Պատերազմ Ուկրաինայում (լայվ բլոգ, թարմացվող)

Ռուսաստանից ծովով արտահանվող նավթի առավելագույն գին սահմանելու փորձերը փոխում են իրադրությունը համաշխարհային էներգետիկ շուկայում, այսօր լրագրողների հետ զրույցում նշել է Ռուսաստանի նախագահի մամուլի խոսնակ Դմիտրի Պեսկովը։

«Որևէ կասկած չկա, որ այս որոշման ընդունումը քայլ է համաշխարհային էներգետիկ շուկայի ապակայունացման ուղղությամբ։ Անկասկած է նաև, որ մենք որևէ առավելագույն գին ընդունել չենք պատրաստվում», -հայտարարել է Պեսկովը։

«Ռուսաստանում աշնանը հայտարարված զորահավաքը բարդացրել է Ուկրաինայի վիճակը», -Reuters գործակալության փոխանցմամբ, այսօր հայտարարել է Ուկրաինայի ցամաքային զորքերի հրամանատար Ալեքսանդր Սիրսկին։

«Նման քանակությամբ անձնակազմի ժամանումը ռազմաճակատ բարդացրել է իրադրությունը։ Դրանք նոր բրիգադներ և գումարտակներ են, որոնց [ռուսական] բանակում սպասում էին, քանի որ այն կատարելապես հյուծված էր։ Նոր ժամանող ստորաբաժանումները նաև ավելի լավ են մարզված, քան դրանց նախորդները», - նշել է Սիրսկին։

Զինվորականի խոսքով՝ այժմ Ռուսաստանի Զինված ուժերի առջև ծառացած գլխավոր խնդիրը մատակարարումների պակասն է։

«Պատերազմի այս փուլում ռուսական կողմը շատ հաճախ հին զենք և սպառազինություն է օգտագործում», - նշել է ուկրաինացի գեներալը։

Ռուսական զորքերն այսօր նոր հրթիռային հարվածներ են հասցրել Ուկրաինայի տարածքին։ «Ինտերֆաքս Ուկրաինա» գործակալության փոխանցմամբ՝ հարվածները հասցվել են երկրի միանգամից մի շարք քաղաքներին՝ մասնավորաբար Օդեսային, Սումիին, Կրիվոյ Ռոգին։

«Օդեսային հասցված հարվածների հետևանքով վնասվել է երկու ենթակառուցվածքային օբյեկտ, մեկ մարդ տեղափոխվել է հիվանդանոց», - հաղորդում է գործակալությունը։

Կրիվոյ Ռոգում աշխատանքն են դադարեցրել այստեղ գտնվող հանքերն ու քաղաքային մետրոն։ «Ուղևորներն ու հանքափորները դուրս են բերվել, նրանց անվտանգությունն ապահովված է», - հայտարարել է Կրիվոյ Ռոգի ռազմական վարչակազմի ղեկավարը։

«Ուկրէներգո» ընկերությունը հաստատել է, որ ռուսական հարվածների հետևանքով կրկին տուժել են երկրի էներգետիկ ենթակառույցները, ինչը կարող է հանգեցնել էլեկտրաէներգիայի մատակարարումների չծրագրված խափանումների։

Մոլդովայի ներքին գործերի նախարարությունը հաղորդել է, որ ռուսական օդանավերից արձակված հրթիռներից մեկը պայթել է երկրի տարածքում՝ մոլդավական Բրիչանի գյուղի մերձակայքում։

Ռուսական ուժերը նոր հարձակում են սկսել Ուկրաինայում, հիմնական թիրախում են Դոնեցկի շրջանի Բախմուտ և Ավդիիվկա շրջանները, հայտարարել է երկրի Գլխավոր շտաբը, հավելելով՝ վերջին ժամերին միայն հրթիռակոծության տակ են հայտնվել մոտ 20 բնակավայրեր։

Մինչ այդ մասնագետները փորձում են վերականգնել էլեկտրաէներգիայի մատակարարումը, որն ընդհատվել էր ռուսական վերջին հրթիռակոծություններից հետո։

Պաշտոնյաները զգուշացնում են, որ Ուկրաինայի կենսական նշանակություն ունեցող ենթակառուցվածքները շարունակում են մնալ ռուսական հարվածների թիրախում, և առաջիկայում հովհարային անջատումներ կարող են կրկնվել մի շարք շրջաններում։

ՌԴ պաշտպանության նախարարությունը հայտնել է, որ «կիևյան ռեժիմի կողմից վերահսկվող տարածքից» վերադարձվել է 60 ռուս զինծառայող, որոնց «գերության մեջ մահացու վտանգ էր սպառնում»։

Ուկրաինայի նախագահի գրասենյակի ղեկավար Անդրեյ Երմակն, իր հերթին, հայտարարել է, որ փոխանակման արդյունքում հայրենիք է վերադարձել 60 ուկրաինացի զինվորական՝ 58 տղամարդ և երկու կին։ Ըստ ուկրաինացի պաշտոնյայի, նրանց մեծ մասը Մարիուպոլի «Ազովստալ» գործարանի պաշտպաններն են, որոնք պահվել են ինքնահռչակ Դոնեցկի հանրապետության Ելենովսկայա բանտում։

Հունգարիան արգելափակել է Եվրամիության կողմից Ուկրաինային 18 միլիարդ եվրոյի վարկ տրամադրելու որոշումը` է՛լ ավելի խորացնելով տարաձայնությունները Բուդապեշտի և միության մյուս անդամների միջև։

«Մենք ձև կգտնենք Ուկարինային աջակցելու համար, անգամ՝ առանց Հունգարիայի, բայց դա կպահանջի հավելյալ ժամանակ, հավելյալ ջանքեր ու ծախսեր։ Վիկտոր Օրբանը սրանից լավ նվեր չէր կարող Պուտինին մատուցել», - հայտարարել է այս հարցով բանակցող եվրոպացի պաշտոնյաներից մեկը։

Եվրահանձնաժողովն իր հերթին շաբաթներ առաջ առաջարկել էր անդամ երկրներին սառեցնել 2023-ին Բուդապեշտին հատկացվելիք 7,5 միլիարդ եվրոյի օգնությունը՝ կոռուպցիոն ռիսկերի և դատական համակարգի անկատարության պատճառով:

Բանակցություններին մոտ կանգնած դիվանագետները հաղորդում են, որ հիմա, արգելափակելով Ուկրաինայի վարկը, Հունգարիան փորձում է այս հարցում զիջումներ կորզել Բրյուսելից։ Երկու հարցով բանակցությունները շարունակվում են, վերջնական որոշման համար կողմերը դեռ ժամանակ ունեն՝ մինչև դեկտեմբերի 19-ը։

Միացյալ Նահանգները չի քաջալերել կամ օգնել Ուկրաինային՝ հարվածներ հասցնելու Ռուսաստանի տարածքում, հայտարարել է ԱՄՆ պետքարտուղարը:

Միաժամանակ, Էնթոնի Բլինքենը վերահաստատել է պաշտոնական Վաշինգտոնի վճռականությունը՝ ապահովելու, որ Կիևն ունենա պաշտպանվելու համար անհրաժեշտ սպառազինությունը:

Պենտագոնի ղեկավար Լլոյդ Օսթինը, իր հերթին, վստահեցրել է` ԱՄՆ-ը, թեև նման հեռահարության զենք չի տրամադրում Ուկրաինային, սակայն չի էլ խոչընդոտի Կիևին՝ «զարգացնելու մեծ հեռահարությամբ հարվածներ հասցնելու սեփական կարողությունը»:

Ամերիկացի բարձրաստիճան պաշտոնյաների այս հայտարարությունները հնչում են նախօրեին Ռուսաստանի՝ թիկունքում գտնվող երեք օդանավակայաններին անօդաչու թռչող սարքերով հասցված հարվածներից հետո։

Միացյալ Նահանգների Սենատը համաձայնեցրել է 2023 թվականի պաշտպանական բյուջեն՝ այն կկազմի շուրջ 850 միլիարդ դոլար։

Նախատեսվում է եկող տարի Ուկրաինային 800 միլիոն դոլարի ռազմական աջակցություն տրամադրել։ Ըստ նախագծի՝ 6 միլիարդ դոլար էլ կուղղվի Եվրոպայում Ռուսաստանին «զսպելու համար»:

Նախատեսվում է նաև ևս հինգ տարով երկարաձգել Ռուսաստանի հետ ռազմական համագործակցության արգելքը։

Արդեն համաձայնեցված նախագիծը օրենքի ուժ կստանա ամերիկյան Կոնգրեսի երկու պալատներում քվեարկություններից ու նախագահ Ջո Բայդենի կողմից ստորագրվելուց հետո։

Ռուսաստանի կողմից օկուպացված Դոնեցկի մարզում այսօր տեղի ունեցած ավտովթարի հետևանքով առնվազն 16 մարդ է զոհվել։ Նրանց թվում կան զինվորականներ։

Շախտյորսկ-Տորեզ ճանապարհին բեռնատարը բախվել է միկրոավտոբուսին։ Բեռնատարի վարորդը ևս զոհվել է։ Երեք զինվորականներ ծանր վիճակում տեղափոխվել են վերակենդանացման բաժանմունք։

Վթարի պատճառն ուսումնասիրվում է։ Նախնական վարկածով՝ միկրոավտոբուսը դուրս է եկել երթևեկության հանդիպակաց գոտի։

Ամերիկյան Time հանդեսը տարվա մարդ է ճանաչել Ուկրաինայի նախագահ Վլադիմիր Զելենսկուն և Ուկրաինայի ոգին։

«Տարվա մարդը․ Վլադիմիր Զելենսկին և Ուկրաինայի ոգին»՝ ազդարարում է հանդեսի շապիկի ճակատի գրառումը։

«Նրանք ապացուցեցին, որ քաջությունը կարող է նույնքան վարակիչ լինել, որքան վախը, ժողովուրդներին ու պետություններին միավորելու ու բարձրացնելու ազատությունը պաշտպանելու համար, աշխարհին հիշեցրին ժողովրդավարության և խաղաղության փխրուն լինելու մասին»․- գրել է Time-ը, նշելով, որ Վլադիմիր Զելենսկին թափ տվեց աշխարհն այնպես, ինչպես շատ տասնամյակներ ոչ ոք չի արել։

«Փետրվարի 24-ին, երբ սկսվեցին թափվել ռուսական ռումբերը, Կիևում մնալու և Ուկրաինային սատարելու համար աշխարհը բարձրացնելու նրա որոշումը բախտորոշ նշանակություն ունեցավ»,- ընդգծում է Time-ը։