Վրաստանի վարչապետ Իրակլի Ղարիբաշվիլին, մեկնաբանելով Կախովկայի ՀԷԿ-ի պայթյունը, հակամարտող կողմերին կոչ է արել ջանքեր գործադրել՝ բանակցություններ սկսելու համար՝ դադարեցնելու Ուկրաինայում պատերազմը։
«Սա այն դաժան, ավերիչ պատերազմի հետևանքներից մեկն է, որը Ռուսաստանը մղում է Ուկրաինայում… Բոլորը ցնցված են Կախովկայի հիդրոէլեկտրակայանում տեղի ունեցած պայթյունից, բայց այսօր Ուկրաինայի տարածքի քսան տոկոսը ավերվել է, քաղաքներ, գյուղեր ավերվել և հողին են հավասարեցվել»,- ասել է Ղարիբաշվիլին։
Անդրադառնալով Վրաստանում տիրող իրավիճակին՝ վարչապետը կրկին պնդել է՝ իշխանության խնդիրն է պահպանել խաղաղությունը երկրում, գրում է «Նովոստի-Գրուզիան»։
«Երբ երկրի 20 տոկոսը օկուպացված է, և կանգնած է ռուսական բանակը, մեր խնդիրն է փրկել երկիրը, պահպանել խաղաղությունը, զարգացնել ու հզորացնել տնտեսությունը»,- ասել է Վրաստանի առաջնորդը՝ ընդդիմությանը մեղադրելով երկիրը Ռուսաստանի հետ հակամարտության մեջ ներքաշելու փորձերի համար:
Պաշտպանության նախարար Սերգեյ Շոյգուն պնդում է, որ Ռուսաստանին հաջողվել է կանխել Ուկրաինայի հակահարձակումը։ Ռուսաստանյան ռազմական գերատեսչության ղեկավարի խոսքերով՝ հարձակումը հետ մղելու ընթացքում զոհվել է 71 զինծառայող։
«Ցավոք կորուստներից զերծ չմնացինք։ Թշնամու հարձակումը հետ մղելու ժամանակ Զորքերի միացյալ խմբում ընդհանուր առմամբ զոհվել է 71 զինծառայող, վիրավորվել՝ 210-ը», - ասել է Շոյգուն:
Ռուսաստանի պաշտպանության նախարարությունը մարտից ի վեր առաջին անգամ է կորուստների թիվ նշում։ Մի շարք երկրների հետախուզական ծառայությունների գնահատականներով Ուկրաինայի պատերազմում Ռուսաստանը տասնյակ հազարավոր զինվորներ է կորցրել։
ՄԱԿ-ի Անվտանգության խորհուրդը երեկ հատուկ նիստ է հրավիրել՝ նվիրված Կախովկա հիդրոէլեկտրակայանի փլուզման և Դնեպրի տակ գտնվող գյուղերի ու քաղաքների հեղեղման հետ կապված։
Նիստը գումարվել է Ուկրաինայի նախաձեռնությամբ, որը պնդում է, թե այն դիտավորյալ պայթեցրել են ռուս զինվորականները, որոնց վերահսկողության տակ է եղել։
ՄԱԿ-ում Ռուսաստանի ներկայացուցիչը ասել է, որ «Կիևի ռեժիմն» է պայթեցրել և դա արել է, մասնավորապես, ուժերը վերախմբավորելու համար։
Ուկրաինայի ներկայացուցիչն արձագանքել է՝ ասելով, որ Ռուսաստանը «թավալվում է սեփական ստերի ցեխի մեջ»։
Ուկրաինայի դիրքորոշումը պաշտպանել է Լատվիայի դեսպանը, ով հանդես է եկել բոլոր երեք բալթյան երկրների անունից։
ՄԱԿ-ում ԱՄՆ ներկայացուցչի տեղակալը Անվտանգության խորհրդի նիստից առաջ լրագրողներին ասել է, որ Միացյալ Նահանգները դեռևս վստահ համոզմունք չունի տեղի ունեցածի կապակցությամբ:
Կախովկայի հիդրոէլեկտրակայանի ավերման հետևանքով տարածքը հեղեղվել է, անհետ կորել է առնվազն յոթ մարդ, հայտարարել է Նովայա Կախովկայի օկուպացիոն վարչակազմի ղեկավար Վլադիմիր Լեոնտևը։
Նրա խոսքով՝ Խերսոնի շրջանի չորս բնակավայրեր գրեթե ամբողջությամբ հեղեղված են։
«Կորսունկա բնակավայրը, բացառությամբ վերջին փողոցի, ամբողջությամբ ջրի տակ է», - հայտարարել է Լեոնտևը։
ՀԷԿ-ի պայթյունի հետևանքով ջուրը մոտ 20 ժամ կշարունակի հոսել դեպի Խերսոնի մարզ։ Այդ ընթացքում ջրի մակարդակը կարող է բարձրանալ ևս մեկ մետրով, հայտարարել է Խերսոնի շրջանային ռազմական վարչակազմի ղեկավար Ալեքսանդր Պրոկուդինը։
«Աջափնյա Խերսոնում, առավոտվա տվյաներով,1852 տուն է հեղեղվել։ Առավոտյան ժամը 6-ի դրությամբ տարհանվել է 1457 մարդ», - Տելեգրամում հրապարակված տեսաուղերձում ասել է նա:
Ուկրաինայի Բախմուտի շրջանում վերջին մարտական գործողությունների ընթացքում ծագումով ադրբեջանցի ուկրաինական բանակի զինվորական է զոհվել։
Սեյմուր Սադիգովը 12 օր առաջ անհետ կորել էր, նրա մարմինը հայտնաբերվել է հունիսի 4-ին, հայտնել են նրա մտերիմները։
Ադրբեջանի Աստարինսկի շրջանից Սադիգովը ապրում էր Խարկովում, նա Ուկրինայի քաղաքացի էր։
Ուկրաինայում ադրբեջանական սփյուռքի տվյալներով՝ ռուս-ուկրաինական պատերազմում ավելի քան 40 ադրբեջանցի է զոհվել։
Ուկրաինայի արտակարգ իրավիճակների պետական ծառայության տվյալներով՝ Կախովկայի հիդրոէլեկտրակայանի ավերման հետևանքով ջրի մակարդակը շարունակում է բարձրանալ, բայց ավելի դանդաղ, քան նախկինում։
Ավելի քան 50 բնակավայր ամբողջությամբ կամ մասնակի հեղեղված է Դնեպրի երկու ափերին։
Ուկրաինայի իշխանությունները հայտնում են, որ աջ ափի բնակավայրերից տարհանվել է մոտ 1900 մարդ, իսկ ըստ Ռուսաստանի արտակարգ ծառայությունների՝ ջրի տակ է անցել ավելի քան 14 հազար տուն, գրեթե 4,3 հազար մարդ տարհանվել է։
Համաշխարհային բանկը հայտարարել է, որ պատրաստ է օգնել Ուկրաինային՝ կատարելով Կախովկայա ՀԷԿ-ի կործանման վնասի արագացված գնահատում, ինչպես նաև գնահատել Ուկրաինայի կարիքները՝ ՀԷԿ-ի վերականգնման համար։
Ուկրաինան հաղորդում է, որ հունիսի 8-ի գիշերը ռուսական զորքերը գնդակոծել են Դոնեցկի շրջանի Ուկրաինսկ քաղաքը, երեք մարդ զոհվել է, այդ թվում՝ մեկ երեխա, հինգը՝ վիրավորվել։
«Հրթիռակոծության հետևանքով զոհվել է երեք մարդ, այդ թվում՝ մեկ երեխա, վիրավորվել է 5 մարդ, այդ թվում՝ չորս երեխա, բոլորը տեղափոխվել են հիվանդանոց, ցուցաբերվում է բուժօգնություն»,- հայտնում է Սելիդովի քաղաքային ռազմական վարչությունը։
Ըստ հաղորդագրության՝ քաղաքում վնասվել է երկու առանձնատուն և 14 բարձրահարկ շենք։
Ուկրաինայի նախագահի գրասենյակի ղեկավար Անդրեյ Երմակն ավելի վաղ հայտնել էր երեք վիրավորի մասին։
Ռուսաստանի Դաշնության անվտանգության խորհրդի քարտուղար Նիկոլայ Պատրուշևը լրագրողիների հետ զրույցում ասել է, որ Ուկրաինայի ղեկավարությունը պատրաստ էր խաղաղություն կնքել, սակայն հրաժարվել է դրանից ԱՄՆ-ի ճնշման ներքո:
Այդ մասին Պատրուշևը խոսել է Մինսկում, որտեղ գումարվել է ՀԱՊԿ երկրների անվտանգության խորհուրդների ղեկավարների ժողովը:
«Եթե չլիներ ԱՄՆ-ի ճնշումը նրանց վրա, ում ամերիկացիները կարգել են Ուկրաինայի ղեկավարներ, այս իրավիճակը չէր լինի: Նույնիսկ Ուկրաինայի ղեկավարներն էին պատրաստ խաղաղության պայմանագիր կնքել և Ռուսաստանին ներկայացրել են գրավոր առաջարկներ, որոնք մենք սկզբունքորեն ընդունել ենք»,- ասել է Պատրուշևը՝ ենթադրաբար նկատի ունենալով ռուս-ուկրաինական քննարկումներն անցյալ տարվա մարտին Թուրքիայում:
Պատրուշևի փոխանցմամբ, ուկրաինացիներն առավոտյան առաջարկներ էին տալիս, իսկ երեկոյան հրաժարվում էին դրանցից:
«Այդպես էր միայն այն պատճառով, որ Միացյալ Նահանգները նրանց {ուկրաինացիների} վրա ճնշում էր գործադրում և պահանջում ոչ մի բանակցություն չանցկացնել»,- ասել է Ռուսաստանի անվտանգության խորհրդի քարտուղարը:
Նիկոլայ Պատրուշևի համոզմամբ, կան այս հակամարտության շարունակմամբ հետաքրքրված երկրներ, «նախևառաջ Միացյալ Նահանգները և Մեծ Բրիտանիան»:
Ուկրաինայի նախագահ Վլադիմիր Զելենսկին ժամանել է Խերսոնի շրջան, որտեղ Կախովկայա ՀԷԿ-ի ամբարտակի ոչնչացման հետևանքով մեծ թվով բնակավայրեր հայտնվել են ջրի տակ:
Զելենսկին մասնակցել է ամբարտակի ոչնչացման հետևանքների վերացման հարցով հանձնաժողովի նիստին, որի օրակարգում բնակչության տարհանման, հեղեղված բնակավայրերում արտակարգ կացությունից բխող գործողությունների կարգավորման, բնապահպանական և ռազմական իրավիճակի հարցերն են:
Կախովկա հիդրոէլեկտրակայանի ամբարտակը պայթեցվել է հունիսի 5-ի լույս 6-ի գիշերը: Այդ գրավված շրջանում Մոսկվայի կողմից Նովայա Կախովկա ավանի ղեկավար նշանակված Վլադիմիր Լեոնտևը հայտնել է 5 զոհվածների և 41 տուժածների մասին:
Ուկրաինան, Եվրամիությունը և Մեծ Բրիտանիան ամբարտակի ոչնչացման համար մեղադրել են Ռուսաստանի իշխանություններին, նշելով, որ դրա նպատակն է կանխել ուկրաինական բանակի հակագրոհը:
Մոսկվան հերքում է մեղադրանքը և պնդում է, որ ամբարտակը ոչնչացվել է Ուկրաինայի կազմակերպած ռազմական դիվերսիայի հետևանքով:
Թե ով է պայթեցրել ՀԷԿ-ը, հստակ տվյալներ դեռ չկան։ Արևմտյան մամուլը գրել է, թե ամերիկյան հետախուզությունը ունի տվյալներ, որ դա արել են ռուսները՝ ուկրաինական հակահարձակումը կանգնեցնելու նպատակով, սակայն ապացույցներ դեռ չեն հրապարակվել։ Պաշտոնական Վաշինգտոնը միևնույն ժամանակ ասում է, որ եթե Ռուսաստանը լայնամասշտաբ ռազմական ներխուժում չսկսեր, ապա ողբերգությունը տեղի չէր ունենա։
«Այս ամբարտակը ռուսների հսկողության տակ էր, և նրանք են պատասխանատու պատերազմի հետևանքով առաջացած ավերածությունների համար», - ասել է Սպիտակ տան մամուլի խոսնակը։
Աղետը, որի ծավալները դեռ վերջնականապես չեն հաշվարկել, չի կանգնեցրել ո'չ ռուսական ռմբակոծությունները, ո'չ էլ ուկրաինական հակահարձակումը։ Առնվազն մեկ կին մահացել է, ևս երկու մարդ վիրավորվել է այսօր Խերսոնի հրետակոծության հետևանքով, հայտնում է Ուկրաինայի ՆԳՆ-ն՝ ընդգծելով, թե գնդակոծությունը սկսվել է քաղաքացիների տարհանման ժամանակ։
Ընդ որում, ուկրաինական հաղորդագրությունների համաձայն, ռուսական զորքերը ամբողջությամբ թողել են ջրհեղեղից տուժած շրջանները և այնտեղ մնացած մարդկանց տարհանում են ուկրաինացի փրկարարները։