- Հեղինակ՝ Արմեն Քոլոյան
Միացյալ Նահանգների գանձապետարանի քարտուղարը (ֆինանսների նախարարը) հայտնել է Կիևին 4 և կես միլիարդ դոլար տրամադրելու մասին: Այդ գումարն ուղղվելու է Ուկրաինայի պետական բյուջեին սատարելու նպատակով:
«Միացյալ Նահանգները շարունակում է հավատարիմ մնալ Ուկրաինային աջակցելու անսասան պարտավորությանը և դրամաշնորհի կարգով 4 ու կես միլիարդ դոլար է հատկացնում այդ երկրի պետական բյուջեին: Գումարի տրամադրումը կսկսվի առաջիկա շաբաթներին»,- ասել է նախարար Ջանեթ Յելենը:
Նրա համոզմամբ, այդ ֆինանսավորումը Կիևին թույլ կտա պահպանել տնտեսական կայունությունը, շարունակել հիմնական պետական ծառայությունների տրամադրումը, այդ թվում՝ աշխատավարձեր վճարել հիվանդանոցների, պետական հիմնարկների և կրթական հաստատությունների աշխատակիցներին և սոցիալական օգնություն ցույց տալ տարեցներին ու երկրի բնակչության խոցելի շերտերին:
- Հեղինակ՝ Արմեն Քոլոյան
«Ազատության» ռուսական ծառայությունը՝ վկայակոչելով «Մեդուզա» կայքի վերլուծությունը, հաղորդում է, որ Ռուսաստանում նկատվում է «հոգնածություն Ուկրաինայի դեմ պատերազմից»:
Ըստ «Մեդուզա»-ի, այդ են վկայում իշխանության պատվերով անցկացված սոցիոլոգիական փակ հարցումների արդյունքները:
«Մեդուզա»-ին այդ տեղեկությունները փոխանցել են Կրեմլին մոտ կանգնած անանուն աղբյուրները, որոնց համաձայն՝ «պատասխանները վկայում են, որ ռուսաստանցիները լավատեսորեն չեն տրամադրված թե՛ իրենց և թե՛ երկրի ապագայի հանդեպ»:
Կրեմլի պատվերով անցկացված փակ հարցումների արդյունքները հիմնականում համընկնում են բաց հարցումների արդյունքների հետ:
Russian Field անկախ սոցիոլոգիական ընկերությունը հոկտեմբերին անցկացրել է հարցում, որի արդյունքների համաձայն՝ հարցվածների միայն 19 տոկոսն է ակնկալում, որ կյանքը կբարելավվի, իսկ 57 տոկոսը խոստովանել է, որ «պատերազմի մասին նորությունները հոգնեցնում են»:
Հուլիսի վերջին այդպիսի պատասխան էր տվել հարցվածների մոտ 40 տոկոսը:
Անկախ փորձագետները նշում են նաև, որ պատերազմին ընդդիմացողների իրական թիվը կարող է շատ ավելի մեծ լինել, քանի որ այսօր Ռուսաստանում առկա լարված մթնոլորտում և վախի պայմաններում մեծ թվով հարցվածներ կարող են անկեղծ չպատասխանել հարցերին:
- Հեղինակ՝ Լուսինե Մուսայելյան
Եվրախորհրդարանը բանաձև է ընդունել, որով Ռուսաստանը ճանաչում է ահաբեկչության հովանավոր։ Եվրամիության օրենսդիր մարմնի ներկայացուցիչները հայտարարել են, որ հող են նախապատրաստում նախագահ Վլադիմիր Պուտինին և նրա կառավարությանը միջազգային տրիբունալ հասցնելու համար:
«Ռուսաստանի Դաշնության կողմից Ուկրաինայի խաղաղ բնակչության դեմ իրականացվող կանոնավոր հարձակումներն ու վայրագությունները, քաղաքացիական ենթակառուցվածքների ոչնչացումը և միջազգային մարդասիրական իրավունքի մյուս լուրջ խախտումները հավասար են Ուկրաինայի բնակչության դեմ ահաբեկչություններին և ռազմական հանցագործություններ են», - ասվում է փաստաթղթում։
Դրանում Ռուսաստանը ճանաչված է որպես պատերազմի ժամանակ ահաբեկչության մեթոդներ կիրառող երկիր։ Պարտադիր կատարման ուժ չունեցող փաստաթղթին կողմ են քվեարկել 494, ձեռնպահ՝ 44, դեմ՝ 58 պատգամավոր։
- Հեղինակ՝ Լուսինե Մուսայելյան
Ռուսաստանն այսօր հրթիռակոծել է Ուկրաինայի մի շարք քաղաքներ, պայթյուններ են արձանագրվել Կիևում, Կիևի մարզում, Վինիցայում, Լվովում, Օդեսայում, Պոլտավայի մարզում, հայտնում են տեղական իշխանությունները։
Հարվածների հետևանքով Կիևում անջատվել է էլեկտրականությունը, աշխատանքն է դադարեցրել ստորգետնյա տրանսպորտը, քաղաքը մնացել է նաև առանց ջրի։ Կիևի մարզում հրթիռներն ընկել են բնակելի շենքի և քաղաքացիական ենթակառուցվածքների վրա։ Լվովը ևս առանց հոսանքի է, քաղաքապետը զգուշացրել է նաև ջրի հնարավոր անջատումների մասին։ Օդեսայի շրջանային ռազմական վարչակազմի ղեկավար Մաքսիմ Մարչենկոն հայտնել է էներգետիկ կառույցներին հասցված զանգվածային հարվածների մասին, ինչի հետևանքով հոսանքազրկվել են սահմանակից Մոլդովայի մի շարք շրջաններ, այդ թվում՝ մայրաքաղաք Քիշնևը։
Ըստ ուկրաինական պաշտոնական աղբյուրների՝ նախնական տվյալներով հրթիռակոծության հետևանքով երեք մարդ զոհվել, վեցը վիրավորվել են։
- Հեղինակ՝ Արմեն Քոլոյան
Կիև-Պեչորյան մայրավանքում խուզարկություն իրականացնելու մասին լուրը մեծ աղմուկ է առաջացրել ուղղափառ աշխարհում ու հատկապես Ռուսաստանում:
Այդ ուղղափառ եկեղեցին համարվում է Ուկրաինայի կրոնական և մշակութային ամենակարևոր արժեքներից ու կենտրոններից մեկը: 1990 թվականին այն ՅՈւՆԵՍԿՕ-ի կողմից հռչակվել է «Համաշխարհային ժառանգություն»:
1051 թվականին հիմնադրված մայրավանքը Մոսկվայի Պատրիարքարանի հովանու ներքո գործող Ուկրաինայի Ուղղափառ եկեղեցու առաջնորդ մետրոպոլիտ Պավելի նստավայրն է:
Ուկրաինայի իրավապահների փոխանցմամբ, խուզարկության նպատակն էր «կասեցնել ռուսական հատուկ ծառայությունների դիվերսիոն գործողությունները և «ռուսաց աշխարհի» գաղափարախոսության տարածումը»:
Ռուսաստանում զայրույթով են արձագանքել լուրին, ասելով, որ «ուկրաինական կողմը հերթական հակառուսական սադրանքն է կազմակերպել»:
Մինչդեռ, երեկ ուկրաինացիները հայտնել են, որ հետաքննության ընթացքում մայրավանքի համալիրի տարածքում հայտնաբերել են «ռուսամետ գրականություն և միլիոնավոր գումարներ կանխիկ դրամով»:
Իրավապահները հրապարակել են ցանկը՝ «ավելի քան 2 միլիոն հրիվնա (Ուկրաինայի ազգային տարադրամը), 100 հազար ԱՄՆ դոլար և մի քանի հազար ռուսական ռուբլի»:
- Հեղինակ՝ Լիլիթ Հարությունյան
Ուկրաինայում ռուսական հրթիռային հարձակման հետևանքով հզոր պայթյունների հերթական շարքն է տեղի ունեցել։ Մի քանի շրջաններ միանգամից զրկվել են հոսանքից և ջրից:
Էներգետիկայի նախարարությունը հայտնել է, որ սպառողների ճնշող մեծամասնությունն ամբողջ երկրում մնացել է առանց էլեկտրականության:
Ուկրաինայի նախագահ Վլադիմիր Զելենսկին գիշերային ուղերձում նշել է, որ հրթիռային հարվածներից հետո ամենաբարդ իրավիճակը Կիևում է։
ՄԱԿ-ի Անվտանգության խորհուրդն այս կապակցությամբ շտապ հանդիպում է անցկացնում:
ՄԱԿ-ում Ռուսաստանի մշտական ներկայացուցիչ Վասիլի Նեբենզյան հայտարարել է, որ Ռուսաստանը հարձակվում է Ուկրաինայի ենթակառուցվածքային օբյեկտների վրա՝ ի պատասխան Կիևին արևմտյան զենք մատակարարելուն։
Նրա խոսքով, ուկրաինական բանակի մարտունակության խաթարումը «հատուկ ռազմական օպերացիայի» նպատակներից մեկն է. - «Եվ այն կիրականացվի ռազմական ճանապարհով, քանի դեռ Կիևի ռեժիմը չի ընդունել իրատեսական դիրքորոշում, որը թույլ կտա բանակցությունների շրջանակում քննարկել և փորձել լուծել այն խնդիրները, որոնք մեզ ստիպել են սկսել հատուկ ռազմական օպերացիան»։
- Հեղինակ՝ Գեւորգ Ստամբոլցյան
Ուկրաինայի իշխանությունների տեղեկություններով՝ ռուսական բանակի կողմից երկրի էներգետիկ ենթակառույցներին նախօրեին հասցված զանգվածային հարվածներից հետո մայրաքաղաք Կիևի տարածքի 70 տոկոսը շարունակում է հոսանքազրկված մնալ։ Այդ մասին այսօր տեղեկացրել է Կիևի քաղաքապետ Վիտալի Կլիչկոն։
Կիևի քաղաքապետը նաև տեղեկացրել է, որ մասամբ հնարավոր է եղել վերականգնել քաղաքի ջրամատակարարումը։ «Առավոտյան ջրամատակարարումն ամբողջությամբ վերականգնվել է Կիևի այն հատվածում,որ գտնվում է Դնեպրի ձախ ափին։ Մայրաքաղաքի մյուս հատվածներում ջրամատակարարումը կվերականգնվի օրվա ընթացքում», - նշել է Կլիչկոն։
Ուկրաինայի էներգետիկայի նախարարության տեղեկություններով՝ չորեքշաբթի երեկոյան հաջողվել է վերականգնել Լվովի էներգամատակարարումը։ «Դնեպրոպետրովսկի, Խարկովի և Օդեսայի մարզերի մի շարք շրջաններ, սակայն, շարունակում են հոսանքազրկված մնալ, իրադրությունը բավական բարդ է», - հաղորդել է Ուկրաինայի էներգետիկայի նախարարությունը։ Գերատեսչության պաշտոնյաները, այդուհանդերձ, հույս ունեն, որ իրադրությունը կբարելավվի օրվա ընթացքում, երբ երկրի միասնական էներգահամակարգին կրկին միացվեն Ռովնոյի, Խմելնիցկու և Հարավուկրաինական ատոմակայանները
Ուկրաինական աղբյուրների պնդմամբ՝ էներգետիկ ենթակառույցներին հասցվող ռուսական հարվածների հետևանքով հոկտեմբերի 10-ից ի վեր տուժել է դրանց մոտ 50 տոկոսը։
- Հեղինակ՝ Գեւորգ Ստամբոլցյան
«Եթե Ուկրաինայում չեն ցանկանում, որ շարունակվեն ահռելի մարդկային կորուստներ գրանցվել, պետք է վերջ տան պատերազմին», - Երևանում կայացած ՀԱՊԿ գագաթնաժողովի ավարտին ռուսաստանցի լրագրողների հետ զրույցի ժամանակ նման հայտարարությամբ է հանդես եկել Բելառուսի նախագահ Ալեքսանդր Լուկաշենկոն։
«Դա շատ դժվար, բարդ, ծանր գործ է, սակայն դա պետք է արվի, եթե Ուկրաինան վերականգնվելու նպատակ ունի։ Այս ամենին հաջորդելու է Ուկրաինայի ամբողջական ոչնչացումը», - ասել է նա՝ պնդելով, թե «այժմ ամեն ինչ Ուկրաինայի ձեռքում է»։
- Հեղինակ՝ Գեւորգ Ստամբոլցյան
Ռուսաստանի Անվտանգության դաշնային ծառայությունը (ФСБ) այսօր հայտարարել է Սև ծովի հատակով անցնող «Հարավային հոսք» գազատարի դեմ դիվերսիոն հարձակումը կանխելու մասին։
Գերատեսչության պնդմամբ՝ դեպի Թուրքիա և Եվրոպա գազ մատակարարող խողովակաշարի պայթեցումը ծրագրել էին ուկրաինական հատուկ ծառայությունները։
«Հետաքննության ընթացքում ձերբակալվել են Ռուսաստանի մի շարք քաղաքացիներ, որոնք առնչություն ունեին բուն ահաբեկչական հարձակման նախապատրաստման, ինչպես նաև դրա ռեսուրսային ապահովման հետ», - հաղորդում է Ռուսաստանի Անվտանգության դաշնային ծառայությունը:
Ռուսաստանցի իրավապահները նաև տեղեկացրել են, որ կասկածյալների մոտ իրականացված խուզարկությունների ընթացքում չորս ական, ինչպես նաև կապի միջոցներ են հայտնաբերվել։
- Հեղինակ՝ Գեւորգ Ստամբոլցյան
Եվրամիությունը (ԵՄ) պատրաստվում է նոր պատժամիջոցներ սահմանել Ռուսաստանի դեմ։ Պատժամիջոցների նոր փաթեթի մշակման մասին այսօր Հելսինկի կատարած այցի ընթացքում հայտարարել է Եվրահանձնաժողովի նախագահ Ուրսուլա ֆոն դեր Լայենը։
Նրա խոսքով՝ պատժամիջոցների առանցքային կետը լինելու է միջազգային շուկայում վաճառվող ռուսական նավթի առավելագույն գնի սահմանումը։
«Ես վստահ եմ, որ շուտով «Մեծ յոթնյակի» և մյուս առաջատար գործընկերների հետ միասին մենք կհաստատենք ռուսական նավթի առավելագույն գին սահմանելու առաջարկը։ Մենք չենք հանդարտվի այնքան ժամանակ, քանի դեռ Ուկրաինան չի հաղթել Պուտինի կողմից իրեն պարտադրված անօրինական և բարբարոս պատերազմում», - հայտարարել է Եվրահանձնաժողովի նախագահը։
Մոսկվան արդեն իսկ արձագանքել է ԵՄ-ի այս մտադրությանը՝ հայտարարելով, որ ռուսական նավթի առավելագույն գնի սահմանումը Բրյուսելի համար ինքնանպատակ է դարձել։
«Դժվար է կանխատեսել, թե այդ քայլը ինչպես կազդի միջազգային էներգետիկ շուկայի վրա։ Ամեն դեպքում, մենք շարունակում ենք մնալ այն տեսակետին, որ նախկինում հնչեցրել է Ռուսաստանի նախագահը։ Դրա համաձայն՝ Ռուսաստանը նավթ և գազ չի վաճառի այն երկրներին, որոնք ռուսական վառելիքի առավելագույն գին կսահմանեն», - հայտարարել է Կրեմլի խոսնակ Դմիտրի Պեսկովը։