Պատերազմ Ուկրաինայում (լայվ բլոգ, թարմացվող)

Միացյալ Նահանգներն «Ուկրաինայի երկաթուղի» ընկերությանը նվիրել է 22500 հատուկ տաքացվող վերմակներ:

Կիևի Կենտրոնական կայարանում և երկրի մնացած կայարաններում գտնվող ուղևորները և ռուսների ռմբահարումների հետևանքով ջեռուցումից զրկված մյուս մարդիկ կարող են դրանց օգնությամբ տաքանալ:

«Վերջին դաժան հարձակումից շատ մարդիկ են սպանվել, շատերն են վիրավորվել, ռուսները ցանկանում են, որ Ուկրաինայում ցուրտն ու մութը տիրի, բայց դա ուկրաինացիներին էլ ավելի վճռական է դարձնում», - ասել է Ուկրաինայում ԱՄՆ դեսպան Բրիջեթ Բրինքը:

Նրա խոսքով, Ուկրաինայի մայրաքաղաքի Կենտրոնական կայարանն աշխարհի համար դարձել է ուկրաինացիների հերոսության վկայություններից մեկը:

Վերմակները տրամադրել է ԱՄՆ միջազգային զարգացման գործակալության մարդասիրական օգնության բյուրոն:

Գնացքներին սպասող ուղևորների համար կայարանի աշխատակիցները ջեռուցումը փոքրիկ վառարաններով են ապահովում և վերմակներն են բաժանում:

Չնայած հակառակորդների բոլոր ջանքերին՝ Ռուսաստանն, անկասկած, կիրականացնի Ուկրաինայում «հատուկ ռազմական օպերացիայի» նպատակները: Այդ մասին հայտարարել է Ռուսաստանի նախագահ Վլադիմիր Պուտինը Ուկրաինա գործուղված զինծառայողների մայրերի հետ Նովո-Օգարյովոյում նոյեմբերի 25-ին տեղի ունեցած հանդիպման ընթացքում:

«Ռուսաստանի հակառակորդները փորձում են իրենց նպատակներին հասնել, իսկ մենք պետք է հասնենք մեր նպատակներին: Եվ կասկած չկա, որ դա կանենք»,- ասել է Պուտինը:

Նա նաև նշել է, թե Ռուսաստանի հակառակորդները «գործում են տեղեկատվական դաշտում և մարդկանց դրդում են ապակառուցողական քայլերի, փորձում են արժեզրկել Դոնբասի ժողովրդին պաշտպանելու մարդկանց ազնիվ մղումը»:

«Նրանք ուզում են զրոյացնել, վարկաբեկել այն, ինչի համար ձեր որդին կյանքը կորցրեց, ուզում են արժեզրկել այն, ինչը մեր տղերքն են անում, արժեզրկել Դոնբասում, Զապորոժիեում, Խերսոնում մեր մարդկանց պաշտպանելու, իմ տեսակետից, շատ ազնիվ ձգտումը»,- ասել է Պուտինն Ուկրաինայում զոհված ավագ լեյտենանտի մոր հետ զրույցում:

Ուկրաինայի քաղաքական ասպարեզում արձանագրվել է խիստ հազվադեպ զարգացում՝ նախագահ Վլադիմիր Զելենսկին հրապարակավ կշտամբել է Կիևի քաղաքապետ Վիտալի Կլիչկոյին:

Նախագահն ասել է, թե քաղաքապետարանը թերացել է ռուսների հրթիռակոծությունների հետևանքով ջեռուցումից զրկված բնակիչների համար տաքացվող ապաստարաններ ստեղծելու գործում: Այդ հատուկ ապաստարաններն Ուկրաինայում անվանում են «դիմադրության հենակետեր»:

«Ամբողջ երկրում տեղակայել ենք «դիմադրության հենակետեր», բայց, ավաղ, գիտեմ, որ ոչ բոլոր քաղաքներում են տեղական իշխանությունները լավ աշխատել: Խնդրում եմ ուշադրություն դարձնել Կիևի վրա, այստեղ 600 հազար մարդ 20-ից 30 ժամ հոսանք չունի, ոչ ոք չի ների, եթե «դիմադրության հենակետերը» թերի աշխատեն, խնդրում եմ սա շատ լուրջ ընդունել», - ասել է Զելենսկին:

Արևմուտքից Ուկրաինա ուղարկված 350 հաուբիցների մոտ մեկ երրորդը պիտանի չեն գերակտիվ օգտագործման կամ մարտերում հակառակորդի կրակից վնասվելու հետևանքով: Այդ մասին, հղում անելով ամերիկյան և ուկրաինական աղբյուրներին, հաղորդում է The New York Times պարբերականը:

Ուկրաինացի հրետանավորներն օրական միջինը 2-ից 4 հազար արկեր են արձակում: Այդ տեմպերը հանգեցնում են հաուբիցների արագ մաշվածության: Հաուբիցը կորցնում է ճշգրտությունը և կրակի հեռահարությունը:

Ըստ վերլուծության՝ ռազմական մասնագետները պարզել են, որ նախկինում չկիրառված 155 միլիմետր տրամաչափի որոշ արկեր վնասում են հաուբիցի փողը:

Ուկրաինայում շարքից դուրս եկած հաուբիցները նորոգելու համար Միացյալ Նահանգները Լեհաստանում տեղակայել է հատուկ արտադրամաս:

Ուկրաինայի, Լիտվայի և Լեհաստանի վարչապետեր Դենիս Շմիգալը, Ինգրիդա Շիմոնիտեն և Մատեուշ Մորավիեցկին Կիևում հարգանքի տուրք են մատուցել Հոլոդոմորի զոհերի հիշատակին:

1932-33 թվականներին Ուկրաինայում սովից մահացել են միլիոնավոր մարդիկ: Ուկրաինայի համոզմամբ՝ սովը միտումնավոր կազմակերպել է բռնապետ Իոսիֆ Ստալինի ռեժիմը:

Ուկրաինայի ներկայիս ղեկավարները, արևմտյան մի շարք երկրների լիդերներ և հասարակական գործիչներ պնդում են, որ Կրեմլն ուկրաինացի ազգայնականներին և գյուղացիությանը պատժելու համար է դիմել այդ քայլին: Ռուսաստանը դա կտրականապես հերքում է:

Երեք վարչապետերը նաև ստորագրել են համատեղ հայտարարություն, որով կոչ են արել շարունակել ռազմական և ֆինանսական օգնության տրամադրումը Ռուսաստանի կողմից ագրեսիայի ենթարկվող Ուկրաինային:

Գերմանիայի կանցլեր Օլաֆ Շոլցն այսօր ասել է, որ այլևս երբեք չի կարելի թույլ տալ, որ սովն օգտագործվի իբրև զենք: Շոլցն այսօր հարգանքի տուրք է մատուցել Ուկրաինայում Հոլոդոմորի զոհերի հիշատակին:

«Ստալինի կողմից միտումնավոր հրահրված մեծ սովն Ուկրաինայում ավելի քան 3 միլիոն 300 հազար տղամարդկանց, կանանց և երեխաների կյանք է խլել: Այդ սարսափելի մարտավարությամբ մարդկանց զրկել են պարենից և հարկադրել են հեռանալ Ուկրաինայից: Այսօր մենք հայտարարում ենք, որ սովն այլևս երբեք չպետք է զենք դառնա: Դրա համար էլ մենք չենք կարող հանդուրժել այն, ինչ հիմա տեղի է ունենում», - հայտարարել է Շոլցը:

Նրա փոխանցմամբ՝ ուկրաինական հացահատիկով բեռնված մի նավ այժմ Գերմանիայի հովանավորությամբ ուղևորվում է դեպի Եթովպիա:

Կանցլերն ասել է, որ Բեռլինը լրացուցիչ 15 միլիոն եվրո կտրամադրի Ուկրաինայից հացահատիկը դուրս փոխադրելու համար:

Գերմանացի օրենսդիրները երեկ քննարկել են Հոլոդոմորը ցեղասպանություն ճանաչելու նախագիծը: Քվեարկության օրը դեռ որոշված չէ:

Մեծ Բրիտանիայի նախկին վարչապետ Բորիս Ջոնսոնը նախաձեռնել է դրամահավաք, որի միջոցով պետք է դեղամիջոցներ ձեռք բերվեն Ուկրաինայի համար:

The Guardian պարբերականի փոխանցմամբ, նախկին վարչապետն իր կոչը հրապարակել է մոտեցող սուրբծննդյան տոներին ընդառաջ:

Այդ ժամանակաշրջանում երկրում տեղի են ունենում քաղաքական ու հանրային անվանի մարդկանց և սպորտի ու շոուբիզնեսի աստղերի մասնակցությամբ բազմաթիվ բարեգործական միջոցառումներ:

«Բրիտանացիները հայտնի են իրենց առատաձեռնությամբ ու մեծահոգությամբ, և այդ ունակությունները դրսևորում են նույնիսկ երբ գալիս են դժվար ժամանակներ, ուստի կոչ եմ անում՝ այս Սուրբ Ծնունդին ձեռքներդ գրպաններդ տարեք»,- ասել նախկին վարչապետը:

Նրա փոխանցմամբ, հավաքվելիք գումարով ձեռք կբերվեն դեղամիջոցներ և բժշկական սարքավորումներ, որոնք կուղարկվեն Ուկրաինա:

Նվիրատվությունները կփոխանցվեն Circle Health հիմնադրամին, որը նախկինում մեկ անգամ արդեն հավաքել է ավելի քան 3 միլիոն ֆունտ ստերլինգ Ուկրաինայի համար:

Կիևում «գրեթե ամբողջությամբ» վերականգնվել են էլեկտրաէներգիան, ջրամատակարարումը, ինչպես նաև կապը, նոյեմբերի 27-ին հայտնել է քաղաքի ռազմական վարչակազմը՝ հավելելով է, որ «հնարավոր են անջատումներ էլեկտրացանցերի ծանրաբեռնվածության պատճառով»:

Ուկրաինայի մայրաքաղաքի տասնյակ հազարավոր բնակիչներ մնացել են առանց էլեկտրականության ռուսական հարձակումներից հետո։ Նոյեմբերի 23-ին Ռուսաստանը հրթիռակոժել է Ուկրաինայի էներգետիկ ենթակառուցվածքին՝ պատճառելով լուրջ վնաս։

Կան նշաններ, որ ռուսական զորքերը պատրաստվում են լքել Զապորոժիեի ատոմակայանը, հայատարարել է ուկրաինական «Էներգոատոմ» ընկերության ղեկավար Պետր Կոտինը:

Նրա խոսքով՝ վերջերս «ռուսական մամուլում շատ հրապարակումներ սկսեցին հայտնվել այն մասին, որ Զապորոժիեի ատոմակայանը միգուցե պետք է փոխանցել Ատոմային էներգիայի միջազգային գործակալության (ԱԷՄԳ) վերահսկողության տակ»։

Վերջին օրերին տպավորություն է ստեղծվել, որ ռուս զինվորականները «հավաքել են ճամպրուկները, ասել է «Էներգոատոմ» ընկերության ղեկավարը։

Ուկրաինայի նախագահ Վլադիմիր Զելենսկին ասել է, որ այս շաբաթը Ուկրաինայի համար, ամենայն հավանականությամբ, ոչ պակաս դժվար կլինի, քան նախորդն էր։

Զելենսկին կիրակի օրը հայտարարել է, որ Ռուսաստանը ավելի շատ հրթիռային հարվածներ կհասցնի Ուկրաինային և զգուշացրել , որ պաշտպանության ուժերը և երկրի քաղաքացիները պետք է պատրաստ լինեն ընդհանուր ջանքերի՝ այդ հարվածների հետևանքներին դիմակայելու համար։