնել մարտական գործողություններն ԱԷԿ-ի շրջանում, քանի որ դրանք կարող են միջազգային աննախադեպ ճգնաժամ առաջացնել: