Պատերազմ Ուկրաինայում (լայվ բլոգ, թարմացվող)

Ուկրաինայի նախագահ Վլադիմիր Զելենսկու այցը Վաշինգտոն ապահովելու համար կիրառվել են անվտանգության արտակարգ միջոցառումներ։

Անցած երեքշաբթի նա այցելել էր ռազմաճակատային Բախմուտ քաղաք, այնուհետև գիշերային գնացքով գաղտնի ուղևորվել Լեհաստան։ Այնտեղ նա նստել է ԱՄՆ-ի ռազմաօդային ուժերի օդանավ, որին ուղեկցել են ՆԱՏՕ-ի F-15 կործանիչներ ու հետախուզական օդանավ։

Մինչ Բրիտանիայի օդային տարածք մտնելը հետախուզական օդանավը ստուգել է Հյուսիսային ծովը, որի ջրերում պարեկություն են անում ռուսական սուզանավերը։ Բրիտանիայից դեպի ԱՄՆ ճանապարհի որոշ հատվածում Զելենսկու օդանավը ուղեկցել են ամերիկյան կործանիչներ։ Վաշինգտոնում նրա անվտանգությունը ապահովել են գաղտնի ծառայության աշխատակիցները։

Ուկրաինայի նախագահ Վլադիմիր Զելենսկին ծննդյան օրվա առթիվ շնորհավորական ուղերձ է հղել իր ադրբեջանցի գործընկերոջը, հայտնում են ադրբեջանական լրատվամիջոցները:

Իր նամակում Զելենսկին շնորհակալություն է հայտնել Իլհամ Ալիևին «Ուկրաինայի ինքնիշխանությանն ու տարածքային ամբողջականությանն» ուղղված աջակցության համար, ինչպես նաև նշել, որ Ադրբեջանն «օգնել է Ուկրաինայի ժողովրդին» Ռուսաստանի հետ պատերազմի ժամանակ:

Ավելին, Զելենսկին նաև նշել է, որ «Ադրբեջանն ամրապնդել է իր դիրքերը ինչպես հարավկովկասյան տարածաշրջանում, այնպես էլ միջազգային ասպարեզում»:

Միացյալ Նահանգների նախագահ Ջո Բայդենը ստորագրել է 858 միլիարդ դոլար արժողությամբ պաշտպանական բյուջեն 2023-ի ֆինանսական տարվա համար։

Այդ գումարից 800 մլն դոլարը հատկացվել է Ուկրաինային օգնելու համար:

Պաշտոնական Կիևը հաղորդում է, որ Խերսոն քաղաքի կենտրոնական թաղամասերի՝ այսօր առավոտյան տեղի ունեցած հթրիռակոծության հետևանքով առնվազն հինգ մարդ է զոհվել, ևս 20 վիրավորվել են։ Այդ մասին Տելեգրամի իր ալիքում գրել է Ուկրաինայի նախագահի գրասենյակի ղեկավարի տեղակալ Կիրիլ Տիմոշենկոն։

«Ահաբեկիչ պետությունը շարունակում է խաղաղ բնակչության ռմբակոծությունների միջոցով «Ռուսական աշխարհը» տարածել», - իր հերթին գրել է Ուկրաինայի նախագահ Վլադիմիր Զելենսկին՝ մեկնաբանելով Խերսոնի հրթիռակոծությունը։

Ուկրաինայի նախագահի խոսքով՝ քաղաքի այն շրջանում, որտեղ որոտացել են պայթյունները, «ռազմական նշանակության օբյեկտներ չեն եղել»։

Ուկրաինայի նախագահ Վլադիմիր Զելենսկին հորդորել է իր ժողովրդին տոկունություն ցուցաբերել Ռուսաստանի հարձակումներին դիմակայելու ժամանակ:

«Ազատությունը թանկ գին ունի, բայց ստրկությունն ավելի բարձր գին ունի», - Սուրբ ծննդյան գիշերը ելույթում ասել է նախագահ Զելենսկին:

Ուկրաինացիների մեծ մասը ուղղափառ քրիստոնյաներ են և Սուրբ Ծննդյան գիշերը նշում են հունվարի 6-ին: Այնուամենայնիվ, աճում է մարդկանց թիվը, ովքեր տոնում են այդ օրը դեկտեմբերի 24-ին՝ ամբողջ աշխարհի քրիստոնյաների մեծամասնությանը համահունչ:

«Մենք նշելու ենք տոները, ինչպես միշտ: Մենք կժպտանք և ուրախ կլինենք, ինչպես միշտ: Տարբերությունը մեկն է՝ մենք հրաշքի չենք սպասի, չէ՞ որ մենք ինքներս ենք այն ստեղծում», - նշել է նա:

Ռուսաստանի հրթիռային և անօդաչու սարքերի հարձակումները միլիոնավոր ուկրաինացիների են թողել առանց էլեկտրականության, ջեռուցման և հոսող ջրի: Շաբաթ օրը ռուսական ավիահարվածների հետևանքով 10 մարդ է զոհվել, ևս 68-ը վիրավորվել են Ուկրաինայի հարավային Խերսոն քաղաքում, հայտնել են պաշտոնյաները:

Ռուսաստանը կկարողանա ոչնչացնել Patriot հակաօդային պաշտպանության համակարգերը, եթե ԱՄՆ-ն դրանք մատակարարի Ուկրաինային, հայտարարել է ՌԴ նախագահ Վլադիմիր Պուտինը։ Միաժամանակ նախագահը հիշեցրել է, որ Ուկրաինան դեռ նման համակարգեր չունի։

Ավելի վաղ Պուտինը լրագրողներին ասել էր, որ Patriot-ը բավականին հին համակարգ է, և այն չի աշխատում, ինչպես ռուսական S-300-ը։

Դեկտեմբերի 21-ին Ուկրաինայի նախագահ Վլադիմիր Զելենսկին ԱՄՆ առաջնորդ Ջո Բայդենի հրավերով այցելել էր Վաշինգտոն։ Բայդենը Ուկրաինայի նախագահին Սպիտակ տանը ընդունելիս հայտարարել էր գերհզոր և գերժամանակակաից Patriot զենիթահրթիռայի համակարգեր Ուկրաինային տրամադրելու մասին։

Սերբիայի մայրաքաղաք Բելգրադում Ռուսաստանի մի քանի հարյուր քաղաքացիներ շաբաթ օրը բողոքի ցույց են անցկացրել ուկրաինական պատերազմի դեմ։ Ակցիայի կազմակերպիչը Ռուսաստանի դեմոկրատական հասարակությունն է, այն հիմնադրել են ռուսները, ովքեր Սերբիա են մեկնել Ռուսաստանի պատերազմից և մոբիլիզացիայից հետո։

Ակտիվիստները երթով անցել են Բելգրադի կենտրոնական փողոցներով՝ սպիտակ-կապույտ-սպիտակ դրոշների ներքո (շատ ռուսներ, ովքեր չեն աջակցում Ուկրաինայի պատերազմին, առաջարկում են «հանել» կարմիր գույնը Ռուսաստանի դրոշից՝ որպես արյան գույն-խմբ.) և «Խաղաղություն» «Գերեզմաններ չկան» և այլ կարգախոսներով:

Բողոքի ակցիան ավարտվել է առանց միջադեպերի, սակայն ոստիկանությունը թույլ չի տվել ցուցարարներին մոտենալ Բելգրադում ՌԴ դեսպանատան շենքին։

Սերբիան չի ճանաչել Ռուսաստանի կողմից Ղրիմի բռնակցումը և Ուկրաինայի օկուպացված շրջաններում կեղծ հանրաքվեները, բայց միևնույն ժամանակ հրաժարվում է պատժամիջոցներ կիրառել Ռուսաստանի դեմ, ինչը Եվրամիությունը պահանջում է։ Սերբիայի ներկայիս ղեկավարությունը համարվում է Եվրոպայում Պուտինի աջակիցներից մեկը՝ Հունգարիայի վարչապետ Վիկտոր Օրբանի հետ միասին։

Ռուսաստանը կկարողանա ոչնչացնել Patriot հակաօդային պաշտպանության համակարգերը, եթե Միացյալ Նահանգները դրանք մատակարարի Ուկրաինային, հայտարարել է Ռուսաստանի նախագահ Վլադիմիր Պուտինը կիրակի օրը "Россия 1" հեռուստաալիքի եթերում՝ «Մոսկվա. Կրեմլ. Պուտին» ծրագրին տված հարցազրույցում:

«Իհարկե, մենք դրանք հեշտությամբ կոչնչացնենք, 100 տոկոսով», - վստահեցրել է նա լրագրողի հետ զրույցում՝ միաժամանակ հիշեցնելով, որ Ուկրաինան դեռ նման համակարգեր չունի:

Ավելի վաղ Պուտինն ասել էր, թե Patriot-ը բավականին հին համակարգ է և չի աշխատում այնպես, ինչպես, օրինակ, աշխատում է ռուսական C-300-ը (S-300):

«Ամերիկյան Patriot համակարգի ոչնչացումը Ուկրաինայում շատ կարևոր կլինի ռուսական քարոզչության համար, որը ճակատում հաջողության ակնհայտ բացակայություն ունի», - գրում է Forbes-ի սյունակագիր, ռազմական հարցերով փորձագետ Փոլ Իդոնը: Նրա կարծիքով՝ Patriot-ի ոչնչացումն ավելի կարևոր կլինի քաղաքակա՛ն տեսանկյունից, քան՝ ռազմական, քանի որ մեկ համալիրն, ամեն դեպքում, չի կարող լուծել մեծ պետության տարածքի զանգվածային ռմբակոծման հետ կապված խնդիրը:

ՌԴ պաշտպանության նախարարությունը հայտնում է, որ Օդատիեզերական ուժերի հակաօդային պաշտպանության համակարգերը կանխել են ուկրաինական անօդաչու թռչող սարքի հարվածը Սարատովի մարզի Էնգելսի ռազմական օդանավակայանին։ Բեկորների ընկնելու հետևանքով երեք մարդ է զոհվել:

«Անօդաչու թռչող սարքի բեկորների ընկնելու հետևանքով օդակայանում գտնվող տեխնիկական անձնակազմի երեք ռուս զինծառայողներ մահացու վիրավորվել են, ավիացիոն տեխնիկան չի տուժել», - հայտնել են նախարարությունից։

Պետդումայի խոսնակ Վյաչեսլավ Վոլոդինն առաջարկել է բարձրացնել հարկերը Ռուսաստանից հեռացածների համար՝ չեղարկել անձնական եկամտահարկի պահպանումը 13 տոկոս մակարդակի վրա և նրանց համար սահմանել բարձր հարկային դրույքաչափ։ Այս մասին քաղաքական գործիչը գրել է իր Տելեգրամ ալիքում։

Ֆորմալ կերպով Վոլոդինի գրառումը վերաբերում է նրանց, ովքեր շարունակում են աշխատել արտասահմանում ռուսական ընկերությունների համար, սակայն հնարավոր է, որ դա կարող է տարածվել բոլոր այն ռուսաստանցիների վրա, ովքեր հեռացել են. - «Նրանք, ովքեր հեռացել են, ոչ միայն աշխատում են ռուսական ընկերություններում հեռակա կարգով, այլև օգտվում են այն բոլոր արտոնություններից, որոնք համապատասխանաբար նրանց տալիս է մեր երկրի օրենսդրությանը։ Ճիշտ է չեղարկել նախապատվությունները նրանց համար, ովքեր լքել են Ռուսաստանի Դաշնությունը, և նրանց համար սահմանել բարձրացված հարկային դրույքաչափ։ Դա արդար կլինի»:

Վոլոդինի հնչեցրած առաջարկը նախկինում պաշտպանվել է Պետդումայի այլ պատգամավորների կողմից։