Պատերազմ Ուկրաինայում (լայվ բլոգ, թարմացվող)

Ամերիկայի Միացյալ Նահանգների պետական քարտուղար Էնթոնի Բլինքենն ասել է, որ Ուկրաինայի էներգետիկ ենթակառուցվածքը ոչնչացնելու ռուսների ռազմավարությունը նպատակին չի հասնի: Այդ մասին նա խոսել է Ռումինիայի մայրաքաղաք Բուխարեստում՝ ՆԱՏՕ-ի անդամ երկրների արտաքին գերատեսչությունների ղեկավարների հավաքում:

«Մենք հանդիպում ենք կրիտիկական պահի, երբ Ուկրաինան փորձում է ամրապնդել դիրքերը ռազմի դաշտում, իսկ {Ռուսաստանի նախագահ Վլադիմիր} Պուտինն իր զայրույթը թափում է Ուկրաինայի քաղաքացիական բնակչության վրա: Անցած շաբաթների ընթացքում Ռուսաստանը հարվածներ է հասցրել Ուկրաինայի էներգահամակարգի մեկ երրորդին», - ասել է Բլինքենը:

ԱՄՆ-ի պետքարտուղարի փոխանցմամբ, միլիոնավոր մարդիկ հայտնվել են մթան և ցրտի պայմաններում:

«Ջեռուցում, ջուր, հոսանք երեխաների, տարեցների, հիվանդների համար՝ այդ ամենը Պուտինի թիրախ է»,- ասել է Բլինքենը:

Նրա համոզմամբ, այդ մարտավարությունը չի աշխատի: Արևմուտքը կշարունակի սատարել Ուկրաինային, իսկ Կիևը պայքարից չի հրաժարվի:

Գերմանիայի Դաշնային Հանրապետության խորհրդարանի ստորին պալատը՝ Բունդեսթագը, 1932-33 թվականների զանգվածային սովամահությունը՝ Հոլոդոմորը ճանաչել է ցեղասպանություն:

Բանաձևին աջակցել են իշխող երեք կուսակցությունները և քրիստոնյա դեմոկրատները: Տարբեր հարցերում հաճախ ռուսամետ դիրքորոշում դրսևորող Ձախերը և «Այլընտրանք Գերմանիայի համար» խմբակցությունը ձեռնպահ են մնացել: Դեմ ձայն չի եղել:

Ուկրաինայի նախագահ Վլադիմիր Զելենսկին շնորհակալություն է հայտնել գերմանացիներին և հայտարարել, որ «ճշմարտությունը միշտ հաղթում է»:

Զանգվածային սովամահության՝ Հոլոդոմորի հետևանքով Ուկրաինայում անցյալ դարի 1930-ականների սկզբին զոհվել է առնվազն 5 միլիոն մարդ:

Դա տեղի է ունեցել այն բանից հետո, երբ խորհրդային իշխանության պահանջով Ուկրաինայում գյուղացիներից առգրավել են գրեթե ամբողջ պարենը՝ հացահատիկը, սերմացուն և անասուններին:

Մեծ թվով պատմաբանների համոզմամբ դա միտումնավոր արվել է Ուկրաինայում զանգվածային սով առաջացնելու և այդ միջոցով ազգայնական ուկրաինացիներին ու կոլխոզների գաղափարին ընդդիմացող գյուղացիներին պատժելու նպատակով:

Ռուսաստանը կտրականապես մերժում է Հոլոդոմորի միտումնավոր կազմակերպումը, պնդելով, որ այդ ժամանակաշրջանում անբերունակ տարիների և անբարենպաստ այլ հանգամանքների հետևանքով մեծ թվով մարդիկ սովամահ են եղել նաև Ռուսաստանում:

Իսպանիայի ոստիկանությունը հետաքննում է դեկտեմբերի 1-ի վաղ առավոտյան Մադրիդի մերձակայքում գտնվող ավիաբազա ուղարկված կասկածելի ծանրոցը։

Իսպանական կառավարության պաշտոնյաները հայտնել են, որ մեկ այլ պայթուցիկ փաթեթ էլ հայտնաբերվել նոյեմբերի 30-ին Սարագոսայի զենքի գործարանում, որտեղ արտադրվող նռնականետերը Մադրիդն Ուկրաինա է ուղարկել։

Նույն օրը Մադրիդում ուկրաինական դեսպանատանն է տեղի ունեցել պայթյուն, որը Իսպանիայի Ազգային դատարանը դիտարկում է որպես ահաբեկչություն, հաղորդում է իսպանական Europa Press լրատվական գործակալությունը՝ վկայակոչելով իր աղբյուրները։

Լրատվամիջոցի համաձայն՝ հետաքննությունը կմեկնարկի ոստիկանության նախնական զեկույցից հետո, որում պետք է տեղ գտնեն միջադեպի առանցքային մանրամասները։

Իսպանական մայրաքաղաքում Ուկրաինայի դիվանագիտական ներկայացուցչությունում պայթյունը տեղի է ունեցել չորեքշաբթի օրը։ Հաղորդվել է մեկ վիրավորի մասին։ Պայթուցիկ սարքը տեղադրված էր դեսպանին հասցեագրված ծանրոցում։

Միջադեպից հետո Ուկրաինայի արտգործնախարարը հանձնարարել է բոլոր ուկրաինական դեսպանատներում խստացնել հսկողությունը և ստացվող նամակներն ու ծանրոցները պարտադիր զննել հատուկ սարքերով:

Միացյալ Նահանգները 1 միլիարդ 200 միլիոն դոլարի պայմանագիր է կնքել Raytheon ընկերության հետ՝ Ուկրաինայի համար NASAMS (National Advanced Surface-to-Air Missile Systems) ՀՕՊ համակարգեր գնելու նպատակով, հայտնում է Պենտագոնի մամլո ծառայությունը։

ԱՄՆ իշխանությունները մտադիր են Ուկրաինային ընդհանուր առմամբ ութ NASAMS համակարգ ուղարկել։ NASAMS-ը կարճ և միջին հեռահարության շարժական զենիթահրթիռային համակարգ է՝ իր դասի մեջ ամենաժամանակակիցը, որը նախատեսված է ցածր և միջին բարձրությունների վրա օդային թիրախների դեմ պայքարելու համար։ Այն ունակ է ոչնչացնել անօդաչու թռչող սարքեր, բալիստիկ և թևավոր հրթիռներ, ուղղաթիռներ, ինքնաթիռներ և այլ օդային թիրախներ։

Կիևն ու Մոսկվան ռազմագերիներ են փոխանակել՝ 50-ը 50-ի դիմաց սկզբունքով, երեկ հայտարարել է ինքնահռչակ Դոնեցկի հանրապետության առաջնորդ Դենիս Պուշիլինը։

Տեղեկատվությունը ավելի ուշ հաստատել են նաև Ռուսաստանի և Ուկրաինայի իշխանությունները։ Ուկրաինայի նախագահի աշխատակազմի ղեկավար Անդրեյ Երմակի խոսքերով՝ հայրենիք վերադարձած գերիների թվում են նաև Ելենովկայում գերեվարված զինծառայողներ, ինչպես նաև Մարիուպոլի և Ազովստալի պաշտպաններ:

Միացյալ Նահանգների և Ֆրանսիայի նախագահներ Ջո Բայդենի և Էմանյուել Մակրոնի՝ Սպիտակ տանը կայացած բանակցություններից հետո հրապարակված համատեղ հայտարարությունում ասված է, որ երկու առաջնորդները հաստատում են իրենց վճռականությունը՝ միջազգային մեխանիզմների օգնությամբ պատասխանատվության ենթարկելու Ռուսաստանին լայնորեն փաստագրված վայրագությունների և ռազմական հանցագործությունների համար, որոնք Ուկրաինայում կատարվել են ռուսական կանոնավոր զինված ուժերի և նրանց աջակիցների կողմից՝ ներառյալ վարձկանները:

Գրավոր հայտարարությունում, ինչպես նաև մամուլի համատեղ ասուլիսում Բայդենը և Մակրոնը հայտարարել են, որ գործընկերների հետ կշարունակեն աջակցել Ուկրաինային որքան անհրաժեշտ լինի:

«Պուտինը կարծում է, թե կարող է կոտրել բոլոր նրանց կամքը, ովքեր հանդես են գալիս իր կայսերական ամբիցիաների դեմ: Ուկրաինայում քաղաքացիական ենթակառուցվածքների վրա հարձակումները, գները բարձրացնելու նպատակով Եվրոպա էներգամատակարարման դադարեցումը, պարենային ճգնաժամի սրացումը վնաս են հասցնում խոցելի մարդկանց ոչ միայն Ուկրաինայում, այլև ամբողջ աշխարհում, բայց նրա մոտ ոչինչ չի ստացվի», - ասել է ԱՄՆ նախագահը:

ԱՄՆ նախագահն ասել է, թե մտադիր չէ մոտ ապագայում կապ ունենալ Ռուսաստանի նախագահի հետ, բայց պատրաստ է խոսել նրա հետ, եթե Պուտինը հետաքրքրություն ցուցաբերի պատերազմը դադարեցնելու ճանապարհ փնտրելու համար: «Նա դեռևս դա չի արել», - նշել է Բայդենը` հավելելով, որ եթե դա տեղի ունենա, ապա խորհրդակցելով Ֆրանսիայի և ՆԱՏՕ-ի ընկերների հետ, ուրախ կլինի՝ նստելու Պուտինի հետ, տեսնելու, թե ինչ է նրա մտքինը:

Մակրոնն ասել է, որ Ուկրաինային երբեք կոչ չեն անի՝ գնալու այնպիսի զիջումների, որոնք անընդունելի են Կիևի համար:

Կրեմլը պատրաստ չէ բանակցել Ամերիկայի Միացյալ Նահանգների հետ, եթե նախապայման է դրվում Ուկրաինայից հեռանալը: Այդ մասին այսօր հայտարարել է Ռուսաստանի նախագահ Վլադիմիր Պուտինի մամլո խոսնակ Դմիտրի Պեսկովն, ով միաժամանակ նշել է, թե Դաշնության լիդերը պատրաստ է շարունակել շփումները:

Պեսկովը հիշատակել է ԱՄՆ-ի նախագահ Ջո Բայդենի վերջին հայտարարությունն այն մասին, որ «բանակցությունները հնարավոր են, եթե Պուտինը հեռանա Ուկրաինայից»: Նախօրեին Վաշինգտոնում Բայդենն այդ մասին ասել է Ֆրանսիայի նախագահ Էմանյուել Մակրոնի հետ համատեղ ասուլիսում:

«Հատուկ ռազմական օպերացիան, անշուշտ, կշարունակվի: Պուտինը բաց էր և հիմա էլ պատրաստ է քննարկումների համար: Իհարկե, մեզ համար նախընտրելի է մեր շահերն ապահովել խաղաղ, դիվանագիտական ուղիներով», - ասել է Վլադիմիր Պուտինի խոսնակը:

Ուկրաինայի ազգային անվտանգության և պաշտպանության խորհուրդը կառավարությանը հանձնարարել է կազմել և Գերագույն ռադային ներկայացնել Ռուսաստանի հետ կապված կրոնական կազմակերպությունների գործունեությունն Ուկրաինայում արգելելու օրինագիծ, հայտնել է նախագահ Վլադիմիր Զելենսկին անցած գիշերվա տեսաուղերձում:

«Մենք պետք է այնպիսի պայմաններ ստեղծենք, որ ագրեսոր երկրի հետ կապված ուժերը զրկվեն ուկրաինացիներին մոլորեցնելու և Ուկրաինան ներսից թուլացնելու հնարավորությունից»,- ասել է Զելենսկին:

Անցած շաբաթների ընթացքում Ուկրաինայի անվտանգության ծառայությունը խուզարկություններ է անցկացրել Ուկրաինայի ուղղափառ եկեղեցու թեմերում:

Մայիսին Ուկրաինայի Ուղղափառ եկեղեցին՝ բողոք հայտնելով Ռուսաստանի ռազմական հարձակմանն աջակցելու Մոսկվայի և Համայն Ռուսիո Պատրիարք Կիրիլի դիրքորոշման դեմ, հայտարարել է Ռուսաց Ուղղափառ եկեղեցու հետ կապերը խզելու և անկախանալու մասին:

Վերջերս ուկրաինացիները խուզարկություն են անցկացրել Ռուսաստանի և Ուկրաինայի համար սրբատեղի համարվող Կիև-Պեչորյան մայրավանքի համալիրի տարածքում, որտեղ հայտնաբերել են ռուսամետ գրականություն և կանխիկ դրամով խոշոր գումարներ:

Այսօր նոր խուզարկություններ են տեղի ունենում Ուկրաինայի Ժիտոմիրի, Ռովնոյի և Անդրկարպատյան շրջանների եկեղեցիներում:

Թուրքիան ենթադրում է, որ Ուկրաինայի պատերազմում հնարավոր հրադադարի վերաբերյալ ավելի պարզ պատկեր տեսնելու համար պետք է սպասել մինչև հաջորդ տարվա գարուն:

«Կարծում եմ, հիմա մենք պետք է համոզենք մեր եվրոպացի որոշ գործընկերներին, որ նորից նստեն բանակցությունների սեղանի շուրջ: Ուկրաինան գետնի վրա առաջընթաց է գրանցում, որոշ տարածքներ է վերադարձնում, բայց Ռուսաստանը միտումնավոր թիրախավորում է քաղաքացիական ենթակառուցվածքը: Կյանքը շատ ծանր է դառնում ուկրաինացիների ու նաև մեզ, մեզ բոլորիս համար»,- ասել է Չավուշօղլուն:

Այդ մեկնաբանությամբ նա հանդես է եկել Հռոմում գումարված «Միջերկրական երկխոսություններ» միջազգային համաժողովում:

Ռուս-ուկրաինական պատերազմի մեկնարկից ի վեր Անկարան փորձել է միջնորդի դեր ստանձնել:

Թուրքիան դեմ է Ռուսաստանին ամբողջությամբ միջազգային ասպարեզից վտարելու քաղաքականությանը:

Հուլիսի 22-ին Ստամբուլում Թուրքիայի և ՄԱԿ-ի միջնորդությամբ կնքվել է ռուսների կողմից պաշարված ուկրաինական սևծովյան նավահանգիստներից հացահատիկը դուրս հանելու և հասցեատերերին հասցնելու գործարքը:

«Ազատության» ռուսական ծառայությունը՝ հղում անելով «Պրոյեկտ» կայքի վերլուծությանը, հայտնում է, որ Ուկրաինայի վրա փետրվարի 24-ին Ռուսաստանի կատարած հարձակումից հետո ռուսական Սևծովյան նավատորմը զրկվել է մարտական կազմի 15 տոկոսից:

Ներխուժումից առաջ Սևծովյան նավատորմի կազմում եղել են 275 նավեր, որոնցից միայն 58-ն էին մարտական: Պարեկային նավակների հետ միասին մարտական նավերի թիվը 74-ի է հասել:

«Պրոյեկտը» վերլուծել է նավերի կորուստների մասին բաց աղբյուրներում հրապարակված տվյալները և պարզել, որ պատերազմի սկզբից ռուսները կորցրել են առնվազն 12 նավեր, որոնց մի մասը խորտակվել է, մյուս մասը վնասվել է և շարքից դուրս եկել:

Ռուսաստանի պաշտպանության նախարարությունն այս պատերազմի ընթացքում նավատորմի կրած կորուստների մասին տվյալներ չի հայտնել: