Պատերազմ Ուկրաինայում (լայվ բլոգ, թարմացվող)

Ուկրաինան և Ռուսաստանը 50-50 սկզբունքով ռազմագերիների փոխանակում են կատարել: Այդ մասին առաջինը հայտնել է Ուկրաինայի նախագահ Վլադիմիր Զելենսկու աշխատակազմի ղեկավար Անդրեյ Երմակը:

Նրա փոխանցմամբ, Ուկրաինան վերադարձրել է 2 սպաների և 48 շարքայինների ու սերժանտների:

«Կարևոր է, որ մենք կարողացանք վերադարձնել Մարիուպոլի 19 պաշտպաններին, դրանից զատ տուն են վերադարձել Չերնոբիլի ԱԷԿ-ի տարածքից 15 գերիներ և 7 գերիներ Զմեինի կղզուց»,- ասել է Երմակը:

Ռուսաստանի պաշտպանության նախարարությունը հաստատել է 50 գերիներին վերադարձնելու փաստը: Ըստ գերատեսչության, «այդ գերիներին մահացու վտանգ էր սպառնում»:

Անցած անգամ կողմերը 35-ական ռազմագերի են փոխանակել, իսկ ավելի վաղ դա արել են 107-107 սկզբունքով:

Բելառուսի նախագահ Ալեքսանդր Լուկաշենկոն ասել է, որ եթե իր երկիրը հարձակման ենթարկվի, Մինսկը չի դիմի ՀԱՊԿ-ին, բայց առաջարկված օգնությունից չի հրաժարվի:

«Մենք, եթե Աստված մի արասցե, ներխուժում լինի, իհարկե, երբեք դեմ չենք լինի, որ օգնեն, բայց, կարծում եմ, ՀԱՊԿ-ին դիմելուն չի հասնի: Չեք էլ պատկերացնում, թե ինչպես կպատասխանենք», - ասել է Լուկաշենկոն OHT հեռուստատեսության թղթակցի հետ զրույցում:

Ավելի վաղ նա հայտարարել է, թե ներխուժման պարագայում Բելառուսի պատասխանից «ոչ միայն Եվրոպան կդողա»:

Նա ընդգծել է, որ հարկ եղած դեպքում կարող է գործադրվել նաև ռուս-բելառուսական համատեղ ռազմական խմբավորումը:

Ուկրաինայի նախագահ Վլադիմիր Զելենսկին անցած գիշեր տեսաուղերձում ասել է, որ ռուսների հրթիռակոծությունների հետևանքով շարքից դուրս եկած հոսանքի, ջրի և կապի համակարգերի աշխատանքն աստիճանաբար վերականգնվում է:

Ռուսական կողմը հոկտեմբերից սկսած թիրախավորում է Ուկրաինայի քաղաքացիական ենթակառուցվածքը, նպատակ ունենալով ձմռան ամիսներին անտանելի պայմաններ ստեղծել բնակչության համար:

«Վերականգնման աշխատանքը շարունակվում է, զօրուգիշեր մենք շարունակում ենք վերականգնել էլեկտրաէներգիայի, ջեռուցման, ջրի մատակարարման և կապի հիմնարկները: 15 շրջաններում դեռ կան ջրի հետ կապված խնդիրներ: Առավել բարդ կացություն է Կիևի, Կիրովհրադի, Դնեպրոպետրովսկի, Լվովի, Պոլտավայի և Խարկովի շրջաններում»,- ասել է Զելենսկին:

Մոսկվան ընդունում է, որ հարվածներ է հասցնում այդ ենթակառուցվածքին և դրանք արդարացնում է Ուկրաինայի պաշտպանունակությունը թուլացնելու և բանակցություններ պարտադրելու նպատակով:

«Շնորհակալ եմ մեր երկրի համար կռվող և աշխատող բոլոր մարդկանց: Մենք միասին ինն ամիս դիմանում ենք այս լայնածավալ պատերազմում, և Ռուսաստանը չի կարողանում կոտրել մեզ և չի էլ կարողանա: Մենք այսպես էլ պետք է շարունակենք լինել միասին և օգնել մեկ-մեկու: Փառք Ուկրաինային»,- գիշերվա տեսաուղերձում ասել է Ուկրաինայի ղեկավարը:

Մայրաքաղաք Կիևում, ըստ քաղաքապետ Վիտալի Կլիչկոյի, ջերմաստիճանը զրոյից շատ ցածր է, բնակիչների 60 տոկոսը զրկված է էլեկտրաէներգիայից:

ՆԱՏՕ-ի գլխավոր քարտուղար Յենս Ստոլտենբերգն այսօր Բրյուսելում ասել է, թե ներկայիս պահին գերնպատակը Կիևին օգնելն է, հարկ է ամեն բան անել, որ Ռուսաստանը չհաղթի Ուկրաինայի դեմ վարած պատերազմում:

«Մենք պետք է անհրաժեշտ ռազմական օգնություն տրամադրենք Ուկրաինային, երաշխավորենք, որ Ռուսաստանի նախագահ Վլադիմիր Պուտինը չհաղթի այս պատերազմում», - ասել է Հյուսիսատլանտյան դաշինքի ղեկավարը:

Նրա փոխանցմամբ, պետք է ամեն բան անել, որ Ուկրաինան ազատագրի ռուսների կողմից զավթված տարածքները և խաղաղության հասնի որպես ինքնիշխան և անկախ պետություն: Ստոլտենբերգի փոխանցմամբ, ՆԱՏՕ-ն, մասնավորապես, դաշինքի անդամ Գերմանիան, հակաօդային պաշտպանության արդյունավետ համակարգեր է փոխանցել ուկրաինացիներին:

Հաջորդ շաբաթ տեղի կունենա ՆԱՏՕ-ի երկրների արտաքին գերատեսչությունների ղեկավարների հավաքը: Ստոլտենբերգը հայտնել է, որ այդ ժողովում կոչ կանի բոլորին լրացուցիչ միջոցներ ձեռնարկել Ուկրաինային սատարելու, այդ թվում՝ ՀՕՊ համակարգեր փոխանցելու համար:

Նիդերլանդների խորհրդարանի Ներկայացուցիչների պալատն ընդունել է բանաձև, որով Ռուսաստանը ճանաչվել է ահաբեկչությունը հովանավորող պետություն:

Բանաձևում ասվում է, որ խորհրդարանի ստորին պալատն այդ որոշումը կայացրել է Ուկրաինա Ռուսաստանի նեխխուժման կապակցությամբ: Նախագիծը ներկայացրել է «կանաչ ձախերի» խմբակցության պատգամաավոր Տոմա վան դեր Լին:

Նիդերլանդների արտաքին գործերի նախարար Վոպկե Հեկստրան նշել է, որ երկրի օրենսդրությունը չի նախատեսում պատժամիջոցների սահմանում ահաբեկչության հովանավորների նկատմամբ:

«Ռուսաստանի բանակն Ուկրաինայում նպատակաուղղված և միտումնավոր հարվածներ է հասցնում քաղաքացիական թիրախներին», - ասվում է բանաձևում:

Օրենսդիրները նաև կոչ են արել գործադիրին առավելագույն օգնություն տրամադրել Ուկրաինային մարդասիրական, դիվանագիտական և ռազմական ասպարեզներում:

Ավելի վաղ Էստոնիայի, Լատվիայի, Լիտվայի, Չեխիայի և Լեհաստանի խորհրդարանները Ռուսաստանը ճանաչել են որպես ահաբեկչությանը սատարող պետություն:

Հոկտեմբերի 13-ին ԵԽԽՎ-ն ընդունել է բանաձև, որով Ռուսաստանը համարվել է «ահաբեկչական ռեժիմ»:

Մեծ Բրիտանիայի արտաքին գործերի նախարար Ջեյմս Քլևերլին մեկնել է Ուկրաինա: Այցի ընթացքում նա կհայտարարի ձմռան համար Կիևին լրացուցիչ օգնություն հատկացնելու մասին, հայտնել են բրիտանական արտաքին քաղաքական գերատեսչությունից։

Ակնկալվում է, որ Լոնդոնը 3 միլիոն ֆունտ ստերլինգ կտրամադրի Ուկրաինայի կենսական ենթակառուցվածքների վերականգնման համար, ևս 5 միլիոն ֆունտ ստերլինգ կհատկացնի հացահատիկի տեղափոխման ծրագրին:

Նախատեսվում է, որ բրիտանացի նախարարը Կիևում կհանդիպի Ուկրաինայի նախագահ Վլադիմիր Զելենսկու և արտաքին գործերի նախարար Դմիտրի Կուլեբայի հետ:

Ավելի քան 15 հազար մարդ է անհետ կորել ուկրաինական պատերազմի ժամանակ, տեղեկացրել է Անհետ կորածների հարցերով միջազգային հանձնաժողովի ներկայացուցիչը։

Հաագայում գործող կազմակերպությունը հուլիսին գրասենյակ բացեց Կիևում՝ օգնելու Ուկրաինային փաստաթղթեր հավաքել և փնտրել անհետ կորածներին:

Կազմակերպության Եվրոպայի տնօրեն Մեթյու Հոլիդեյի խոսքով՝ դեռ պարզ չէ, թե քանի մարդ է բռնի տեղահանվել, պահվում է Ռուսաստանում, ողջ է և բաժանված է ընտանիքից կամ մահացել է:

Ուկրաինայում անհետ կորածների որոնումները կշարունակվեն տարիներ, նույնիսկ ռազմական գործողությունների դադարեցումից հետո, ասել է Հոլիդեյը Reuters-ին տված հարցազրույցում։

Ուկրաինա «Փեթրիոթ» տեսակի հակաօդային պաշտպանության հրթիռներ ուղարկելու որոշումը կախված է ՆԱՏՕ-ի անդամ կոնկրետ երկրներից: Այդ հայտարարությամբ այսօր Բրյուսելում Հյուսիսատլանտյան դաշինքի գլխավոր քարտուղարն արձագանքել ուկրաինացիներին «Փեթրիոթներ» տրամադրելու Գերմանիային հասցեագրված Լեհաստանի կոչին:

«Մենք արդեն նշանակալից ՀՕՊ համակարգեր ենք փոխանցել Ուկրաինային: Գերմանիան տվել է արդիական համակարգեր, և ես՝ հաջորդ շաբաթ, ՆԱՏՕ-ի արտաքին գործերի նախարարների ժողովում, բոլորին կոչ կանեմ լրացուցիչ օգնություն տալ Կիևին, բայց կոնկրետ տեսակի սպառազենի վերաբերյալ վճիռները պետք է կոնկրետ երկրները կայացնեն»,- ասել է Ստոլտենբերգը:

Բեռլինը Վարշավային «Փեթրիոթներ» է առաջարկել այն բանից հետո, երբ վերջերս թիրախից շեղված ուկրաինական ՀՕՊ համակարգի հրթիռն ընկել է Լեհաստանի տարածքում և դրա պայթյունից երկու տեղացի ֆերմեր է զոհվել:

Ռուսաստանի Դաշնության նախագահ Վլադիմիր Պուտինն այսօր Նովո-Օգարևոյի ամառանոցային նստավայրում հանդիպել է Ուկրաինայում «հատուկ ռազմական օպերացիայի» ընթացքում զոհված զինծառայողների մայրերին:

Նա հավաստիացրել է, որ ինքը և Դաշնության մյուս ղեկավարները կիսում են մարտերում զոհված զինծառայողների մայրերի ցավը:

«Ով որդուն է կորցրել, այստեղ լեզուն չի պտտվում ինչ-որ պաշտոնական ընդունված բաներ ասել, ցավակցություն հայտնել: Բայց ուզում եմ, որ իմանաք, որ անձամբ ես, երկրի ամբողջ ղեկավարությունը, մենք կիսում ենք ձեր ցավը: Մենք գիտակցում ենք, որ ոչինչ չի կարող փոխարինել որդուն, երեխայի կորուստը, հատկապես մայրների համար, որոնց պարտական ենք այս աշխարհ գալով, որոնք ծնել, կերակրել, պահել են զավակներին»,- ասել է Պուտինը հանդիպման ընթացքում:

Նա հավաստիացրել է, թե Ռուսաստանի Դաշնության իշխանությունն ամեն բան կանի, որ զոհված զինծառայողների մայրերն իրենց երբեք մոռացված չզգան:

BBC ռադիոկայանի ռուսական ծառայության փոխանցմամբ, Ռուսաստանում սեպտեմբերի 21-ին մասնակի զորակոչի մասին հրամանագրի հրապարակումից ի վեր Ուկրաինայում մարտական գործողություններում, ինչպես նաև ռազմաճակատ ուղարկվելուց առաջ զոհվել կամ մահացել են առնվազն 326 ռուսաստանցի զորակոչիկներ:

Նրանցից 290-ը զոհվել են բուն ռազմական գործողություններում, ևս 36-ը մահացել են Ռուսաստանի տարածքում՝ զորակոչի կենտրոններում, զինկոմիսարիատներում կամ զորամասերում: Նրանց մահվան հիմնական պատճառներ են դարձել սրտային հիվանդությունները, դժբախտ պատահարները և ալկոհոլի օգտագործումը:

BBC ռադիոկայանի ռուսական ծառայությունը ճշտել է 326 մահացածների անուն-ազգանունները:

Ենթադրվում է, որ զորակոչիկների շրջանում զոհվածների կամ ոչ մարտական պայմաններում մահացածների իրական թիվն ավելի մեծ է: Քանի որ հոկտեմբերից սկսված Ուկրաինայում զոհվածների կարգավիճակը չի նշվում, ուստի հայտնի չէ, զոհվածը պայմանագրային զինծառայող էր, ժամկետային, կամավոր, թե վերջին հրամանագրով զորակոչված:

BBC-ն և «Մեդիազոնա» կայքը կատարել են համատեղ հետազոտություն, որի համաձայն, նոյեմբերի 25-ի դրությամբ հաստատված են Ուկրաինայոիմ զոհված 9 հազար 311 ռուսաստանցի սպաների և զինվորների անուն-ազգանունները: