Պատերազմ Ուկրաինայում (լայվ բլոգ, թարմացվող)

Կրեմլը հերքում է մամուլում և սոցիալական ցանցերում շրջանառվող տեղեկությունները, որոնց համաձայն, Ռուսաստանի նախագահի այսօր մեկնարկող այցը Մինսկ նպատակ ունի համոզել Ալեքսանդր Լուկաշենկոյին, որպեսզի Բելառուսը միանա Ուկրաինայում ընթացող ռազմական գործողություններին։

«Դրանք հիմար և հիմնազուրկ պնդումներ են», - լրագրողների հետ զրույցում հայտարարել է Ռուսաստանի նախագահի մամուլի քարտուղար Դմիտրի Պեսկովը։

Ռուսաստանի նախագահ Վլադիմիր Պուտինը ժամանել է Բելառուս։ Մինսկի օդանավակայանում նրան դիմավորել է Բելառուսի նախագահ Ալեքսանդր Լուկաշենկոն։

Սա Պուտինի առաջին այցն է Բելառուս 2019 թվականից ի վեր։

Այցի շեմին մամուլում և սոցիալական ցանցերում տեղեկություններ էին շրջանառվում, որ Պուտինը Մինսկ է մեկնում, որպեսզի Բելառուսի նախագահին համոզի միանալ Ուկրաինայում ընթացող ռազմական գործողություններին։ Կրեմլի պաշտոնական ներկայացուցիչ Դմիտրի Պեսկովը, սակայն, այս պնդումները «հիմար և հիմնազուրկ» է անվանել։

Եվրամիության (ԵՄ) անդամ պետությունների էներգետիկայի նախարարները քիչ առաջ՝ Բրյուսելում մոտ վեց ժամ շարունակված դռնփակ քննարկումներից հետո, համաձայնեցրել են Եվրոպա մատակարարվող գազի առավելագույն թույլատրելի գինը։

Reuters գործակալության տրամադրության տակ հայտնված փաստաթղթերի համաձայն՝ որպես Եվրոպա մատակարարվող գազի առավելագույն գին սահմանվել է 180 եվրոն մեկ մեգավատի կամ 1800-ից 2000 եվրոն՝ հազար խորանարդ մետր գազի դիմաց։

ԵՄ մատակարարվող գազի առավելագույն թույլատրելի գին սահմանելու որոշման շուրջ քննարկումները շարունակվում են արդեն մի քանի շաբաթ՝ լուրջ տարաձայնությունների տեղիք տալով։ Գերմանիան, Ավստրիան և Նիդերլանդները ընդհանրապես դեմ են գազի առավելագույն թւոյլատրելի գնի սահմանմանը՝ պնդելով, որ նման քայլը կարող է խաթարել մայրցամաքի էներգետիկ շուկայի բնականոն աշխատանքը։

Նախապես ենթադրվում էր, որ գազի առավելագույն թույլատրելի գնի սահմանումը ուժի մեջ կմտնի հունվարի 1-ից։ Reuters-ի տեղեկություններով, սակայն, այդ ժամկետը հետաձգվել է մինչև 2023 թվականի փետրվարի 15-ը։

Ռուսաստանն ու Բելառուսը միասին պայքարում են պատժամիջոցների դեմ, դա անում են արդյունավետ, ասել է ՌԴ նախագահ Վլադիմիր Պուտինը:

«Միասին մենք դիմակայում ենք ոչ բարեկամ պետությունների պատժամիջոցների ճնշմանը, Ռուսաստանին և Բելառուսին համաշխարհային շուկաներից մեկուսացնելու փորձերին, համակարգում ենք քայլերը՝ նվազագույնի հասցնելու անօրինական սահմանափակող միջոցների ազդեցությունը մեր երկրների տնտեսությունների վրա», - Բելառուսի նախագահի հետ բանակցություններից հետո ասել է Ռուսաստանի ղեկավարը:

Ռուսաստանի նախագահ Վլադիմիր Պուտինը վերջին երեք տարիների ընթացքում առաջին անգամ այցելեց հարևան և սերտ դաշնակից երկիր Բելառուս:

Բանակցություններից հետո նա և Բելառուսի նախագահ Ալեքսանդր Լուկաշենկոն երեկ երեկոյան մամուլի համատեղ ասուլիս են տվել:

Պուտինն ասել է, որ Ռուսաստանը մտադիր չէ կլանել Բելառուսը: «Հարցը ոչ թե կլանելն է, այլ տնտեսական քաղաքականությունը համաձայնեցնելը», - ասել է Ռուսաստանի նախագահը երկու երկրների ինտեգրացիոն գործընթացների մասին:

Պուտինի խոսքով՝ Ռուսաստանը չի պատրաստվում կլանել որևէ երկիր, այդ թվում՝ Բելառուսը:

Ռազմական փորձագետների կարծիքով՝ Պուտինը կփորձի Լուկաշենկոյին համոզել՝ օգնել Ուկրաինայի դեմ պատերազմում, նույնիսկ զինվորներ ուղարկել:

Վաշինգտոնը կշարունակի վերահսկել, թե արդյոք Բելառուսը ցանկանում է լրացուցիչ օգնություն տրամադրել Մոսկվային Ուկրաինայի հետ պատերազմում, և եթե դա տեղի ունենա, կարող են նոր պատժամիջոցներ սահմանվել Մինսկի դեմ, ճեպազրույցում ասել է ԱՄՆ Պետդեպարտամենտի խոսնակ Նեդ Փրայսը։

«Եթե մենք տեսնենք սա [հավելյալ աջակցություն ցուցաբերելու փորձերը], տեսնենք դրա պոտենցիալը, ապա համաչափ պատասխան կտանք՝ լրացուցիչ միջոցների ներդրմամբ»,- ասել է նա։

Լուկաշենկոյի կախվածությունը Պուտինից մտավախություն է առաջացնում Կիևում, որ Ռուսաստանի նախագահը կարող է ի վերջո ստիպել նրան միանալ Ուկրաինայի դեմ Ռուսաստանի ռազմական գործողություններին:

Ուկրաինայի նախագահ Վլադիմիր Զելենսկին այցելել է Դոնեցկի մարզում գտնվող Բախմուտ, որտեղ այժմ թեժ մարտեր են ընթանում։ Այս մասին հայտնել է Ուկրաինայի նախագահի գրասենյակը:

Բախմուտը համարվում է կարևոր տրանսպորտային հանգույց, որտեղով անցնում են Լիսիչանսկի և Սևերոդոնեցկի, Սևերսկի, Սլովյանսկի, Կրամատորսկի, Կոնստանտինովկայի, Գորլովկայի և Լուգանսկի ճանապարհները։

Բախմուտի չդադարող գնդակոծությունների ֆոնին, ըստ տարբեր աղբյուրների, քաղաքի 70 հազար բնակիչների մեծ մասը լքել է իր տունը, քաղաքում չկա ջուր, հոսանք, բազմաթիվ շենքեր ավերված են:

Չուվաշիայում պայթյուն է որոտացել Ուրենգոյ-Պոմարի-Ուժգորոդ մայրուղային գազատարի վրա, հաղորդում են ռուսաստանյան պետական լրատվամիջոցները՝ վկայակոչելով պաշտոնական աղբյուրները: «ՌԻԱ Նովոստի»-ն հայտնում է երեք զոհի և մեկ վիրավորի մասին։

Արտակարգ իրավիճակների նախարարությունից ՏԱՍՍ գործակալությանը հայտնել են, որ Յամբախտինո գյուղի մոտ՝ Չեբոկսարիից մոտ 50 կիլոմետր դեպի հարավ, տեղի է ունեցել արտահոսք, որին էլ հաջորդել է հրդեհ ստորգետնյա գազատարում։ Որոշ աղբյուրների համաձայն՝ հրդեհի տարածքում բարձր ջերմաստիճանի պատճառով բնակիչները չեն կարողանում մոտենալ իրենց տներին։ Նախնական տվյալներով՝ պայթյունը տեղի է ունեցել շինմոնտաժային աշխատանքների ժամանակ։ Թե կոնկրետ ինչով է պայմանավորված միջադեպը, դեռևս հայտնի չէ։

Աշխատանքներն իրականացրել է «Գազպրոմ Տրանսգազ Նիժնի Նովգորոդ» ընկերությունը։ Ուրենգոյ-Պոմարի-Ուժգորոդ գազատարը ռուսաստանյան կապույտ վառելիքը Սիբիրից Եվրոպա է հասցնում Ուկրաինայի տարածքով։ Խողովակաշարը հատում է ռուս-ուկրաինական սահմանը Կուրսկի շրջանի Սուդժա կայարանի մոտ։

2022 թվականին Ռուսաստանը լքել է մոտ 100 հազար ՏՏ մասնագետ, ինչը կազմում է ռուսական ՏՏ ընկերությունների աշխատակիցների ընդհանուր թվի մոտ 10 տոկոսը։ Այս մասին հայտնել է ՌԴ թվային զարգացման, կապի և զանգվածային հաղորդակցությունների նախարար Մաքսուտ Շադաևը՝ ելույթ ունենալով ՌԴ Պետդումայի նիստում։

«Շատերը վերադարձել են, բայց եթե ընդհանուր առմամբ վերցնենք, մոտ 100 հազար ՏՏ մասնագետ գտնվում է երկրից դուրս»,- ասել է ռուսաստանցի պաշտոնյան:

Ռուսաստանյան լրատվամիջոցների փոխանցմամբ՝ իշխող «Եդինայա Ռոսիա»-ն պատրաստվում է Պետդումա ներկայացնել օրինագիծ, որն արգելում է հեռավար աշխատանքը նրանց համար, ովքեր լքել են Ռուսաստանը և կորցրել են իրենց հարկային բնակության իրավունքը։ Արգելքի ենթակա մասնագիտությունների վերջնական ցանկը կորոշի կառավարությունը։ Ռուսաստանը լքած քաղաքացիների մեծ մասը հաստատվել է հարևան երկրներում, այդ թվում՝ Հայաստանում և Վրաստանում։

Պատերազմի ուսումնասիրման ամերիկյան ինստիտուտի տվյալներով, ռուսները վերջին օրերին, մի կողմից, կորցրել են որոշ դիրքեր Բախմուտից հարավ ընկած հատվածում, մյուս կողմից, դիրքեր են գրավել քաղաքի ծայրամասերում։

Պատերազմի տասը ամիսների ընթացքում ուկրաինացիները ռուսական օկուպացիայից ազատագրել են ավելի քան 74 հազար քառակուսի կիլոմետր տարածք։ Սա Ուկրաինայի տարածքի 12,3 տոկոսն է։

Սակայն ռուսները դեռ վերահսկում են մոտ 87 հազար քառակուսի կիլոմետր ուկրաինական հող կամ երկրի տարածքի մոտավորապես 14,4 տոկոսը։ Եվ սա երկու անգամ ավելի է, քան եղել է մինչև փետրվարի 24-ի ներխուժումը։

Ամերիկացի վերլուծաբանների այս տվյալների համաձայն, ուկրաինացիներին այդուամենայնիվ հաջողվել է ազատագրել փետրվարի 24-ից հետո ռուսների վերահսկողության տակ անցած տարածքների մեծ մասը։

Ռուսաստանի նախագահ Վլադիմիր Պուտինը հատուկ ծառայությունների օրվա կապակցությամբ իր խոսքում այսօր թերևս առաջին անգամ խոստովանել է․ իրավիճակը Ուկրաինայի բռնակցված շրջաններում «չափազանց բարդ է». - «Իրավիճակը Դոնեցկի և Լուգանսկի Ժողովրդական Հանրապետություններում, Խերսոնի և Զապորոժիեի մարզերում ծայրահեղ բարդ է».

Ուկրաինայի նախագահն էլ իր երեկվա ուղերձում հայտարարել է, թե Կրեմլը պարզապես չգիտի, թե ինչպես սեփական ընդունել սխալները. - «Ուղղակի մտածեք դրա մասին. Ռուսաստանն արդեն կորցրել է մոտ 99 հազար զինվոր Ուկրաինայում: Ինչի՞ համար։ Մոսկվայում ոչ ոք պատասխան չունի և չի ունենալու»։